Adwentne woknješko
Bajki interaktiwnje dožiwić
Z jubilejom doprědka hladaja
Wulke plany za staciju młodych slědźerjow a technikarjow
Běła Woda (AK/SN). Stacija młodych slědźerjow přirody a technikarjow w Běłej Wodźe chce w lěće 2027 jako modernizowane a generacije přesahowace městno wuknjenja do noweho přichoda startować. Na dotalnym městnje na kromje města nastanje twarski kompleks z dźěłarnjemi, seminarnymi rumnosćemi, běrowami, žurlu, móžnosćemi přenocowanja kaž tež wonkownymi připrawami z jewišćom. Kooperaciski partner budźe nimo přirodoškitneje stacije Astrocentrum Łužica (DZA). Projekt „Stacija přichoda“ płaći 4,88 milionow eurow a ma so k 81 procentam z pjenjez za změnu strukturow financować. Dale wobdźělenej stej město Běła Woda a Swobodny stat Sakska. „Ličimy z dźesać kruće přistajenymi“, rjekny nawoda Bernd Frommelt tele dny k 70. róčnicy stacije.
Policija (11.12.23)
Lift tčacy wostał
Wojerecy. Na nic runjewon najrjeńšim městnje dyrbješe pjatk wječor 38lětny muž dlěši čas wutrać. W jednym z bydlenskich domow na Budyskej aleji we Wojerecach wužiwaše wón krótko po 18 hodź. lift, kiž nadobo mjez štwórtym a sedmym poschodom tčacy wosta a so hižo njehibaše. Regionalna dispatchernja wuchodneje Sakskeje koordinowaše trěbnu pomoc a pósła technikarja na městno. Jemu so poradźi lift reparować, tak zo móžeše 38lětny swoje jastwo po dwěmaj hodźinomaj njezranjeny zaso wopušćić.
Wopity z awtom jěł
Njedźichow. Při wobchadnej kontroli w Njedźichowje su policisća sobotu připołdnju 38lětneho šofera Škody zadźerželi. Pola njeho naměrichu 1,38 promilow alkohola w kreji.
Seniorojo škotuja
Budyšin. Lětuši posledni škotowy turněr serbskich seniorow wotměje so jutře, wutoru, w rezidency seniorow na Budyskej Tschirnerowej 10. Započatk budźe w 14 hodź. Nimo dobyćerjow dnja počesća šěsć najlěpšich škotowarjow lěta z pokalemi a wěcnymi mytami. Kaž hłowny organizator Měrćin Nowak zdźěli, wobkedźbuja při tym wosom wuslědkow wobdźělenych w běhu lěta.
Radźićeljo wuradźuja
Radwor. Zjawne posedźenje Radworskeje gmejnskeje rady wotměje so srjedu, 13. decembra, we 18.30 hodź. w towarstwowym domje wjesneho kluba Lutobč-Měrkow na Parkowej dróze 3 w Lutobču. Mjez druhim wobkruća radźićeljo zamołwiteho za serbske prašenja Radworskeje gmejny. Nimo toho zaběraja so ze zhromadnym ćopłotnym planowanjom gmejnow Radwor, Wulka Dubrawa a Malešecy.
Za dźěłarničku so přizjewić
Wudźěleja wotpadkowu protyku
Budyšin (SN/MWj). Wot minjeneho kónca tydźenja hač do 22. decembra wudźěleja w Budyskim wokrjesu wotpadkowu protyku za lěto 2024. Protyka ma runje tak kaž w zašłym lěće format wokrjesneho žurnala „Hdys a hdys“. Wobydlerjo měli potajkim trochu dokładnišo hladać, prjedy hač swoje stare nowiny wotbudu. Mjez nimi móhła snano tež wotpadkowa protyka być, kaž Budyski krajnoradny zarjad informuje.
W protyce zapřijate su zaso terminy wotwožowanja jednotliwych wotpadkowych sudobjow za wšitke města a gmejny wokrjesa. Tele terminy su kruće zapisane a so hižo njezměnja. Tež swjate dny su wobkedźbowane. Štóž tajki termin skomdźi, nima hižo šansu, zo jeho wotpadkowe sudobje dodatnje wuprózdnja. Nimo toho su w protyce zapřijate pokiwy, kak najlěpje wotpadki dźěliš, powšitkowne informacije wo wotpadkowym hospodarstwje, adresy městnow, hdźež móžeš swoje dodźeržane elektriske nastroje wotbyć, kaž tež dalše adresy komunalnych a priwatnych přijimarnjow zelenych wotpadkow.
Derje radźili su so prěnje adwentne wiki na Radworskej kupje, ...
Krótkopowěsće (11.12.23)
SN dźěło fotografow připóznawaja
Berlin. Serbske Nowiny su nimo dźenikow Mainpost a Landshuter Zeitung znowa přikładne nastupajo prawo fotografowkow a fotografow, zo so jich mjeno wozjewja. Wo tym informowaše Zwjazk žurnalistow Němskeje (DJV) dźensa w Berlinje. Při wuhódnoćenju zwěsćachu, zo steji w Serbskich Nowinach pod sto procentami fotow mjeno awtora. „Njeńdźe jenož wo zakoń, ale wo připóznaće dźěła“, rjekny Mika Beuster, zwjazkowy předsyda DJV.
Z Choćebuza do Żaganja direktnje
Choćebuz. Direktny ćah DB Regio zwjaza jako RB93 pjeć razow wot póndźele do pjatka a dwójce kónc tydźenja nětko Choćebuz z pólskim městom Żaganjom we wojewódstwje Lubuskie. Dotal dyrbjachu pasažěrojo w Baršću do pólskeho ćaha přestupić. Změna płaći z nowym jězbnym planom wot wčerawšeje njedźele. Dotalny poskitk ćahow mjez Choćebuzom a Baršćom so njezměni.
Dźak za čestnohamtstwo
Woda a wopłóčki budu dróše
Wojerowske zastaranske zawody reaguja na aktualne wuwiće
Wojerecy (AK/SN). Płaćizny za pitnu wodu, wopłóčki a wotwodźowanje dešćikoweje wody Wojerowske zastaranske zawody (VBH) wot klětušeho zwyša. Wone maja potom hač do 2027 stabilne wostać. Kaž jednaćel Wolf-Thomas Hendrich srjedu rjekny, reaguja tak na přiběrace wudawki za personal a material.
Za kubikny meter pitneje wody změja wobydlerjo wot januara 1,95 eurow město dotal 1,74 eurow płaćić. Měsačna zakładna płaćizna na přikład za jednoswójbny dom ze štyrjomi wosobami rozrosće wot 10,59 eurow na 16,94 eurow. Dróše budźe tohorunja rjedźenje wopłóčkow, štož wobstaruja we wodočisćerni na Horach za město Wojerecy, Łuty, Lubuš, Halštrowsku Holu a Wulke Ždźary. Płaćizna za kubikny meter wopłóčkow podróši so wot 3,26 eurow na 3,32 eurow. Měsačna zakładna płaćizna rozrosće wot 12,26 na 17,75 eurow. Tež za wotwodźowanje dešćikoweje wody budu ludźo we Wojerecach a wokolinje wjace płaćić dyrbjeć, mjenujcy wšudźe tam, hdźež dešćik do zemje zasaknyć njemóže. To wobliča po płoninje. Na kwadratny meter zwyši so płaćizna wot 30 centow na 49 centow.
