Politika měła skónčnje jednać
Drježdźany. Rjemjeslnicy w Sakskej žadaja sej dołhodobne rozrisanja za problemy město małych krokow. Za to pobrachuje politice na runinje Zwjazka „hišće móc“, kritizuje Jörg Dittrich, prezident Drježdźanskeje rjemjeslniskeje komory a Sakskeho foruma rjemjeslnikow, w lěto 2023 bilancowacej zdźělence w Drježdźanach. Na přikład so njeje poradźiło běrokratiju wobknježić.
Podpěra za wosom projektow
Budyšin/Wostrowc/Wulke Hendrichecy. Wosom projektow Budyskeho komiteja z.t., Załožby mjezynarodny zetkawanski centrum Marijiny Doł a Wobswětoweje knihownje Wulke Hendrichecy z.t. spěchuje Zwjazkowa załožba za přeslědźenje diktatury SED klětu z dohromady 101 111 eurami. Jedne ćežišćo su zarjadowanja wo ludowym zběžku w NDR 17. junija 1953, dalše wudobywanje a zmilinjowanje brunicy w sakskim krajnym třiróžku.
Młodostni narěče dokumentuja
Sernjany (SN/AN). Dwaj dnjej do patoržicy su w Sernjanach poslednje woknješko žiweje adwentneje protyki wočinili. Dźěći Mětec a Barčec swójby předstajichu hodownu stawiznu Björna Steffensa wo małej hwězdźe, kotraž chcyše wosebita być. Kostimy a rekwizity za to běchu sej sami wumyslili a zhotowili. Tež za přichwatanych hosći su překwapjenku přihotowali.
Wćipni sedźachu wosebje najmłódši na ławkach blisko małeho jewišća, kotrež běchu sej w Mětec garaži natwarili, a slědowachu napjeći powědarjej a hrajerjam. Po předstajenju rozdźělichu hrajerjo hosćom słódne poprjančki a selowe pječwo w formje hwězdow za wupyšenje hodowneho štoma. Wothłós na žiwu adwentnu protyku bě w cyłym hodowniku stajnje dosć wulki. Wobdźělnicy móžachu akciju ze swójskim přinoškom wobohaćeć. Tak změja Sernjančenjo zawěsće tež klětu zaso zarjadowanje w adwenće, kotrež wjesnu zhromadnosć w zymnym počasu skrući.
Běły Chołmc (AK/SN). Pola Helmichec w Běłym Chołmcu wonješe krótko do hód wosebje rjenje za horcym winom, poprjančkami a pomazkami. Bě to 13. a předposlednja stacija žiweje adwentneje protyki. 20. raz su ju lětsa přewjedli. Iniciatorka Maren Behrens, kotraž bě wot 2004 hač do 2014 wjesna předstejićerka, jón kóžde lěto hromadźe z towarstwom Pjeć počasow organizuje.
Sobu skutkowała je mjez druhim wnučka Lisa Helmich. „Sama sym namjetowała, zo móhła na huslach adwentne pěsnje zahudźić“, 31lětna powěda. Prjedy hač přećahny jeje swójba do Wojerec, bydleše wona hač do pjateho žiwjenskeho lěta pola wowki w Běłym Chołmcu. Pozdźišo je w Bayerskej powołanje husletwarče nawuknyła. Z tymle powołanjom je so wona 2018 w Mnichowje zesamostatniła. We wobłuku žiweje adwentneje protyki zahudźi wona na huslach, kotrež je za huslerja w Aachenje twariła. Tež hdyž instrument hišće lakěrowany njebě, wón wulkotnje klinčeše.
Hwězdu pokradnyć chcył
Budyšin. Z hodowneho štoma na kupje Schliebenoweho kružneho wobchada w Budyšinje je w nocy na wutoru 38lětny muž jednu z hwězdow pokradnyć chcył. Runje w tym wokomiku pak tam policisća přijědźechu a njeskutkej zadźěwachu. Hwězda bě něhdźe 20 eurow hódna.
W mnohich swójbach drje su sej patoržicu po dawnym wašnju Boži narodk nastajili. Wo tójšto wjetši narodk maja lětsa zaso w Smochčanskim kubłanišću swjateho Bena.
Smochćicy (SN/MWj). Boži narodk z nimale kaž čłowjek wulkimi drjewjanymi figurami steji wot patoržicy zaso na dworje Smochčanskeho kubłanišća swjateho Bena. Kaž kubłanišćo w nowinskim wozjewjenju zdźěli, je to poskitk wšitkim zajimcam tam pozastać, rozmyslować a so pomodlić. Nimo toho móža sej wopytowarjo swětło měra z Bethlehema sobu wzać, kotrež je w cyrkwi wšědnje wot 8 do 17 hodź. přistupne. Boži narodk wostanje hač do swjedźenja Swěčk Marje na dworje kubłanišća natwarjeny.
DGB: W Sakskej njeměr knježi
Drježdźany. Bilanca DGB Sakskeje za nachilace so lěto je wostrózbjaca. „W Sakskej knježi njeměr, nic jenož politisce, ale tež hladajo na dźěłowe wuměnjenja ludźi. Špatne mzdy, špatne dźěłowe časy a pobrachowace sobupostajowanje bjez skorženja dawno wjace njeakceptuja, ale dźěławi so wobaraja“, rjekny šef DGB Markus Schlimbach powěsćerni dpa. Dźěłodawarjow namołwi, zo njebychu dlěje na joby z niskimi mzdami sadźeli.
Předsydu wobkrućili
Budyšin. Towarstwo Škit Budyšin je na swojej hłownej a wólbnej zhromadźiznje 23. decembra Roberta Krawca jako předsydu wobkrućiło. Nimo wólbow bilancowachu tež zašłe lěto w kotrymž zwoprawdźichu mnohe projekty, mjez nimi spěwanje na adwentnych wikach. Za klětu planuja, zahrodu w starym měsće za serbsku zjawnosć wuhotować.
Hilža Nukec zemrěła