Chutne połoženje korony dla

štwórtk, 05. nowembera 2020 spisane wot:

Ličba nowych infekcijow z koronawirusom w Budyskim wokrjesu z kóždym dnjom dale rozrostuje. Tohodla je so krajny rada Michael Harig (CDU) z widejowym poselstwom wčera na ludnosć wobroćił. Tež předsyda Domowiny Dawid Statnik so starosći a wobydlerjow namołwja, „sebjekritisce z aktualnym stawom pandemije w našich kónčinach wobchadźeć“.

Krótkopowěsće (05.11.20)

štwórtk, 05. nowembera 2020 spisane wot:

Dale mnohe nowonatyknjenja

Budyšin/Zhorjelc. Ličba wšitkich wobkrućenych koronainfekcijow w Budyskim wokrjesu je wčera wo 250 na cyłkownje 2 376 rozrostła. Aktualnje schorjenych je 1 459 ludźi (+230). Z nich 36 (+7) w chorowni lěkuja. Zhorjelski wo­krjes je wčera 194 nowonatyknjenjow přizjewił, cyłkownje 1 814. W klinikach staraja so wo 110 pacientow (+5).

Wokrjesny zjězd přestorčeny

Budyšin. Za 14. nowember planowany zjězd Budyskeho wokrjesneho zwjazka CDU přesunu trajaceje koronapandemije dla najprjedy raz na 9. januar 2021. To je wokrjesne předsydstwo rozsudźiło, rěka w nowinskej zdźělence wokrjesneho běrowa. Wot přestorčenja je zdobom nominacija direktneho kandidata za klětuše wólby zwjazkoweho sejma potrjechena. Po zakonju móhli zjězd wotměć. Tuchwilnych wobmjezowanjow zetkawanja dla pak chcedźa ludnosći z přikładom być, tak so tež po tym maja.

Symbol města ponowjeja

Z Kukowa do lěsa njebě daloko

srjeda, 04. nowembera 2020 spisane wot:
Za lubowarjow hribow je lětuša nazyma přewšo wunošna. Dwaj prawakaj na jednym blečku je tele dny třilětny Feliks z Kukowa w lěsu namakał. Dale wuhlada wón tój­što maronow, kotrež smědźeše runja prawakam a dalšim hribam w korbiku sobu wzać. Daloko sej drje z Kukowa do lěsa dojěł njebě, ale hdźe dokładnje wón ze swo­jim nanom bě, nam bohužel přera­dźić nochcyše. Foto: Jan Rjeda

Policija (04.11.20)

srjeda, 04. nowembera 2020 spisane wot:

Solarny panel sobu wzali

Wulke Ždźary. Njewšědnu rubiznu běchu sej njeznaći skućićeljo w nocy na póndźelu při Hórnikečanskim jězoru blisko Wulkich Ždźarow wupytali. Na tamnišim wulkotwarnišću pokradnychu woni solarny panel. Kaž policija zdźěli, dodawaše tónle nastroj trěbnu milinu za měrjensku techniku, kotraž je na tamnišich nasypnišćach instalowana. Paduši pak njejsu jeničce solarny panel w hódnoće něhdźe 2 500 eurow sobu wzali, ale tež hišće bateriju, kaž w policajskej rozprawje rěka.

Nowa šćežka ze štyrjomi temami

srjeda, 04. nowembera 2020 spisane wot:

Stróža (SN/MWj). Wjetši twarski projekt su tele dny w biosferowym rezerwaće Hornjołužiska hola a haty zwoprawdźeć započeli. Kaž zamołwita za zjawnostne dźěło Christina Schmidt zdźěli, natwarja tam nowu přirodowu wučbnu šćežku Hućinjanske haty a Olbaski jězor, kotraž ma na městnje dotalneje šćežki nastać. Hižo wot lěta 2004 wona w swojej dźensnišej formje mnohich zajimcow přiwabja.

Dokelž pućiki, platformy, ławki, in­formaciske tafle a druhe připrawy hižo najnowšemu stawej njewotpowěduja, su wučbnu šćežku zasadnje znowa konci­powali. „Po wšěm zdaću hač do swjatkow 2021 ma so wona wobsahowje a twarsce předźěłać“, praji Christina Schmidt.

Pěstowarnju chcedźa ponowić

srjeda, 04. nowembera 2020 spisane wot:

Prócuja so wo financowanje ze srědkow za strukturnu změnu

Slepo (AK/SN). Pěstowarnja „Pfiffikus“ w nošerstwje Slepjanskeje gmejny budźe wobšěrnje saněrowana. Za to wuprajiła je so wčera tamniša gmejnska rada, kotrejež čłonojo to jednohłósnje schwalichu. Za financowanje projekta prócuje so gmejna nětko wo srědki z programa za strukturnu změnu. Konkretnje chcedźa to zwoprawdźić přez prěnju směrnicu sakskeho statneho ministerstwa za regionalne wuwiće wo sakskim strukturnym wuwićowym programje w bruni­co­wych rewěrach. „Spěchowanje wučinja 90 procentow cyłkownych twarskich kóštow. Swójski podźěl we wobjimje dźesać procentow ma do hospodarskeho pla­na zapisany być“, rěka we wobzamknjenju.

