Pytaja hudźbnikow za bigband

štwórtk, 10. oktobera 2019 spisane wot:

Budyšin. Kamjentny dom w Budyšinje přewjedźe w adwenće zaso projekt „Swingin’ Santa“ a pyta hudźbnikow a spěwarjow za hodownu bigband. Wšitcy, kotřiž su dźesać do 18 lět stari a rady spěwaja a hudźa, su namołwjeni so wobdźělić. Proby za koncert budu w nazymskich prózdninach wot 14. do 20. oktobra w Kamjentnym domje. Wo přenocowanje w Budyšinje je tež postarane. Nastać ma něhdźe 90mjeńšinski koncert z němskimi, serbskimi, pólskimi a jendźelskimi spěwami. Prěni kónc tydźenja w decembrje chcedźa program trójce předstajić. Přizjewjenja su móžne w Kamjentnym domje pod telefonowym čisłom 03591/ 531 99 72 abo pod

Přepodadźa kolesowanski puć

Štó a što tči za serbskimi projektami, kotrež buchu we wobłuku wubědźo­wanja Sakskeho fondsa „Čiń sobu!“ myto­wane? W serialu Serbskich Nowin tajke předstajamy.

Přihoty wólbow zahajene

srjeda, 09. oktobera 2019 spisane wot:

Radwor (SN/MkWj). W Radworskej gmejnje su wot wčerawšeho přihoty wólbow noweho wjesnjanosty oficialnje zahajene. Gmejnscy radźićeljo su na swojim posedźenju gmejnski wólbny wuběrk wuzwolili. Ze šěsć wosobow wobstejacy gremij nawjeduje Radworčan Bosćij Handrik. Zajimcy za zastojnstwo móža so wotnětka přizjewić. Wólby wjesnjanosty wotměja so 9. februara 2020, ewentualne druhe koło 23. februara. Dotalny wjesnjanosta Wincenc Baberška po 27 lětach w zastojnstwje hižo njenastupi.

Dwaj kandidataj staj so dotal za wólby přizjewiłoj: juristka Katrin Suchec-Dźisławkowa, kotruž bě gmejnska skupina CDU minjeny tydźeń nominowała, a předawar rybow Jovan Hrjehor, kiž nastupi jako njewotwisny kandidat. Powšitkownje z toho wuchadźeja, zo so hišće dalši kandidaća přizjewja. K wólbam nastupić móže faktisce kóždy wobydler. Štóž ni­ma podpěru jedneje z politiskich stron, dyrbi 40 podpěraćelskich podpismow předpołožić.

Gmejnscy radźićeljo w tym zwisku wobzamknychu, pjenježne wotrunanje za wólbnych pomocnikow zwyšić.

Čim wjace, ćim lěpje

srjeda, 09. oktobera 2019 spisane wot:
Ludowe nakładnistwo Domowina je hižo někotre wobrazowe słowniki w serbskej rěči wudało. Dotal nastachu tajke dźěćace knihi na němsko- abo tež čěskorěčnym zakładźe, kaž na přikład „Wuzwol sej swoje powołanje“ z lěta 2016. Wone su po­dobne němskim tak mjenowanym „wimmelknižkam“. Zo njeje nakładnistwo dotal žanu tajku swójsku serbsku wudało, ma ze specifiku knižneje družiny činić: Jara podrobne ilustracije su z wosebitymi kóštami zwjazane. A LND nima z wobmjezowanym etatom jeno serbsku literaturu za dźěći zaručić, ale wšitke serbskorěčne publikacije. Witam tuž iniciatiwu, wosebitu serbsku „wimmelknižku“ wudać a tak poskitk za łužiske dźěći rozšěrić. Iniciatiwnicy maja wězo ze samsnym problemom wobchadźeć, mjenujcy z kóštowym faktorom. Přeju jim dobreho partnera zwonka serbskich institucijow. Čim wjace zwjazkarjow mamy, ćim lěpje za serbsku kulturnu produkciju. Cordula Ratajczakowa

Za lubowarjow keramiskich wudźěłkow bě minjeny kónc tydźenja Wjazońca dobra adresa. Tam wuhotowachu wulke hornčerske wiki, hdźež su tež čěscy a pólscy hornčerjo swoje produkty poskićeli. Atrakcija bě wosebity napřemoběh z keramiskimi wudźěłkami­, kotryž tohorunja někotři serbscy wopytowarjo sobu dožiwichu. Foto: Steffen Unger

Wuběrk steji na hračkach

srjeda, 09. oktobera 2019 spisane wot:

Njeswačanscy radźićeljo wo hłownych wustawkach diskutowali

Njeswačidło (JK/SN). Nastupajo kalkulaciju wopłóčkowych popłatkow su so čłonojo Njeswačanskeje gmejnskeje rady wčera dojednali, je po namjeće fachowcow klětu zwyšić. Tak zwyša zakładny popłatk na dźesać eurow wob měsac a domjacnosć, a na kubikny meter wopłóčkow dyrbja přizamknjene ležownosće 2,82 eurow płaćić. Na prašenje radźićela Norberta Brauna, hač widźi přitomny fachowc w systemje wobhospodarjenja komunalnych wopłóčkow někajke móžnosće lutować, skedźbni tón na nimale hižo optimalny system w Njeswačidle. Personalne kóšty lědma maja, tež techniske wuhotowanje žadanjam wotpowěduje. Eficienca hodźi so jeničce z wyšimi popłatkami zawěsćić. Mały tróšt je, zo bychu popłatk hižo dawno zwyšić dyrbjeli, dokelž njeje poslednja kalkulacija z lěta 2013 hižo aktualna.

