Dźěłaja w Kulowskej kónčinje

pjatk, 10. julija 2020 spisane wot:

Kulow (SN/MiR). W Koćinje, mjez Hózkom a Rachlowom, kaž tež na dalšich wsach, kotrež městu Kulowej přisłušeja, předwjeduja tuchwilu saněrowanske dźěła za płunowód. W 1970tych lětach twarjeny wód wjedźe z błótowskich Bórkowow hač do Freiberga, rozłoži na naprašowanje naměstny nawoda Kulowskeho twarskeho zarjada Jurij Brösan. Kaž wón dale zdźěli, zatwarjeja do płunowoda – jemu je wjele předewzaćow w regionje přizamknjenych, mjez druhim Energijowe zastaranje Čorny Halštrow (EVSE) z hłownym sydłom w Salowje – nowe roły z přeměrom nimale jednoho metra.

W Koćinje a pola Hózka su hłowne dźěła mjeztym zakónčene. W delnich Sulšecach chcedźa je po planje hač do kónca awgusta wotzamknyć. „Za město Kulow woznamjenjeja tajke akcije wulki nawal dźěła“, Brösan wuswětla. „Mjez druhim mamy za to staw dnowneje wody znižić. Wo dźěłach maja so zamołwići města Kulowa z wobdźělenymi zawo­dami tu a tam dorěčeć, a na kóncu ma město zdokonjane pruwować a takrjec wotewzać.“

Namjetuja dalšu płuwansku čaru

pjatk, 10. julija 2020 spisane wot:

Budyski wokrjesny sejmik budźe so na swojim posedźenju přichodnu póndźelu znowa z Kamjenskej halowej kupjelu zaběrać. Najnowša warianta nowotwara chowa někotre překwapjenja w sebi.

Kamjenc (UM/SN). Změje Kamjenska halowa kupjel w běhu nowowuhotowanja šestu płuwansku čaru? Tele prašenje ma so w zwisku z dalšim planowanjom jako alternatiwna warianta, zo bychu tuchwilny staw wobchowali, sobu přepytować. To wobzamknyć namjetuje zarjadnistwo wokrjesnym radźićelam za póndźelne posedźenje. Tam chcedźa wo tym roz­sudźić, kak nastupajo přetorhnjene planowanja za nowotwar wólnočasneho a sportoweho zarjadnišća (SN wo tym rozprawjachu) dale postupować. Prěnjotnje faworizowana warianta kombino­wa­neje kupjele bu trochowanych kóštow dla zaćisnjena, planowanja zastajene.

Krótkopowěsće (10.07.20)

pjatk, 10. julija 2020 spisane wot:

Serbski swjedźeń wupadnje

Serbin. Lětuši „Wendish fest“, swjedźeń potomnikow něhdy do Texasa wupu­ćowanych Serbow, koronapandemije dla wupadnje. 27. septembra planowane zeńdźenje by so 32. raz wotměło. Kaž zarja­dowanje wuhotowace towarstwo Texas­ Wendish Society na swojej homepage pisa, „organizatorojo rozsud jara wobžaruja. Wjeselimy pak so na klětu!“

Jězdźenki płaća tež w awgusće

Budyšin. Dobru powěsć za čas lětušich wulkich prózdnin maja wobchadne předewzaća pod třěchu ZVON za šulerjow z měsačnej abojězdźenku. Hódnotna znamka (Wertmarke) za julij płaći tež w awgusće. To rěka, zo móža ći šulerjo we wobłuku ZVON wšitke busowe a železniske linije wužiwać. Julijsku znamku njeměli preč ćisnyć, warnuje ZVON, wona je zdobom w awgusće připóznata.

