Policija (15.09.15)

wutora, 15. septembera 2015 spisane wot:

Łuty. Paducham po wšěm zdaću hižo ničo swjate njeje. We Łutach dyrbješe farar tamnišeje ewangelskeje cyrkwje zawčerawšim zwěsćić, zo běchu so njeznaći ­minjeny čas do Božeho domu při Wjesnej dróze zadobyli. Pokradnyli su z njeho něhdźe 350 lět staru cynowu dupu ze železnym wobhrodźenjom. Hódnotu ­sa­- kralneje drohoćinki duchowny hišće dokładnje zwěsćić njemóžeše, maličkosć pak to runjewon njeje.

Wuprawy z busom słušeja do kóždolětnych předewzaćow Malešanskeje Domowinskeje skupiny. Njedawno bě zaso tak daloko. Předsydstwo prošeše na wulět do Mišna a podłu rěki Triebisch, nam hišće w pomjatku zapławjenja Mišna wulkeje wody dla. Sobustawam přidružichu so dalši Malešenjo a zajimcy z wokolnych wsow, na přikład z Plusnikec a Krakec.

W Mišnje witaše nas přewodnica a pokaza nam krasne stare město pod hrodom. Při pomniku za němskeho krala Heinricha I. zwoła nam połobsko-słowjanske a serbske stawizny před wjace hač tysac lětami do pomjatka: surowe bitwy, podćisnjenje kmjenow, załoženje hrodu a Mišna. Přichodna stacija bě Mikławšska cyrkwička – woprawdźita parla města. W cyrkwi dopominaja taflički na nimale­ 2 000 padnjenych wojakow Prěnjeje swětoweje wójny z tohole města a wulke žarowace figury na wójnu a smjerć­ – wšitko z běłeho pórclina.

Staru techniku wobdźiwali

póndźela, 14. septembera 2015 spisane wot:

Na dnju wotewrjenych pomnikow w Budyšinje wobkedźbowane

Budyšin (ML/SN). Z 20 394 wopytowarjemi w pjatnaće objektach je město Budyšin na wčerawšim dnju wotewrjenych pomnikow pod hesłom „Rjemjesło, technika, industrija“ dotalny rekord docpěło. Najwjace nawala bě na dworje Hrodu, hdźež je 3 500 ludźi składnosć wužiło a za kulisy Dźiwadła na hrodźe NSLDź hladało. Woni dožiwichu tam tež pokazku a wulosowanje zastupnych lisćikow přichodneje němskorěčneje inscenacije Jurja Kochoweje hry „Krajměrjerjo“.

Přirodne twory z rukow torhali

póndźela, 14. septembera 2015 spisane wot:

Tysacy zajimcow su sobotu na přirodowe wiki do Stróže pola Hućiny ćahnyli. To drje je so za wšitkich zadaniło, mjez druhim regionalnych wudźěłkow a łemkowskeje kultury dla.

Stróža (CK/SN). „Wulkotnu naladu“, chwaleše sej tež Marion Frenzelowa. Wikowarka z Přezdrěnka w Radworskej gmejnje bě prěni raz na Stróžanskich přirodowych wikach, hdźež poskićeše wjace hač połsta družin marmelady ze swójskeje ­produkcije. Kombinacije z bozanku a z jara strowymi aronija-jahodami jej kupcy runjewon z rukow torhachu. Marion Frenzelowa předawa swoje wudźěłki ­hewak zwjetša na Budyskich zelenych wikach a dodawa je někotrym biowobchodam. ­Jako nowačka na 18. nazymskich wikach přirody w Stróži bě wona „dospołnje spokojom“.

Lipa jako znamjo noweje nadźije

póndźela, 14. septembera 2015 spisane wot:

Slepo (AK/SN). Lutherowa lipa rosće wotnětka při Slepjanskej farskej bróžni. „Wona je symbol nadźije za naš lud, za našu serbšćinu, našu kulturu a našu wěru. Tónle štom woznamjenja hłuboke zakótwjenje w času, hdyž so korjenje wutorhaja“, podšmórny fararka Jadwiga Malinkowa wčera k zakónčenju serbskeho wosadneho popołdnja. Dieter Redo a Erhard Weinberg z Trjebinka sadźištaj jón w přitomnosći 25 wopytowarjow.

