Radźićeljo so schadźuja

srjeda, 14. apryla 2021 spisane wot:

Chrósćicy. Nakup mustwoweho transportera za Chróšćansku wohnjowu woboru budźe jedna z temow přichodneho posedźenja tamnišeje gmejnskeje rady jutře, štwórtk, w 19 hodź. w sydarni gmejnskeho a kulturneho centruma. Dale chcedźa radźićeljo přepodać nadawk wutworić w Serbskej zakładnej šuli Chrósćicy WLAN-syć z controllerom a firewall. Nimo toho zaběraja so z dalšim wu­twarom dróhi wot Nuknicy do Lejna, za čož ma so zrěčenje za inženjerske wukony wotzamknyć. Wobydlerjo su wutrobnje přeprošeni.

Zwukowu instalaciju zakónča

Rakecy. Z dołhej nocu z psalmom 23 zahaji so zakónčenje spirituelneje zwukoweje instalacije w Rakečanskej ewangelsko-lutherskej cyrkwi. Dźakny nyšpor pjatk, 16. apryla, započnje so w 19 hodź. Hač do 23.06 hodź. budźe Boži dom přistupny. Pozadk njewšědneho časa je, zo wopřijima psalm 23 šěsć štučkow. Projekt wostanje hač do 18. apryla słyšeć.

Spodobne ideje w domje zetkanja

srjeda, 14. apryla 2021 spisane wot:

Wojerecy (SiR/SN). Kreatiwita a improwizacija stej we Wojerowskim domje zetkanja často prašanej. Tele wužadanje sobudźěłaćerjo tafle, mebloweje dźěłarnje, poliwkoweje kuchnje, šwalčernje a na taflowej zahrodźe nimale wšědnje zmištruja, zo móhli potrěbnym pomhać. Mjez druhim wužiwaja plahowane wudźěłki ze zahrodki, zo móhli poskitk rozšěrić a ludźom stajnje strowe jědźe warić.

Wokoło domu zetkanja njestaraja so jenož wo wonkowne připrawy, ale wu­tworjeja krok po kroku tež zelenu rjadownisku rumnosć. Nimo toho nastawaja w zhromadnym dźěle stajnje zaso małe optiske akcenty, kaž samozhotowjene rostlinske oazy w formje šalki. Za to trěbne su „jenož“ fundament, awtowa wobruč, někotre šruby, barby a tróšku wušiknosće. Zo so jim ideja nawodnicy domu Madlen Krenz spodoba, su sobudźěłaćerjo a wopytowarjo hižo wobkrućili. Kerstin Bähr so nětko wo rostliny w zahrodce stara. Zelowa fachowča so hižo na wodźenja wjeseli, kotrež budu nadźijomnje bórze zaso móžne.

Chwala sej šćěpjensku akciju

srjeda, 14. apryla 2021 spisane wot:

Swojim wobydlerjam puć do Lubijskeho centruma zalutowali

Slepo (CK/SN). Swój najrjeńši narodninski dar mjenowaše starša rentnarka minjenu njedźelu šćěpjenje přećiwo koronje w Slepjanskim Serbskim kulturnym centrumje (SKC). Tónle dźak wuži tamniši wjesnjanosta Jörg Funda (CDU) na wčerawšim posedźenju gmejnskeje rady za prěni rezimej.

Towarstwa sprawnje spěchować

srjeda, 14. apryla 2021 spisane wot:

Sportowe a kulturne towarstwa su wažny stołp towaršnostneho žiwjenja kóždeje komuny. Toho su sej tež we Łazowskej gmejnje wědomi a spytaja tuž tajke cyłki podpěrać.

Łaz (AK/SN). Zaměrnje spěchować chce gmejna Łaz přichodnje swoje sportowe a dalše zjednoćenstwa. Jednohłósnje wobzamknychu radźićeljo na swojim wčerawšim posedźenju wustawki wo spěchowanju sporta a towarstwoweho žiwjenja. „Runje towarstwa wukonjeja wažne dźěło za sport, za hladanje dźěći a młodostnych kaž tež za zachowanje kulturneho žiwjenja“, podšmórny wjesnjanosta Thomas Leberecht (CDU). „Tónle angažement chcemy hódnoćić.“ Zakład je sprawne a wuwažene spěchowanje. Na te wašnje chce Łazowska gmejna čiłemu towarstwowemu žiwjenje přinošować.

Kaž nawróćace so baćony a žołte narcisy słuša tež podlěsk do nalětnich dnjow. Njewuhladaš jón jenož we Łazkowskim lěsu abo w Lipju w Pančicach-Kukowje, ale runje tak w parku Smochčanskeho kubłanišća swjateho Bena. Nalětnje přechodźowanje so potajkim tež tam zadani, ćim bóle, hdyž budźe zaso trochu ćoplišo. Foto: SN/Hanka Šěnec

Zběhanka na nowej pěstowarni

srjeda, 14. apryla 2021 spisane wot:
Na twarnišću noweje Gołkojčanskeje pěstowarnje chcedźa jutře zběhanku swjećić. ­Korony dla wšak budźe wona jenož w małym ramiku, kaž z gmejnskeho zarjadnistwa rěka. Z nowotwarom reaguja na přiběrace ličby dźěći w gmejnje a podpěruja wobstejace pěstowarnje, kotrež su wućežene. Na 1 146 kwadratnych metrach nastawa po informacijach gmejny moderne přebywanišćo za 80 dźěći a 13 kubłarkow. Twarjenje ma jenož jedyn poschod a je tuž bjez zadźěwkow. Pěstowarnja změje tři skupinske a jednu wjacezaměrowu rumnosć, kotrež budu ze zemskej ćopłotu tepjene. Nowotwarej su 2,82 milionow eurow spěchowanskich srědkow přewostajili. Foto: Michael Helbig

