Chwaćicy (ES/SN). We wobłuku swjedźenskeje Božeje słužby su minjenu sobotu w Chwačanskej cyrkwi Dobreho pastyrja pišćele po ponowjenju znowa po­swjećili a do słužby stajili. Njeswačanska fararka Susanne Aechtner hódnoćeše wukonjane dźěło pišćeletwarcow Budyskeje firmy Eule. Woni běchu w minjenych měsacach instrument wobšěrnje saněrowali. Při tym su cyły nastroj dospołnje rozebrali, wurjedźili, wšelake wobškodźene abo dodźeržane dźěle wuměnili, wšitko zaso hromadźe twarili a pišćele skónčnje zaso intoněrowali. Zwukowy charakter, kaž wón wot lěta 1985 wobsteješe, su při tym zachowali.

Wubědźowanje zahajene

Budyšin. Statne ministerstwo za regionalne wuwiće je lětsa 12. raz wubědźowanje „Naša wjes ma přichod“ wuwołało. Hač do 5. meje móža so wsy z hač do 3 000 wobydlerjow na krajnoradnym zarjedźe ze swojimi idejemi a projektami požadać, kotrež atraktiwitu žiwjenja na wsy přisporjeja. Dobyćerja wočakuje pjenježne myto we wysokosći 10 000 eurow.

Nowy wobydlerski policist

Pančicy-Kukow. We wsach zarjadniskeho zwjazka „Při Klóšterskej wodźe“ maja wot spočatka lěta noweho wobydlerskeho policista. Sernjančan André Kober je zamołwitosć za pjeć serbskich gmejnow přewzał. Wón stara so wo zjawnu wěstotu, wo njezboža kaž tež přeńdźenja přećiwo porjadej a je wobydlerjam, šulam, wobchodam, towarstwam a zawodam z narěčenskim partnerom.

Wróćo do 1970tych lět