Rakecy (JK/SN). Runja druhim gmejnam steja tež w Rakecach před wulkim wužadanjom, komunalne dróhi dale w dobrym a wužiwajomnym stawje dźeržeć abo je do tajkeho dóstać. Zo bychu to z wobmjezowanym etatom 76 000 eurow k spokojnosći wšitkich potrjechenych zdokonjeli, su sej prioritnu lisćinu nastajili. Po njej chcedźa postupować. Na minjenym posedźenju gmejnskeje rady je nawodnica twarskeho zarjada gmejny Martina Nytsch hromadźe z wjesnjanostu Swenom Nowotnym (CDU) lisćinu a naprawy k wobnowjenju abo wuporjedźenju mjenowanych dróhow předstajiła.
Wojerecy (SiR/SN). W bydlenju Stangec swójby we Wojerecach je lědma rumnosće, hdźež žane wobrazy njewisaja. Paleta motiwow saha wot wjelkow přez girafy hač ke kóčkam. Wosebitosć je, zo je Ramona Stange wšitke wobrazy sama lěpiła, molowała abo wušiwała, a to stajnje po hotowych předłohach. Najradšo pak wěnuje so wona technice diamond paintings. Při tym na kóždu płoninu wobraza, kotraž je z ličbu woznamjenjena, barbojte kamuški lěpi, podobnje principej molowanju po ličbach. Tohodla so 63lětna tež za wuměłču nima. „Tajke wobrazy móže kóždy zhotowić. Ja mam z toho prosće swoje wjeselo a so wot wšědneho dnja trochu wočerstwjam“, měni Wojerowčanka.
Wulkoždźarowska zakładna šula „Při Hórnikečanskim jězoru“ gmejnu Łaz hižo dlěši čas zaběra. Na swojim zašłym posedźenju su gmejnscy radźićeljo dalši twarski nadawk přepodali.
Łaz (AK/SN). Nutřkowne saněrowanje Wulkoždźarowskeje zakładneje šule „Při Hórnikečanskim jězoru“ dale postupuje. „To podšmórny twarski nawoda Łazowskeje gmejny Wolfgang Tietze na zašłym posedźenju tamnišeje gmejnskeje rady. „Hač do kónca zašłeho lěta smy šulske twarjenje nutřkownje dospołnje wuprózdnili. Nětko wěnujemy so elektrice, tepjenju a sanitarnemu wobłukej. Tak časowje derje w planje ležimy“, wuzběhny Tietze na naprašowanje radźićela Tina Starosty (CDU).
Wo dalšim postupowanju rěčałoj
Budyšin. Budyski wokrjes měješe wčera po RKI třeći dźeń za sobu incidencnu hódnotu nad sto. Krajny rada Michael Harig chcyše so ze sakskim ministerskim prezidentom Michaelom Kretschmerom (wobaj CDU) wo postupowanju nowych wobmjezowanjow dla dorozumić. We wokrjesu rozprawjachu wo jědnaće dalšich natyknjenjach z koronawirusom a wo dźewjeć smjertnych padach. Po RKI wučinja incidenca tu dźensa 95,7.
Křižerjo dale čakaja
Drježdźany. Sakski ministerski prezident Michael Kretschmer (CDU) je we wobłuku nowinarskeje konferency wčera podšmórnył, zo ma „za prawe, infekcisku žołmu přez jutry złamać. Sakska je na to pokazana kaž lědma dalši kraj.“ Što to za křižerjow woznamjenja, wo tym „dyrbi so woměrje rěčeć. Njesmě pak žane zhromadźenje syłow ludźi być.“
Zwěrjo coowa „sej wupožčić“
Drogi namakali
Radwor. W dwěmaj bydlenjomaj w Radworju je policija předwčerawšim popołdnju dohromady wjace hač 50 gramow drogow namakała. Jako prěnje wobhladachu sej popołdnju po pokiwje swědka bydlenje 36lětneho. Tam namakachu 32 gramow konopje, wšelake utensilije za jeje wužiwanje kaž tež tak mjenowany butterfly-nóž. Wječor wołachu zastojnikow wospjet do samsneho bydlenja. Nětko bě tam dalši 34lětny muž, kiž uniformowanym snadne mnóstwo marihuany přepoda. Na sudniski přikaz sej tež jeho bydlenje bliže wobhladachu a z pomocu psa dalše 22 gramow konopje namakachu. Policisća wšitko sćazachu a wupisachu chłostanske přizjewjenje. Kriminalna słužba Budyskeho rewěra so z padom dale zaběra.
Ralbicy (JK/SN). Wokomiknje je zaměrowy zwjazk za wopłóčki Při Klóšterskej wodźe bjez jednaćela. Dotalny wotrjadnik Jan Mikel jón tuchwilu komisarisce wjedźe. Zwjazk pak trjeba po smjerći wjelelětneho jednaćela Hansa-Joachima Schöny nowe wjednistwo abo podobne zjednoćenstwo, kotrež by wjednistwo zaměroweho zwjazka přewzało. Wo tym rozmyslowali su čłonojo gmejnskeje rady Ralbicy-Róžant na swojim minjenym posedźenju.