Krótkopowěsće (13.08.15)

štwórtk, 13. awgusta 2015 spisane wot:

Mjenje zajimcow

Žitawa/Zhorjelc. 3 800 młodostnych je próstwu stajiło za studij na Wysokej šuli Žitawa/Zhorjelc. To je 200 mjenje hač loni. K wosebje prašanym studijnym směram słušeja znowa techniske studije. Přizwolenja za studij su zajimcy mjeztym dóstali. Za studijne směry z numerusom claususom maja so požadarjo hač do­­ 21. awgusta rozsudźić.

Nowa app za Hornju Łužicu

Budyšin. Pomoc za tury po Hornjej Łužicy předleži nětko jako nowa app za smart­phony a tablety. Wudało je ju Marketingowa towaršnoć Hornja Łužica-Delnja Šleska. Darmotna app z interaktiwnej kartu a mnohimi kolesowanskimi a pućowanskimi šćežkami ma tež poskitki­ za wólny čas. App je tohorunja w interneće přistupna.

Klumpaja wodu do Sprjewje

Choćebuz. Hladajo na dołho trajacu suchotu klumpa koncern Vattenfall wšědnje 600 milionow litrow dnowneje wody do Sprjewje. Jeje hładźizna drje pomałšo­ hač w druhich rěkach spaduje, wodu Sprjewje pak koncern trjeba, zo by milinarnje chłódźił.

Z beachvolleyballom dale šło

Policija (13.08.15)

štwórtk, 13. awgusta 2015 spisane wot:

Janšojce. Wot 25. julija pytaja za 15lětnej Susannu Göthel z Drježdźan. Wona bě w Janšojskim zarjadnišću projekt „Neustart“ zaměstnjena. Kaž policija dźensa zdźěli, je młodostna přebywanišćo do njeznateho směra wopušćiła. Zastojnicy nětko tež w Hornjej Łužicy za něhdźe 165 centimetrow wulkej, čerwjenowłosatej šwižnej holcu w čornym kožanym kabaće a čornych legginsach pytaja. Dotal ju tež po přepruwowanju kontaktnych adresow w Drježdźanach našli njejsu. Pokiwy přijimuje Choćebuska policajska direkcija pod telefonowym čisłom 0355/ 49 37 12 27.

Tři Hwězdy. Dokelž je wutoru popołdnju Peugeot, kotryž chcyše nalěwo na awtodróhu wotbočić, jemu napřećo přijěducemu VWjej předjězbu wzał, awće do so zrazyštej. 28lětna sobujěduca a tři dźěći w Peugeoće so lochko zranichu, 85lětna sobujěduca w VWju ćežko.

Swójbny dźeń w parku

štwórtk, 13. awgusta 2015 spisane wot:

Mały Wjelkow (SN). Prěni króć kooperujetej sakski krajny zwjazk Čerwjeneho křiža (DRK) a Małowjelkowski prazwěrjenc. Jutře, 14. awgusta, wotměje so w parku sawrierow swójbny dźeń, za kotryž maja tójšto atrakcijow za dźěći přihotowane. Na přikład móža sej hólcy a holcy chorobny wóz DRK wobhladać.

Mnohich doma hladaja

Budyšin (SN). Kaž zamołwići wikowanskeje chorobneje kasy (KKH) Budyskeho wokrjesa zwěsćeja, su přistajeni hladanskich słužbow w nadawku KKH potrěbnych w minjenych měsacach zwjetša doma zastarali. 72 procentow z wjace hač 56 000 hladanja potrěbnych su wukubłane sotry doma zastarali. Při tym leži domjace hladanje po zdźělenju Zwjazkoweho statistiskeho zarjada po dwěmaj třećinomaj w rukach přiwuznych, tamny dźěl zaručeja – zdźěla kompletnje – ambulantne słužby.

Specielne čaporowe wiki

Christoph Pötzsch, ordinariatny rada Drježdźansko-Mišnjanskeho biskopstwa, tamniši biskop Heiner Koch, Holger Zastrow, předsyda sakskeje FDP, Michael Weber, sobudźěłaćer biskopa Kocha a Peter-Paul Straube, rektor Smochčanskeho Domu biskopa Bena (wotlěwa) su wčera popołdnju nowu taflu při awtodróze A 4 njedaloko Słoneje Boršće poswjećili. Wšelake za to zamołwite instancy tuchwilu pruwuja, hač smě so tafla přichodnje ze serbskim napisom wudospołnić. Foto: Angelika Häneltowa

Pućiki po kěrchowje wuplestrowane

srjeda, 12. awgusta 2015 spisane wot:

Po tym zo bě biskop Joachim Reinelt ­lěta 1996 w Rakecach cyrkwičku Najswjećišej wutrobje Jězusowej poswjećił, njeje za tamnišich wěriwych dotal wužiwana kapałka w domje na Hłownej dróze hižo trěbna była.

Ralbicy (aha/SN). Michał Nawka, kiž bě mjeztym pjeć lět w Ralbicach z fararjom, je so hłownje wo zmóžnjenje trěbneho předewzaća starał a je tuž zhromadnje z wosadnej cyrkwinskej radu rozsudźił, wot wosady hižo njewužiwanu imobiliju předać. Runočasnje so w lěće 2010 dojednachu, pjenjezy z předanje wužiwać za plestrowanje pućikow na Ralbičanskim kěrchowje kaž tež městnosće před hłownym zachodom do cyrkwje. Dale sej předewzachu, wšitke kromy ze zornowcowymi kamjenjemi wusadźeć.