Rozsudy dwělomne

srjeda, 14. apryla 2021 spisane wot:
Wo rozsudach kołowokoło koronowych škitnych postajenjow móžeš zawěrno rozdźělneho měnjenja być, někotre pak ja mjeztym woprawdźe hižo njerozumju. We Wochožanskim parku błudźenkow trjebaš negatiwny koronowy test, chceš-li so tam wuchodźować. Park je tak wulki, zo lědma někomu bliže hač dźesać metrow přińdźeš. Kak ma so tam něchtó natyknyć, a to hišće wonka? Wčera popołdnju dyrbjach w Kamjenskim OBIju něšto wobstarać. Nahubnik je tam wězo tež předpisany. Ale hewak? Ludźo chodźa nutř a won, zetkawaja so na chódbach mjez polcami, dadźa so wot předawarjow poradźować a sej pomhać a nastupja so skónčnje jedyn po druhim při kasy. Nic zo mje něchtó wopak rozumi: Wjeselu so, zo je znajmjeńša OBI hišće wočinjeny. Natyknyć pak móžeš so tam zawěsće wjele spěšnišo hač we wulkim parku pod hołym njebjom. Knježerstwo pak nima lěpše ideje, hač zo w nocy dom abo bydlenje wopušćić njesměš. Marian Wjeńka

Wulki zajim – snadne dochody

srjeda, 14. apryla 2021 spisane wot:
Tuchwilu staraja so w Błohaščanskej zwěrjatowni wo poměrnje mało kóčkow, psow, nuklow a wozdobnych ptakow. Přičina je pandemije dla wulke naprašowanje za domjacymi zwěrjatami. Pjenjezy wšak přiwšěm wyše nimaja. Nawopak: Zwěrjaca pensija, kotraž najwjetši dźěl dochodow zaruča, wokomiknje wulce prašana njeje. Tež dary njestajnych wopytowarjow tele dny skerje snadnje dochadźeja. Dohromady nałožuja něhdźe 205 000 eurow wob lěto, zo bychu na přikład skótnych lěkarjow, picu a mzdu sobudźěłaćerjow zapłaćili. Štóž chce instituciju podpěrać, ma k tomu mjez druhim přez nakup na platformje gooding.de přiležnosć. Foto: SN/Hanka Šěnec

Krótkopowěsće (14.04.21)

srjeda, 14. apryla 2021 spisane wot:

Wysoka incidenca dale traje

Budyšin. Wo dalšich jědnaće smjertnych padach w zwisku z koronawirusom je Budyski wokrjes wčera informował, nimo toho bě 16 nowonatyknjenjow. RKI zdźěli dźensa rano za minjene sydom dnjow 232,5 infekcijow na 100 000 wobydlerjow. 134 infekcijow a šěsć zemrětych zwěsćichu hač do wčerawšeho w Zhorjelskim wokrjesu. Tam wučinja aktualna incidenca po RKI 189,1.

Kandidatow nominowali

Lipsk. Jury za Myto Lipšćanskich knižnych wikow je mjena 16 kandidatow za wuznamjenjenje wozjewiło. Za beletriju su to Iris Hanika („Echos Kammern“), Judith Hermann („Daheim“), Friederike Mayröcker („da ich morgens und moosgrün. Ans Fenster trete“), Helga Schubert („Vom Aufstehen: Ein Leben in Geschichten“) a Christian Kracht („Eurotrash“). Přepodać chcedźa myto 28. meje.

Wjace studijnych městnow

Policija (13.04.21)

wutora, 13. apryla 2021 spisane wot:

Do traktorow so zadobyli

Kubšicy. Tójšto škody načinili su njeznaći minjeny kónc tydźenja na terenje firmy w Kubšicach. Tam zadobychu so do šěsć traktorow, kotrež stejachu pod hołym njebjom a w halach. Z nich pokradnychu jězdźidłowe kompjutery kaž tež GPS-nastroje. Wěcnu škodu trochuja na něhdźe 15 000 eurow. Hódnota pokradnjenych wěcow wučinja na wšě 80 000 eurow. Fachowcy zawěsćichu slědy, a kriminalisća přewzachu přepytowanja.

Kolesowar smjertnje znjezbožił

Biskopicy. Rjane wjedro je předwčera­wšim mnohich kolesowarjow won wabiło. Bohužel je při tym tež k njezbožam dóšło. W Biskopicach je 69lětny muž z dotal njeznateje přičiny z kolesom padnył, jako po Ramnowskim puću jězdźeše. Wuchowanske mocy dowjezechu jeho do chorownje, hdźež muž na sćěhi zranjenjow zemrě. Při Parcowskim jězoru je so 77lětna ćežko zraniła. Jeje mandźelski jědźeše před njej a dyrbješe zaborzdźić, štož žona přepozdźe pytny a padny. Ju dyrbjachu do chorownje dowjezć.

Serbska debata

nowostki LND