Po wulkim boju dypkowu hru zasłužbnje dobyli

štwórtk, 20. septembera 2018 spisane wot:

ST Marijina hwězda – HZ Łaz/Běły Chołmc 2:1 (1:1)

Zestawa domjacych: O. Schmidt – Pesch­mann, Škoda, Rab, Cyž (69. Lipič), Pjetaš, Kuring, O. Hawš, R. Hawš, Eldor (83. Bělk), Pakoßnick (77. P. Schmidt)

Při přijomnych wonkownych wuměnjenjach nastupištej w Pančicach prěnje koparske mustwo Sportoweho towarstwa Marijina hwězda a cyłk Hrajneho zjednoćenstwa Łaz/Běły Chołmc přećiwo sebi. Hosćićeljo móžachu partiju na wysokim niwowje, w kotrejž nasta tójšto rjanych dwubojow, z 2:1 dobyć. Woboje wrota třěli Jakob Pakoßnick. Porjadny natwar hry pak na woběmaj stronomaj spočatnje móžny njebě, dokelž w srjedźnym polu wo kóždy bul wojowachu. Z wobhladanjahódnymi wrotami hosćo po 16 mjeńšinach nawjedowachu, štož pak Pančičanow njezatraši. Hnydom přewzachu woni režiju na hrajnišću. Wosebje kapitan Pakoßnick torhaše přeco zaso na rjećazach. W 21. min. so jemu hišće njeporadźi wurunać, w 39. min. pak to lěpje sčini. Foulowany bě sej Pakoßnick kulowatu kožu sam za wólny kop na trawnik połožił a ju ze zdalenosće 21 metrow do šibjeńcy třělił. Z remisom dźěše do přestawki.

Wuspěch w sakskim derbyju žnjeli

štwórtk, 20. septembera 2018 spisane wot:

FSV Budissa Budyšin – VfB Auerbach 1906 1:0 (0:0)

Zestawa domjacych: Ebersbach – Mack, Patka, Hoßmang, Kral (76. Krawčik), Ciapa (46. Langr), Weiß (85. Wockatz), Treu, Schmidt T., Merkel, Bönisch

Prěnju móžnosć na stronje Budissy Budyšin měješe pilny Tony Schmidt, kiž pak bul z kónčkojteho kuta snadnje nimo přećiwniskich wrotow třěli (2.). Při kopje Amera Kadrića na tamnym boku bě Maik Ebersbach na městnje a dźeržeše (10.). Wotnětka naby Auerbach na sylnosći a nadźěła sej wjacore šansy. Jedna z nich bě třělwa Marca-Philippa Zimmermanna do łaty (21.).

Slědowachu dalšej móžnosći za Thomasa Stocka (28.), Zimmermanna (38.), ale tež amplowa karta za Marcina Siebera po dalšim foulu (41.). Nětko bě Budissa z mužom wjace na kopanišću. Přiwšěm rěčeše trenar Torsten Gütschow wo najšpatnišim połčasu swojeho mustwa w aktualnej sezonje. Narěč w połčasu pomhaše.

Krótkopowěsće (20.09.18)

štwórtk, 20. septembera 2018 spisane wot:

Kniha z digitalnej komponentu

Budyšin. Druhi nakład w Ludowym nakładnistwje Domowina wušłeje knihi Madleny Nasticcyneje „Što tam łazy, běha, lěta“ budźe bórze na předań. Tele wudaće je prěnje kompatibelne z digitalnym słuchopisakom BOOKiijom nakładnistwa Tessloff. To rěka, wužiwar móže nimo zwučeneho wašnja předčitanja z knihi sej tež zwuki a rymy naposkać.

8. oktobra nowy termin

Budyšin. Wotprajene 21. posedźenje Budyskeho wokrjesneho sejmika z minjeneje póndźele z wurjadnym posedźenjom 8. oktobra nachwataja. Za to za 29. oktober planowane zeńdźenje wo­krjesneho parlamenta njebudźe. Wo tym informowaše wčera Budyski krajnoradny zarjad. Njekorektneho wozjewjenja zjawneho přeprošenja dla bě zarjadnistwo 21. posedźenje wotprajiło.

Prapremjera bajkoweho filma

Policija (20.09.18)

štwórtk, 20. septembera 2018 spisane wot:

Wobchod zapusćili a tony pomórali

Wojerecy. Něhdźe 10 000 eurow škody načinichu wandalojo, kotřiž běchu blisko Wojerowskeho lěsneho kěrchowa w nocy na wutoru wobchod zapusćili. Policija na to tuka, zo jedna so wo samsnych chaotow, kotřiž su na Kinajchtskej a na Hasy dr. Marje Grólmusec wotpadkowe tony, latarnju, nadróžne znamješka a busowu čakarnju z hokatymi křižemi a ze wšela­kimi­ parolemi pomórali.

Hišće městna za projekt

štwórtk, 20. septembera 2018 spisane wot:

Budyšin (SN). Kaž Alexander Noack ze zarjadniskeho managementa Budyskeho Kamjentneho domu zdźěli, maja w zarjadnišću hišće swobodne městna za bigbandowy projekt „Swingin ,Santa‘“. W druhim tydźenju nazymskich prózdnin, wot 13. do 19. oktobra, chcedźa tam z třiceći młodostnymi swój lětuši hodowny program na jewišćo přinjesć. Zajimcy 10 do 18 lět móža so přizjewić.

