Struchłe a ćežke časy hroža
Z ponowjenym nadróžnym wobswětlenjom móhli tójšto lutować
Njebjelčicy (JK/SN). Gmejnje Njebjelčicy hroža struchłe a ćežke časy. To zdźěli wjesnjanosta André Bulank (njestronjan) na wčerawšim posedźenju tamnišeje gmejnskeje rady. Po klawsurnym posedźenju w měrcu je dźeń a jasnišo widźeć napjata pjenježna situacija gmejny. Wot klětušeho njebudu hižo dobrowólne nadawki spjelnić móc, jeli je stoprocentnje financowane njedóstanu. Jenož hišće nadawki k zawěsćenju wěstoty a dźěławosće budu wuwzaćnje móžne.
Wuhódanje jutrowneje křižowki
Dobre začuće a rozhorjenosć
Njeswačidło (SN/MWj). We wobłuku lětušich wotpadkowych akciskich dnjow w Budyskim wokrjesu je so dohromady dwanaće tonow wotpadkow nazběrało. Tole zdźěli Sophia Hauswald z přirodoweje centrale w Njeswačidle. Něhdźe 1 500 ludźi je we wobłuku 30 iniciatiwow w běhu třoch tydźenjow wotpadki zběrało. Priwatnicy su so na akciji runje tak wobdźělili kaž pěstowarnje, šule, towarstwa a wjesne rady. Runje w času nalětnjeho rjedźenja, kotrež ma w mnohich gmejnach hižo dlěšu tradiciju, je so wjace ludźi hač hewak za akciskimi dnjemi wobhoniło. Hdźe su wšudźe wotpadki zběrali, nadeńdu zajimcy pod www.naturzentrale-bautzen.de.
Porěča wo aktualnych temach
Njebjelčicy. Aktualne wuwića a wužadanja na komunalnej runinje steja w srjedźišću zjawneho diskusijneho wječora póndźelu, 15. apryla, w 19.30 hodź. w Njebjelčanskej „Bjesadźe“. Na njón přeprošujetaj kandidatka CDU za wólby Sakskeho krajneho sejma Elaine Jenčec a zapósłanc krajneho sejma Alojs Mikławšk (CDU). Z hosćom budźe generalny sekretar sakskeje CDU Alexander Dierks. Wšitcy třo kaž tež dalši mandatni nošerjo chcedźa so ze zajimowanymi wobydlerjemi wuměnjeć a ideje wuwiwać, kak hodźa so wuhibki za spušćomne a do přichoda sahace wuwiće Sakskeje a wjesnych kónčin stajeć.
Nalětni kolokwij
Stróža. Fachowe zarjadowanje wo kibuće (Kiebitz), ptačku lěta 2024, wotměje so jutře, sobotu, wot 9.30 hač do 16.30 hodź. w Stróžanskim Domje tysac hatow. Dokelž njeje hižo dosć wulkich njewobtwarjenych płoninow, je kibut w Sakskej wot wotemrěća wohroženy. Tohodla su intensiwne prócowanja trěbne dalšemu pohubjeńšenju połoženja zadźěwać. Zarjadowanje měri so na nazhonitych ornitologow runje tak kaž na lajkow a zajimowanu zjawnosć. Wobdźělenje je darmotne.
Sportowy dom sej wobhladać
Přepytuja cuze wopłóčki
Trjebin (AK/SN). Z cuzymi wopłóčkami, kotrež přichadźeja z njeznateho žórła do wopłóčkoweje syće, dyrbi so Trjebinska gmejna zaběrać. Wona chce tónle pad dokładnje přeslědźić. Tole rjekny wjesnjanosta Robert Sprjejc (Trjebinske wolerske zjednoćenstwo) srjedu na posedźenju gmejnskeje rady. Jedna so wo něhdźe 4 000 kubiknych metrow, kotrež njekontrolowane we wopłóčkowych rołach do Běłeje Wody ćeku. Za wotwodźowanje zamołwite je předewzaće Komunalna zastaranska towaršnosće Łužica (KVL). Wot 1. julija 2023 zamołwja KVL zastaranje z pitnej wodu a wotwodźowanje wopłóčkow za Běłu Wodu, Hamor, Jabłońc, Dźěwin, Krušwicu, Slepo, Trjebin, Wuskidź a Šprjewiny Doł. Po słowach Roberta Sprjejca je KVL Trjebinsku gmejnu na cuze wopłóčki skedźbniła. „Dyrbimy přeslědźić, zwotkel wopłóčki přichadźeja. Hewak móže nam KVL přichodne lěta pokutu nabrěmjenić“, praji Trjebinski wjesnjanosta.