Poradźowanje budźe dale trěbne

srjeda, 09. oktobera 2019 spisane wot:

Budyšin (CS/SN). Wjelelětne „wobličo“ Budyskeje centrale přetrjebowarjow Dirk Mittrach njemóžeše so wčera chorosće dla na swjedźenju k 25lětnemu wobstaću centrale wobdźělić. Tak staj Andrea Heyer a Robert Hoyer ze sakskeje centrale přetrjebarjow zbožopřeća zastupjerjow města, wokrjesa a Sakskeho krajneho sejma přijimałoj. Wšitke tři runiny centralu tež pjenježnje podpěruja, zo móhli tam ludźi njewotwisnje poradźować.

Krótkopowěsće (09.10.19)

srjeda, 09. oktobera 2019 spisane wot:

Kolokwij za prof. Köstlina

Drježdźany. Institut za sakske stawizny a ludowědu (ISGV) chce zhromadnje ze Serbskim institutom (SI) prof. dr. Konrada Köstlina jeho zasłužbow dla z wědomostnym kolokwijom 17. oktobra počesćić. Prof. Köstlin je załoženje a dalewuwiće ISGV runje tak nawjedujcy přewodźał kaž w SI. Z wědomostneje přirady ISGV je so 79lětny nětko wróćo sćahnył, kurato­rijej SI wón hač do dźensnišeho přisłuša.

Dalnoćopłota z Janšojc wostanje

Choćebuz. Janšojska milinarnja město Choćebuz tež přichodnje z dalnoćopłotu zastara. Komuna, Choćebuska towaršnosć tepjenskeje a milinarnje (HKWG) a Łužiska energija milinarnje AG (LEAG) su so dojednali, wobstejace zrěčenje hač do kónca lěta 2032 podlěšić. Wo tym je LEAG wčera informowała. Předewzaće přewostaja znajmjeńša połojcu mnóstwa, kotrež su Choćebuženjo dotal wob lěto woprawdźe přetrjebali.

Wjace załožbow w Sakskej

Policija (09.10.19)

srjeda, 09. oktobera 2019 spisane wot:

Zawrjenu dróhu wobkedźbowali

Kamjenej. Z trochu njewšědnym nadawkom je so předwčerawšim popoł­dnju wobchadna wobstražowanska słužba policije zaběrała. Wona wobkedźbowaše zwjazkowu dróhu B 96 blisko Kamjeneje pola Rakec. Tam je mjenujcy nadróžne twarnišćo, čehoždla je dróha dospołnje ­zawrjena. Po wšěm zdaću pak so wšitcy po tym nimaja. W běhu dweju hodźin ­zadźeržachu tam dohromady 35 jězdźi­dłow, kotrež po zaraćenym dźělu dróhi ­jědźechu. 15 wodźerjow bě wobchadne znamjenja prosće ignorowało. Za to dyrbja pokutu płaćić. Tamni ­smědźachu po twarnišću jěć, kaž při dróze bydlacy, taksije a šulski bus.

Kniha změje premjeru

srjeda, 09. oktobera 2019 spisane wot:

Budyšin. Nowa kniha Róže Domašcyneje „W času zeza časa“ změje štwórtk, 10. oktobra, w 19.30 hodź. premjeru w Budyskej Smolerjec kniharni. Basnica wěnuje so w swojej nowostce bliskim temam­ kaž serbskej rěči, zničenemu krajej­, nahrabnosći, zachodnosći zemje a žiwjenja kaž tež njezwučenym wobkedź­bowanjam a fantastiskim wumyslenkam w přirodźe. Awtorka tón wječor knihu předstaji a na prašenja rady wotmołwi.

Přewjedu serbski wječor

Wulka Dubrawa. Domowina, Rada za serbske naležnosće Swobodneho stata Sakskeje a Załožba za serbski lud přeprošeja za štwórtk, 10. oktobra, w 19 hodź. na serbski wječor do Wulkodubrawskeho Šnajdrec wobchoda za kuchnje. Z wopytowarjemi chcedźa so tam wo aktualnych serbskich prašenjach rozmołwjeć a kak móhli serbske skutkowanje na městnje podpěrać. Přeprošeni njejsu jenož­ aktiwni čłonojo serbskich towarstwow, ale tež jednotliwcy, serbscy młodostni a starši. Diskusiji přizamknjetej so zhromadny serbski spěw a bjesada.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND