Budyšin. W poslednje dny stareho lěta připósłanej wotpadkowej protyce Budyskeho wokrjesa su so zmylki zadobyli. Kaž krajnoradny zarjad zdźěli, potrjechi to nimo Biskopic tež gmejny Halštrowska Hola, Bukecy, Rakecy a Wóspork. Tak změnja so na přikład za Halštrowsku Holu terminy wotwožowanja čorneho wotpadkoweho sudobja, w Bukecach žołteho sudobja a w Rakecach módreho sudobja za staru papjeru. Aktualizowanu protyku w potrjechenych komunach žanu njedóstanu. Změny zdźěla přez hamtsku nowinu wokrjesa. Terminy we wotpadkowej app su prawe.
Pytaja wobrazy za kalender
Wojerecy. „Moje najlubše městno we łužiskej jězorinje“ rěka hesło fotoweho wubědźowanja tamnišeho Leaderoweho regiona, kotrež su tele dny zahjili. Wubědźowanje traje hač do awgusta. Zaměr je, zestajeć wobrazowu protyku wo łužiskej jězorinje za přichodne lěto. 13 najrjeńšich wobrazow mytuja. Zajimcy njech sćelu swój foto na adresu .
Wulka Chójnica. Ćežke lěsne njezbožo je so minjenu sobotu we Wulkej Chójnicy (Großkunitz) w Kubšiskej gmejnje stało. Při štomypušćenju bu tam 56lětny muž wot štoma zatłusnjeny. Wohnjowi wobornicy a wuchowanscy pomocnicy jeho wuswobodźichu. Z helikopterom dowjezechu jeho do chorownje, hdźež pozdźišo zemrě. Dalšu zranjenu wosobu móžachu na městnje lěkarsce zastarać.
Biblioteka zawrjena
Wojerecy. Aktualneho strowotniskeho połoženja dla wostanje Wojerowska biblioteka Brigitty Reimann po wšěm zdaću hač do 16. januara zawrjena. Swojich wužiwarjow skedźbnjeja na to, zo so tuchwilne wupožčenje medijow tak dołho podlěši, doniž biblioteka zaso njewočini. Přidatne wudawki z toho žane njenastanu. Štóž chce knihi a dalše medije wróćić, móže je do přihotowanych boksow połožić, kotrež su wot póndźele do pjatka stajnje wot 8 do 15 hodź. přistupne.
Městno za nowe domy
Kamjenc. Prěnje dźěćo lěta 2021 w Kamjenskej chorowni maltezow swjateho Jana bě Kurt. Wón narodźi so 1. januara w 23.05 hodź. a je třeće dźěćo swójby. Ze swojim wulkim bratrom móže wón přichodnje zhromadnje narodniny swjećić. Tež wón bě so Nowe lěto narodźił. Dohromady je loni w Kamjenskej chorowni 459 dźěći na swět přišło, mjez 237 hólcami a 222 holcami dwójce dwójnikaj. Najwoblubowanišej mjenje běštej Theo a Hannah.
Praskotak strašny był
Halštrow. Njeznateho praskotaka dla su w prěnich hodźinach noweho lěta w Halštrowje wosebitu jednotku krajneho kriminalneho zarjada (LKA) wołali. Po informacijach policije jednaše so wo wohnjostrojnu bombu typa F4 z wuchodneje Europy. Tale družina rozbuchadłow smě so jeno z wotpowědnej dowolnosću zapalić. Dokelž praskotak rozbuchnył njebě, dyrbjachu městno namakanki zaraćić, prjedy hač ju LKA wotwjeze.
Zetkaja so online
Wojerecy. Lědma zo su hody nimo, su wčera na Wojerowskim Łužiskim naměsće tam stejacy hodowny štom podrězali. Sobudźěłaćerjo Wojerowskeho komunalneho twarskeho zawoda a kameradojo powołanskeje wohnjoweje wobory přijědźechu z wjacorymi jězdźidłami a šmrěk zrumowachu. Štom na staroměšćanskim torhošću porno tomu wostanje hač do 6. januara stejo.
Jeničke zarjadowanje přewjedli
Pančicy-Kukow. Zelowa njedźela w awgusće bě jeničke zarjadowanje, kotrež móžachu lětsa w zežiwjenskim a zelowym centrumje w Pančicach-Kukowje přewjesć. Za to mějachu w běhu lěta wjace wopytowarjow hač w zašłosći.
Wuježk. Krajny zarjad za rěčne zawěry je spušćadło při Wuježčanskim młynje pola Wósporka wottwarić dał. Z tym Lubata (Löbauer Wasser) w tymle wotrězku zaso po normalnej skłoninje ćeče a móže so tak přirodnje wuwić. Twarske dźěła su so loni zahajili a płaćachu 350 000 eurow, kotrež zapłaćištej Zwjazk a Sakska.
Poskićeja znowa pomoc
Budyšin. Za čas lockdowna Budyske wosady kaž tež dobroćelskej zwjazkaj Caritas a diakonija potrěbnym pomoc poskićeja. Štóž staroby abo strowotnych přičin dla bydlenje wopušćić njemóže, dóstanje wot pomocnikow podpěru při nakupowanju, wobstaranju lěkow a dalšich wažnych naležnosćach. Docpějomni su pomocnicy wot póndźele do štwórtka stajnje wot 13 do 15 hodź. pod telefonowym čisłom 0 35 91 / 5 97 95 37, zwonka toho časa přez wotmołwjak.
Drježdźany (BD/SN). Korony dla njemóžachu Drježdźanscy Serbja swoje decemberske zetkanje wot wobliča k wobliču přewjesć. Tuž so předwčerawšim digitalnje zhromadźichu, kóždy doma za kompjuterom abo smartfonom. Dźesać stajnych wobdźělnikow a dwaj hosćej z Choćebuza su so na bjesadźe towarstwa Stup dale wobdźělili, rozjimujo swoje naležnosće w maćernej hornjo- a delnjoserbšćinje. Přezjedni sej běchu, zo dyrbjeli serbske institucije, medije a towarstwa hladajo na infekciske połoženje wjace digitalnych poskitkow wuwiwać a je wšitkim Serbam, wosebje dźěćom a młodostnym, z hudźbu a filmom runje tak kaž z literaturu a dźiwadłom poskićić. Drježdźanska bjesada w maćernej rěči chce dale po nowym digitalnym puću kročić. Přichodnu 11. januara tuž znowa online přewjedu.
Zarjadnišća dale začinjene