Budyšin (SN/MWj). Lědma hdy žněje wobzamknjenje Budyskeje měšćanskeje rady přiklesk publikuma. Tele wuwzaće bě dožiwić na zašłym posedźenju parlamenta, jako stajichu radźićeljo wuhibki za twar noweho sportoweho parka w Strowotnej studni. Za njón přewostaji město spěchowanske srědki we wobjimje 436 000 eurow.
Po měnjenju wyšeho měšćanosty Alexandera Ahrensa (SPD) njenastanje jenož atraktiwny poskitk w Strowotnej studni, ale tež „městno, kotrež móhło nadregionalny wuznam měć“, rěka w nowinskim wozjewjenju města. Ze spěchowanskimi srědkami móže Budyska bydlenjotwarska towaršnosć (BWB) bjezposrědnje při spjatym jězoru připrawu za skaterow, scooterow a BMX-kolesowarjow natwarić. Runočasnje nastanje basketballnišćo. Wot města přewostajene pjenjezy pochadźeja ze spěchowanskeho programa Zwjazka a kraja za měšćanski přetwar.
Kajka měła strukturna změna we Wojerecach wupadać, bě jedna z temow wčerawšeho posedźenja tamnišeje měšćanskeje rady. Při tym mjenowaše wyši měšćanosta Stefan Skora wjacore projekty, na kotrež chcedźa so přichodnje wusměrić. Bě to poslednje posedźenje radźićelow, kotrež je Skora jako wyši měšćanosta nawjedował.
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ tworićelskosć na dobro našeje maćeršćiny znowa pozbudźiło. Serbske Nowiny tule w serialu rjad drobnych a małych projektow předstajeja.
Čłonojo předsydstwa Wojerowskeje župy „Handrij Zejler“ chcedźa swój Domowinski dom na Drježdźanskej we Wojerecach jako zetkanišćo skrućić. Kaž wuzběhny regionalna rěčnica Domowiny za Wojerowski region Sonja Hrjehorjowa, kotraž je zdobom čłonka tamnišeho župneho předsydstwa, chcedźa ludźom z města, wokolnych wsow a dalšim zajimcam kaž tež pěstowarnjam a šulam pod hesłom „Zetkawanska bróžnja“ prawidłownje zarjadowanja poskićeć. „Prěnje tajke smy kónc septembra wotměli. Serbski ludowy ansambl je wuhotował hudźbno-literarne popołdnjo rjadu ‚Zynki a linki‘. W našej bróžni je Hanka Rjelcyna twórby z pjera Marje Młynkoweje recitowała, štož wobrubichu hudźbnicy z twórbami serbskich komponistow kaž Jana Pawoła Nagela, Bjarnata Krawca a dalšich“, rozłoži Hrjehorjowa.
Casnik dóstanje šefredaktorku
Choćebuz. Stefanie Krawcojc budźe wot 2021 šefredaktorka Noweho Casnika. Městno je na pjeć lět wobmjezowane. Krawcojc naslěduje dr. Viktora Zakarja, kotryž funkciju po wotchadźe Gregora Wieczoreka hišće hač do kónca lěta wukonja. 45lětna maćernorěčna Delnjoserbowka je w Berlinje a w Finskej studowała a je wot lěta 2014 redaktorka najstaršeje nowiny w Delnjej Łužicy.
Nětko rizikowa kónčina
Budyšin/Zhorjelc. Ze 162 pozitiwnje na koronawirus testowanymi w běhu sydom dnjow je wčera tež Budyski wokrjes hranicu 50 nowoinfekcijow na 100 000 wobydlerjow překročił a je tuž rizikowa kónčina. Wobmjezowanja pak tam najprjedy njepřiwótřa, ale wočaknu dalše směrnicy sakskeho knježerstwa, rěka z Budyskeho krajnoradneho zarjada. W Zhorjelskim wokrjesu su wčera 220 natyknjenych zličili, 25 wjac hač dźeń do toho.
