Njeměr a blady přiběraja

štwórtk, 22. oktobera 2015 spisane wot:

Kubšiska gmejna měła 64 čěkancow zaměstnić. To postara so na wsach komuny wo njeměr, předewšem dokelž njeje dotal wjac znate hač jenož ličba.

Kubšicy (CK/SN). Wobydlerjo Krakec a Poršic su jara znjeměrnjeni. Woni maja strach, zo w jich wsach ćěkancow zaměstnja, bjez toho, zo jich do toho informuja. „Dale a wjac bladow so šeri“, rozłoži gmejnski radźićel Jens Löser (Wolerske zjednoćenstwo Kubšicy) na wčerawšim wuradźowanju gmejnskeje rady. Wo njeměr na wsach postara kónc tydźenja wozjewjeny přehlad Budyskeho wokrjesa z kotrehož wuchadźa, kelko požadarjow azyla a ćěkancow chcył wokrjes wotnětka na gmejny a města rozdźělić. Bjezdwěla zaleži to tež na tym, „zo gmejnscy radźićeljo k tomu ničo rjec njemóža“, Jens Löser kritizuje. A tež wjesnjanosta Olaf Reichert (njestronjan) bě wo postajenej ličbje 64 požadarjow azyla za Kubšicy z nowin zhonił.

Z kontaktowym běrowom

štwórtk, 22. oktobera 2015 spisane wot:

Budyšin (SN). Zwjakarstwo „Budyšin wostanje pisany“ je nětko w Kamjentnym domje sprjewineho města kontaktowy běrow zarjadowało. Rěčne hodźiny su stajnje štwórtk wot 15 do 17 hodź. Docpějomny je běrow telefonisce pod čisłom 0171-9792101 abo přez e-mailku .

Kontaktowy běrow organizuje čěstnohamtske dźěło z ćěkancami w Budyšinje. Wón je wšitkim zajimowanym wobydlerjam města a jeho wokoliny přistupny, kotřiž so wo lěpšu integraciju ćěkancow prócuja abo jim pomoc poskićeja.

Kaž w nowinskej informaciji rěka, ko­ordinuje zarjadnišćo tež pomocne poskitki měšćanow z potrjebu we wulkich kwartěrach požadarjow azyla abo tu w bydlenjach zaměstnjenych ćěkancow. Tuchwilu pytaja za kmótrami za ćěkancow, kaž tež wosoby, kotrež chcyli jim znajomosće w němčinje sposrědkować.

W kontaktowym běrowje dźěłaja čestnohamtscy pomocnicy, kotřiž maja hižo tójšto nazhonjenjow w praktiskim dźěle z ćěkancami.

Krótkopowěsće (22.10.15)

štwórtk, 22. oktobera 2015 spisane wot:

Sakski šef PKK zajaty

Drježdźany. Policija je pozdatneho sakskeho regionalneho šefa zakazaneje kurdiskeje Dźěłaćerskeje strony PKK zajała. 44lětneho dosahnychu jeho wčera při raciji w Drježdźanach, kaž statne rěčnistwo dźensa zdźěli. Jemu wumjetuja čłonstwo we wukrajnej terorowej organizaciji. Dotal bě 44lětny regionalny nawoda w Hannoveru, doniž njepřińdźe do Sakskeje.

„Ostalgija“ tež w Čěskej

Praha. Na teritoriju bywšeje NDR rozšěrjene nastajenje k tradicionalnym produktam z časa do lěta 1990 je tež w Čěskej republice přitomny. Dźeń a wjac předewzaćow spyta tole wužić. Tak je předawarnja Lidl hižo druhi raz wosebity tydźeń ze žiwidłami socialistickeho časa w „originalnym“ zapakowanju přewjedła. Zajim kupcow wočakowanja přetrjechi.

Sakske hospodarstwo robustne

Policija (22.10.15)

štwórtk, 22. oktobera 2015 spisane wot:

Porchow. Hnydom dweju paduchow awtow je policija wčera na awtodróze A 4 pola Porchowa lepiła a zajała. Při kontroli BMWja, kotryž bě do směra na Zhorjelc po puću, zwěsćichu zastojnicy mnoho dopokazow na jězdźidle w hódnoće wjac hač 50 000 eurow, zo bě wone pokradneje. 35lětneho šofera zajachu.

Krótko na to kontrolawachu zastojnicy w Zhorjelcu při hranicy k Pólskej čorny Audi A 5. Při tym so wukopa, zo je 33lětny šofer prawdźepodobnje pomocnik paducha BMWja był. Policja tež jeho zaja.

Šulerki a šulerjo Serbskeho šulskeho a zetkawanskeho centruma Budyšin změja wotněka na dworje swojeho kubłanišća tróšku wjac městna. Sobudźěłaćerjej Bónječanskeje (Binnewitz) zahrodoweje a krajinowuhotowarskeje firmy Zwahr, André Stieglitz a Martin Breske (wotlěwa), staj tele dny někotre kerčizny na dworje wotstroniłoj a městno wuplestrowałoj. Foto: SN/M. Bulank

Jara rozdźělne wuměnjenja

srjeda, 21. oktobera 2015 spisane wot:

Na přeprošenje komuny Prožym je Njebjelčanski wjesnjanosta Tomaš Čornak (CDU) wo nazhonjenjach swojeje gmejny nastupajo samozastarowanje z alternatiwnymi energijemi přednošował.

