Krótkopowěsće (02.03.21)
Sydom mutacijow wobkrućenych
Budyšin. W Budyskim wokrjesu je dotal 54 podhladnych padow na mutaciju koronawirusa. Sydom króć je sekwencija genoma podhlad wobkrućiła, štyri razy britisku mutaciju wirusa, kaž krajnoradny zarjad zdźěli. Wčera zwěsćichu tam štyri nowonatyknjenja a incidencu 87,33. Wokrjes Zhorjelc rozprawješe wo dalšej infekciji, wo wosom smjertnych padach a wo incidency 72,81.
Wjace swobodnych městnow
Budyšin. We wuchodnej Sakskej bě w februaru 19 833 bjezdźěłnych, 125 wjace hač měsac do toho. Kaž Budyska agentura za dźěło dźensa informuje, je dźěłodawarski serwis dohromady 733 nowych dźěłowych městnow zwěsćił, 113 wjace hač w januaru. Postup pokazuje, zo předewzaćeljo tež w tymle wužadowacym času sobudźěłaćerjow přistajeja.
Wšěch wučerjow šćěpić
Trjebaja hladansku připrawu
Běła Woda (AK/SN). Město Běła Woda dyrbi do wuhotowanja powołanskeje wohnjoweje wobory inwestować. Měšćanska rada je na swojim srjedownym wuradźowanju jednohłósnje wobzamknyła, zo chce wobstarać kompaktnu hladansku připrawu za hadźicy. Wobstarać a montować ma ju předewzaće Wilhelm Bockermann připrawy a twar nastrojow tzwr, kotrež ma swoje sydło w sewjerorynsko-westfalskim Engeru njedaloko Herfurta. Nuznje trěbna připrawa ma brutto 66 000 eurow płaćić. W aktualnje přizwolenym Běłowodźanskim etaće je 80 000 eurow za hladansku připrawu zaplanowanych. Spočatnje bě město ze spěchowanjom 35 000 eurow ličiło. Z přizwolenjom wyšeje sumy, mjenujcy 40 000 eurow, wučinja swójski podźěl jenož hišće 40 000 eurow. Nadawk bě město po cyłej Němskej wupisało. Dwě předewzaći stej na to wo podłožki prosyłoj. Na kóncu předležeše zarjadnistwu jenički poskitk. Tón je hospodarski a wotpowěduje kriterijam wupisanja. Předewzaće je kmane trěbne dźěła technisce kaž tež personelnje wukonjeć.
Insektowe hotele njedaloko Miłoćic
Coowy su „wěste“
Wojerecy. W zwjazku organizowane coologiske zahrody a zwěrjency su so z listom na zwjazkowu kanclerku Angelu Merkel (CDU) a ministerskich prezidentow krajow wobroćili, kaž Wojerowski zwěrjenc informuje. W lisće proša wo to, zo smědźa wot měrca zaso wotewrěć a swójbam za čas lockdowna wulětny cil być. Nastupajo přiběracy ćišć na staršich a jich dźěći maja coowy tajki poskitk za wurunanje. Při tym skedźbnjeja na hygienowe koncepty a přeja sej postupne wotewrjenje wonkownych a pozdźišo dalšich wobłukow.
Wuspěšne skutkowanje
Budyšin. W Budyšinje stacioněrowany helikopter „Christoph 62“ za wuchowanja z powětra (DRF) bě loni 1 527 króć zasadźeny, z toho 1 011 nuzowje a 516 króć za transport kritisce schorjenych abo zranjenych mjez klinikami. Lěto do toho bu 1 396 króć zasadźeny. Wot decembra maja w sprjewinym měsće dalši wuchowanski helikopter. „Christoph 114“ pomha při nuzowych zasadźenjach, zo by „Christoph 62“ móhł wjace na koronu schorjenych pacientow transportować. W Sakskej zasadźene tři helikoptery w słužbje DRF běchu loni cyłkownje 2 720 razow wołali.
Policija (01.03.21)
Šofer transportera ćežko zranjeny
Prěčecy. Wodźer małotransportera marki Opel Vivaro je wčera rano, krótko po sedmich na awtodróze A 4 krótko před Prěčecami do směra na Drježdźany znjezbožił. 21lětny muž němskeho pochada jědźeše krótko do mosta nad S 100 na zelenišća a přełama płót za dźiwinu. Opel přejědźe prěkowacu statnu dróhu S 100 a zwróći na jeje prawym boku na polo, při čimž so ćežko zrani. Z helikopterom dowjezechu jeho do Drježdźanskeje kliniki. Transporter so dospołnje skóncowa. Dźiwinowy płót bě po dołhosći połsta metrow wobškodźeny. Cyłkowna škoda wučinja něhdźe 30 000 eurow. S 100 běše za čas zastaranja zranjeneho kaž tež rumowanja dospołnje zawrjena.
Wužitk a zamołwitosć zwjazać
Woklečanska gmejnska rada rozmyslowanja wo haće nastorčiła
Worklecy (JK/SN). Rjany to wobraz: wudźerjo steja na brjoze hata a čakaja, zo ryby za wudu cybaja. Ryby su samoplahowane, wo hat so wudźerjo sami staraja a woda je čista. Tajku abo podobnu wiziju ma Worklečanski wjesnjanosta Franc Brusk (CDU), jako wo tym rozmyslowaše, wjesny hat z kupomaj snano wudźerjam přenajeć. Ideju předstaji wón minjeny štwórtk Worklečanskej gmejnskej radźe jako zakład płódneje diskusije. K tomu bě sej fachowu pomoc Kamjenskeho wudźerskeho towarstwa skazał. Tamniši předsyda Dieter Arnold rozłoži radźićelam zakonske zakłady móžneho wotnajenskeho zrěčenja mjez wudźerjemi a gmejnu. Kamjenske wudźerske towarstwo ma nastupajo wotnajimanje hatow w gmejnach hižo dobre nazhonjenja, a tak móhli je tež za Worklečanski wjesny hat nałožować.
Seršćowcow a pisakow so přimali
Sylvia Hübner bě dźěći w decembru namołwjała wobdźělić so na molowanskim wubědźowanju. Nětko je wona dobu za wotedaće rysowankow a molowankow podlěšiła.
Podpěra přichodnym wučerjam
Wokrjes Sprjewja-Nysa podpěruje młodych ludźi, kotřiž chcedźa wučerstwo za předmjet serbšćinu studować, z přidatnym stipendijom. To je wokrjesny sejmik na swojim februarskim posedźenju wobzamknył.
Baršć (HA/SN). Delnja Łužica dóstanje nětko wot wokrjesa Sprjewja-Nysa (SPN) konkretnu podpěru při zdobywanju młodych ludźi, zo bychu so na wučerku abo wučerja serbšćiny wukubłali. Frakcija Lěwicy we wokrjesnym sejmiku zapoda za to projekt, z kotrymž je so minjenu srjedu wokrjesny sejmik na swojim posedźenju w Baršću zaběrał. Lěwica namjetuje, zo bychu tych, kotřiž chcedźa studować wučerstwo za předmjet serbšćinu, z přidatnym stipendijom podpěrali. Tón wučinja měsačnje 500 eurow a płaći pjeć lět, za cyły čas studija. Wuměnjenje je, zo ma nowa serbska wučerka resp. nowy serbski wučer najpozdźišo pjeć měsacow po zakónčenju studija započeć serbšćinu wuwučować w šuli, kotruž šulski zarjad hromadźe z wokrjesom Sprjewja-Nysa wupyta. Najprjedy pjeć lět dołho dyrbi wona resp. wón potom tam dźěłać.
Krótkopowěsće (01.03.21)
Masowy test jutře w Radebergu
Budyšin. Natyknjenja z koronawirusom so we wokolinje Radeberga kopja. Tohodla poskića krajnoradny zarjad jutře w sportowni tamnišeho BSZ wot 9 do 17 hodź. masowy test. W Budyskim wokrjesu informowachu přez kónc tydźenja wo 146 natyknjenjach a 81 smjertnych padach. Wčerawša incidenca bě 88. Zhorjelski wokrjes wozjewi 15 natyknjenjow, incidenca tam wučinješe 72,41.
Třo so wo jednaćelstwo požadali
Choćebuz. Staršich sylnišo do skutkowanja SŠT zapřijeć bě jedne ćežišćo klawsury předsydstwa SŠT kónc tydźenja w Choćebuzu. Kaž SŠT zdźěli, dojednachu so tam na wobsahi skutkowanja. Zaběrali su so tež z třomi požadanjemi wo jednaćelstwo SŠT a z aktualnymi prašenjemi wjednicow kubłanišćow. Za wuměnu z Delnjej Łužicu maja prěnje ideje, mjez druhim zetkawanski kónc tydźenja swójbow.
Domowina pomoc přilubiła
LaNU namołwja: Won do přirody
Kamjenc (SN/MiR). Donětka su sej šulerjo serbskich a serbšćinu podawacych šulow wulećeli mjez druhim na pućowanskim dnju do Sakskeje Šwicy. Tuchwilu pak to móžno njeje. Sakski krajny zarjad za škit přirody LaNu pak poruča swójbam sej tam dojěć, wobkedźbujo wobmjezowanja korony dla. Wotnětka hač do 15. meje maja tam wosebitu akciju centruma Narodny park Sakska Šwica. Wona zestaja so z wubědźowanja wobrazow a powědančkow, kwisa kaž tež přewodnika za ekskursije. Kóždemu wobdźělnikej je přewostajene, kotry kamušk z małeho mozaika sej wubjerje abo hač kóždy poskitk wužije. Wobdźělnicy móža wobrazy zhotowić, sej powědančka wumyslić a na prašenja w kwisu wotmołwić. Přewodnik ekskursije w formje z wobrazami wuhotowaneho lista njeje jeničce dźěćom zajimawy, ale tež dorosćenym sobupućowacym a tuž zajimawa literatura wšitkim, kotřiž so za přirodu zajimuja.