Z nowymaj čłonomaj
Rakecy (JK/SN). „Zo je regionalny management LEADER-regiona Hornjołužiska hola a haty runje w Rakecach zaměstnjeny, je za nas wulke zbožo a tež zakład komunalnych wuspěchow“, rjekny Rakečanski wjesnjanosta Swen Nowotny (CDU) na minjenym posedźenju gmejnskeje rady. Z tutymi słowami witaše regionalneho managera Rudolfa Rychtarja, kotryž poda rozprawu wo wuspěšnym zakónčenju spěchowanskeje doby w regionje. Za čas spěchowanja wot 2014 do 2020 je tež Rakečanska gmejna měła tójšto dobrotow. Mnoho su tam na dobro gmejny a wobydlerjow zwoprawdźili. Cyłkownje je regionalny management komunje přewostajił 750 000 eurow spěchowanskich srědkow z dohromady za cyłu dobu a region k dispoziciji stejacych 12,5 milionow eurow. Z Rakečanskeje gmejny bu 16 próstwow wo spěchowanje zapodatych. Z toho běštej dwě za priwatny bydlenjotwar. Tamne budu swoje slědy na dobro gmejny hišće mnohe lěta zawostajić. Na jednej próstwje ma Rudolf Rychtar tež wosobinski podźěl. Je to Rakečanske strowotniske srjedźišćo, kotrež su wutworili w něhdyšej kupnicy Penny.
Budyšin. Dale trajaceje pandemije dla dyrbja so přichodne přednoški Maćičneje akademije, kiž bychu so wot nowembra hač do měrca w Budyskim hosćencu „Wjelbik“ wotměli, nažel wotprajić. To zdźěli w mjenje stawizniskeje sekcije Maćicy Serbskeje Trudla Malinkowa. Po normalizowanju wobstejnosćow chcedźa zarjadowanja nachwatać. Terminy sčasom zdźěla.
Čita z twórbow Domaški
Budyšin. Jedyn z najwuznamnišich ludowych powědarjow do Prěnjeje swětowej wójny kaž tež mjez wójnomaj, Romuald Domaška (1869–1945), steji w srjedźišću zabawneho wječora srjedu, 21. oktobra, w 19.30 hodź. w Budyskim Dźiwadle na hrodźe. K 75. posmjertninam wěnuja jemu hudźbno-literarny wječor w rjedźe „Zynki a linki“. Dźiwadźelnik Jurij Šiman čita ze zběrki Domaški „Wokoło stareho młyna“. Hudźbnicy SLA čitanje přewodźeja. Wšitcy zajimcy su wutrobnje přeprošeni
Pod wliwom drogow do kupy zajěł
Hrańca. Drogi běchu sobu wina na wobchadnym njezbožu, kotrež je so minjenu sobotu w Hrańcy stało. Krótko po 16 hodź. jědźeše tam 18lětny wodźer Peugeota na statnej dróze S 101, jako do wobchadneje kupy zrazy a při tym wobchadnej znamjeni skóncowa. Dohromady nasta 500 eurow škody, awto bu dospołnje wobškodźene. Přiwołana policija přewjedźe pola młodostneho drogowy test a zwěsći, zo bě wón amfetaminy brał. Jeho jězbnu dowolnosć sej zastojnicy hnydom wobchowachu.
Chrósćicy (SN/MWj). Runje hakle je Chróšćanska gmejna bywše šulske twarjenje na gmejnski a kulturny centrum přetwariła, to čaka na nju přichodne twarske wužadanje, a to hnydom w susodstwje. Sportowu a wjacezaměrowu halu „Jednota“ dyrbja mjenujcy saněrować. Při tym njeje rěč wo kusk čerstwej barbje, ale wo wulkim twarskim projekće, kaž wjesnjanosta Marko Kliman (CDU) čłonam gmejnskeje rady na jich zašłym posedźenju wuswětli. Woni schwalichu 18 800 eurow za prěnje planowanje projekta, štož je zakład za to, zapodać próstwu wo spěchowanje.
Budyšin (SN). W Budyskim wokrjesu je strowotniski zarjad wčera 24 nowych infekcijow w zwisku z koronawirusom přizjewił. Z tym so ličba nowych infekcijow w běhu sydom dnjow na 100 000 wobydlerjow na 49,3 powyši. Hranica postajenych 50 je nimale docpěta. Wobydlerjo Budyskeho wokrjesa maja so prawdźepodobnje na nowe přiwótřene postajenja nastajić, kajkež wot wčerawšeho hižo w Zhorjelskim wokrjesu płaća. Tam ležeše hódnota wčera pola 56,58 nowych infekcijow. Na wjetšich zarjadowanjach, zhromadźiznach a swjedźenjach smědźa so jasnje mjenje ludźi wobdźělić. To samsne płaći za priwatne zeńdźenja. Dźensa připołdnju chcychu zamołwići na nowinarskej rozmołwje aktualne połoženje w Zhorjelskim wokrjesu rozłožić.
W Budyskim wokrjesu ličba pacientow w chorownjach přiběra. Mjeztym so tam dźesać wosobow lěkuje. Ličba wopodstatnjenych infekcijow je so na 880 zwyšiła, 249 z nich je tuchwilu schorjenych. Cyłkownje 751 wosobow je w karantenje.