Mjeńšina je rozsudźiła

póndźela, 15. awgusta 2016 spisane wot:

Wobydlerjo gmejny Halštrowska Hola swojemu wjesnjanosće Dietmarej Koarkej dowěrjeja. Wuslědk wčerawšich wólbow za najwyše zastojnstwo komuny we łužiskej jězorinje to jasnje pokazuje: 97 procentow płaćiwych hłosow za jeničkeho nominowaneho kandidata. To je šwarny wuspěch, samsny kaž při minjenych wólbach w lěće 2009. Jenož 2002 dósta wón 0,7 procentow mjenje. Kandidat je wšak wysoke wuslědki zwučeny. Nowołučenjo běchu jeho 1994 ze sto procentami jednohłósnje za wjesnjanostu wuzwolili.

Mjenje zwjesela spad wólbneho wobdźělenja. Před sydom lětami bě to hišće 63,1 procent. Wot 3 301 wólbokmaneho bě tehdy 2 082 woliło. Wčera je z 2 989 wólbokmanych jenož 1 164 wolić šło, snadne to wólbne wobdźělenje 38,9 procentow. Statistisce widźane je tónkróć mjeńšina noweho wjesnjanostu postajiła. Axel Arlt

Krótkopowěsće (15.08.16)

póndźela, 15. awgusta 2016 spisane wot:

Šulerjo namołwjeni

Drježdźany. Sakska kultusowa ministerka Brunhild Kurth (CDU) je šulerjow namołwjała, so na wubědźowanju „Młodźina slědźi“ wobdźělić. „Wužiwajće šansu, swoju wćipnosć spokojić a tež zwonka wučby slědźić a za rozrisanjemi pytać“, rjekny wona dźensa w Drježdźanach. Zajimowani šulerjo maja hač do 30. nowembra składnosć so přizjewić.

Hermann Kant zemrěł

Berlin. Spisowaćel Hermann Kant je njeboh. Wón zemrě wčera 90lětny w chorowni w Neustreelitzu. Kant, kiž bě so srjedź 90tych lět ze zjawneho žiwjenja wróćo sćahnył, bě jedyn z najwuspěšnišich spisowaćelow NDR. Wón bě wjele lět prezident spisowaćelskeho zwjazka NDR a čłon centralneho komiteja SED. Socializm w NDR je stajnje zakitował.

Předań alkohola wobmjezować?

Praha. Oldřich Lomecký, měšćanosta srjedźoměšćanskeho wobwoda Praha 1, chcył magistrat wo nowe postajenje prosyć: Po nim měła so předań alkohola po 22 hodź. we wobchodach zakazać. Tak měło so młodym, nócny měr mylacym wukrajnym turistam přistup k alkoholej poćežić, wón medijam zdźěli. Druhe Praske wobwody namjet njepodpě­ruja.

Policija (15.08.16)

póndźela, 15. awgusta 2016 spisane wot:

Kóčki dla do sćežorow

Wujezd. Dokelž nochcyše kóčku přejěć, je so jej pjatk wječor 18lětna wodźerka Peugeota we Wujezdźe pola Bukec (Breitendorf) wuwinyła. Při tym pak zhubi kontrolu nad wodźidłom a zrazy do betonoweho a na to do drjewjaneho sće­žora. Młodostna so snadnje zrani, jeje awto pak so dospołnje skóncowa. Kóčka po wšěm zdaću njezranjena ćekny.

Tykowana cyrkej twarnišćo

pjatk, 12. awgusta 2016 spisane wot:

Drjewjane hrjady Blunjanskeho Božeho domu dyrbja saněrować

Bluń (SN/MWj). Při 343 lět starej Blunjanskej tykowanej cyrkwi su přichodne tydźenje wobšěrniše saněrowanske dźěła trěbne. Wo tym informuja zhromadnu wosadu Bluń/Zabrod/Bjezdowy w najnowšim wosadnym łopjenu. Zo bychu jónkrótny twarski pomnik zachowali, dyrbja tam wšitke drjewjane hrjady fasady, drjewjane wokna kaž tež třěšne lijawy restawrować a zdźěla wobnowić. Tohodla wonkowny wobraz cyrkwje hač do nowembra hižo tajki kaž zwučeny njeje, dokelž jón róšty wobdawaja.

Chrósćicy (SN). Hižo dźesać lět so Přezpólni na swjedźenjach po wšej Łužicy kaž tež na mjezynarodnych jewišćach derje čuja. W tym času su wjacore dźesatki spěwow zabyću wutorhnychu – zrudne a chutne runje tak kaž žortne a zdźěla samo nješwarne. Nětko hotuja so na jubilejny swjedźeń, kotryž wotměje so jutře za tydźeń, 20. awgusta, na Chróšćanskim Koklic statoku. Započatk budźe w 20 hodź. Po zhromadnym programje z cymbalowej skupinu Vojara z južneje Morawy a z rejwarjemi Wudworskeho folklorneho ansambla přizamknje so zabawa. Morawscy a serbscy ludowi hercy budu hač do nocy hudźić a spěwać.

Musku spěwnu skupinu Přezpólni załožichu 2006 jako dźěl Wudworskeho folklorneho­ ansambla. Hłowny zaměr cyłka je, pěstować serbski ludowy spěw w jeho prěnjotnej formje. Spěwa so jednohłósnje, přewod přewozmu dwoje husle a kontrabas. Swój repertoire čerpa skupina ze starych zapisow, mjez druhim ze Smolerjoweje/Hauptoweje zběrki pěsničkow z lěta 1841 a 1843.

