Clemens Bejmak hlada čestnohamtsce sadowcy na sadowcowej łuce Njebjelčanskeje gmejny pola Miłoćic. K tomu pyta nětko zajimcow, kotřiž chcyli jeho podpěrać.

Miłoćicy. Dohromady 110 štomikow rosće­ na sadowcowej łuce pola Njebjelčic. Su to jabłučiny, krušwiny, wišniny a slowčiny ze zdźěla eksotiskimi mjenami, wšo historiske a nimale pozabyte družiny. „We wšitkich padach jedna so wo wysokozdónkowe štomy, kotrež sym wotpowědnje jich družinje wobtřihał“, rozłoži Clemens Bejmak z Miłoćic. Wot měrca so 30lětny štomowy zahrodnik čestnohamtsce wo Miłočansku sadowcowu łuku a wo dalše sadowcy na teritoriju Njebjelčanskeje gmejny stara.

Statistika z ličbami, kotrež putaja

pjatk, 15. meje 2015 spisane wot:

Na posedźenju Zhorjelskeho wokrjesneho sejmika tutu srjedu předpołožichu wokrjesnym radźićelam dokument z titlom „Socialna struktura“, kiž zaběra so z aktulanymi ličbami wokrjesneho wuwića.

Zhorjelc (HA/SN). Do statistiki zapřijatych je njemało ličbow a faktow, kotrež předstajeja wobšěrnu socialnu strukturu městow Běła Woda, Niska, Zhorjelc, Žitawa a Lubij kaž tež města wobdawacych kónčin. Při tym přirunuja so w dokumenće jednotliwe gmejny z městami. Dale su tam zapisane a napřećo stajene wotpowědne ličby k druhim dwanaće wokrjesam a wulkim městam po cyłej Sakskej. Z tohole atlasa, kotryž je po lěće 2012 hižo druhi, hodźi so mjez druhim wučitać, kak je so wobydlerstwo změniło. Wokrjes ma tuchwilu něhdźe 264 000 wobydlerjow Tole je porno lětu 1990 wo 102 000 mjenje. W Slepjanskej gmejnje na přikład je w zańdźenych sydom lětach­ wobydlerstwo wo něhdźe 150 wot 2 800 na 2 650 ludźi wotewzało.

Tež najmjeńši so wubědźowali

pjatk, 15. meje 2015 spisane wot:
W Róžeńće zetkachu so srjedu nawječor k mejemjetanju. Nimo młodźiny a staršich běchu tež ći najmjeńši angažowani a zwjeselichu přihladowarjow z rjanymi rejemi w serbskej narodnej drasće (na foće). Mejski kral bu lětsa Titus Žur, kiž wuzwoli sej Aqui­nu Žurec za swoju njewjestu. Druhi běh dnja, při kotrymž so najmjeńši kadlojo­ wsy wubědźowachu, doby Linus Hrjehor. Wón wuzwoli sej Hańžu Handrikec za swoju mejsku kralownu. Foto: Gloria Žurec

Gmejny wojuja za brunicu

pjatk, 15. meje 2015 spisane wot:

Kulow (SN). Ze zhromadnym apelom k zawěsćenju přichoda brunicy w Braniborskej a Sakskej wobroćichu so města a komuny Kulow, Halštrowska Hola, Łuty, Łaz, Sprjewiny Doł, Wojerecy a Nje­dźichow na zwjazkowe knježerstwo.

Wone wuprajeja so přećiwo planam zwjazkoweho knježerstwa, z kotrymiž chce wone klimowe cile docpěć. Namjety ze zwjazkoweho ministerstwa za ho­spodarstwo měrja so na to, milinarnje wotpinyć, kotrež su starše hač 20 lět. Hlada­jo na hrožace sćěhi za wšón region, kotrehož wuwiće je z jich perspektiwy dołhodobnje z dalewob­staćom bruni­coweje energije zwjazane, sćěhowachu komuny iniciatiwu Wojerowskeho měšćanosty Stefana Skory (CDU) a podpisachu list kanclerce Angeli Merkel (CDU). „No­chcemy so zmysłapołnej, naslědnej a wuspěch lubjacej energijowej změnje zawrěć. Namjety ze zwjazkoweho ministerstwa za hospodarstwo poćežuja přede­wšěm brunicowu industriju, štož mamy za wopačne a njekmane“, rěka w dźensa wotpósłanym lisće.

