Policija (09.09.21)
Zaparkować so njeporadźiło
Wojerecy. Wjacore razy zwrěšćiła je 74lětna žona předwčerawšim we Wojerecach, jako chcyše swoje awto parkować. Najprjedy spyta wona swój VW Polo wróćo zaparkować, storči pak při tym do za njej stejaceho VWja. Jako zaso doprědka jědźeše, zrazy do čakaceho Opela. Na to spyta swoje zbožo na hinašim městnje. Při tym pak prasny jeje Polo z připrawu za připowěšak dwójce do murje. Wěcnu škodu trochuje policija na dohromady něhdźe 9 000 eurow.
Serb so na wandrowstwo podał
Radwor (rz/SN). Spočatk tohole tydźenja je w Radworju horstka ludźi Mikławša Brězana na wandrowstwo rozžohnowała. Po tym zo bě tam młody Serb wjesnu taflu přelězł, přewostajichu jeho swójbni a přećeljo nazhonitemu wandrowskemu.
Poprawom pochadźa Mikławš Brězan z Prawoćic, hdźež bychu jeho tež rozžohnować dyrbjeli. Dokelž pak by to za jeho přewodźerja, tež „starca“ mjenowaneho přeblisko k jeho domiznje było, steješe Prawočanska wjesna tafla póndźelu takrjec w Radworju.
Drastu běchu wandrowscy hižo kónc tydźenja do toho nowačkej přepodali. K porjadnemu woblečenju słušeja cholowy, lac a kabat z čorneho korda kaž tež běła košla, tak mjenowany štawtk, čorny kłobuk a zwjerćany kij. Drastu Mikławša Brězana su mjez swójbnymi a přećelemi přesadźowali. Pjenjezy, kotrež tak nazběrachu, ma skupina wandrowskich prěnje dny za zastaranje k dispoziciji.
Koncertuja w cyrkwi
Budyšin. Twórbje „Missa D-dur“ a „Te Deum“ čěskeho komponista romantiki Antonína Dvořáka zaklinčitej jutře, pjatk, w 19.30 hodź. w Budyskej tachantskej cyrkwi swj. Pětra. Juhoněmski lěkarski chór a jeho orchester spěwatej a hudźitej pod nawodom cyrkwinskohudźbneho direktora Mariusa Poppa. Zastup je darmotny. Po beneficnym koncerće budźe kolekta za młodźinske dźěło wobeju tachantskeju cyrkwinskeju wosadow.
Serenada w zelenym
Stróža. Wječor do lětušich nazymskich přirodowych wikow w Stróži pola Hućiny wotměje so tam tež jutře, pjatk, serenada w zelenym. Cyle po tradiciji serbsko-němskeje kulturneje kónčiny předstaji tam w 19 hodź. Trio con moto swój dialog z knihu Jurja Brězana „Moja archa Horni Hajnk“. Hraja Hanka Tiedemann, Bettina Witke a Helfried Knopsmeier, čita Lisa Čornakowa. Koncert zarjadujetej biosferowy rezerwat Hornjołužiska hola a haty kaž tež Stróžanske domizniske towarstwo Radiška.
Kockert nowy komornik
Wot instalatera ke korčmarjej
Hosćency a korčmy su za towaršnostne žiwjenje wažne městna, wšako so tam ludźo rady zetkawaja. Často pak maja tež zajimawe stawizny. W swojej lětnjej seriji tajke gastronomiske předewzaća předstajamy, dźensa „Wjesnu stwičku“ w Němcach. (18)
Na zapadnej stronje Němcow, hdźež kónči so puć, pomjenowany po Wincencowej hrjebi, a hdźež wije so podłu Čorneho Halštrowa po nim Halštrowska niwa mjenowany puć, steja na lěwej stronje někotre třistronske statoki. Wosrjedź nich bě něhdy tež Bilikec ratarski statok z bróžnju a hródźemi.
Dotalne jednore hrajkanišćo na kromje Wěteńcy dóstawa tuchwilu ...
Krótko před Złokomorowskim dwórnišćom je wčera dopołdnja ...