Roswitha Petschick (3. wotlěwa) wot Wojerowskich wjesnych žonow ...
Krótkopowěsće (12.04.24)
Złota medalja šulerce ze Slepoho
Drježdźany. Sakski kultusowy minister Christian Piwarz je wčera wobdźělnikow Sakskeje olympiady cuzych rěčow počesćił. Złotu medalju wudobyštaj sej šulerka Wyšeje šule Slepo Luna Ritze w jendźelšćinje a šuler Serbskeje wyšeje šule Ralbicy Jakub Barč w rušćinje. Luiza Domanic, tež šulerka Ralbičan šule, wudoby sej w rušćinje druhe městno. Cyłkownje běše so 55 šulerjow 8. a 9. lětnikow wobdźěliło.
Finale za mjenowe prawo
Berlin. Dźensa chcyše zwjazkowy sejm reformu mjenoweho prawa Němskeje wobzamknyć. Z tym móža tež Serbowki swoje swójbne mjeno na serbske wašnje do hamtskich dokumentow zapisać dać. Sakski zapósłanc a parlamentariski jednaćel frakcije FDP Torsten Herbst, kiž je so wjele lět za reformu zasadźował, praji, zo ma serbšćina dźěl wšědneje komunikacije tež na zjawnych zarjadach być.
Šiman: Přihot na studij zaručeny
Policija (11.04.24)
W lěsu so paliło
Spale. Z dotal njeznateje přičiny je so wutoru wječor pola Spalow čwak lěsa palił. Wobydler je to wobkedźbował a krótko do 21.30 hodź. Wojerowsku wuchowansku dispatchernju zazwonił. Wottam wohnjowu woboru a policiju alarmowachu. Po informacijach Zhorjelskeje policajskeje direkcije wupřestrě so woheń na něhdźe 200 kwadratnych metrow. Za čas hašenja dyrbjachu wokrjesnu dróhu mjez Spalemi a Mučowom dospołnje zawrěć. Krótko do napoł dwanaćich běchu płomjenja podušene, tak zo móžachu tež dróhu zaso wočinić. Wojerowski policajski rewěr přepytuje w tym padźe lochkomyslneho zapalerstwa dla.
Serb je nowy šeflěkar
Matti Bětnar nawodnistwo chirurgiskeje kliniki w Kamjencu přewzał
Kamjenc (SN/MWj). Wurjadnaj fachowcaj zesylnjataj chirurgisku kliniku Kamjenskeje chorownje swjateho Jana. Kaž chorownja w nowinskim wozjewjenju zdźěli, skutkujetaj nětko 38lětny Matti Bětnar jako nowy šeflěkar a 57lětna Rita Wächtershäuser jako nawodna wyša lěkarka viszeralneje chirurgije (chirurgija brjucha a organow w nim). Matti Bětnar, pochadźacy ze serbskeje swójby w Kašecach, nawjeduje wobłukaj za njezbožowu chirurgiju a ortopediju. Rita Wächtershäuser pochadźa ze sewjerneje Němskeje a změje wobłuk brjušneje chirurgije z ćežišćom minimalinwaziwnych operacijow na starosći.
Bóšičanski třiróžk wohroženy
Bóšicy (SN/MiR). Gmejnscy radźićeljo Bóšičanskeje gmejny so na swojim posedźenju wutoru njemało dźiwachu. Mjeztym dołho planowane a přihotowane zarjadowanje „Bóšičanski třiróžk“, kotryž gmejna 27. a 28. apryla wuhotuje, je wohrožene. Katrin Ullrich z Njeswačanskeho gmejnskeho zarjada dósta pismo z krajneho zarjada za dróhotwar a wobchad (LASuV) a bě přewšo překwapjena. Wšako sej sobudźěłaćerka LASuV žada, zo maja šoferojo, kotřiž chcedźa za čas motorsportoweho zarjadowanja z Wětrowa abo do wsy jěć, pólny pućik z Wbohowa wužiwać.
Dale ma křižowanišćo Bóšicy/Nowe Bóšicy po połojcy wotewrjene wostać a zjawny wobchad ma so z amplu rjadować. Bóšičanski wjesnjanosta Stanij Ryćer (rjemjesło Bóšicy), kiž je zdobom iniciator dwudnjowskeho a daloko přez mjezy gmejny zajim zbudźaceho eventa, je Budyski wokrjes wo pomoc prosył. „Wot wokrjesa, policije, strowotnych zarjadnišćow a wot druhdźe mjeztym wšitke dowolnosće předleža. A LASuV je nam před lětomaj na 2. Bóšičanskim třiróžku zdźělił, zo směmy zarjadowanje lětsa přewjesć.“
