Za dźěći maja hišće městna
Chcyli biosferowy rezerwat rozšěrić
Wulka Dubrawa (CS/SN). Z móžnym rozšěrjenjom terena biosferoweho rezerwata Hornjołužiska hola a haty su so čłonojo Wulkodubrawskeje gmejnskeje rady na swojim zašłym posedźenju zaběrali. Teritorij, 1997 w jeho dźensnišej formje wutworjeny, dyrbja mjeztym nowelěrować, rozłoži dr. Jan Peper ze zarjadnistwa biosferoweho rezerwata. Z dohromady 59 wsow přisłuša škitanej kónčinje tež dźesać z gmejny Wulka Dubrawa. W jeje radźe, kotrejž wšitcy wjesnjanosća přisłušeja, su wo rozšěrjenju hižo rěčeli. Jako wosebje škitanja hódne wobhladuja tři na dźensniše hranicy rezerwata mjezowace kónčiny. Jónu je to sprjewina nižina wokoło Delnjeje Hórki, kotraž saha hač do Załhowa (Salga) a Klukša a je tuž teritorij Wulkodubrawskeje gmejny. Płonina je něhdźe 260 hektarow wulka. Dalša kónčina, kotraž by wot rozšěrjenja potrjechena była, je 100 hektarow wulki teritorij wokoło wětrnikoweje hory pola Brěmjenja. Tón wopřijima jako wosebitosć orchidejowu łuku. Třeća kónčina stej tak mjenowany motorowy hat a pěskowa hora pola Chrósta (Crosta) z cyłkownej płoninu je 19 hektarow.
Pobrjóh dokładnje wurjedźeny
15. meje je so lětuša kupanska sezona při Bjerwałdskim jězoru zahajiła. Tež tam maja ludźo škitne postajenja korony dla dodźeržeć. To samo kontroluja, kaž bě nětko słyšeć.
Hamor (CK/SN). Při temperaturje dwanaće stopnjow drje tuchwilu jenož ći najzmužićiši do Bjerwałdskeho jězora du. Dowolene pak je to wšitkim. Wšako je so kupanska sezona po koronowych předpisach 15. meje zahajiła. Z profesionelnym rjedźenjom su minjeny tydźeń 7,5 hektarow wulke pobrjóžne wotrězki za tekstilne kupanje, FKK a psy pola Hamora, Delnjeho Wujězda a Klětnoho přihotowali. Hač do hłubokosće 20 centimetrow su wšón pěsk přesali a tak zbytki cigaretow, wěka piwowych blešow a dalši drobny njerjad wufiltrowali. Gmejna Hamor płaći za to štyricyfrowu sumu pjenjez.
W běhu sezony sobudźěłaćerjo komunalneho twarskeho zawoda wšědnje na pobrjoze papjeru, bleše a wotpadki zběraja. Dokładne rjedźenje wotměwa so kóždej dwě lěće. Tak wobstajnje to při tamnych wodźiznach łužiskeje jězoriny hišće njepřewjeduja.
Wěžu cyrkwje nětko ponowjeja
Róštow dla wulki zwón Chwačanskeho Božeho domu tuchwilu mjelči
Chwaćicy (ES/SN). Na Chwačanskej cyrkwi K dobremu pastyrjej dyrbjachu hižo před dlěšim časom zwěsćić, zo so wot wobkromy fasady wěže dźěle wobmjetka pušćachu a dele padachu. Zo bychu strachej za wopytowarjow Božeho domu a kěrchowa wotwobarali, dyrbjachu jednać. W nowembru 2019 zapoda wosada twarsku próstwu, zo móhli fasadu wěže saněrować dać. Před lětom, w juniju 2020, dóstachu wotpowědnu dowolnosć a runočasnje pjenježnu přiražku Ewangelsko-lutherskeje krajneje cyrkwje Sakskeje.
Minjeny tydźeń započachu při cyrkwinej wěži róšty twarić, kotrež sahaja hač k wotkapej (Traufe). Dźěła wukonja na to specializowana firma z Goldbacha pola Biskopic. Za ponowjenje wěže dyrbja w Chwaćicach dohromady 129 000 eurow wudać. Z toho dóstanu něhdźe 96 000 eurow z programa Leader w kónčinje Hornjołužiskeje hole a hatow spěchowane. Zbytk dyrbi wosada ze swójskich srědkow zwjesć.
Krótkopowěsće (18.05.21)
Wot štwórtka wolóženja
Budyšin. Incidenca po Roberta Kochowym instituće je dźensa w Budyskim wokrjesu ze 97,1 sedmy dźeń za sobu pod 165. Tak smědźa wot štwórtka dźěćace dnjowe přebywarnje z krutymi skupinami a wosobami zaso wotewrěć a šule prezencnu wučbu poskićeć. Hač do wčerawšeho zwěsćichu tu 14 natyknjenjow z koronu a dwaj smjertnej padaj. Zhorjelski wokrjes rozprawješe wo pjeć nowoinfekcijach a wo třoch smjertnych padach. Incidenca po RKI je tam dźensa 91,4.
