Radźićeljo so schadźuja
Ralbicy. Přichodne posedźenje gmejnskeje rady Ralbicy-Róžant je jutře, štwórtk, we 18.30 hodź. w sportowni Ralbičanskeje šule. Na dnjowym porjedźe stejitej mjez druhim předstajenje a wobzamknjenje kubłanskeho koncepta nošerja Ralbičanskeje pěstowarnje „Dr. Jurij Młynk“, Serbskeho šulskeho towarstwa. Dale zaběraja so radźićeljo z dodatnymi wustawkami za „Konjecy-sewjer“.
Chrósćicy. Tohorunja jutře, ale w 19 hodź. schadźuja so Chróšćanscy gmejnscy radźićeljo , a to we wjacezaměrowej rumnosći „Jednoty“. Nimo twarskich naležnosćow póńdźe tam mjez druhim wo wobhospodarjenje wodźiznow na teritoriju gmejny a wo změnjene wěnowanje třoch wjesnych dróhow w Chrósćicach.
Darowanska akcija wulki wuspěch
Wojerecy (SN/MWj). Loni kónc nowembra zahajena akcija Wojerowskeho zwěrjenca „Darować město praskotać“ je wulki wuspěch žnjała. Wobydlerjo běchu namołwjeni pjenjezy njewudać za silwesterski wohnjostroj, ale je na dobro zwěrjatow přewostajić. Wjace hač 200 lubowarjow zwěrjatow je dohromady 24 085 eurow dariło. To je wjace hač třećina wupadnjenych dochodow w nowembru a decembru. „Smy přemóženi“, wjeseli so nawoda coowa Eugène Bruins. „Běchmy so nadźijeli, mały dźěl wupadnjenych dochodow narunać móc. Zo pak budźe telko pjenježnych darow, je nas překwapiło“, rěka w nowinskej zdźělence.
Rozmysluja wo wubědźowanju
Wjes ma wjace potenciala hač jenož prazwěrjenc a błudźišćo
Mały Wjelkow (CS/SN). Na wčerawšim posedźenju Małowjelkowskeje wjesneje rady přednjese čłon spěchowanskeho towarstwa tamnišeje sotrownje Lutz-Wolfram Reiter mysle, kak móhł so Mały Wjelkow na wubědźowanju „Naša wjes ma přichod“ wobdźělić. Wjesni radźićeljo su jeho konceptej přihłosowali. Přezjedni sej woni běchu, zo ma wjes nimo prazwěrjenca a błudźišća wjace potenciala, kiž pak je přemało znaty. Tak ma Mały Wjelko kompaktny sydlenski wobraz Ochranowskeje bratrowskeje wosady a wězo sotrownju. Jeje struktura z lěta 1770 je so lědma změniła. Žadnostka je tohorunja kěrchow. Tón měł bóle w zjawnosći stać, přetož jeho pochowanska kultura słužeše jako přikład hač do Grönlandskeje a Awstralskeje.
13lětny Pančičan kompjuterej serbske ličby a čas nawučił
Zo steji dźensa w dźěćacych stwach zwjetša personalny kompjuter abo laptop, je nimale hižo samozrozumliwe a runje nětko za čas pandemije trěbne. Tež Korla Baier w Pančicach-Kukowje tajki ličak ma. Wón pak z nim jeno za šulu njewuknje, ale hižo swójske programy wuwiwa.
Pančicy-Kukow (SN/MWj). Wonkownje so Korla Baier z Pančic-Kukowa wot druhich w swojej starobje njerozeznawa. Je ministrant w cyrkwi klóštra Marijineje hwězdy, honi po zasněženej krajinje a so ze swójbnymi po wsy a wokolinje wuchodźuje. Wulka lubosć 13lětneho pak je jeho kompjuter. Z nim je tele dny program dokónčił, kotryž zamóže ličby wot jedyn hač do tysac a tohorunja aktualny čas serbsce rěčeć. Pod adresu gaussia.de/slp-test móžeš na přikład 637 zapodać, a akuratnje tule ličbu słyšiš wuprajenu. Nic pak wot kompjuteroweho hłosa. Korla Baier je ličby sam natočił. To samsne je činił za podaće časa, kiž monitor deleka naprawo pokazuje.
Štóž rady regionalne wudźěłki kupuje, dźiwajo při tym na dobru ...
Lifty stejo wostali
Časy dźensa hinaše
Krótkopowěsće (20.01.21)
Zaso wjace natyknjenjow
Budyšin. Ličba koronanatyknjenjow w Hornjej Łužicy zaso přiběra. W Budyskim wokrjesu su wčera 188 dalšich infekcijow a dwanaće smjertnych padow zwěsćili. Wot 1 115 schorjenych (+22) lěkuja 132 (-28) w chorowni. Tudyša incidenca wučinja 306,33. Zhorjelski wokrjes je wčera wo 91 nowonatyknjenjach a třoch smjertnych padach informował. Incidenca tam je 238,99.
NSLDź chce 1. apryla wotewrěć
Budyšin. Němsko-Serbske ludowe dźiwadło Budyšin přihotuje so na wotewrjenje 1. apryla. To su intendant Lutz Hillmann, Budyski krajny rada Michael Harig (CDU) a zamołwita přirjadnica Birgit Weber rozsudźili. Tak planuja premjerny kónc tydźenja k jutram, a to zeleny štwórtk z marionetowej inscenaciju „Das Märchen von der Salzprinzessin“ a z předstajenjom „Čmjeła Hana chce na dowol lećeć“.
Zeleny tydźeń digitalny
Policija (19.01.21)
Lulu zaso w zwěrjencu
Běła Woda. Njewšědny pad padustwa, kiž bě so loni w awgusće w Běłowodźanskim zwěrjencu stał, je nětko wujasnjeny. Tehdy běchu so tam njeznaći zadobyli a nukla Lulu pokradnyli. Sančka měješe runje młodźata a njemóžeše je na to hižo zastarać. Na zbožo to sobudźěłaćerjo pytnychu, tak zo małe nukle přežiwichu. Lulu pak bě najprjedy raz fuk. We wobłuku přepytowanjow koncentrowachu so kriminalisća na 21lětneho muža a 22lětnu žonu. Na přikaz sudnistwa přepytachu minjeny pjatk jeju bydlenje, hdźež su pokradnjenu sančku namakali. Sobudźěłaćerka zwěrjenca ju cyle jasnje jako Lulu identifikowaše a móžeše ju wša zbožowna sobu wzać.
