Organizator so na konja šwiknył

wutora, 01. septembera 2015 spisane wot:

Dubrjenk (HH/SN). Z ćopłokrejnymi walachami­ a šumjelowymi kobłami je za­wčerawšim w Dubrjenku 13 jěcharjow a jěcharkow dobyćerja w kałanju wěnca zwěsćiło. Nimo dujerskeje hudźby, kreatiwneho paslenja a kulinariskich wosebitosćow bě konjace wubědźowanje wjeršk dworoweho swjedźenja Dubrjenskeho Krječmarjec hosćenca. Něhdźe 200 zajimcow sej wobhlada, kak jěcharjo spytachu w połnym galopje wěnc z plećenych wrotow storhnyć. Dobył je Fabian Šnabl ze swojim konjom Nicom. Mjeztym zo dósta brunač ekstraporciju wowsa, smědźeše so Fabian Šnabl nad dobropisom Krječmarjec hosćenca wjeselić.

Při jěchanju wěnc wottorhnyć njeporadźi so wězo kóždemu. Zwonka hódnoćenja pak šwikny so tohorunja hłowny organizator, korčmar Handrij Krječmar, na konja a přihladowarjam dopokaza, zo to zamóže. Pod mócnym přikleskom publikuma padny wěnc na zemju.

Serbske žiwjenje w měsće molować

wutora, 01. septembera 2015 spisane wot:
Wojerecy (AK/SN). „Serbja we Wojerecach“ rěka hesło molowanskeho wu­bědźowanja, ke kotremuž namołwja ­přirada za serbske naležnosće města ­Wojerec wšitkich wuknjacych 4. lětnikow w šulskim lěće 2015/2016. Wobrazy we wšelakorych technikach móža za­jimowani šulerjo hač do 5. februara 2016 ­zapodać župje „Handrij ­Zejler“ na Drježdźanskej dróze 18, 02977 Wojerecy, e-mail:­ . Twórby njeměli wjetše być hač format A 4. Wuběr zapodatych wobrazow chcedźa w klubowni Wojerowskeho župneho domu wustajić a tři najlěpše motiwy mytować­.

Při twarje mosta wjelby wotkryli

wutora, 01. septembera 2015 spisane wot:

Budyšin (ESm/SN). Nowy móst nad Sprjewju na Budyskim Židowje při bywšim płunowym zawodźe dóstawa poněčim swoju formu. Po tym zo běchu spočatk julija stary móst wuzběhnyli, natwarichu na woběmaj pobrjohomaj trěbne fundamenty. Při tym so njemało dźiwachu, jako wotkrychu wjelby młynskeje hrjebje susodneho bywšeho Kapplerec młyna. Za nowy móst pak dyrbjachu wjelby bohužel wotstronić.

Minjeny pjatk połožichu woclowej nošakaj – koždy štyri tony ćežki – na fun­damenty. Na tule konstrukciju připrawja přichodnje 3,25 metrow šěroku betonowu platu, po kotrejž budu pěšcy a kolesowarjo wot jednoho na tamny bok Sprjewje dóńć móc.

Krótkopowěsće (01.09.15)

wutora, 01. septembera 2015 spisane wot:

Za lěpše wuměnjenja

Berlin. Wjetšina wobydlerjow Němskeje wupraja so za wyše mzdy kubłarjam a po wšej republice płaćiwe kwalitne standardy za dźěćace dnjowe přebywanišća. 79 procentow naprašowanych je za wyše mzdy a 77 procentow za to, zo móža wšitke dźěći wot štyrjoch lět darmotnje do pěstowarnje chodźić. Tole zwěsća studija kubłanskeho barometra.

Wěstotu krajow skrućić

Berlin. Pólski statny prezident Andrzej Duda je sej žadał, pólske wójsko modernizować a z NATO wušo hromadźe dźěłać. To ma wón za wužadanje přichoda. Duda wopominaše dźensa 76. róčnicu nadpada Němskeje na Pólsku na Westernplaće w Gdańsku. „Tehdy kaž dźensa njesměmy dopušćić, zo so mjezynarodne prawo łama a suwerenita krajow wobškodźi“, Duda podšmórny.

Dalšich podhladnych zajeli

Policija (01.09.15)

wutora, 01. septembera 2015 spisane wot:

Kulow. Dohromady štyri kolesa zhubichu so minjeny kónc tydźenja w Kulowje a w Niskej. Při tym njetrjebachu paduši ani žane wulke zadźěwki přewinyć. Groćane haple w cyłkownej hódnoće 7 000 eurow stejachu na třěšnym resp. na zadnim nošaku na awtomaj. Kaž policija zdźěla, to wězo žane wěste městno za koleso njeje. Wšako jednore zamki za paduchow žadyn wulki problem njewoznamjenjeja. Je tuž lěpje při dlěšich přestawkach abo přez nóc koleso z awta wzać a je porjadnje zamknyć.

