Wjace wobchada błóta dla

štwórtk, 26. nowembera 2020 spisane wot:

Mjeńše a wjetše haty abo tež wodowe zběrniki dyrbiš hdys a hdys wurjedźić a z nich wotsadźene błóto wubagrować. Ale dokal z nim? W padźe Hodźijskeho spjatnišća mějachu zajimawu ideju.

Hodźij/Chasow (SN/MWj). Wulke oranžobarbne nakładne awta tłóča so tele dny po wuskich pućach pola Chasowa ze směra zwjazkoweje dróhi B 96 do směra na Radwor. Wone woža tysacy ­kubiknych metrow wuschnyteho błóta a wusypnu je mjez druhim na bywšu železnisku čaru wuchodnje Chasowa.

Błóto abo modernišo prajene sedimenty pochadźeja z Hodźijskeho spjateho jězora. Tón běchu lětsa wot januara hač do apryla wubagrowali, zo bychu poprawny spjaty wolumen zaso docpěli. Dohromady wuwozychu tehdy ze spjatnišća něhdźe 15 000 kubiknych metrow sedimentow. Kaž w nowinskim zdźělenju krajneho zarjada za rěčne zawěry (LTV) rěka, inwestowaše Swobodny stat Sakska za to něhdźe 270 000 eurow. Zo njebychu mokre błóto transportować trjebali, wotsypnychu je južnje Hodźijskeho ­spjateho jězora, zo móhło tam ­wuschnyć.

W Malešecach twarja tuchwilu wosrjedź wsy hrajkanišćo a zetkawanišćo. Najprjedy připrawja na městnje móžnosće k sedźenju a narjady za krosnowanje a balansowanje, pozdźišo chcedźa jim dalše sportowe a hrajkanske nastroje za rozdźělne starobne skupiny přidać. Wutwar cyłkowneho naměsta podpěruja ze spěchowanskimi pjenjezami Europskeje unije. Prěni wotrězk płaći něhdźe 21 500 eurow. Foto: Jurij Helgest

Swójbny dźeń sadźenja w Radušu

štwórtk, 26. nowembera 2020 spisane wot:
We wobłuku akcije „Äppel &Birnen For Future“ su sej hibićiwi Radušenjo předewzali raz 725 štomow a kerkow najwšelakorišich družin sadźić. Ličba wotpowěduje wjesnemu jubilejej. Sprjewina akademija ze sydłom w błótowskej wsy koordinuje sadźensku akciju. Koronapandemije dla je nalětnje sadźenje wupadnyło. Tele dny pak wužiwachu za to wuwołany swójbny dźeń sadźenja. Za kóždu swójbu bě kruta hodźina zaplanowana, zo by dźesać štomikow do zemje Beeskojc niwoweho lěsa dóstała. Započała je Verstojc swójba (na foće), jich syn Karl měješe pjate narodniny. Na kóncu je Wětošowski zapósłanc zwjazkoweho sejma prof. Martin Neumann (FDP) spochi jedyn štom po druhim do bahnojteje pódy sadźił. Foto: Peter Becker

Krótkopowěsće (26.11.20)

štwórtk, 26. nowembera 2020 spisane wot:

MSPI jutře w parlamenće

Berlin. Zwjazkowy sejm zaběra so na swojim jutřišim posedźenju z namjetomaj CDU/CSU a SPD kaž tež Zelenych nastupajo Europsku wobydlersku iniciatiwu „Minory SafePack“ (MSPI). Předmjet steji prěni raz na dnjowym porjedźe, wo nim maja zapósłancy direktnje wothłosować. Koaliciskej frakciji namołwitej knježerstwo namjety MSPI, dalokož Europska komisija je sćěhuje, bórze pruwowować. Zeleni žadaja sej, zo so knježerstwo za zaměry MSPI zasudźuje.

