Z fantaziju a wulkej prócu hotuja so w Běłowodźanskej powšitkownowužitnej towarš­nosći za spěchowanje dźěła a powołanja na bórze zahajace so adwentne wiki. Jacqueline­ Umlauf móže tam zhromadnje ze sobuwojowarjemi swoje kreatiwne ideje zwoprawdźić. Prěnje wiki zahaja 30. nowembra we Wuskidźi. Foto: Joachim Rjela

Gmejnske pjenjezy poćežene

štwórtk, 08. nowembera 2018 spisane wot:

Najebać dosć dobre hospodarske połoženje w swobodnym staće maja komuny wulku lubu nuzu, zo bychu w běhu lěta ze swojimi pjenjezami wušli. Kóžde přidatne poćežowanje je hižo mała katastrofa.

Trjebin (AK/SN). Wulku sumu přemysłoweho dawka dyrbi gmejna Trjebin energijowemu koncernej Vattenfallej za lěto 2010 wróćić. Kaž přisłušny financny zarjad zdźěli, jedna so wo 141 350,28 eurow. „Běchmy so nadźijeli, zo budźemy přelutowani, štož so bohužel stało njeje. Hižo za štyri tydźenje dyrbimy pjenjezy přepokazać“, praji wjesnjanosta Waldemar Locke (CDU) na wčerawšim posedźenju gmejnskich radźićelow.

Hladajo na wobmjezowane srědki w komunalnej kasy drje budźe za Trjebinsku gmejnu jara ćežko wulku sumu přepokazać. Po słowach wjesnjanosty chcedźa tuž połoženje najprjedy dokładnje analyzować. Kaž Waldemar Locke dale­ rjekny, dyrbi tež Slepjanska gmejna Vattenfallej přemysłowe dawki wróćić.

Nadawki za šulu přepodali

štwórtk, 08. nowembera 2018 spisane wot:

Na wupisanju twarskich dźěłow so jenož mało firmow wobdźěliło

Slepo (CK/SN). Dalše nadawki za twar Slepjanskeho němsko-serbskeho šulskeho centruma je tamniša gmejnska rada zawčerawšim na swojim posedźenju přepodała. Rozsud, štó měł molerske dźěła přewzać, běchu na oktoberskim posedźenju wotstorčili, dokelž bě rozdźěl wot najtuńšeho hač k přichodnemu poskitkej wot 211 000 do 342 000 eurow přewulki. Kaž nawoda twarskeho wotrjada gmejny Steffen Seidlich rozłoži, je gmejna jako twarski knjez winowata přičiny za to wujasnić. Při tym so wukopa, zo bě firma z najtuńšim poskitkom wopak kalkulowała.

Běrny w mnohich wariantach

štwórtk, 08. nowembera 2018 spisane wot:

Droždźij (CS/SN). Tysacy wopytowarjow su minjenu njedźelu běrnjacy swjedźeń w Droždźiju pola Wósporka wopytali. Tamniše domizniske towarstwo je woblubowane zarjadowanje derje přihotowało a mnozy wjesnjenjo pomhachu, zo by so wšo radźiło. Wósporski měšćanosta Jürgen Arlt (njestronjan) jich angažement chwaleše, mjez druhim to, zo bě dosć parkowanskich městnow.

W srjedźišću swjedźenja stejachu wězo běrny. Pilne žony so wo to starachu, zo móžachu sej je wopytowarjo jako poliwku, plincy, kisałe běrny abo z twarohom a lanym wolijom popřeć. Sobudźěłaćerjo Hrodźišćanskeje agrarneje wikowanskeje towaršnosće neple po měchach předawachu a čłonojo młodźinskeje wohnjoweje wobory je k awtam kupcow nošachu. Nimo toho je něhdźe 50 wikowarjow swoje twory poskićało.

Hinak hač w zašłych lětach sej wopytowarjo Droždźijski hrodowy park lětsa wobhladać njemóžachu. Nowy wobsedźer hrodu bě wokoło swojeje ležownosće płót stajił.

W Běłowodźanskej chorowni su wčera nowu paliatiwnu staciju zajimcam předstajili. Jeje šeflěkar Cyril Hančik z Radworja (nalěwo) witaše tam mjez druhim nawodu Ochranowskeho stacionarneho hospica Renéja Rixratha a nawodnicu tamnišeje hladanskeje słužby Kathrin Dwornikiewicz (wotprawa), kotrajž přepodaštaj jemu Ochranowsku hwězdu. Foto: Joachim Rjela

Krótkopowěsće (08.11.18)

štwórtk, 08. nowembera 2018 spisane wot:

Seehofer přijědźe

Berlin/Budyšin. Zwjazkoweho nutřkowneho ministra Horsta Seehofera (CSU) wočakuja póndźelu na oficialne wo­tewrjenje zhromadneho slědźenskeho a kompetencneho centruma zwjaz­koweje a sakskeje policije w Budyšinje. Sakski nutřkowny minister Roland Wöller (CDU) chce Seehofera přewodźeć.

