Swójske kmanosće wuslědźić

wutora, 27. februara 2024 spisane wot:

W bywšim Wojerowskim ličenskim centrumje móža šulerjo wupruwować, kotre powołanje by jich zajimam najbóle wotpowědowało. Za to maja moderne fachowe kabinety z realnymi wuměnjenjemi.

Wojerecy (SiR/SN). Wot minjeneje nazymy je na delnim poschodźe bywšeho Wojerowskeho ličenskeho centruma na Lipowym puću 43 kubłanski skutk dźěłaćerskeho dobroćelstwa AWO zaměstnjeny. Towaršnosć za hladanje a zastaranje je jedyn z najwjetšich dźěłodawarjow regiona a nošer wšelakich zarjadnišćow, w kotrychž ludźi hladaja, wukubłuja a přewodźeja. Z kubłanskim skutkom chcedźa swojim partneram při wupytanju powołanja profesionelnje pomhać a dorost za swójske předewzaće dobywać.

Druhdy zwěsćiš, zo něšto rjaneho w bjezposrědnej bliskosći hišće ženje widźał njejsy. Tak drje začuwaše sobotu swójba z Drježdźan, kotraž je w Smochćicach tamniši park wopytała. Nan drje pochadźa z Njeswačidła, w Smochćicach pak hišće ženje ­njebě. Ćim bóle so dźiwaše, kak rjenje móžeš so tam wuchodźować a wočerstwjeć. Foto: Feliks Haza

Silicon Saxony za Fabmobil

wutora, 27. februara 2024 spisane wot:
Drježdźany (SN/MiR). Silicon Saxony – syć resp. branšowy zwjazk sakskeje mikroelektroniskeje, połwodnikoweje, fotowoltaikoweje a softwaroweje branše, podpěruje mobilny wuměłski a digitalny labor Fabmobil. Wo tym informuje w swojim aktualnym a zdobom prěnim lětušim newsletteru. Do kruha branšoweho zwjazka słušeja předewzaća Bosch, Global Foundries, Infineon a X-FAB. „Zhromadnje z nowymi partnerami dźemy lětsa na ‚połwodnikowu turu‘ a ponjesemy spe­cifisku wědu nastupajo mechatroniku, programěrowanje kaž tež kołowokoło produkcije chipow do sakskich šulow“, zdźěli jednaćel Fabmobila Bosćij Pjaca. Zazběh akcije bě zetkanje z kultusowym ministrom Christianom Piwarzom w januaru na powołanskich wikach „Start ­karjery“ w Drježdźanach. Tuchwilu wuhotuja sobudźěłaćerjo Fabmobila bus z nowymi technologijemi, z kotrymiž móža bórze dźěłarnički na dale a lěpšim niwowje poskićeć. K tomu słuša nakup wjetšeje ličby nawočow za wirtualnu realitu, mechatroniki kaž tež hardware za pro­graměrowanje a přihotowanje dalšich ­nastrojow za lejtowanje.

Kulinariski„Dźeń archiwow“

wutora, 27. februara 2024 spisane wot:
Fulda/Budyšin/Kamjenc (SN/bn). Zwjazk němskich archiwarkow a archiwarow wuhotuje w dwulětnym turnusu „Dźeń archiwow“. Pod hesłom „Jěsć a pić“ wobdźěla so lětsa wospjet tež Budyski zwjazk archiwow, Budyski wokrjesny archiw w Kamjencu kaž tež Serbski kulturny archiw (SKA) a Serbska centralna biblioteka (SCB). Sobotu, 2. měrca, poskića w tym zwisku w Kamjencu wosebite wodźenja po wustajeńcy „Dorfgasthöfe – zwischen Erbgericht und Kegelbahn“. Měšćanski archiw a Statny filialny archiw w Budyšinje přeprošatej dźeń pozdźišo na wodźenja po swojimaj institucijomaj a wabitej přidatnje z wubědźowanjom „Hdźe so w Budyšinje před sto lětami załožeše?“. Wobmjezowanje wopytowarskeje kapacity dla měli so zajimcy z mailku na přizjewić. SKA a SCB wěnujetej so tohorunja njedźelu pod nadpismom „Archiw jako kulturny pomjatk“ z „historiskimi dokumentami ­a zwukowymi nahrawanjemi“ regionalnej kulinarice. Wopytowarjam kiwaja nimo wodźenjow „błótowske plincy a kofej“. Wšitke zarjadowanja we wobłuku „Dnja archiwow“ su zdarma přistupne.

Krótkopowěsće (27.02.24)

wutora, 27. februara 2024 spisane wot:

Wólbne kopolaki – namołwa

Budyšin. Hač do 1. měrca hišće móža wšitcy zajimowani Serbja hač do třoch prašenjow nastupajo lětuše krajne wólby w Sakskej a Braniborskej Domowinje pod: zapodać. Jako zastupjerka zajimow Serbow Domowina prašenja we wobłuku akcije „Wólbne kopolaki“ hromadźi a politiskim stronam dale sposrědkuje.