Werner Müller

pjatk, 15. meje 2015 spisane wot:
Hudźbne duwo Arek Frog & Elina Sinisalo přewodźeše wčerawši dźeń muži na Radworskej kupje. Tam pak njejsu jenož muži wita­li, ale tež tójšto swójbow, kotrež sej hrochowu poliwku Měrćina Pawluša a jeho syna Stefana (wotlěwa) słodźeć dachu. Molowan­ski róžk za dźěći a samopječeny tykanc poskitk na kupje skulojćištej. Foto: Werner Müller

60 lět po kwasu

pjatk, 15. meje 2015 spisane wot:
Róžownik njeje jenož dźensa najwoblubowaniši měsac kwasowanja. Tomu bě po wšěm zdaću tež hižo před 60 lětami tak, jako so Madlena a Jurij Rynčec z Baćonja zwěrowaštaj. K jeju dejmantnemu jubilejej jimaj minjenu njedźelu mnozy wjesnjenjo gratulowachu a jimaj čestnu pletwu nawichu. Foto: Margit Smolina

Bjesada tónraz na Dubiču

pjatk, 15. meje 2015 spisane wot:

Rakecy. Poprawom zetkawaja so čłonojo Rakečanskeje Serbskeje Bjesady w „Zejlerjowej stwě“ Rakečanskeje farskeje bróžnje. Minjenu srjedu pak schadźowaše so skupina na Dubiču pola Wysokeje při hońtwjerskej budce Wernera Sporki. Při rjanym wjedrje nawječor w lěsu zaběrachu so ze serbskimi hesłami a tekstami. Bjesadu nawjedowaše dr. Günter Holder. Nimo hodźiny serbšćiny dorěčachu sej přichodne serbske ewangelske zarjadowanja, tak serbski ewangelski cyrkwin­ski dźeń. Naposledk sćěhowaše serbski Wótčenaš. Z lóštnej bjesadu wječor w lěsu wuklinča.

Skupina zajimcow zetkawa so prawi­dłownje jónu wob měsac, zo bychu so ze serb­šćinu zaběrali a so w njej wukmanjeli. Gramatika hraje při tym wulku rólu, dokelž jenož nĕkotři serbšćinu jako maćeršćinu wobknježa. Za swoje zetkanja wužiwaja serbske wučbnicy, powědančka a CD Rěčneho centruma WITAJ „Serbsce lochko“.

Krótkopowěsće (15.05.15)

pjatk, 15. meje 2015 spisane wot:

Započnje wutwarjeć

Budyšin. Jako „ebay-wjes“ znaty statok pola Libonja smě so na prózdninski a wja­cegeneraciski statok wutwarić. Gmejna Hodźij je wobsedźerjej wotpowědne twar­ske prawo přizwoliła. Wobsedźer Andreas Reitmann ma tole za wažny měznik planowanja. Nětko chce započeć štyristronski statok energijoawtarknje wutwarjeć.

Próstwa wo zakaz dóšła

Karlsruhe. W dalšim postupowanju wo zakazanje strony NPD su do Zwjazkoweho sudnistwa w Karlsruhe trěbne podłožki krajow w podatym času dóšli. Druhi senat bě kraje w měrcu napominał, hač do 15. meje jasne dopokazy cofnjenja informantow z nawodnych kruhow NPD předpołožić. Prěnju próstwu wo zakazanje NPD w lěće 2003 bě sudnistwo wotpokazało.

Prezentuja němsku literaturu

Praha. W čěskej stolicy su so wčera tradicionalne wulkowiki Swět knihi zahajili. W tutym wobłuku so mjeztym hižo wosme lěto zhromadnje literatura němsce rěčacych krajow pod mjenom „Das Buch“ předstaja. Mjez čitacymi awtorami wusahuje lětsa wosebje Thomas Brussig, kiž swoju nowu knihu „Das gibts in keinem Russenfilm“ předstaji.

Policija (15.05.15)

pjatk, 15. meje 2015 spisane wot:

Njezbožo na „dnju muži

Sernjany. Njerjany wukónc měješe na wčerawšim „dnju muži“ jězba z konjacym zapřahom w Sernjanach. 59lětny wodźer zapřaha chcyše tam krótko do 18 hodź. na hłowny puć wotbočić, hdźež 55lětny pomocnik na wobchad kedźbowaše. Jako pomocnik zaso na pomału jěducu kuču skoči, so wón wobsuny a padny. Při tym so ćežko zrani, tak zo dyrbjachu jeho z helikopterom k lěkarskemu zastaranju do chorownje transportować.

Šulerjo w krajnym sejmje pobyli

pjatk, 15. meje 2015 spisane wot:

9. lětnik Ralbičanskeje Serbskeje wyšeje šule je sej njedawno do Drježdźan dojěł, zo by Sakski krajny sejm wopytał. Tam mějachmy krótke, ale zajimawe wodźenje po domje, při čimž wjele noweho zhonichmy. Nětko na přikład wěmy, zo wopřija dźěłowy čas politikarja wob tydźeń něhdźe 60 hodźin.

Mějachmy zbožo, zo wotměwaše so ru­nje za čas našeho wopyta tak mje­nowany plenum. Smědźachmy horcym diskusijam připosłuchać a druhdy so dźi­wach­my, kak politikarjo při diskusijach mjez sobu wobchadźachu.

Po 45 mjeńšinach přihladowanja mějachmy termin z knjezom Alojsom Mikławškom, kiž je zapósłanc Sakskeho krajneho sejma na lisćinje CDU. Připadnje zetkachmy a popowědachmy skrótka z kultusowej ministerku Brunhild Kurth. Naš wučer Achim Mič, kiž je naš wopyt organizował, je ministerce hordźe ruku dał. Alojs Mikławšk přeprosy našu rjadownju na słódny lód do kafeterije w krajnym sejmje.

nawěšk

nowostki LND