Połnej staciji korony dla

Budyšin. Z 260 nowymi koronainfekcijemi wostanje niwow w Budyskim wo­krjesu wysoki. Kaž krajnoradny zarjad wčera zdźěli, su aktualnje 2 199 schorjenych (+77), z nich 128 (+1) w klinice lěkuja, a dalšej smjertnej padaj. Wobě korona-staciji Budyskeje chorownje stej runje tak połnej kaž tamniša intensiwna stacija, hdźež maja dźesać korona-łožow, Serbski rozhłós dźensa rano rozprawješe.

Zawodny zakaz płaći

Rěčne hodźiny wotprajene

srjeda, 25. nowembera 2020 spisane wot:

Pančicy-Kukow. Wobydlerski policist za teritorij gmejnow zarjadniskeho zwjazka Při Klóšterskej wodźe Uwe Mittag najprjedy raz žane rěčne hodźiny njezměje. Kaž zarjadniski zwjazk zdźěli, su je wotprajili. Štóž přiwšěm policajsku poradu trjeba, njech přizjewi so pod telefonowym čisłom 03578/ 35 20 abo zazwoni nuzowe čisło 110.

Alternatiwa njebudźe

Bikopicy. Jako „nakupowanske dundanje po měsće“ myslenu alternatiwu k adwentnym wikam w Biskopicach přewjesć njesmědźa. Zarjadniske zadźěwki to znjemóžnjeja, rěka z radnicy. Alternatiwny plan bě přewjesć w nutřkownym měsće wot 4. do 6. decembra „kupnicu bjez ­třěchi“. Wikowarjo, kotřiž běchu za poprawne hodowne wiki přizjewjeni, mě­jachu swoje stejnišća z dosahacym wotstawkom natwarić. To pak njebu dowo­lene.

Planuja narunanje

Knižna cela we wsy napadnje

srjeda, 25. nowembera 2020 spisane wot:

Delnja Hórka (CS/SN). Nimale hižo cyły měsac je Delnja Hórka w Malešanskej gmejnje wo atrakciju bohatša, kotruž tež druhdźe hižo maja. Tam steji mjenujcy tak mjenowana knižna cela. Wona je w starej telefonowej budce zaměstnjena. Wo nju staratej so wjesnjance Ute Gregor a Petra Eckert. Wobě stej z dotalnym wothłosom wobydlerjow dosć spokojom. Dotal dyrbjachu jenož jónu zwěsćić, zo je tam něchtó knihi wotbył, kotrež so hižo wužiwać njehodźa a kotrež dyrbjachu tuž zaso wurumować.

Ideju za knižnu celu měješe čłonka Delnjohórčanskeje wjesneje rady Katja Lorenz. Zo pak móžachu projekt skónčnje tola zwoprawdźić, bě zhromadny skutk mnohich wobdźělenych, Ute Gregor wuzběhny.

Policija (25.11.20)

srjeda, 25. nowembera 2020 spisane wot:

Swójske koleso namakała

Wojerecy. Na swójsku iniciatiwu a dźakowano wobdźělenju policije je žona we Wojerecach tele dny swoje pokradnjene koleso wróćene dóstała. Njeznaći běchu so do pincy wjaceswójbneho domu na Hasy Konrada Zuseho zadobyli a jeje groćaneho konika typa Stevens sobu wzali. Wobsedźerka wuhlada swoje koleso na to w interneće, hdźež je něchtó na předań poskićeše a aranžowaše z předawarjom zetkanje. Jako tak daloko bě, nječakaše jeno žona na swoje koleso, ale tež policija na podhladneho paducha. Pola 29lětneho namakachu zastojnicy rubiznu, kotraž pochadźa z dalšeho zadobywanja do pincy wjaceswójbneho domu we Wojerecach. Mjez druhim bě wón tam elektro-roler pokradnył. Za swoje njeskutki změje so paduch nětko před sudnistwom zamołwić.