Dohromady je to nimale 1 000 kwadratnych metrow a k tomu wjac hač 300 metrow chódnikoweje kromy. Bohužel njeje předań Rakečanskeje imobilije telko wunjesła, zo móhli wšo zapłaćić. Přiwšěm je farar Nawka wobzamknjenje zwoprawdźił.

Maltezojo w słužbje chorych

srjeda, 12. awgusta 2015 spisane wot:

Dr. Blaicher: Dyrbimy plany prawidłownje měnjeć a přiměrjeć

Kamjenc (SN/mwe). W zašłosći steješe Kamjenska chorownja maltezow w fokusu zjawnych diskusijow, dokelž dyrbjachu tam słužbne plany a z nimi zwisowace dźěłowe hodźiny medicinskeho personala we wšelakich stacijach změnić. „Dyrbimy słužbne plany nastajnosći přiměrjeć, dokelž so tež pacienća měnjeja. Ludźo su dale a starši, a na to dyrbimy reagować“, jednaćel maltezow dr. Alex Blaicher Serbskim Nowinam rozłožuje, „to je cyle normalny proces, a we wobłuku toho smy słužbne plany nětko změnili. Mjeztym smy w tym nastupanju tež w konsensu ze sobudźěłaćerjemi. Ze stron medicinskeho personala njejsu tuž hižo žane wotewrjene prašenja.“

Inwestuja do dróhotwara a wobswětlenja

srjeda, 12. awgusta 2015 spisane wot:

Njeswačidło (aha/SN). Na wčerawšej zhromadźiznje Njeswačanskeje gmejnskeje rady bu dotalny a na zašłych wólbach znowawuzwoleny wjesnjanosta Gerd Schuster (CDU) wot zastupowaceho wjesnjanosty Norberta Brauna za zastojnstwo w přichodnej legislaturnej ­periodźe spřisahany a zawjazany.

Wobšěrnje wuradźowachu na to wo dalšich naprawach za spjelnjenje konsolidowanskeho plana. Jón schwalić bě wuměnjenje, zo móža lětuši hospodarski plan wobzamknyć. Wjesnjanosta Schuster skedźbni na trěbnosć, w přichodnymaj lětomaj pozitiwne wuwiće likwidnych srědkow zaručić. Hakle hdyž njejsu dalše móžnosće zalutowanja abo hdyž su wšitke móžne pozicije zwyšenja dochodow wučerpane, wusadźa wotpłaćowansku ratu za kredit. Radźićel Ingo Rienicke namjet wotpokaza, mějo jón za „wotstorkowanje, kotrež pod smužku ničo njewunjese“. Za trěbne zalutowanje we wjacorych pozicijach běchu sej radźićeljo přezjedni, zo bychu w přichodnymaj lětomaj wjac srědkow za inwesticije měli.

Traktor a synowa prasa zničenej

srjeda, 12. awgusta 2015 spisane wot:
Něhdźe we 18 hodź. paleše so wčera na zahonje mjez Rušicu a Porchowom synowa prasa. Z dotal njewujasnjeneje přičiny poča so syno w prasy palić a woheń so spěšnje rozpřestrěwaše. Wodźer traktora móžeše hišće z njeho skočić a wosta njezranjeny. Płomjenja z prasy přeskočichu na traktor, kotryž so tohorunja dospołnje zniči. Cyłkowna wěcna škoda wučinja něhdźe 300 000 eurow. Wohnjowi wobornicy z Halštrowa, Rušic a Protec woheń zhašachu. Foto: Rocci Klein

Krótkopowěsće (12.08.15)

srjeda, 12. awgusta 2015 spisane wot:

Wjace pšeńcy plahowali

Kamjenc. Sakscy ratarjo su lětsa wjace pšeńcy plahowali hač loni. Kaž statistiski zarjad w Kamjencu zdźěli, je so podźěl nalětnjeje pšeńcy wo 28 procentow a nazymskeje wo 0,6 procentow powjetšił. Pšeńcu plahowali su lětsa na cyłkownje 196 800 hektarach. Wona je najwažniša družina žita před ječmjenjom na 119 200 hektarach. Sakscy ratarjo wobdźěłuja lětsa dohromady 709 000 ha role.

Hłodowy stawk

Wojerecy. Hižo třeći dźeń někotři požadowarjo azyla we Wojerecach stawkuja a ničo wjac njejědźa. Chcedźa ćišć na zarjady wukonjeć, zo jich próstwy wo azyl spěšnišo wobdźěłaja. Zamołwići běchu jim rozsud w běhu třoch měsacow připowědźli, mjeztym čakaja hižo dlěje hač lěto. Wokrjesny wukrajny zarjad chcyše dźensa wo próstwje rozsudźić.

Tež w Čěskej na łosy skedźbnjeć

Policija (12.08.15)

srjeda, 12. awgusta 2015 spisane wot:

Budyšin. Póndźelu a wutoru w nocy je so w Budyskim a Zhorjelskim wokrjesu dohromady sydom króć paliło. Wohnjowi wobornicy dyrbjachu wotpadkowe tony runje tak kaž mjeńše lěsne wohenje hašeć. Palił je so tohorunja přirow mjez Rachlowom a Komorowom pola Kulowa. Policija tuka na to, zo bě tam něchtó žeh­liwu cigaretu do trawy ćisnył.

nawěšk

nowostki LND