Prožym/Njebjelčicy (HS/SN). Wobydlerjo Wjelčanskeho měšćanskeho dźěla Prožym chcychu njedawno wot Njebjelčanskeho wjesnjanosty Tomaša Čornaka zhonić, kotre nazhonjenja ma jeho gmejna ze samozastarowanjom z milinu z alternatiwnych energijow. Prožym je runja Njebjelčicam čłon Krabatoweho towarstwa, a tak sej mjez sobu pomhaja.

Na wjac pacientow so nastajić

srjeda, 21. oktobera 2015 spisane wot:

Wojerowski jězorinowy klinikum solidnje dźěła

Wojerecy (AK/SN). Jězorinowy klinikum we Wojerecach nastaja so na přiběracu ličbu staršich pacientow. „W juniju smy nowu dnjowu kliniku geriatrije wotewrěli. Šěsć tydźenjow pozdźišo běchu wšitke městna w njej wobsadźene. To je dobre wuwiće, podšmórnje jednaćel Jörg Scharfenberg. Z wutworjenjom geriatrije je klinikum rjad twarskich naprawow zakónčił, nětkole chcedźa so předewšěm wobsaham domu wěnować.

Wot spočatka měsaca maja we Wojerecach hygienikarja přistajeneho. Wón rjaduje w domje naležnosće hygieny. Nuzowu­ přijimarnju chcedźa na samostatny wobłuk wuwić. Tak móhli tam fleksibelnišo dźěłać. „Znowa rjadowali smy gynekologiju. Wot 1. oktobra wuńdźemy na staciji bjez honorarnych lě­karjow. Přichodnje zaručamy zastaranje ze swó­jskimi mocami. Nowy šeflěkar započnje­ klětu 1. januara dźěłać“, rozłožuje Jörg Scharfenberg zwjeselace wu­wiće.

Klětu dźeń wotewrjenych duri w Drobach

srjeda, 21. oktobera 2015 spisane wot:

Radwor (SN/MkWj). Zarjadnistwo Radworskeje wyšeje šule „Dr. Marja Grólmusec“ dóstanje nowy kompjuter a moderny serwer. Tole su gmejnscy radźićeljo na swojim wčerawšim posedźenju wobzamknyli. Tuchwilu wužiwany kompjuter pochadźa z lěta 2003 a njeje dźensnišim žadanjam hladajo na organizowanje šulskeho wotběha hižo zrosćeny, kaž radźićeljo a hosćo zhonichu. Žadanje jednoho z radźićelow, šulu hladajo na stajnje zaso trěbne wudawki gmejny radšo do nošerstwa wokrjesa přepodać, žadyn wothłós njenańdźe.

Wjace diskusije zbudźi plan wobhospodarjerjow składa plastowych wotpadkow w Drobach. Tam chcedźa tři nowe hale twarić, zo móhli wotběhi lěpje organizować. Přitomni wobydlerjo Drobow so hóršachu, zo njemóža w lěću swoje terasy wulkeho mnóstwa muchow dla hižo wužiwać. Zamołwići skedźbnichu na swoje prócowanja, muchi z wotpowědnymi srědkami zaničować. Klětu nalěto chcedźa na dźeń wotewrjenych duri do zawoda přeprosyć.

Z fararku Giese so rozžohnowali

srjeda, 21. oktobera 2015 spisane wot:
Mnozy wěriwi z Blunja, Lejnoho, Ptačec a wokolnych wsow su so minjenu njedźelu z fararku Anju Giese (nalěwo) rozžohnowali, mjez nimi Blunjanski wjesny předstejićer Udo Zippack (naprawo). 39lětna, z Berlina pochadźaca dušepastyrka, nastupi farske městno w Ebers­waldźe-Finowje. Wot lěta 2012 bě wona Blunjanske wosadne wsy zastarowała. Při tym­ je mnohe serbske tradicije Wojerowskeje kónčiny kaž tohorunja­ křižerjow zeznała a tež tón abo tamny serbski wobrot nawuknyła. Štó ju w Blunju naslěduje, dotal znate njeje. Foto: Ramona Wowčerjowa

Krótkopowěsće (21.10.15)

srjeda, 21. oktobera 2015 spisane wot:

Přednošuje wo Gersdorfje

Halle. Konferenca wo zemjanskim angažemenće za čas pietizma z genderskeho wida wotměwa so wot dźensnišeho hač do soboty w Halle. Stawiznarka Lubina Malinkowa přednošuje tam wo skutkowanju hrabje Friedricha Caspera von Gersdorfa na dobro Serbow. Gersdorf bě w prěnjej połojcy 18. lětstotka šule za Serbow załožił, za wukubłanje serbskich fararjow so zasadźał a ćišć serbskich nabožnych spisow podpěrał.

Budyski eksponat w New Yorku

Budyšin/New York. Drjeworězba Albrechta Dürera z Muzeja Budyšin z lěta 1507 je nětko w New-Yorkskim Metropolitan Museum of Art widźeć. Dürer tworješe dohromady sydom mustrow za tekstilije jako drjeworězbu po předłoze Leonarda da Vincija. Jako jenička je wona w New Yorku Budyske wustajena, tamne jenož jako ćišć.

Wutupjene zwěrjata tu zaso su

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND