Słowjanske rěče jemu hižo wot dźěćatstwa leža. „W šuli wuknjech rušćinu. Ze swojej mandźelskej Urszulu hač do dźensnišeho krok po kroku pólšćinu wuknu. Wot lěta 2004 dźěłam w Zhorjelcu jako swobodny, zjawnje skazany a wobkrućeny přełožowar za pólšćinu“, powěda Lutz Jankus. Jako wokrjesny radźićel skutkuje 49lětny na namjet AfD w přiradźe za serbske naležnosće Zhorjelskeho wokrjesneho sejmika. Čestnohamtsce angažuje so wón hižo mnohe lěta jako nazwučowar w ST Lok Zhorjelc we wobłuku dźěćaceho płuwanja a na krajnej runinje jako sudnik w płuwanju.
Adwentne wiki maja so wotměć
Drježdźany. Sakska ministerka za kulturu a turizm Barbara Klepsch (CDU) je so za to wuprajiła, zo měli adwentne wiki lětsa wotměć. „Wone su wuznamny kulturny podawk w Sakskej z tradiciju, rozpřestrěwacy so po cyłym swobodnym staće. Zdobom maja wulki hospodarski a turistiski wuznam.“ Pandemije dla planuje wona forum z komunami.
Wot jutřišeho nowy prezident
Lipsk. Sakske wustawowe sudnistwo změje wot jutřišeho noweho prezidenta. Po tym zo je z Wanne-Eickela pochadźaca Birgit Munz 13 lět sudnistwo w Lipsku nawjedowała, naslěduje ju nětko dr. Matthias Grünberg. 59lětneho je krajny sejm 10. junija z dwěmaj třećinomaj hłosow wuzwolił. Grünberg pochadźa z Mannheima a skutkuje wot lěta 1996 w Sakskej. Wot 2008 bě wiceprezident Wyšeho zarjadniskeho sudnistwa w Budyšinje.
Rekordny dobytk
Bager do awta zrazył
Stróža. K njewšědnej zražce je předwčerawšim popołdnju w Stróži pola Hućiny dóšło. Na kromje tamnišeje hłowneje dróhi dźěłaše wodźer bagra. Runje jako so 43lětny ze swojej dźěłowej mašinu zwjertny a łžica bagra nad pućom steješe, přijědźe BMW a do njeje zrazy. 45lětny wodźer a pjećlětne dźěćo so snadnje zraništaj. Zranjenu 34lětnu sobujěducu dyrbjachu do chorownje dowjezć. Škoda na awće wučinja 3 500 eurow.
Delnja Hórka (UM/SN). Dołho je trało, ale nětko zda so twar wobjězdki zwjazkoweje dróhi B 156 wokoło Delnjeje Hórki konkretny być. Znajmjeńša je tuchwilu hač do 19. awgusta naćisk tak mjenowaneje procedury zawěsćenja plana w Malešanskim a Wulkodubrawskim gmejnskim zarjadnistwje wupołoženy. Štóž čuje so wot twarskeho projekta potrjecheny, móže hač do 21. septembra swoje přispomnjenja a wobmyslenja pisomnje zapodać abo ertnje přednjesć.
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa towarstwo Miłočanska žaba (8).
Algow dla so w jězorje njekupać
Budyšin. Strowotniski zarjad tuchwilu wotradźa, kupać so w Budyskim spjatym jězorje sylneho rozpřestrěća módreje mokricy (Blaualge) dla. Woda je zdźěla hižo mutna. Módra mokrica produkuje jědy a škodźi strowoće. Wosebje w sensibelnych ludźoch móže sliničce (Schleimhaut) škodźeć a alergiske reakcije kože zbudźić. Někotre družiny bakterije wuwabjeja samo běhawu, hdyž wodu póžěraš.
Znowa wuznamjenjena
Bórkowy. Němski turistiski zwjazk je znowa turistisku informaciju w Bórkowach na přichodne tři lěta z certifikatom i-Marke wuznamjenił. Sobudźěłaćerki a sobudźěłaćerjo su pruwowanje z „jara derje“ wobstali. Dohromady je Bórkowska turistiska informacija 95 ze 100 móžnych dypkow dóstała. K pozitiwnym wuslědkam mjez druhim słušeše, zo je informacija tež zwonka wotewrjenskich časow docpějomna.
Wjetša bjezdźěłnosć w juliju
Njeswačidło (ML/SN). Na mjeńše dźěći čaka w Njeswačanskim domizniskim muzeju wosebita překwapjenka, wopytaja-li wone ze staršimaj abo z wowku a dźědom nowu wustajeńcu „Hrajki z NDRskeho časa“. 70lětny bywši docent za EDV Frank Lange z Póckowow je něhdźe 250 hrajkow z NDRskeho časa muzejej jako požčonki přewostajił.
Po politiskim přewróće 1989/1990 započa Póckowčan hrajki, modele jězdźidłow a figury, z kotrymiž bě so kaž tamne NDRske dźěći rady zaběrał, zběrać. Před 30 lětami su mnozy tele hrajki preč mjetali. Lange pak je zběraše. Pozdźišo kupowaše je tež na čaporowych wikach. „Dźensa jeno za wjele pjenjez derje zdźeržane hrajki z časa 1949 do 1989 w NDR dóstanješ“, wón wuswětla. Mjeztym ma wjace hač 1 000 tajkich eksponatow woblubowaneje dźěćaceje zaběry. „Mjeztym su wone tež na zapadźe Němskeje a w druhich krajach, samo w USA, jara požadane, wšako je hižo njeprodukuja. Fabriki za jich zhotowjenje hižo njewobsteja“, zběraćel powěda. Lange je tež sobuawtor dweju knihow wo NDRskich hrajkach. Jeho mandźelska Veronika jako něhdyša pěstowarka jeho podpěruje.