Krótkopowěsće (28.01.20)

wutora, 28. januara 2020 spisane wot:

Nowa prezentacija w interneće

Budyšin. Wot wčerawšeho předstaja so Budyski wokrjes z předźěłanej prezentaciju www.landkreis-bautzen.de w inter­neće. Nowa je rubika „Wokrjes Budyšin-nowosće“, hdźež podawaja informacije w serbskej rěči. Pokazka na nju na star­towej stronje „Aktuelles in sorbischer Sprache“ pak je bohužel němska.

600 filmow so požadało

Wulke Hendrichecy. Wot 12. do 17. meje wotměje so w třikrajowym róžku 17. nysowy filmowy festiwal. Wjace hač 600 hrajnych, dokumentariskich a krótkofilmow su zarjadowarjo festiwala we Wulkohendrichečanskim Kunstbauerkino dóstali. Wone pochadźeja z Němskeje, Pólskeje a Čěskeje kaž tež z Portugala, Grjekskeje, Egyptowskeje, Irana, Indiskeje a Awstralskeje. W měrcu chcedźa paski za festiwal wuzwolić.

Do Pekinga jeno z přestupom

Policija (28.01.20)

wutora, 28. januara 2020 spisane wot:

Drogi a municiju namakali

Hołbin. Při kontroli wosoboweho awta w Hołbinje (Taubenheim) pola Załomja (Sohland) namakachu sobudźěłaćerjo cła 50 gramow marihuany a informowachu policiju. Ta zwěsći, zo steješe 18lětny wodźer pod wliwom cannabisa. W běhu přepytowanjow storčichu zastojnicy na dalšeho 17lětneho podhladneho. Jako so po jeho bydlenju rozhladowachu, namakachu 2,5 kilogramow marihuany a štyricyfrowu sumu pjenjez. Nimo toho měješe młodostny pistolu a tójšto municije w bydlenju. Hladajo na swoju starobu njetrjebaše wón do přepytowanskeje jatby,­ dyrbi pak přiwšěm na sudnistwo.

Běrow nachwilnje zawrjeny

wutora, 28. januara 2020 spisane wot:

Njebjelčicy. Jutře, 29. januara, wostanje běrow Njebjelčanskeho gmejnskeho zarjadnistwa wot 8.45 do 12.30 hodź. za­wrjeny. Jako přičinu mjenuje komuna dalekubłanje­ swojich sobudźěłaćerjow a prosy wo zrozumjenje.

Jutře na „hłownu“

Pančicy-Kukow. Čłonojo Domowinskeje skupiny Pančicy-Kukow njech njezabudu na swoju hłownu a wólbnu zhroma­dźiznu. Wona wotměje so jutře, srjedu, w 19 hodź. w rumnosći farskeje wikarije na klóšterskim dworje. Po rozprawje wo lońšim dźěle skupiny, po wólbach a wobzamknjenju noweho plana wobhladaja sej při horcym winje a kołbaskach domiznowědny film. Wšitcy čłonojo a dalši zajimcy su wutrobnje witani.

Kak amfibijam pomhać?

Dołha Boršć. W přirodoškitnej staciji wuchodneje Hornjeje Łužicy w Dołhej Boršći (Förstgen) pola Mikowa (Mücka) budźe jutře, srjedu, w 19 hodź. přednošk na temu „Kak móžu domjace amfibije podpěrać?“. Wobdźělnicy dóstanu praktiske pokiwy, kak móža swój dźěl přinošować, zo bychu so žaby, krokawy a dalše tajke zwěrjata zachowali.

Ličba wobydlerjow wostała

póndźela, 27. januara 2020 spisane wot:

Runja mnohim druhim gmejnam tež Hodźijska stajnje spočatk lěta statistiku wuwića swojeho wobydlerstwa wozjewja. Tele dny je so tuž tamniša gmejnska rada z ličbami zaběrała.

Hodźij (CK/SN). Kónc lěta 2019 bydleše w gmejnje Hodźij 3 083 ludźi. 20 wukrajnikow mjez nimi woznamjenja podźěl snadnych 0,6 procentow. Lońše 32 porodow 32 zemrětych takrjec narunaja. A trochu kuriozne snano tež je, zo bě so 128 ludźi do druhich kónčin přesydliło, ale runje telko do Hodźijskeje gmejny přićahnyło. Ličba wobydlerjow wosta potajkim njezměnjena. Na zašłym posedźenju gmejnskeje rady předstaji wjesnjanosta Gerald Meyer (njestronjan) wobydlersku statistiku wot lěta 1992. W tychle 27 lětach je komuna dohromady 377 wobydlerjow­ zhubiła. Wona wobsteji z 32 wjesnych dźělow něhdyšich samostatnych gmejnow Hodźij, Prěčecy a Koblicy. Z 857 ma Hodźij najwjace, Mała Praha­ z 15 wobydlerjow najmjenje.

Krótkopowěsće (27.01.20)

póndźela, 27. januara 2020 spisane wot:

W muzeju kwasowali

Drježdźany. Dźěći a starši towarstwa Stup dale z. t. w Drježdźanach swjećachu sobotu ptači kwas a pokazachu swój program­ něhdźe 200 ludźom w foyeru tamnišeho měšćanskeho muzeja. Při woblěkanju serbskeje katolskeje narodneje drasty je staršich towarstwa Kristin Bel­kotowa z Hózka podpěrała. Program nazwučowali běchu we wobłuku dźěłoweho zjednoćenstwa „Serbšćina“.

Brošurka přepodata

Worklecy. Brošurku „Moje wukubłanje“ su Marija-Tereza Krawžic, Marija Kokli­na, socialna dźěłaćerka za młodźinske socialne dźěło Rěčneho centruma WITAJ, a Pětr Brězan, referent za hospodarske a infrastrukturne naležnosće Domowiny, pjatk we Worklečanskej wyšej šuli přepodali. Domowina bě 124stronsku ediciju k powołanskej orientaciji loni w nakładźe 300 eksemplarow wudała.

Kobe Bryant mjez woporami

Policija (27.01.20)

póndźela, 27. januara 2020 spisane wot:

Z kolesom ćeknyć spytał

Běła Woda. Zo nima wjele zmysła, před policiju ćěkać, a to hišće z kolesom, wě wot soboty 18lětny w Běłej Wodźe. Jeho chcychu zastojnicy na Brězowskim puću kontrolować. Młodostny chcyše so tomu wuwinyć a ćekny. Policisća pak běchu spěšniši a jeho chětře dosahnychu. Na to so tež bórze přičina wukopa, čehodla je wón so zminyć chcył. W nachribjetniku młodeho muža namakachu mjenujcy wšelake nastroje za konsum drogow. Nětko drje dóstanje 18lětny póštu wot sudnistwa.

Pozabyte do pomjatka zwołałoj

póndźela, 27. januara 2020 spisane wot:

Budyšin. Kak intensiwnje je mnoholětny jednaćel Domowiny Bjarnat Cyž před třiceći lětami za serbske naležnosće rozsudne wuhibki sobu stajał, wuwědomi wón minjenu wutoru w kruhu serbskich seniorow Budyskeje katolskeje tachantskeje wosady. Monika Cyžowa pak, mějićelka drastoweho fundusa, zaměstnjeneho na něhdyšej Róžeńčanskej šuli, je jara nazornje na wšelake warianty drasty katolskich Serbowkow pokazała.

Pančičanski wosud w pozadku

pjatk, 24. januara 2020 spisane wot:

Worklečansku wyšu šulu „Michał Hórnik­“ dyrbja nuznje saněrować, štož by něhdźe 3,2 milionaj eurow płaćiło. Gmejna sama to njemóže. Nětko rozmysluja radźićeljo wo tym, nošerstwo kubłanišća wokrjesej přepodać.