Radźićeljo so zetkaja

srjeda, 04. nowembera 2020 spisane wot:

Chrósćicy. Přichodne posedźenje Chróšćanskeje gmejnskeje rady wotměje so jutře, štwórtk, w 19 hodź. we wjaceza­měrowym rumje „Jednoty“. Na dnjowym porjedźe steji nimo wjacorych priwatnych twarskich naležnosćow wobzamknjenje wo njeplanowanych wudawkach za wottorhanje bywšeje Chróšćanskeje pěstowarnje. Nimo toho informuje wjesnjanosta wo nakupje mobilnych kónčnych nastrojow za Chróšćansku zakładnu šulu.

Njebjelčicy. Tohorunja jutře, štwórtk, ale w 19.30 hodź. zetkaja so čłonjojo Nje­bjelčanskeje gmejnskeje rady w posedźenskej rumnosći gmejny. Mjez druhim porěča woni wo tym, kak chcedźa srědki za skrućenje wjesneje kónčiny 2020 wužiwać. Wopytowarjo maja pła­ćiwe postajenja hygieny wobkedźbować a škitny nahubnik wužiwać.

Wotnožku zaso wotewru

Njeměrny přihot na zymu

srjeda, 04. nowembera 2020 spisane wot:

Je-li někajka mašina skóncowana, ­daš ju porjedźeć, abo trjebaš nowu, ­zo by swoje dźěło zmištrować móhł. Tež w gmejnje Ralbicy-Róžant so ­tuchwilu z tajkim prašenjom zaběraja. To pak je z ćežemi zwjazane.

Ralbicy (JK/SN). Zyma so bliži a komuny přihotuja naprawy za zymsku słužbu. Přewažnje činja to w swójskej zamołwitosći a z wotpowědnej techniku. To běchu dotal tež w gmejnje Ralbicy-Róžant tak činili. Gmejnski traktor pak, mjeztym nimale 20 lět stary, dyrbi znowa do re­paratury. Hač pak budźe hač k prěnjemu sněhej zaso zasadźomny, je njejasne. Toho­dla su so w gmejnskej radźe hižo w juliju na to dojednali, kupić nowy, wšitkim načasnym žadanjam komunalneho dźěła wotpowědowacy traktor. Tež wudawki we wysokosći 285 000 eurow su při nastajenju lětušeho hospodarskeho plana za to zaplanowali. Ale traktor dotal hišće žadyn nimaja.

Čłonojo Wojerowskeje iniciatiwy „Město sadźa“ běchu minjenu sobotu na łuce w Małej Nydeji při dźěle. Po tym zo běchu hižo loni na třoch tajkich akcijach dohromady 200 štomikow a kerkow sadźeli, chcedźa to nětko wospjetować. Hłownje budu ­to klony, krušwiny a jabłučiny. Z pomocu Leona je tu Andreas Mielke swój třeći štom dnja sadźił. Foto: Gernot Menzel

Choćebuz/Budyšin (SN/došo/JaW). Dešć minjenych dnjow a tydźenjow je situa­ciju nastupajo staw wody we łužiskich rěkach a jězorach polěpšił. To zdźěli Łu­žiska a srjedźoněmska towaršnosć hór­nistwoweho zarjadnistwa (LMBV) w nowinskej zdźělence.

„Wulkeje suchoty w lěću dla bě situa­cija we łužiskich rěkach kaž w Sprjewi a Čornym Halštrowje w juhu Braniborskeje a zdźěla tež Sakskeje měsacy dołho napjata. Dešć je połoženje chětro polěpšił“, hódnoći tohorunja kraje přesaho­waca dźěłowa skupina „Ekstremne situacije“, kotraž w naležnosći dwutydźensce wuradźuje. Minjene dny a tydźenje su předewšěm w Budyskim wokrjesu stu­pace mnóstwa spadkow zregistrowali. Mjeztym poručeja eksperća hižo braniborskim wokrjesam, „powšitkowny zakaz z powjerchowych wodźiznow wodu brać a klumpać zběhnyć“. Wokrjes Sprjewja-Nysa je poručenje hižo zwoprawdźił a minjeny tydźeń zakaz klumpanja wody z rěkow zběhnył. W Budyskim a Zhorjelskim wukaz dale płaći, rešerše Serbskich Nowin wunjesechu.

Serbska debata

nowostki LND