Inwentura w kniharni
Budyšin. Smolerjec kniharnja wostanje inwentury dla wot 2. hač do 12. januara 2024 zawrjena. Wot póndźele, 15. januara 2024 je kniharnja zaso wšědnje wot póndźele hač do pjatka w času wot 10 do 17 hodź. wotewrjena. Sobudźěłaćerjo so na wopyt kupcow wjesela.
Pytaja kandidatki za Martu
Wojerecy. Kóždej dwě lěće počesći město Wojerecy žonu z města za wosebite zasłužby z plastiku Marty. Tak hódnoća čestnohamtske dźěło abo skutkowanje w towarstwje abo susodstwje. Klětu 8. měrca chcedźa dalšu žonu počesćić. Za to pytaja kandidatki. Hač do 26. januara móža wobydlerjo namjetować, kotra žona z města měła wuznamjenjenje přijimać.
Koncertuja z dźěćimi
Radwor. Swój kóždolětny hodowny koncert wuhotuje chór Meja sobotu, 6. januara, w 17 hodź. w Radworskim hosćencu „Meja“. Nimo chóra tež Radworske dźěći sobu skutkuja. Hanka Rjelcyna budźe hodowno-zymske teksty.
Koncert w cyrkwi
Chrósćicy. Hodowny koncert Chróšćanskeho cyrkwinskeho chóra wotměje so njedźelu, 7. januara, w 14 hodź. w farskej cyrkwi. Šoli a dujerjo jón sobu wuhotuja.
Policija (29.12.23)
Awto zezerzawjene
Budyšin. Za nadróžny wobchad dospołnje njewěste awto je policija srjedu popołdnju na Přišečanskej dróze w Budyšinje wuslědźiła. VW Passat najskerje hižo dołho porjadnje hladany njebě. Kaž policija rozprawja, běchu dno jězdźidła, durje a bagažnik w dalokej měrje zezerzawjene. Nimo toho prědnjej městnje kruće přišrubowanej njeběštej.
Nowa přistajena pola frizera
Při wjerinej chěžce so murja sypnyła
Wěža nětko žiwjenski rum
Posledni swědk zahrodnistwa słuži nowemu zaměrej
Wóspork (UM/SN). Na rozpuću dróhow wot Wósporka do Wuježka a Wudworja (Vorwerk) je nowa zajimawosć nastała. Wodowu wěžu bywšeho Kahlichec zahrodnistwa su sporjedźeli a jako žiwjenski rum za škitane družiny zwěrjatow wuhotowali. Kaž Wósporske měšćanske zarjadnistwo zdźěli, je to zhromadny projekt załožby Knorre & Baum z Budyskim krajnoradnym zarjadom, Sakskim krajnym zarjadom za wobswět, ratarstwo a geologiju, z firmu Knorre kaž tež z wjacorymi tudyšimi firmami a priwatnymi wosobami. Iniciator bě we Wuježku bydlacy jednaćel firmy Knorre Robert Hirte.
Wutworja nowe přemysłownišćo
Słónkecy (CS/SN). Gmejna Dobruša-Huska planuje w Słónkecach (Schlungwitz) přemysłownišćo. Za to dóstanje podpěru z hornca za změnu strukturow. Krótko do hód je statna sekretarka Barbara Meyer we wsy pobyła a přizwolenje spěchowanskich srědkach přepodała. Wjesnjanosta Alexander Fischer ju wo planowanym zasydlenju přemysłowych předewzaćow informowaše. Wobdźěliłoj staj so zapósłanc Sakskeho krajneho sejma Marko Šiman (CDU) a jednaćel rozbuchadło produkowaceho zawoda Maxam Tobias Hofmann.
W połnje wobsadźenej Róžeńčanskej cyrkwi je chór Lipa wčera ...
Krótkopowěsće (29.12.23)
Serbska murja bilancowała
Jaseńca. Lěto 2023 bě najwuspěšniše w dotalnym dźěle towarstwa Serbska murja. Tole wuchadźa z bilancy předsydstwa na wčerawšej hłownej zhromadźiznje w Jaseńcy. Předewšěm mjenowachu widejowy format Stawiznak a wubědźowanje Kwisk a trysk. Wobaj projektaj chcedźa klětu wospjetować a dale wuwiwać. Za jeje skutkowanje spožči so Serbskej muri lětsa Myto Domowiny za dorost.
Serbski sejm prosy wo dary
Njebjelčicy. Serbski sejm prosy Serbow wo pjenježnu podpěru, zo bychu klětuše druhe listowe wólby ludoweho zastupnistwa přihotować móhli. Kaž w aktualnej zdźělence rěčnicy Jadwigi Pjacec rěka, trjeba čestnohamtsce skutkowacy gremij dary za zjawnostne dźěło a wusyłanje wólbnych podłožkow. Daty wotpowědneho konta su na internetnej stronje www.serbski-sejm.de přistupne.
Amoka dla mjenje wohnjostroja?
Čehodla so ličce howjadow narězatej?
Nic jenož na wsach, ale tež w městach maja mnozy doma skót. Něchtóžkuli nimo toho drobny skót plahuje. Wšitcy so wo strowotu swojich dwu- abo štyrinohatych lubuškow prócuja. K tomu přinošować chce naša serija z pokiwami z weterinarneje mediciny. (22)
W zymje su hižo naši prjedownicy skót, kotryž běchu přez lěćo kormili, rězali a wulki swjedźeń wuhotowali. Swinjo, wowca abo howjado bu pod fachowym wóčkom rěznika zarězane, a wjetšina swójbnych při předźěłanju pomhaše. Mjeztym pak kiwa wopyt z weterinarneho hamta, zo by so mjaso zarězaneho skoćeća dźiwajo na zakoń wo hygienje přepytowało. W Němskej je jedyn z najlěpšich systemow přepytowanja zežiwidłow, přez čož je so škit wužiwarjow w zašłych lětach jara polěpšił.
Při přepytowanju zarězaneho skotu kładźe so wažnosć na wosebite dźěle. Zasadnje maja wšitke dźěle na městnje přepytowanja być. Dychnica, płuca, wutroba, jatra a jěrchenki so stajnje přepytuja. Su-li wěste lymfowe suki napadne, so dalše wokoło črjewow narěznu. Pola koni a swinjow wozmje pruwowar čwak mjasa za přepytowanje na trichiny sobu.