Dalšu kandidatku nominowali

Mjedźojz. Patricia Wissel je we wólbnym wokrjesu 52 (Budyšin 1) znowa direkt­na kandidatka CDU za klětuše wólby Sakskeho krajneho sejma. 44 čłonow CDU je tuchwilnu zapósłanču na wólb­nowo­krjesnej zhromadźiznje wutoru w Mjedźojzu (Medewitz) ze 97,7 procentami přihłosowanja wuzwoliło. „Mi je wažne za ludźi w swojim domizniskim wólbnym wo­krjesu skutkować, jim pomhać a jich podpěrać“, rjekny Wissel.

Zastupne lisćiki jara požadane

Policija (08.11.18)

štwórtk, 08. nowembera 2018 spisane wot:

Přepytuja morjenja dla

Budyšin. Po wšěm zdaću hrózbny njeskutk sta so wčera w Budyšinje. Kriminalna policija je wječor přepytowanja podhlada morjenja dla zahajiła. Jako bě žona po dźěle do swojeho bydlenja na Karla Marxowej přišła, namaka tam swoju dźowku nježiwu. Přiwołany nuzowy lěkar móžeše jenož hišće smjerć 30lětneje zwěsćić.

W bydlenju 50lětneje maćerje bě to­horunja 32lětny žiwjenski partner jeje dźowki. Wón bě spytał sebje samoho morić. Nuzowemu lěkarjej pak so poradźi jeho wožiwić. Na to 32lětneho zajachu. Pod škitom policije dowjezechu jeho do chorownje. Při tym dyrbjachu muža sputać, dokelž so wón ze wšej mocu přećiwo wuchowanju­ wobaraše. Što bě so w by­dlenju dokładnje stało, dotal hišće znate njeje. Kriminalisća zawěsćichu slědy a dopokazanki. Statne rěčnistwo a komisija za mordarstwa pad přepytujetej.

Na wosadne popołdnjo

štwórtk, 08. nowembera 2018 spisane wot:

Bukecy. Na serbske wosadne popołdnjo ze superintendentom Janom Malinkom přeprošuje Bukečanska wosada sobotu, 10. nowembra, w 14.30 hodź. na Bukečansku wosadnu žurlu. Mjez druhim čita tam Marko Grojlich. K tomu poskića kofej a tykanc.

Wopominaja pogromowu nóc

Budyšin. Składnostnje 80. róčnicy pogromoweje nocy přeprošujetej Budyski zwjazk antifašistow a tudyši zwjazk Lěwicy na wopomnjenske zarjadowanje, kotrež wotměje so jutře, 9. nowembra, w 15 hodź. na Budyskim židowskim pohrjebnišću za parkowanišćom Röhrscheidtoweje kupjele w Strowotnej studni. Tam porěči Marja Michałkowa. Mužojo njech sej čapku sobu přinjesu. Na pogromowu nóc dopominaja tohorunja jutře w 19 hodź. w Budyskim klóštrje klarisow z wopomnjenskej nutrnosću.

Pokaza kolekciju debjenkow

Budyšin. Wustajeńca twórbow wuměłče Reginy Schmidt z Lawaldy je tuchwilu w Budyskej měšćanskej bibliotece widźeć. Tam předstaji wona jutře, pjatk, wot 15 do 18 hodź. swoju kolekciju debjenkow. Na to su zajimcy wutrobnje přeprošeni. Wustajeńca wostanje hač do 11. januara 2019 přistupna.

„Sergej“ na jewišću

Na lětušim Budyskim hodownym štomje, kotryž steji wot póndźele na Hłownym torhošću, budu so lětsa prěni raz Ochranowske hwězdy błyšćić a nic hižo jednore žehlawki kaž zašłe lěta. Dźensa započachu Burkhard Böhme a jeho kolegojo nimale 50 hwězdow připrawjeć. Lětuše 635. Wjacławske wiki traja wot 30. nowembra hač do 23. decembra. Foto: SN/Maćij Bulank

Dwěluja na časowym planje

srjeda, 07. nowembera 2018 spisane wot:

Łaz (AK/SN). Kónc lěta 2021 ma Hórni­kečanski jězor w dalokej měrje dosaně­rowany być. Zaměr Łužiskeje a srjedźoněmskeje towaršnosće hórnistwoweho zarjadnistwa (LMBV) je, zo ma jězor w kupanskej sezonje 2022 zaso přistupny być. To podšmórny wotrjadnik LMBV Gerd Richter na wčerawšim posedźenju Łazowskeje gmejnskeje rady.

W minjenych měsacach mějachu na wulkim twarnišću hnydom wjacore starosće. Sudniskeho jednanja dla so saněrowanske naprawy wo sydom měsacow přesunychu. Nimo toho njemóžachu mašinu za zhusćenje zemje dlěši čas zasadźić, dokelž bě w jězoru přemało wody. Mjeztym zo na wjacorych wotrězkach runočasnje­ dźěłaja, je wobłuk při zwjazkowej dróze B 96 nětko hotowy.

nawěšk

nowostki LND