Prěni hosćo w zetkanišću

Hamor (SN). Wot spočatka septembra zajimcy Hamorski zetkawanski centrum wužiwaja. Na druhim poschodźe šulskeho domu maja nimo čłonow seniorskeho kluba tež wupožčowarjo medijow w Hamorskej bibliotece swój domicil.

Přidatne prěkuše za Židow

Budyšin (SN). Kaž připowědźene, wukonja Budyske měšćanske zarjadnistwo dalši krok, „zo bychu wobchad w Židowje spomalili“. Na Słonoboršćanskej, Wjel­ko- wskej kaž tež Ćichońskej dróze kładu specielne prěkuše, zo bychu šoferojo spěšnosć jězdźidłow pomjeńšili. Dźěła chcychu dźensa zakónčić.

Nowonarodźene witali

Zahoritosć za sejm njepřeskočiła

srjeda, 19. septembera 2018 spisane wot:

Někotryžkuli wćipny wobydler Radworja bě wčera na posedźenje gmejnskeje rady přišoł, zo by předstajenje iniciatiwneje skupiny Serbski sejm dožiwił. Na kóncu běchu wšitcy we wólbnobojowym zarjadowanju, kotrež dyrbješe wjesnjanosta po hodźinje přetorhnyć.

Radwor (SN/MkWj). Hnydom pjeć zastupnikow iniciatiwneje skupiny bě wčera wječor na posedźenje gmejnskeje rady do Radworja přišło, zo bychu swoje dźěło a swoje předstawy na jednym z dźesać dypkow dnjoweho porjada rozłožili.

Wot dźensnišeho je hrajkanišćo na Budyskim Friedricha Engelsowym naměsće přechodnje njepřistupne. Šćerk, kotryž ma dźěći při skakanju a druhich zaběrach škitać, dźěłaćerjo nětko wotwožeja a potom nowy nasypaja. Zo dźěła hišće lětsa wukonjeja, bě hakle njedawno jasne. Najebać pruwowanje a to, zo tučasnje žadyn strach za hrajkacych njewobsteji, fachowcy přiwšěm wobkedźbo­wachu, zo so škitny material zhusća. Hižo kónc tydźenja ma naprawa zakónčena być. Foto: SN/Maćij Bulank

Trěbne zwučowanja z klankami

srjeda, 19. septembera 2018 spisane wot:

Nowa wuchowanska straža Budyšin­zapad w Sćijecach při zwjazkowej dróze B 6 dźěła ­mjeztym dlěje hač lěto. Minjenu sobotu su tam dźeń wotewrjenych duri ­přewjedli.

Budyšin (CS/SN). Wobhospodarjer wuchowanskeje straže, Němski čerwjeny křiž (DRK), je na dnju wotewrjenych duri mnohim zajimowanym wobydlerjam dohlad do swojich rumnosćow a dźěła zmóžnił. Wosebje wužadani běchu wučomnicy DRK. Tak předstajichu woni wćipnym wopytowarjam tak mjenowane „dummyje“, kaž čłowjek wulke klanki ­jako atrapy, z kotrymiž trenuja.

Wjeršk zarjadowanja bě wulke wuchowanske zwučowanje, a to hromadźe ze Sćiječanskej wohnjowej woboru. Tež tu dyrbjachu předewšěm wučomnicy swoje kmanosće pokazać. W srjedźišću steješe simulacija wobchadneho njezboža, při čimž dyrbjachu w jězdźidle zatłusnjenu a zranjenu wosobu zastarać.

Šulsku awlu bórze ponowja

srjeda, 19. septembera 2018 spisane wot:

Łazowska gmejnska rada wčera wažnej twarskej nadawkaj přepodała

Łaz (AK/SN). Łazowska gmejna Zakładnu šulu „Při Hórnikečanskim jězoru“ we Wulkich Ždźarach dale zaměrnje saněruje. K tomu je so wčera gmejnska rada na zjawnym posedźenju wuznała. Jako přichodny krok nětko planuja saněrować wjacezaměrowu rumnosć. Wot oktobra hač do januara 2019 maja twarske dźěła trać. Financować móža je dźakowano swójskim srědkam komuny a přiražkam ze sakskeho zakonja wo zesylnjenju inwesticiskeje mocy. Z toho fondsa dóstanje Łaz 75procentowske spěchowanje 238 000 eurow. Přizwolenje pjenjez je na 1. februar 2017 datěrowane. „Jako naprawy we wobłuku budgeta ­‚Sakska‘ budu durje a wokna, špundowanja, rumnostna akustika a tepjenje wobnowjene. Dalše naprawy su předwidźane na zakładźe přizwolenjow za rekonstrukciju zakładneje šule we Wulkich Ždźarach“, wjes­njanosta Thomas Leberecht (CDU) wčera rozłoži.

Štomy při pućach často stare a suche

srjeda, 19. septembera 2018 spisane wot:

Wot lěta 2013 do 2017 su w Budyskim wokrjesu wěstotnych přičin dla z 55 000 štomow při pućach něhdźe 4 900 podrězali. W samsnym času su něhdźe 4 000 štomow a 5 650 kerkow sadźeli.

nawěšk

nowostki LND