Budyšin. „Z Lipicy do hole“ rěka kniha Michała Andersa a Pětra Lipiča ze Swinjarnje. Štwórtk, 14. nowembra, ju w 19.30 hodź. w Budyskej Smolerjec kniharni předstaja. Pětr Lipič je wupytał historiske wobrazy a pohladnicy, Michał Anders přida k tomu přinoški z nowin a časopisow. Nowostka skići čiły zaćišć wo ludowej architekturje, wo wšědnym dźěle na polu, wo wurjadnych swjedźenjach a zahubnych podawkach.
Čehodla ludźo morja
Kamjenc. Na zhromadne awtorske čitanje pod hesłom „Mordarki & mordarjo“ přeprošatej Kamjenska měšćanska biblioteka a měšćanska dźěłarnja Wobydlerska łuka pjatk, 15. nowembra, w 19 hodź. do rumnosćow měšćanskeje dźěłarnje na Hasy Rosy Luxemburg. Tam wěnje so bywši zakitowar za chłostanske delikty Veikko Bartel z Podstupima mjez druhim prašenjam, kaž „Čehodla ludźo morja?“, a čita k tomu ze swojeje knihi, w kotrejž rozprawja wo zetkanjach ze swojimi klientami. Zastupne lisćiki dóstanjeće za 14 eurow w měšćanskej bibliotece.
Njebjelčicy. Towarški a towaršojo, přećeljo kaž tež zajimowani wobydlerjo su jutře we 18 hodź. na zetkanje serbskopolitiskich kružkow a akterow CDU, SPD a Zwjazka 90/Zelenych w Njebjelčanskim gmejnskim zarjedźe přeprošeni. W rozmołwach a diskusijach a zhladowanju na politiku w Sakskej steji přichod serbskeho ludu w srjedźišću.
Elementarij wopyta hódny
Kamjenc. Kamjenski Muzej zapadneje Łužicy je mnohim, kotřiž su z přirodu a přirodoškitom kaž tež z archeologiju wusko zwjazani, dobra adresa. Tak su zajimcy jutře w 17 hodź. do domu witani, zo bychu swoje namakane kamjenje a fosilije posudźować dali. Jens Czoßek, muzejowy geologa, móže jim pomhać, chcedźa-li wědźeć, kotry kamjeń n. př. su sej z dowola při morju sobu přiwjezli.
Spominanje we wopomnišću
Budyšin. „Ohne Ruhe rollt das Meer“ rěka čitanje a koncert z Gerhardom Bausu a Stephanom Krawczykom srjedu składnostnje wotewrjenja stasijastwa Budyšin II před 30 lětami. Započatk je w 19 hodź., zastup darmotny.
Wo starych časach „sonić“
Chrósćicy. Starši a dalši zajimcy su dźensa w 19.30 hodź. k 4. fachowemu dnjej 2plus, kiž je jutře w Chróšćanskej „Jednoće“, na wječor „Zwěsćenje rěčneho stawa w serbšćinje“ přeprošeni. Rěčny staw ma so přichodnje we 8. lětniku přepruwować. Tež starši młódšich šulerjow móža so rady na přednošku wobdźělić.
Razantny folk w muzeju
Budyšin. Po dwěmaj lětomaj wustupi Edinburghska folkskupina North Sea Gas zaso w Budyšinje. Njedźelu ludźi trijo wot 19 hodź. w Budyskim Serbskim muzeju. Dožiwić móža zajimcy program „Voice of Scotland“. Dave Gilfillan, Ronnie MacDonald a Grant Simpson prezentuja na gitarje, banju, lutni a dalšich instrumentach jónkrótne aranžementy kaž tež nowu CD „Hearth & Homeland“.
Budyšin. Dźěłarnička Serbskeho ewangelskeho towarstwa (SET) nastupajo kubłanje lektorow sobotu, 9. nowembra, na Budyskej Michałskej farje wupadnje. To zdźěli našej redakciji předsyda SET Mato Krygaŕ. Jako přičinu mjenuje wón snadne wobdźělenje. Zdobom skedźbnja na to, zo započnje so sobotne schadźowanje towarstwa hakle w 13 hodź. na Michałskej farje z dźěłarničku „Přichod serbskeho wosadneho žiwjenja“. Ze zhromadnym kofejom a mjezsobnej wuměnu popołdnjo něhdźe napoł štyrjoch zakónča.
Impresije z Južneje Afriki
Łaz. Na swětłowobrazowy přednošk přeproša spěchowanske towarstwo Zetkanišćo Dom Zejlerja a Smolerja we Łazu pjatk, 8. nowembra, do swojich rumnosćow. Łazowčan Wilfrid Sauer rozprawja wo swojich dožiwjenjach na pućowanju po juhu Afriki, mjez druhim w Namibiji a Botswanje. Započatk je we 18 hodź. Towarstwo prosy wo přinošk třoch eurow na wosobu za wudawki.
Ketlicy. Za předstajenje „Serbskeho rekwiema“ Korle Awgusta Kocora njedźelu, 10. nowembra, w 16 hodź. w Ketlicach móža sej zajimcy zastupne lisćiki kupić. Dóstanu je na Keltličanskej kaž tež na Lubijskej ewangelskej farje, w Lubijskej měšćanskej informaciji a w tamnišim fachowym wobchodźe Kessner.