Z Krabatom do přichoda

pjatk, 12. awgusta 2016 spisane wot:

Budyšin (SN). Domowina jako třěšny Zwjazk Serbow přewjedźe lětsa interkulturny projekt „Krabat between us“ (Krabat mjez nami), a to w Budyskim Kamjentnym domje.

Po přihotowanskich dnjach w juniju čaka na młodostnych wot 14 lět nětko takrjec wjeršk projekta, poprawna grafitijowa dźěłarnička wot 19. do 21. awgusta. Potom móža wobdźělnicy swoje znajomosće z barbowej tyzu, airbrushom abo ze specielnymi pisakami wuspytać a so na wulke sćěny zwažić.

W běhu mjenowaneho kónca tydźenja dojědu sej młodostni mjez druhim do Drježdźanskeho noweho města, zo bychu so z načasnej scenu wuměłskeje družiny street art zeznajomili. Na zhromadnym interkulturnym wječorku so při warjenju, spěwanju a rejwanju rozdźělne kultury předstaja a zeznaja.

Znowa serbski swjedźeń pod Čornobohom

pjatk, 12. awgusta 2016 spisane wot:

Wuježk (SN). Serbske ewangelske towarstwo přeproša znowa wšitkich Serbow a dalšich zajimcow sobotu, 20. awgusta, na mjeztym hižo dwanate lětnje pućowanje a serbski swjedźeń we Wuježku pod Čornobohom. Wobdźělnicy zetkaja so w 13 hodź. pola Krygarjec (Wuježk čo. 31A) abo w 13.15 hodź. na parkowanišću mjez Splóskom a Schönbergom. Wottam pućuja zhromadnje přez Hromadnik a Čertowe wokno na Čornobóh a dale do Wuježka. Pućowarjo njech mysla na to, wobuć so krute črije a dołhe cholowy! Po puću­ ­njech so kóždy sam ze swojeho nachribjetnika zastara.

Po zwučenym wašnju přizamknje so po pućowanju a kofeju w 17 hodź. nutrnosć ze superintendentom ­Janom Malinkom na Pawlikec statoku. Wot 18 hodź. zawjeseli wopytowarjow Drježdźanska skupina Podka.

Połoženje wostrózbja

pjatk, 12. awgusta 2016 spisane wot:
Domjacy lěkarjo w Hornjej Łužicy najbóle faluja, a je ćežko młodych medicinarjow za dźěło jara zdalene wot Drježdźan zahorić. To dźě je znate, nětko pak wot sakskeho ministerstwa za socialne a škit přetrjebarjow předpołožena studija kalamitu čorne na běłym potwjerdźa. Dokumentowane je dale njedosahace zastaranje z wóčnymi lěkarjemi, dermatologami abo urologami. W Běłowodźanskej kónčinje nimaja za 1 000 wobydlerjow jenož najmjenje lěkarjow, ně, woni su po starobje tež najstarši. Wědomostnicy Centralneho instituta za kasowolěkarske zastaranje w Němskej mjenuja tónle wobłuk jako jedyn z třoch w Sakskej, hdźež mamy nanajmjenje wočakować, zo młodźi lěkarjo tam du a praksu wotewru. Wostrózbjace to połoženje. Wšako wone sugerěruje, zo tež tych dowukubłanych medicinarjow, kotřiž wottam pochadźeja, łužiska domizna hižo dosć njewabi. Axel Arlt

Krótkopowěsće (12.08.16)

pjatk, 12. awgusta 2016 spisane wot:

Nadawki tež domjacym firmam

Worklecy. Za ponowjenje Worklečanskeje sportownje je gmejnska rada wčera jědnaće twarskich nadawkow rozdawała. Tež serbske zawody su so wuspěšnje požadali. Tak přewozmje Chróšćanska Grutkec firma wobmjetk a fasadowe dźěła, durje. Dalše blidarske nadawki wobstara Róžeńčan Benedikt Wjesela, a Worklečan Florian Šołta změje tepjenje na starosći.

Tilich olympionikam gratulował

Drježdźany. Sakski ministerski prezident Stanisław Tilich (CDU) je prěnimaj sakskimaj dobyćerjomaj złoteje medalje na olympiskich hrach w Rio de Janeiru gratulował. Annekatrin Thiele a Philipp Wende z Lipšćanskeje wysokeje sportoweje šule běštaj wčera ze swojimaj mustwomaj we wjesłowanju złoto zdobyłoj. Tilich wuzběhny jeju jako „přikład, předewšěm młodostnym a sportowcam“.

Wopomnišćo holocausta

Policija (12.08.16)

pjatk, 12. awgusta 2016 spisane wot:

Z trikom pjenjezy zhubił

Radeberg. Z woporom pjenježneho trika je so zawčerawšim w Radebergu 75lětny muž stał, kiž je při tym 75 eurow přisadźił. Njeznaty bě rentnarja narěčał a jeho prosył, hač móhł jemu snano twjerde pjenjezy zaměnić, dokelž chcyše pječa telefonować. Jako Radebergčan swoju móšnju wočini, cuzy tróšku do njeho storči, tak zo někotre pjenjezy na zemju padnychu. Wobaj pjenjezy zezběraštaj. Při tym so njeznatemu poradźi, skrótka za móšnju přimnyć a sej bankowki z njeje wzać, bjez toho zo by to rentnar pytnył. Hakle pozdźišo 75lětnemu napadny, zo su pjenjezy z móšnje fuk. To wón wězo hnydom na policajskim rewěrje zdźěli, hdźež so z tymle padom bliže zaběraja.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND