Znamjo zhromadnosće
Wokrjesny sejmik Dubje-Błóta wo přistupje k Domowinje rozsudźił
Lubin (SN/JaW). Wokrjes Dubje-Błóta chce so ze spěchowanskim čłonom Domowiny stać. Wotpowědnu próstwu móža zamołwići nětko zarjadej serbskeho třěšneho zwjazka zapodać. To je wčera wokrjesny sejmik w Lubinje wobzamknył. Z tym je delnjołužiski wokrjes scyła prěni, kotryž so wo status spěchowanskeho čłona Domowiny prócuje. Kaž z wobzamknjenja wuchadźa, je tójšto towarstwow wokrjesa, mjez druhim Běłeje Góry (Byhleguhre), Noweje Niwy (Neu Zauche) a Lubina (Lübben), z čłonom Domowiny. „Ze spěchowanskim čłonstwom w Domowinje sadźi wokrjes znamjo za wzajomne zhromadne dźěło a přisłušnosći Serbam. Z přistupom skića so wokrjesej šansa na institucionalnej runinje, wuwiwanje jónkrótneho a mnohotneho kulturneho namrěwstwa Serbow sobu wuhotować.“ Dale wustaja wokrjes we wobkrućenju wobzamknjenja swój krok jako teritorialna korporacija status spěchowanskeho čłonstwa docpěć jako „pioněrski. Wokrjes ma z tym wusahowacu hódnotu w serbskim sydlenskim rumje mjez krajomaj Braniborskej a Sakskej.“
Krótkopowěsće (29.10.20)
Z časom slědować hižo njemóža
Budyšin/Zhorjelc. 139 nowych natyknjenjow z koronawirusom su wčera w Budyskim wokrjesu zwěsćili. Wulkeje ličby padow dla njemóže strowotniski zarjad hižo wšitke kontaktowe wosoby pozitiwnje testowanych informować, w zdźělence rěka. W Zhorjelskim wokrjesu su wčera 146 nowoinfekcijow zwěsćili.
Statnik gratuluje Kamjenicy
Budyšin. Předsyda Domowiny Dawid Statnik je Kamjenicy k wuzwolenju jako Europska kulturna stolica 2025 gratulował. „Kamjenica skići ze swojim słowjanskim pochadom dobry zwisk k ideji, w třikrajowym róžku 2018 abo 2019 mjezy přesahowacu kulturnu stolicu wutworić. By rjenje było, hdyž by Łužica jónu takrjec štafelowy stab wot Kamjenicy w rjedźe europskich kulturnych stolicow přewzać móhła“. (hlej tež 2. stronu)
Móst přez dróhu do Łužicy
Radźićeljo so zetkaja
Ralbicy. Z namjetom financowanja nowotwara pěstowarnje w Ralbicach zaběraja so čłonojo gmejnskeje rady Ralbicy-Róžant na swojim zjawnym posedźenju jutře, štwórtk, we 18.30 hodź. w Ralbičanskej sportowni. Dale póńdźe wo njeplanowane wudawki za planowanje noweje pěstowarnje. Na dnjowym porjedźe steji nimo toho wobzamknjenje k wozjewjenskim taflam gmejny. Wopytowarjo maja na posedźenju nahubnik wužiwać.
Nowa nadróžna mištrownja
Kinspork. Wot přichodneho tydźenja so struktura nadróžnych mištrownjow w Budyskim wokrjesu změni. Po přepruwowanju dotalnych šěsć mištrownjow na hospodarskosć a potrjebu inwesticijow zwěsćichu, zo měli mištrowni Kamjenc a Wachau hromadźe połožić a na nowym městnje w Kinsporku koncentrować. Tam budu wšitke trěbne rumnosće w jednym twarjenju. Přichodny tydźeń srjedu nowu nadróžnu mištrownju w Kinsporku přepodadźa.
Při błyskanju nadobo prasnyło
Wot padlowanja hač k mišterstwam
Runje wčera před sto lětami su w Grodku kanusportowe towarstwo załožili. To je nětko tema wosebiteje wustajeńcy w tamnišim Delnjołužiskim holanskim muzeju.
Grodk (JoS/SN). Za kanusport w bywšej NDR hraješe Grodk wuznamnu rólu. Tole je widźeć we wosebitej wustajeńcy w tamnišim Delnjołužiskim holanskim muzeju. Ju pokazaja składnostnje 100. róčnicy załoženja Grodkowskeho kanusportoweho towarstwa 27. oktobra 1920. Hižo lěto pozdźišo natwarichu na prawym boku Sprjewje prěni čołmikowy dom. Wón je wšitke časy přetrał a prezentuje so po saněrowanju w lěće 2004 w nowej pyše. Spočatnje steješe wodowy pućowanski sport w srjedźišću. Jutry 1921 padlowachu z Grodka prěni raz do Čelnoho. Hač do Druheje swětoweje wójny tónle sport dominowaše. Najdlěša jězba wjedźeše 1939 na Dunaju wot Ingolstadta hač do Wiena.