Skićeja njetopyrjam nowy domicil

srjeda, 25. nowembera 2020 spisane wot:

Pola Wojerec planuje krajny zarjad za rěčne zawěry klětu wobšěrne saněrowanje nasypa podłu Čornicy a Čorneho Halštrowa. Přihotowanske dźěła tam hižo z połnej paru běža.

Wojerecy (SN/MWj). 18 nowych kwartěrow za njetopyrje je Wojerowska wodowa mištrownja wčera při Čornym Halštrowje pola Wojerec připrawiła. Njetopyrjowe kašćiki su jedna z wjacorych kompensaciskich naprawow za planowane saněrowanje nasypa podłu Wojerowskeje Čornicy a Čorneho Halštrowa, štož maja za přichodne lěto předwidźane. Kaž krajny zarjad za rěčne zawěry (LTV) informuje, trjebaja rozdźělne družiny njetopyrjow tež rozdźělne kwartěry. Tohodla zasadźa w swojej akciji tři wšelake njetopyrjowe kašćiki. Zo bychu małe cycaki swój nowy domicil tež přiwzali, připrawja je we wysokosći znajmjeńša štyrjoch metrow. Dokelž maja njetopyrje rady ćopło, njesmědźa jich kašćiki do sewjera wu­směrjene być. Nimo toho dyrbitej přilět a wotlět bjez zadźěwkow móžnej być.

Wěži matej zaso kulu a křiž

srjeda, 25. nowembera 2020 spisane wot:

Z ponowjenymaj cyblomaj saněrowanje třěchi cyrkwje wotzamknjene

Chrósćicy (SN/MWj). Byrnjež chětro zymny a jěry bě dźensa dopołdnja w Chrósćicach přiwšěm swjatočny a tež historiski wokomik. Horstka Chróšćanow mjenujcy sobu dožiwi, kak twarscy dźěłaćerjo najprjedy na sewjernu a potom na južnu nabóčnu wěžu pozłoćanu kulu a swjaty křiž připrawichu. „Z tym je hač na někotre maličkosće cyłkowne ponowjenje třěchi farskeje cyrkwje wotzamknjene“, rjekny farar Měrćin Deleńk.

Na małym nyšporje bě wón do toho kulu a křiž za sewjernu wěžu požohnował. Zhotowił bě jej Jasčanski kowar Michael Kaczmar. Pozłoćił je jej Rjenčec předewzaće z Dobrošic. W zašłych štyrjoch měsacach dóstaštej wobě wěži nowu cyblu z drjewa a kopora.

Ze susodnymaj komunomaj

srjeda, 25. nowembera 2020 spisane wot:

Město Wojerecy chce so přichodnje ze susodnymaj komunomaj sylnišo splesć. To je nowy wyši měšćanosta Torsten Ruban-Zeh (SPD) wčera na posedźenju měšćanskeje rady podšmórnył, mějo so po swojim připowědźenju při zapokazanja do zastojnstwa.

Wojerecy (AK/SN). Z jednym wzdaćom hłosa je wjetšina měšćanskich radźićelow zaměrowemu dojednanju mjez městom Wojerecami a gmejnu Sprjewinym Dołom přihłosowała. Wobě komunje změjetej přichodnje zhromadneho społnomócnjeneho za daty. Wón nadawki spjelni, kotrež měšćanske kaž tež gmejnske zarjadnistwo runje tak potrjechi.

Gmejna Sprjewiny Doł bě so loni nastupajo tutu naležnosć naprašowała. Jej dźeše wo zhromadne dźěło mjez komunomaj a chcyše docpěć, zo Wojerowski społnomócnjeny za daty swoje nadawki zdobom za gmejnu Sprjewiny Doł spjelni. Temu su dobroćiwje a wotewrjene rozjimali. Město Wojerecy próstwje zasadnje přihłosowaše. Jako wuslědk jednanjow předleži nětko zaměrowe do­jednanje. Sobu zakótwjeny je zarjad ­za prawniski dohlad Budyskeho wo­krjesa.

Serbska debata

nowostki LND