Worklecy (SN/MWj). Wo přichodźe Worklečanskeje Serbskeje wyšeje šule „Michał Hórnik“ wosta po wčerawšim posedźenju gmejnskeje rady wjele prašenjow njewotmołwjenych, byrnjež dołho wo nich rěčeli. Wažniše bě, zo prašenja scyła na blido přińdu. Za to bě nawoda wo­krjesneho šulskeho zarjada Georg Richter přijěł, zo by spytał na nje wotmołwić, štož pak so jemu jeno zdźěla poradźi.

Pozadk je, zo dyrbja kubłanišćo wobšěrnje saněrować, byrnjež gmejna Worklecy minjene lěta wobstajnje do njeho inwestowała. Přichodne twarske wuža­da­nja pak njemóže sama zmištrować. Móžny wupuć móhł być, zo Budyski wokrjes nošerstwo přewozmje. Wón nima jenož lěpše pjenježne móžnosće hač gmejna, ale tež wotpowědne nazhonjenja.

Kubłanski koncept rozjimali

pjatk, 24. januara 2020 spisane wot:

Předšulske kubłanje je wčerawše wuradźowanje gmejnskeje Ralbicy-Róžant bytostnje postajało. Radźićeljo běchu sej kubłanski koncept Ralbičanskeje pěstowarnje­ předstajić dali.

Róžant (SN/JaW). Nawodnica Ralbičanskeje pěstowarnje „Dr. Jurij Młynk“ Jadwiga Nukowa a jeje naměstnik René Bětnar žněještaj wčera na posedźenju gmejnskeje rady w Róžeńće tójšto připóznaća.

Wonaj předstajištaj koncept kubłanišća, kotrež je w nošerstwje Serbskeho šulskeho towarstwa. „Zakład koncepta su wodźacy wobraz SŠT kaž tež zakonske předpisy“, rjekny Jadwiga Nukowa. Kaž wona dale rozłoži statne zarjady, nošer pěstowarnje a tež gmejna koncept wobstajnje kontroluja. Najwažniši dypk je, zo pěstuja serbsku rěč, serbske nałožki kaž tež tradicije. Wšědny dźeń w pěstowarni je na rěč wusměrjeny. „Wšitcy přistajeni serbsce rěča.“ Wusměrjeny je koncept na to, zo činja dźěći we wšelakich wobłukach pěstowarnje to, štož so jim spodoba a kubłarki a kubłarjo je přewodźeja.

Krótkopowěsće (24.01.20)

pjatk, 24. januara 2020 spisane wot:

Měšćanske dwórnišćo přepodate

Budyšin. Modernizowane Budyske dwórnišćo staj inwestoraj Jörg Drews a Gerald Lucas w přitomnosći zastupjerjow krajneho zjawneho žiwjenja dźensa swjatočnje přepodałoj. Zaměstnjene su tam nowa wotnožka krajnoradneho zarjada ze socialnym a młodźinskim zarjadom, kofejownja, předawarnja jězdźenkow, wobchadny zwjazk ZVON a chorobna kasa Barmer. Ludnosć bě popołdnju na wote­wrjenje přeprošena.

Gudrun Pausewang njeboh

Bamberg. Awtorka knihi „Die Wolke“ Gudrun Pausewang je wčera 91lětna zemrěła. W romanje „Mróčel“ (1987) wopisuje wona dóńt młodostneje po atomowej katastrofje w němskej milinarni. Pausewang je wjace hač 90 knihow wozjewiła a bu w 2017 z Němskim mytom za młodźinsku literaturu za swój žiwjenski skutk wuznamjenjena.

Srědki za Lessingowy gymnazij

nawěšk

SERBSKE NOWINY podpěruja:

Novi Sad – kulturna stolica Europy

nowostki LND