Seminar wo złu w bibliji
Smochćicy. Smochčanski Dom biskopa Bena přeproša na seminar pod hesłom „Biblija a ... zło“. Tón wotměje so wot pjatka do njedźele, 8. do 10. nowembra. Hłownje póńdźe pod nawodom referenta Ansgara Hoffmanna wo to, što Swjate pismo wo djabole, Luciferu a satanje podawa a zwotkel Boži přećiwnicy pochadźeja. Předznajomosće za seminar njejsu trěbne.
Kartki za schadźowanku
Budyšin. Wot dźensnišeho su zastupne lisćiki za lětušu schadźowanku na předań. Kupić móžeće sej je jeničce při kasy Němsko-Serbskeho ludoweho dźiwadła w Budyšinje. Jenož tam přiwozmu tež skazanki za blida za zabawu po programje. Schadźowanka budźe 23. nowembra znowa w NSLDź, lětsa pak tam telko městnow za blidami kaž loni njezměja. K rejam budźe nowa projektowa kapała piskać.
Stróža. Serbski spisowaćel a publicist Benedikt Dyrlich předstaji zajutřišim, srjedu, 6. nowembra, w 19 hodź. w Stróžanskim (Wartha) Domje tysac hatow prěni dźěl swojeje němskorěčneje knihi „Doma we wućekach“. W njej wopisuje swój njelochki žiwjenski puć a swoje skutkowanje w NDR. Po tym maja wšitcy składnosć z awtorom so rozmołwjeć.
Dalši žarowanski kruh
Chrósćicy. Žarowanskaj přewodźerjej Regina Krawcowa ze Smječkec a Tomaš Pěčka ze Sernjan poskićataj zhromadnje z dr. Ludmilu Lajderowej z Drježdźan po lońšim zazběhu dalši serbski žarowanski kruh. Prěnje zetkanje budźe štwórtk, 7. nowembra, w 17 hodź. w Chróšćanskej putniskej hospodźe. Dalši termin je tři njedźele pozdźišo. Předwidźane je, zo so žarowanski kruh hač do spočatka apryla wosom króć zetka. Zajimcy měli so pod telefonowym čisłom 01 74 / 7 01 94 87 přizjewić.
Budyšin. Jutře přewjedu w Budyšinje wot 16 do 22 hodź. nakukowansku nóc „Romantica“. Pod hesłom „błyšć w bajkowym lěsu“ wočakuja w měsće tysacy wopytowarjow, kotrychž z hudźbu kaž tež z plincami a kofejom zastaraja. Tež serbske institucije su wobdźělene. Budyski Serbski muzej poskići we 18 a 18.30 hodź. wodźeni po wustajeńcy „Sorbian Street Style“, w Serbskej kulturnej informaciji wotewru we 18 hodź. wustajeńcu Andreje Tiebel-Quastoweje a w 16.30 hodź. je w Serbskim domje nazymski koncert z chórom Łužyca
Rowniske glosy w młynje
Čorny Chołmc. Na koncert přeprošeni su zajimcy njedźelu, 3. nowembra, w 15.30 hodź. do Čornochołmčanskeho Krabatoweho młyna. Po kofejpiću (wot 14.30 hodź.) wuhotuja spěwace žony Rowniske glosy program.
Akademija so zaso wotměje
Budyšin. Póndźelu, 4. nowembra, we 18 hodź. zahaja na Budyskej studijnej akademiji 15. přednoškowy rjad „Budyska akademija“. Jako prěni přednošuje bywši triatlet Maik Petzold.
Wojerecy. Na wotewrjenje wustajeńcy pod hesłom „Kunstraum XIV Maja Nagel ungelöst“ z twórbami serbskeje tworjaceje wuměłče Maje Nageloweje su zajimcy pjatk, 1. nowembra, w 19 hodź. do Wojerowskeje Kulturneje fabriki přeprošeni. Wernisaži přizamknje so koncert. Projekt „wuměłstwowy rum XIV“ spěchuje Załožba za serbski lud.
Předawaja kartki za koncert
Malešecy. Župa „Jan Arnošt Smoler“ Budyšin a Załožba za serbski lud přeprošatej na nazymski koncert do Malešanskeho hosćenca „Wódny muž“, kotryž budźe sobotu, 2. nowembra. Program wuhotuja Serbski folklorny ansambl Wudwor kaž tež skupinje Přezpólni a Brankatschki. Zastupne lisćiki dóstanjeće w předpředani za wosom eurow w Budyskej Serbskej kulturnej informaciji, pola Hendrichec w Barće a w Malešanskim wobchodźe Bärbel’s Einkaufseck.
Wo bibliotekach a zběrkach
Drježdźany. Towarstwo Stup dale přeprosy štwórtk, 31. oktobra, na nazymske pućowanje po sakskej stolicy Drježdźanach. Start je w 11.15 hodź. při zadnim wuchodźe Nowoměšćanskeho dwórnišća.
Předstaja gmejnski centrum
Chrósćicy. Gmejna Chrósćicy přeprosy jutře, srjedu, na dźeń wotewrjenych duri w tamnišim gmejnskim a kulturnym centrumje. W 15 hodź. budźe dom poswjećeny. Po tym předstaja Chróšćanske šulske dźěći kulturny program, a zajimcy móža sej rumnosće noweho centruma wobhladać.
Nominowanje a wustawki
Chrósćicy. Wurjadne posedźenje wotměje jutře, 30. oktobra, we 18 hodź. Zwjazkowe předsydstwo Domowiny w Chróšćanskej „Jednoće“. Čłonojo gremija chcedźa mjez druhim štyrjoch kandidatow za nowu radu za serbske naležnosće Sakskeje nominować a wustawki rozjimać.