Ćisk (JT/SN). Serbske dźěćace towarstwo Ćisk je lětsa prěni króć swjedźeń towarstwow wuhotowało. Nicole Strauchowa, kotraž z něhdźe 20 dźěćimi tydźensce prawidłownje němske a serbske reje zwučuje, měješe hnydom ideju za ramikowe jednanje za zarjadowanje w Ćisku. Wona namjetowaše lóštne stawiznički kołowokoło serbskich mytiskich figurow předstajić. „Dźěći wšak je znaja a běchu tak kmane, program ze swójskimi idejemi sobu wuhotować“, wona praji.
Pančicy–Kukow (SN/MG). W połnej wobsadce zetka so wčera, wutoru, zhromadźizna Zarjadniskeho zwjazka „Při Klóšterskej wodźe“ w sydarni zwjazkoweho twarjenja. Na dnjowym porjedźe mějachu radźićelki a radźićeljo diskusiju wo hospodarskim planje kaž tež spěchowanje komunalneho ćopłotneho plana, kiž dyrbja gmejny nadźěłać.
Jasne je nětko hižo, zo wudawki zarjadniskeho zwjazka klětu wo něhdźe 105 000 eurow na 1,72 milionow přiběraja. Přičiny za to su wšelake, kaž nawoda Stefan Anders rozkładźe. Najwjetša pozicija drje su zwyšenja personalnych kóštow wo 65 000 eurow. Dale změja tež klětuše wólby kaž wšelakore administratiwne nadawki wulki wliw na kóšty. Za wólby na přikład dóstanje zarjadniski zwjazk drje podźělne přiražki, tute pak njedosahaja. Za wólby zwjazkoweho sejma lěta 2021 na přikład dósta zarjadniski zwjazk jeničce 50 centow na wobydlerja. Z wyšimi kóštami zwisuje nětko wězo tež powyšenje popłatka gmejnow na zarjadniski zwjazk. Plan wobzamknyć chcedźa na přichodnym posedźenju cyłka 9. januara 2024.
Zhorjelc (SN/BŠe). Sakska krajna direkcija je Zhorjelskemu wokrjesej přizwoliła, wosebite płaćenje we wobjimje 40 milionow eurow dóstać, dokelž hrozy strach, zo njemóže wokrjes swoje wudawki zapłaćić. Pjenjezy su z hornca za komunalne wurunanje, zdźěli wčera krajna direkcija. Z tak mjenowanym připokazanjom potrjeby maja so njewšědne poćeženja w zwisku z etatom přewinyć. Po słowach nowinskeje rěčnicy wokrjesa je Zhorjelski wokrjes jenički po cyłej Sakskej, kotryž nima hišće přizwoleny etat za lěće 2023 a 2024. Komuna na kromje Sakskeje móže pjenjezy klětu w dźělnych płaćenjach dóstać.
Přiwšěm njeje etat wokrjesa přizwolenjakmany. Tak dyrbja zamołwići komuny za móžnosćemi pytać, hdźe móhli pjenjezy lutować a wuslědki krajnej direkciji předpołožić. Direkcija pruwuje wustawki za etat.
Krabat Magica – mystiske kuzło
Čorny Chołmc. Nowy poskitk Krabat Magica maja wot 28. do 30. decembra w Čornochołmčanskim Krabatowym młynje. Z nim chcedźa ludźom ze spěwom, hudźbu a kuzłom strach před ćmu wzać. Budźe to potajne a mystiske dožiwjenje za cyłu swójbu. Wšědnje maja 700 městnow. 1 500 zastupnych lisćikow je hižo předatych. Tikety hodźa so online abo při wječornej kasy kupić.
Hrajnišća za Europeadu
Za klětuše koparske wubědźowanje narodnych mjeńšinow je 14 hrajnišćow zawěsćenych. Hry wotměja so potajkim wot 28. junija do 7. julija w Němskej a Danskej, hraničnej kónčinje wokoło Harrislee. Cyłkownje 36 mustwow je přizjewjenych, mjez nimi tež serbskej mustwje žonow a muži.
Nowe spěchowanje projektow
Drježdźany. Swobodny stat mjezu překročace projekty za ćežišći „skutkowny pomjezny rum – prewencija a přiměrjenje na změnu klimy“ a „powšitkowne a powołanske kubłanje kaž tež wuknjenje čas žiwjenja“ programa Interreg EU w Sakskej a Pólskej spěchuje. Komuny, towarstwa, załožby, lokalne hospodarske zwjazki a zarjadnistwa móža swoje próstwy hač do 31. januara 2024 zapodać.
Budyšin. Kóždolětnje su wěriwi wobeju konfesijow 9. nowembra do Budyskeje klóšterskeje cyrkwje klarisow přeprošeni, zo bychu šěsć milionow Židow wopominali, kotřiž su za čas nacionalsocialistiskeho nadknjejstwa zahinyli. Tak tež lětsa – 85 lět po „Kristalowej nocy“. Lěta hižo su přewažnje Kaulfürstec swójbni na wuhotowanju tutoho nyšpora wobdźěleni, zo njeby towaršnosć na pogrom přećiwo židowskemu ludej zabyła. Su to stajnje derje wupytane teksty a kěrluše, z kotrymiž spominaja křesćenjo na swojich „staršich bratrow a starše sotry“, kaž zwurazni to bamž Jan Pawoł II. w lěće 1986 při swojim historiskim wopyće najwjetšeje synagogi w Romje.
Budyšin. Budyski Kamjentny dom pokaza jutře, 15. nowembra, w 20 hodź. dansku tragikowu komediju „Rose – Njezapomnita jězba do Parisa“. Hnujacy film Nielsa Ardena Opleva je w Danskej njewočakowany wuspěch měł. Šicofrena žona jědźe z busom do Parisa, w kotrymž ze swojej wotewrjenosću tójšto wuskutkuje. We hłownej róli brilěruje Sofie Gråbøl, znata jako komisarka Lund. Zastup płaći šěsć eurow.
Premjera w kniharni
Budyšin. W swojej prěnjej, njedawno w Ludowym nakładnistwje Domowina wušłej basniskej zběrce, dawa Sylwija Šěnowa „putacy dohlad do čłowjeskeje duše. Wona znaje hłubiny w žiwjenju runje tak kaž začuće swobody a rytmus žadosćow. Wona rozestaja so z ciwilizaciju a jeje kritiskimi stronami.“ Knižna premjera wotměje so na zwučene wašnje w Smolerjec kniharni, a to štwórtk, 16. nowembra, w 19 hodź.
Přeprošuje do Berlina
Granatu namakali
Trjebin/Niska. Na lěsnej šćežce njedaloko Trjebina je pěšk na swojim wuchodźowanju njedźelu popołdnju při Zwěrjencowej dróze ručnu granatu namakał. Pódla rozbuchadła, po zdaću ruskeho pochada, ležeše zapalak. Słužba za wotstronjenje bojowych srědkow je so wo wotstronjenje municije starała.
Na Hornčerskej bě kónc jězby
Budyšin. Njedźelu dopołdnja su zastojnicy policije w Budyšinje na Hornčerskej šofera wosoboweho awta marki VW kontrolowali. Wone zwěsćichu 0,92 promilow alkohola pola 56lětneho.