Krótkopowěsće (09.09.21)
Natyknjenja dale přiběraja
Budyšin. Natyknjenja z koronawirusom zaso přiběraja. W Budyskim wokrjesu informowachu wčera wo 31 zwěsćenych padach, w Zhorjelskim běše jich 26. Pjeć wosobow w chorowni lěkuja. Tež incidenca wotpowědnje stupa. Roberta Kochowy institut je dźensa za wokrjes Budyšin 18,4 a za wokrjes Zhorjelc 25,9 podał. Po cyłej Hornjej Łužicy płaći nětko winowatosć nahubnik wužiwać.
Kongres FUEN zahajeny
Triest. Rada słowjenskich organizacijow (SSO) wuhotuje wot dźensnišeho hač do njedźele 21. kongres Federalistiskeje unije europskich narodnych mjeńšin (FUEN) w Triesće. Serbow zastupuja tam Felicia Touvenot z młodźinskeho towarstwa Pawk, Maksimilian Hasacki z Delnjeje Łužicy a Dawid Statnik z Hornjeje Łužicy. Hosćićeljo SSO prócuja so wo słowjensku rěč a narodne sebjewědomje.
Ćeže falowaceje papjery dla
Policija (08.09.21)
Pluwaceho paducha zajeli
Budyšin. Paduch je předwčerawšim sobudźěłaćerjow kupnicy na Budyskej Kamjentnej zaběrał. 41lětny předawarkam napadny, dokelž běchu jemu hižo přistup zakazali. Nimo toho bě sej wón twory do nachribjetnika tyknył. Jako chcyše bjez płaćenja wobchod wopušćić, jeho kasěrarka narěča. Muž najprjedy njereagowaše, na čož so jemu sobudźěłaćerjo do puća stupichu. Přećiwo nim so muž masiwnje wobaraše a na nich pluwaše. Skónčnje pak policija přijědźe a 41lětneho zaja.
Maja hišće lisćiki
Chrósćicy. Za premjerne předstajenje serbskeje popoweje opery „Carpe Noctem – Njeskónčna nóc“ zajutřišim, pjatk, w Chróšćanskej „Jednoće“ su wšitke zastupne lisćiki wupředate. Za wšěch, kotřiž chcedźa jenož na wječorne reje z kapału Praskot přińć, maja při wječornej kasy kartki za pjeć eurow. Tež za sobotu a njedźelu hišće někotre zastupne lisćiki maja. Njedźelu poskića k předstajenju kofej a tykanc. Na wšěch předstajenjach maja wopytowarjo nahubnik nosyć, doniž njejsu na městnje.
Do akademije pohladać
Budyšin. Dźeń wotewrjenych duri změja sobotu, 11. septembra, wot 9 do 13 hodź. w Budyskej studijnej akademiji. Zajimcy móža so tam wo dohromady šěsć studijnych směrach na polu hospodarstwa a techniki wobhonić a sej nowe laborowe twarjenje wobhladać. Tež tym, kotřiž su so hižo za dualny studij rozsudźili, ale hišće žanoho partnera za praksu nimaja, móža na dnju wotewrjenych duri pomhać.
Maja noweho třělcowskeho krala
W lěće 2020 je so koronawirusa dla lědma něhdźe wjesny abo někajki hinaši zabawny swjedźeń wotměł. Lětsa spytaja tu a tam něštožkuli nachwatać, kaž činjachu to minjenu sobotu w Zabrodźe.
Zabrod (JoS/SN). Swój tradicionalny třělcowski swjedźeń je minjenu sobotu dobrowólna wohnjowa wobora w Zabrodźe přewjedła. Loni njemóžachu tónle podawk koronapandemije dla přewjesć. Tak je šalmajowa kapała Wolfharda Girku jako třělcowskeho krala lěta 2019 doma wotewzała a na swjedźenišćo přewodźała. Wón měješe tež nadawk, čestny wěnc za swojeho naslědnika wobstarać. Zhotowiła bě jón floristka Elke Schötz.