Policija (28.10.20)
Dwójce z drogami
Běła Woda. Hnydom dwójce je 18lětny wodźer motorskeho w nocy na wutoru policistam Běłowodźanskeho rewěra napadnył. Najprjedy lepichu jeho w Běłej Wodźe a zwěsćichu, zo steješe pod wliwom drogow. Młodostny dyrbješe krej wotedać a njesmědźeše dale jěć. Lědma dwě hodźinje pozdźišo pak samsne motorske policistam w Trjebinje napřećo přijědźe a znowa bě drogowy test pozitiwny. Tónraz kluč sćazachu.
Pjekarjo, pčołarjo a winicarjo
23. Wojerowski stawizniski zešiwk je kulinariski přewod po měsće
Wojerecy (SiR/SN). Wjace hač 80 stron zezběranych faktow a dopomnjenkow časowych swědkow, k tomu aktualne wobrazy a historiske dokumenty wopřija nowy Wojerowski stawizniski zešiwk. Na jeho wobalce je widźeć wobraz domjaceju pjekarkow w serbskej drasće. Nastał je wón wokoło 1900 a pochadźa z priwatneho archiwa awtora Andreasa Noacka. Předwčerawšim su mjeztym 23. zešiwk tohole rjadu we Wojerowskej radnicy předstajili. W nim wjerći so wšitko wokoło pjekarjow, pčołarjow a winicarjow. Wudawaćelej stej město a měšćanski muzej.
Rozžohnowacemu so wyšemu měšćanosće Stefanej Skorje (CDU) je nowy zešiwk wosebitosć. Wšako je wón hižo 1998 k Dnjej Saksow we Wojerecach wudaće prěnjeho zešiwka sobu dožiwić směł. Krótko prjedy hač jeho naslědnik Torsten Ruban-Zeh kluč radnicy přewozmje, je zešiwk čo. 23 wušoł, kiž chcychu hakle kónc lěta předstajić. Změny na čole města dla su to zašo činili.
Dźěći pilni zahrodkarjo byli
Njeswačidło (aha/SN). Loni w Njeswačanskim parku wuspěšnje zahajena akcija, zelenišćo před třomi restawrowanymi studnjemi z nalětnimi kwětkami nasadźeć, je mjez wopytowarjemi wjele připóznaća našło. Tohodla su wčera dopołdnja znowa tajku akciju přewjedli. Za čas tuchwilnych prózdnin w horće přebywacych šulerjow powitaštaj na něhdźe 60 króć sto metrow wulkej płoninje wjesnjanosta Gerd Schuster (CDU) a nawodnica gmejnskeho twarskeho zarjada Katrin Ullrich. Mjeztym zo wjesnjanosta šulerjam zaměr akcije rozłoži, rozdźěli jeho sobudźěłaćerka 20 šulerjam něhdźe 3 000 kwětkacych cybličkow. Holcy a hólcy so na to z pomocu swojich kubłarkow jako pilni zahrodkarjo wopokazachu. Připódla woni zhonichu, z kotrych cyblkow pozdźišo krokusy, narcisy abo hyacinty narostu. Z wulkim zapalom so wšitcy zhromadnje wo to starachu, zo bychu cyblički po cyłej płoninje rjenje rozdźělili, zo móhło klětu wšitko kćěć. Runje tak kaž dorosćeni běchu tež šulerjo ze swojim dźěłom spokojom.
Za nowonarodźenych lěta 2019 su tele dny w Brětni štomik ...
Mnohotnosć, stawizny a hojenske mocy lawendla
Čmjeły a mjetele zlětuja kołowokoło hrjadkow, posadźene z lawendlom, někotři praja tež lěwanćikom. Něžna fijałkojta barba kćenjow zwjesela woči wopytowarjow. „Wužiwam jenož prawy lawendl, kiž mjenuje so po łaćonskim Lavandula angustifolia, bóle znaty pod zapřijećom lawendl. Tón ma wobstatki, kotrež słuža hojenju. Skutkuje tuž změrujo kaž tež wožiwjejo“, rozłožuje Yvonne Müller při wodźenju po swojej Njedźichowskej zahrodźe. Dwě lěće hižo ma wona mały wobchod za lawendl. Lětsa je prěni króć dźeń wotewrjenych duri zarjadowała. Lawendl, tak zhonja wopytowarjo wot njeje, je lěkowanska rostlina lěta 2020. Jury je za to wjacore přičiny mjenowała, mjez druhim mnohostronski wužitk rostliny w stawiznach čłowjestwa kaž tež najnowše wuslědki slědźenja.