Pytaneho dwójnika popadnyli
Drježdźany/Berlin. Nimale połdra lěta po spektakularnym padustwje juwelow ze Zeleneho wjelba w Drježdźanach su nětko wšitkich njeskutka podhladnych popadnyli. Na raciji je policija wčera wječor pytaneho dwójnika ze znateho clana arabskeho pochada w bydlenju w Berlinje-Neukölnje zajała. 22lětny je mjeztym w Drježdźanach, hdźež měješe sudnik dźensa wo jatbje rozsudźić.
Rěčny docent dźěło nastupił
Nowe hrajkanišćo 1. junija přepodadźa
Ćisk (JT/SN). Za často wužiwane prajidmo „Štož dołho traje, budźe dobre“ je nowe wuhotowanje hrajkanišća na Ćišćanskej nawsy najlěpši přikład. Hižo wot lěta 2014 so wjesnjenjo pola města Wojerecy wo to prócuja. Najprjedy pak so wjele stało njeje. Wot komunalneho twarskeho zawoda poskićenej standardnej warianće Ćišćanska wjesna rada njepřihłosowaše. „Chcychmy hrajkanišćo, kotrež wjesnemu charakterej wotpowěduje“, podšmórny wjesny předstejićer Jens Zahrodnik. Kak móhło tajke něšto wupadać, pokazaja někotre wot njeho stworjene elementy, kotrež běchu 2018 z pomocu staršich nastajili. Idejowe wubědźowanje mjez Ćišćanami wunjese dalše namjety za přetworjenje hrajkanišća.
Sto wobličow k jubilejej
Zrěčenje najprjedy njepodpisa
Wuslědk wobydlerskeho rozsuda njeje doskónčnje jasny
Kulow (AK/SN). Wobydlerski rozsud 9. meje wo škričkowanskim sćežoru w Mučowje z wida města Kulowa hišće žadyn jasny wuslědk wunjesł njeje. Tole rjekny měšćanosta Markus Posch (CDU) na zašłym posedźenju měšćanskich radźićelow. „Měšćanska rada budźe na přichodnym posedźenju 14. julija wo tym rozsudźić. Hač do toho žane wotpowědne zrěčenje njepodpisam“, wón přilubi. Wobydlerska iniciatiwa „Hórnikečanski jězor bjez prudźenja. Žadyn škričkowanski sćežor w Mučowje“ wojuje wo cofnjenje tak mjenowaneho dowolenskeho zrěčenja města ze škričkowanskim poskićerjom. Wona bě tohodla wobydlerski rozsud nastorčiła.
Nadróžne daty digitalnje składować
Radwor (SN/MkWj). Policija je přepytowanja nastupajo powaleny swjaty křiž mjez Kamjenej a Lutobčom zakónčiła, dokelž skućićelow namakać njezamó. Wo tym je Radworska wjesnjanostka Madeleine Rentsch na posedźenju gmejnskeje rady minjenu srjedu informowała. Gmejna chce so nětko sama wo wuporjedźenje křiža starać. Próstwu wo pjenježnu pomoc su mjeztym Załožbje za serbski lud zapodali. Njeznaći běchu křiž njedaloko wopomnišća za zničeny statok Hronow powalili.
Gmejnscy radźićeljo su na swojim posedźenju w sportowej a wjacezaměrowej hali „Slavia“ tomu přihłosowali, zo přistupi gmejna „Digitalnej integraciskej platformje za nadróžne daty“. Z njej móža wšitke dróhi nastupowace daty, mjez druhim tež wobstatk štomow, registrować. Krajnoradny zarjad 90 procentow nastawacych kóštow spěchuje. Gmejna dyrbi 4 700 eurow, rozdźělene na štyri lěta, přinošować. Nimo toho wobzamknychu zapadnu fasadu gratownje Radworskeje wohnjoweje wobory ponowić.
Policija (17.05.21)
W parkowanskim domje znjezbožił
Budyšin. Ćežko zranił je so předwčerawšim 14lětny hólc w parkowanskim domje na Budyskej Wonkownej Lawskej. Kaž policija rozprawja, bě wón na třěchu domu zalězł a přez swětłowy šacht pjeć metrow w schodźišću do hłubiny padnył. Alarmowane wuchowanske mocy so wo znjezboženeho na městnje starachu a dowjezechu jeho do chorownje. Mjeztym wón hižo w žiwjenskim straše njeje. Kak je so njezbožo dokładnje stało, policija nětko přepytuje. Pomhać naležnosć rozrisać móhli młodostni, kotřiž běchu ze 14lětnym hromadźe w parkowanskim domje.