Habeck dźensa w Choćebuzu

Choćebuz. Energijowa změna we Łužicy je dźensa ćežišćo konferency w Choćebuzu, na kotrymž so mjez druhim zwjazkowy hospodarski minister Robert Habeck (Zeleni) wobdźěli. Přitomny budźe nimo toho sakski ministerski prezident Michael Kretschmer (CDU). Předewšěm póńdźe wo to, kak móhła Łužica dołhodobnje energijowy region wostać.

Chcedźa wusud wozjewić

Policija (26.02.24)

póndźela, 26. februara 2024 spisane wot:

Z nowymi črijemi ćeknył

Budyšin. Stare črije na nowe zaměnił je muž sobotu w nakupowanišću na Budyskej Delnjokinjanskej dróze. Jako chcyše kupnicu bjez płaćenja wopušćić, jeho sobudźěłaćer narěča. Na to muž strowotne problemy wudawaše, so wutorhny a ćekny. Nowe črije běchu něhdźe 45 eurow hódne. Hač při pytanju za skućićelom stare črije něšto pomhaja, njeje znate.

Přihotuja so na jubileje

póndźela, 26. februara 2024 spisane wot:

Na Njepilic statoku wěnuja so dale rěči, nałožkam a drasće

Rowno (AK/SN). Spěchowanske towarstwo Rownjanskeho Njepilic statoka chce slepjanšćinu dale hajić a nałožować. Tole wuzběhny předsyda Manfred Nikel pjatk na hłownej zhromadźiznje, kotruž mjenuja „hoklapnicu“. 15 čłonow wobdźěli so kóždy druhi tydźeń na kursu serbšćiny pod nawodom Juliany Kaulfürstoweje. „Něchtóžkuli z nas hižo dosć derje serbsce rěči. Nětko chcemy tež slepjanšćinu pisać nawuknyć“, praji Manfred Nikel. Dalši nadawk je nałožki w běhu lěta pěstować. Z tym wotpowěduje w lěće 1999 załožene towarstwo swojej zasadźe „Kak to jo było“.

Seniorojo škotuja

póndźela, 26. februara 2024 spisane wot:

Pančicy-Kukow. Přichodny škotowy turněr serbskich seniorow wotměje so jutře, wutoru, w Karstenowej piwowej stwičce w Pančicach-Kukowje. Započatk budźe w 14 hodź. Nowačkojo su kaž kóždy raz rady witani, zdźěli hłowny organizator Měrćin Nowak. Dalši škotowy turněr wotměje so 26. měrca w Radworskim hosćencu Meja.

Radźićeljo wuradźuja

Chrósćicy. Přichodne posedźenje Chróšćanskeje gmejnskeje rady wotměje so jutře, wutoru, w 19 hodź. w Chróšćanskim gmejnskim a kulturnym centrumje. W zjawnym dźělu zaběraja so radźićeljo z dwěmaj priwatnymaj twarskimaj předewzaćomaj. Přizamknje so njezjawny dźěl. Wobydlerjo su wutrobnje přeprošeni.

Hraja we Łužiskim seminarje

Praha. Po tym zo je Chróšćanska lajska dźiwadłowa skupina swoju komediju „ALOJS mobilizuje“ dźewjeć razow na serbskich wjeskach zahrała, čaka na hrajerki a hrajerjow nětko nowosć. Sobotu, 2. měrca, we 18 hodź. předstaja woni swoju inscenaciju w Praskim Łužiskim seminarje. Zajimcy z čěskeje stolicy a z Łužicy su wutrobnje witani.

Přehladka hišće přistupna

Pytaja zaso wotewrjene zahrody

póndźela, 26. februara 2024 spisane wot:

Njedźelu, 16. junija, ma so runja druhim městnam we Wojerecach a wokolinje 2. dźeń wotewrjeneje zahrody wotměć. Za to pytaja nětko sobuwojowarjow, kotřiž bychu swoje zelene oazy druhim zajimcam spřistupnili a wopytowarjow witali.

Wojerecy (SiR/SN). Před njecyłymaj lě­tomaj je hłowna iniciatorka Roswitha Petschick z Małeje Nydeje z podpěraćelemi a partnerami organizaciju do ruki wzała a ze swojej priwatnej iniciatiwu prěni dźeń wotewrjeneje zahrody w starym Wojerowskim wokrjesu přihotować započała. Akcija bě tehdy wulki wuspěch. Hladajo na najwšelakoriše dobre wothłosy sej projekt wospjetowanje runjewon žadaše.

Na mnohich wsach móžeš nětko wobkedźbować, zo so křižerjo poněčim na jutry přihotuja. Štóž ma swójske konje sej z nimi při rjanym wjedrje wujěcha. Skupinu jěcharjow z Haslowa a Radworja zetkachmy sobotu při rjanym wjedrje při pomniku Cyrila a Metoda pola Smochćic. Foto: Feliks Haza

Serbska debata

nowostki LND