Wóčko so smjało a płakało

póndźela, 31. awgusta 2015 spisane wot:

Ze swjedźenjom so wěriwi z fararjom Hrjehorjom rozžohnowali

Chrósćicy (aha/SN). Wulki farski dwór w Chrósćicach bě wčera popołdnju runje tak pjelnjeny kaž na folklornych festiwalach. Něhdźe 800 ludźi bě přeprošenje wosadneje rady sćěhowało a rozžohnowa so z fararjom Clemensom Hrjehorjom, kiž bě tam 18 lět skutkował.

Jemu k česći wuhotowany wjacehodźinski wotměnjawy kulturny program, kotryž Nukničan Roman Nuk moderěrowaše, swědčeše wo tym, kak woblubowany a připóznaty Clemens Hrjehor mjez wosadnymi je. Dźěći Chróšćanskeje pěstowarnje to runje tak spěwajo zwuraznichu kaž šulerjo tamnišeje zakładneje šule­ „Jurij Chěžka“ ze swojej derje předstajenej krótkohru, spisanej wot Wórše Wićazoweje. Tež chóraj Lipa a Meja, Wu­dworski folklorny ansambl a dujerjo so runje tak do programa zarjadowachu kaž němska a serbska dźěćaca šola. Kak derje wosadni swojeho fararja znaja, wo tym swědčachu prawe wotmołwy na kwiso­we­ prašenja.

Wobkuzłacy wječor w parku

póndźela, 31. awgusta 2015 spisane wot:

Njeswačidło (LR/SN). W swojim lětnym planje ma Njeswačanske kulturne a domizniske towarstwo nimo wšelakich wustajeńcow a koncertow tež swjedźeń swěčkow zapisany. Sobotu je tónle woblubowany wječor znowa tójšto wopytowarjow přiwabił. Z 20. tajkim zarjadowanjom móžachu tónraz samo na mały jubilej zhladować.

Ideju zrodźili běchu tehdy při wuklinčenju poslednjeho koncerta lěta, jako za swojich hosći swěčki na blida zestajachu. Lěto pozdźišo płuwachu hižo na deskach připrawjene swěčki po kołpjacym haće, štož so wopytowarjam wězo lubješe. Tak so z kóždym lětom nowe ideje přidru­žichu. Zawčerawšim wobswětlichu park z něhdźe 3 000 swěčkami a mnohimi smólnicami. Napohlad bě prosće wobkuzłacy. Z kupy kołpjaceho hata zaklinča cunja hudźba panoweje pišćałki. Mjez wopytowarjemi běchu mnozy Serbja, kotřiž so wo atmosferje kołowokoło hrodu a w parku jara chwalobnje wuprajichu.

Krótkopowěsće (31.08.15)

póndźela, 31. awgusta 2015 spisane wot:

Nukstock z nowosćemi

Nuknica. Wjace ludźi hač zašłe lěta – dohromady něhdźe 600 – je kónc tydźenja 17. festiwal Nukstock dožiwiło. Při Nukničanskej skale zahra dźewjeć hudźbnych skupin z kraja a wukraja. Prěni raz su sobotu dźěćacy program organizowali. Dalša nowosć bě, zo su biologisce wottwarjomne nopaški a talerje wužiwali. Lětsa rozdawachu na Nukstocku tohorunja antirasistiske nalěpki.

Pašowarjo ludźi zajeći

Wien. Po zahajenju raznišich kontrololow při madźarskej mjezy je awstriska policija dotal pjeć pozdatnych pašowarjow a wjace hač 200 ćěkancow našła, polici­ja dźensa zdźěli. Cyłkownje 54 zastojnikow je zasadźenych, zo bychu přećiwo pašowarjam ludźi postupowali. Tež bayer­ska policija kontrole zesylnja. Historiski datum wotkryty

Policija (31.08.15)

póndźela, 31. awgusta 2015 spisane wot:

Wallroda. Mjez Biskopicami a Radebergom je po wšěm zdaću zapaler po puću. W prěnich hodźinach soboty su wohnjowych wobornikow na łuku mjez Wall­rodu a Kleinröhrsdorfom wołali. Tam paleše­ so něhdźe sto wulkich kulojtych walčkow słomy. Na zbožo so nichtó nje­zrani, tež twarjenja žane potrjechene njeběchu.­ Štyri wohnjowe wobory wokolnych wsow běchu zasadźene. Wo­bornicy mějachu hač do 9 hodź. z hašenjom ruce połnej dźěła. Hižo srjedu wječor bě so minjeny tydźeń wulki skład słomy mjez Großröhrsdorfom a Połčnicu wotpalił.

Njewšědne wubědźowanje přewjedu jutře w Zagorju pola Krušwicy. Tam chcedźa wot 13 hodź. w rubanju a rězanju drjewa mocy měrić. Při tym wšak trjebaš tež dobru strategiju, kak ze sekeru najspěšnišo zdónk štoma přerubaš abo z piłu zdónk přerězaš. Tule­ su Michael Dürr z piłu kaž tež Johannes Winter a Theo Brendel ze sekeru hišće raz trenowali. Foto: Joachim Rjela

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND