Róžant (jh/SN). Wjesne dźěći z Róžanta su so w Pólskej z filmom „Hody budu“ na 11. festiwalu třoch kulturow wobdźělili a w kategoriji „wosebite myto“ prěnje městno wobsadźili. To zdźěli jury pólskeje załožby Europska parla baroka minjeny kónc tydźenja Ralbičanskemu wosadnemu fararjej Šćěpanej Delanej.

Koronapandemije dla su Róžeńčansku hodownu hru loni prěni raz jako widejo z trikowymi elementami nahrawali a su ju w interneće wusyłali. Tež festiwal třoch kulturow w pólskim klóštrje Krze­szów dyrbjachu lětsa online přewjesć. Zapo­dali běchu za njón nimale 30 přinoškow z Pólskeje, Čěskeje a Němskeje.

Awtorka a režiserka dobyćerskeje Róžeńčanskeje hodowneje hry bě znowa wjesnjanka Diana Šołćina. Sobu skutkowało je 18 wjesnych dźěći.

Budyšin (WeB/SN). Rěčny centrum WITAJ přewjeduje tele dny Walentinsku akciju „Mam će rady“ za dźěći a młodostnych. W času, hdyž su šule a pěstowarnje zawrjene, móža zajimcy na hinaše wašnje na přikład najlubšej přećelce rjec, zo faluje, nanej so podźakować, zo přeco kopańcu sobu hraje, abo wowce prajić, kak rjenje je, zo přeco rady pomha. Štóž Rěčnemu centrumej WITAJ prawje bórze mejlku napisa, dóstanje serbske pismikowe parlički, zo móhł lubu wosobu z paslenym postrowom na Walentina zwjeselić. Mejlku njech pósćelu zajimcy hač do 7. februara na adresu . Připisać měli, hač chcedźa wutrobičkojty tykačk, rjećazk za ruku abo přiwěšk za kluč paslić. Dale njech připisaja, što ma na debjence stać (maksimalnje dźesać pismikow, na přikład lubuško, słónčko, kórka, lubuju će, mój luby, bariko atd. a kotre barby měli parlički měć. A wězo njeměli adresu zabyć! Potom dóstanu z póštu swoju indiwidualnu paslensku titku a móža debjenku hač k dnjej Walentina, 14. februara, spaslić. Akcija ničo njepłaći. Wobdźělnicy pak móža rady foto swojeje debjenki zapodać.

Kupnicu wobšudźili

Wojerecy. Z woporom njeznatych telefonowych wobšudnikow je so minjenu sobotu kupnica na Wojerowskim Łužiskim naměsće stała. Něhdźe w 17.30 hodź. tam cuzy zazwoni a wudawaše, zo kupnica wěstu ličbu tak mjenowanych Google-Play-kartow hižo předawać njesmě. Nje­znaty předawarku namołwi, zo měła jemu cody jednotliwych kartow mjenować. Pozdźišo so wukopa, zo běchu wobšudnicy karty bjezposrědnje po tym na pjenjezy zaměnili. Wojerowskej kupnicy nasta na te wašnje dohromady ně­hdźe 4 500 eurow škody.

Rakecy. Z nowozarjadowanym online-asistentom Rakečanskeje gmejny móža wobydlerjo nětko přidatne poskitki wužiwać. Tak hodźi so přemysło online přizjewić, změnić abo wotzjewić, tež psyči dawk abo wupadnjena mzda wohnjowoborneho zasadźenja dla přizjewić. Přez internetnu stronu www.amt24.sachsen.de dóstanu wobydlerjo wotpowědny formular a móža jón gmejnje wupjelnjeny připósłać. Tež přez stronu gmejny pod www.koenigs­wartha.de so zajimcy direktnje k wotpowědnemu formularej dóstanu.