Dóstanu připłatk za přebytk

Dźeń pomnikow wotprajeny

štwórtk, 09. julija 2020 spisane wot:

Budyšin. Město Budyšin je so dołho dlijiło, hač dźeń wotewrjeneho pomnika wotměje abo nic. Nětko pak je zarjadowanje koronapandemije dla wotprajene, dokelž njeje wěstota organizatorow ­runje tak kaž wšitkich wobdźělnikow zaručena. Měšćanostka za twarske naležnosće Julia Naumann rozsud wobkrući a hlada optimistisce na klětuši dźeń wotewrjeneho pomnika, kotryž chcedźa ­hižo nalěto planować započeć. Dźeń ma so potom po cyłej Němskej njedźelu, 12. septembra, wotměć.

Pisomnu próstwu stajić

Budyšin. Přijimarjo podpěry po socialnym zakoniku II (SGB II) dyrbja znowa pisomnje wo nju prosyć. Potrjechene su wšitke přizwolenja, kotrež so 31. awgusta abo pozdźišo kónča. Kaž Budyski krajnoradny zarjad informuje, wotpadnje wosebite rjadowanje, zo móža potrjecheni bjez próstwy podpěru dale dóstać. Nowe požadanja dyrbja woni dypkownje jobcenterej zapodać.

Policija (09.07.20)

štwórtk, 09. julija 2020 spisane wot:

Woheń škodu načinił

Ptačecy. Woheń na Kóšynskej dróze w Ptačecach (Tätzschwitz) su wčera wohnjowe wobory z Wojerec, Čorneho Chołmca, Ptačec, Łutow a Kóšyna (Großkoschen) a pomocnicy ze Złeho Komorowa hašeć dyrbjeli. Po prěnim přepytowanju zajachu policisća podhladneho 30lětneho muža. Pomhał je zastojnikam při tym po­licajski pos ze Zhorjelca. Płomjenja su bróžnju a třěchu pódlanskeho domskeho wobškodźili. Wěcna škoda wučinja 60 000 eurow. Zranił so na zbožo nichtó njeje.

Přeće wuměłče „Irmchen“ spjelnił

štwórtk, 09. julija 2020 spisane wot:
Grodk (FAG/SN). Ludowa wuměłča a molerka Irmgard Kulejowa je tež daloko za mjezami Grodka znata. Wona pochadźa z wotbagrowaneje wsy Bukowa. Lět­dźe­satki dołho je wuměłsce skutkowała a cyle swojoraznu, kreatiwnu rěč wuwiwała. 91lětna zemrě wona w decembru 2018 a zawostaji tehdy wobšěrny molerski fundus. Grodkowčan Hans-Joachim Zain bě z wuměłču spřećeleny. „Irmchen“, kaž ju luboznje mjenowaše, bě sej přała, zo „njech po jeje smjerći jeje twórby hišće raz w Błobošojskej muzejowej bróžni wustaja. Sym jej to slubił a přeće nětko spjelnił. Njeličomne hodźiny sym jeje wuměłske zawostajenstwo přehladował. A sym to rady činił. Nětko je zdokonjane a myslu sej, zo je prezentacija poradźena“, rjekny Zain minjenu sobotu na wernisaži wustajeńcy w Błobošojcach (Bloischdorf). Z dohromady 36 wobrazami spomina přehladka pod hesłom ­„Žiwjenje za wuměłstwo“ na „łužiski original“. K technikam, kotrež bě Irmgard Kulejowa nało­žowała, słušeja mjez druhim rysowanje z čerwjenej krydu, z wolijom, wuhlom a pastelowymi barbami. Nimo toho zhotowješe wona akwarele, linolowe rězy a grafiki.

Wažna je dobra zhromadnosć

štwórtk, 09. julija 2020 spisane wot:

Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak wjele njezhoniš. W swojej lětnjej seriji lětsa tajke aktiwne cyłki předstajamy, dźensa Wjesnu zhromadnosć z.t. ­Nowa Wjeska (2).

Zo haja Nowowješćenjo mjeztym lět­dźesatki dobru zhromadnosć, to stajnje znowa dopokazuja. Tak běchu to hižo w 1970tych lětach přewjedźene koparske turněry, sportowe wubědźowanja a zhromadne swjedźenje w bywšej tobakowej hali prodrustwa. Tradiciju po politiskim přewróće dale hajić bě agilnej wjesnej trójce – Křesćanej Korjeńkej, Jurjej Pěčce a Měrćinej Hicce – přewšo wažne. A to wosebje tež tohodla, zo bychu tradicionalne nałožki dale pěstowali. Tež młodostni – na jich čole Stefan Hicka, Marko Pjech, Stefan Kunath a Tomaš Klimant – so zaměrnemu nadawkej z wulkim elanom wěnowachu.

Jasne znamjo wožiwjenja rěče

štwórtk, 09. julija 2020 spisane wot:

Nowotwar Witaj-pěstowarnje „Milenka“ w Rownom wobzamknjeny

Rowno (AK/SN). Rownjanska Witaj-pěstowarnja „Milenka“ w nošerstwje gmejny Slepo dóstanje nowotwar a ma potom zdobom serbske žro wsy tworić. K tomu je so wutoru Slepjanska gmejnska rada wuznała. Z jednym hłosawzdaćom wupraji so wjetšina za nowotwar. Zo bychu wotpowědnu ležownosć kupić móhli, ma wjesnjanosta z Rownjanami jednać a so wo prawniske naprawy nowotwara starać. Kóšty za njón wučinjeja dohromady dwaj milionaj eurow. Hłowny dźěl pjenjez zwjedźe Swobodny stat Sakska a přewozmje zdobom swójski podźěl gmejny, kotraž je twarski knjez. Na financowanju wobdźěleny je tež koncern LEAG. Hač do kónca lěta 2022 ma pěstowarnja natwarjena być, a hač do toho dyrbja pjenjezy přetrjebać.

W holi z wudu na wodu

štwórtk, 09. julija 2020 spisane wot:
Wudźerska sezona při Lejnjanskim jězoru je zahajena. Wotnětka je tam oficialnje dowolene ryby łójić. Zo by popad zaručeny był, su zastupjerjo krajneho wudźerskeho zjednoćenstwa wčera w přitomnosći Budyskeho krajneho rady Michaela Hariga (CDU, nalěwo) symbolisce wjacore liny do wody pušćili. Na te wašnje chcedźa wob­statk­ rybow přichodnje a prawidłownje wobchować. Wězo so nadźijeja, zo so nimo­ linow mjez druhim tež wuhorje a wijule (Muränen) w jězoru zadomjeja. Wudźerjo měli wobkedźbować, zo smědźa swój hobby jenož­ z obligatoriskim wopismom a we wosebje woznamjenjenych wobłukach pěstować. Foto: Gernot Menzel

Rěči runohódnje wobkedźbowanej

štwórtk, 09. julija 2020 spisane wot:

Dom zarjadniskeho zwjazka Při Klóšterskej wodźe w Pančicach-Kukowje změje dwurěčny napis. Serbšćina a němčina budźetej při tym runohódnej.

Pančicy-Kukow (SN/JaW). Hnydom dwě wurjadnej posedźeni zhromadźizny zarjadniskeho zwjazka bě jeho předsyda Měrko Domaška za wčera w awli Šule Ćišin­skeho zwołał. Na prěnjej dyrbjachu zastupnicy zwjazkej přisłušnych pjeć gmejnow wobzamknjenje ze zašłeho wura­dźowanja sporjadkować. Tak cofny gremij swój rozsud, na domje zarjadniskeho zwjazka dwurěčny napis tak připrawić dać, zo steji serbski nad němskim. Dyrbjachu tuž w naležnosći znowa rozsudźić, a to formalneho zmylka před­sydy zarjadniskeho zwjazka Měrka Do­maški dla. Tež gmejna Pančicy-Kukow bě spřećiwjenje zapodała. Wotpowědnje předpisam dyrbješe zhromadźizna tuž w běhu třoch tydźenjow wobzamknjenje znowa rozjimać.

Serbska debata

nowostki LND