Štom ma zwjazanosć ewangelskich Serbow po wšej Łužicy zwuraznjeć. Přetož po Bukecach a Slepom ma so bórze třeća lipa w Janšojcach sadźić. Dalšu sadźa ewangelscy Serbja 19. septembra we Wittenbergu. Ze štomow, sadźanych wot křesćanow­ z cyłeje Němskeje, ma hač do lěta 2017 k 500. róčnicy refor­macije Lutherowa zahroda nastać. „Naša lipa při farskej bróžni pokazuje, zo smy jako ewangelscy Serbja žiwi a zo swoju kulturu zachowamy“, praji Jadwiga Malinkowa. Pod hesłom „naša domizna, naše­ wjeski“ so wobdźělnicy wosadneho popołdnja modlachu a spěwachu kěr­luše. „Domizna“, potwjerdźa fararka, „njeje jenož lu­bosć ke wsy, k přirodźe a nałožkam. Domizna je tež wěra do Boha, naša duchowna domizna.“

Krótkopowěsće (14.09.15)

póndźela, 14. septembera 2015 spisane wot:

Tež Sakska chce kontrolować

Drježdźany. Sakski nutřkowny minister Markus Ulbig (CDU) je wobydlerjow kraja namołwił, so na móžne pomjezne kontrole nastajić. „Poručam, wupokaz při sebi měć a zrozumjenje za naprawy měć“, rjekny minister sćelakej MDR Info. Kontrole maja ilegalnemu překročenju mjezow zadźěwać. Nimo toho ma nutřkowne ministerstwo wuski zwisk k čěskim wěstotnym zarjadam, zo bychu sej informacije wuměnjeli.

Ponowjeja wulkopósłanstwo

Praha/Berlin. Twarjenje čěskeho wulkopósłanstwa ze 70tych lět wosrjedź Berlina dyrbja nuznje ponowić. Tepjenje a wentilaciski system stej w špatnym stawje­. Čěski wulkopósłanc w Němskej Tomáš J. Podivínský zdźěli, zo čěske wonkowne ministerstwo hižo trěbne ponowjenske naprawy přihotuje.

Mayweather přestanje

Policija (14.09.15)

póndźela, 14. septembera 2015 spisane wot:

Dobruša-Huska. Tragiske wobchadne njezbožo je so wčera dopołdnja na statnej dróze S 119 pola Hnašec w gmejnje Dobruša-Huska stało. Tam jědźeše 77lětny wodźer wosoboweho awta typa VW Passat do směra na Budyšin, jako so mjez wotbóčkomaj do Hnašec a Ćemjerc nadobo rozsudźi so zawróćić. Po wšěm zdaću­ rentnar wobkedźbował njebě, zo wotzady motorske přijědźe. Jeho 46lětny wodźer njemóžeše hižo borzdźić a zrazy wotboka do Passata. Wuchowanscy sa­nitetarjo drje hišće spytachu motorskeho reaniměrować, zražka pak bě tak ćežka, zo wón hišće na městnje njezb­oža zemrě.­ Wodźer Passata a třo sobujě­­du­cy w jeho awće so njezranichu. Wěc­nu­ škodu trochuje policija na něhdźe 10 000 eurow.

Po měsacach zwučowanja je tak daloko, zo dožiwi pasionska hra „Wy sće swětło swěta“ jutře w 19.30 hodź. w Chrósćicach premjeru­. Mjez sobuskutkowacymi su tež dźěći, a wone mějachu na probach swoje wjeselo z wóslikom, kotryž ma takrjec „nošnu“ rólu. Dalše předstajenja budu njedźelu w 16 hodź. kaž tež 18., 19. a 20. septembra stajnje w 19.30 hodź. Foto: SN/Maćij Bulank

Při jězoru pilnje dale twarja

pjatk, 11. septembera 2015 spisane wot:

Zo by Bjerwałdski jězor jako najwjetši Sakskeje dowolnika, dale atraktiwniši był, tam Hamorska gmejna wobstajnje inwestuje. Zaběrała je so z tym wčera tamniša gmejnska rada.

Hamor (AK/SN). Ponowjenje připrawy, z kotrejž hodźa so w Klětnjanskim přistawje płachtaki a motorske čołmy na wodu pušćić, je wotzamknjene. Tole zdźěli Hamorski­ wjesnjanosta Achim Junker (CDU) na wčerawšim posedźenju gmejnskeje rady w swojej rozprawje wo ak­tualnym połoženju při jězoru. „Připrawu móžachmy nětko wodosportowcam k wužiwanju přepodać“, rjekny Junker.

Wobraz wo „poolu“ najrjeńši był

pjatk, 11. septembera 2015 spisane wot:

Dokelž za něšto dnjow hižo nazyma wo durje kłapa, skónčimy dźensa lětušu akciju, z kotrejž pytachmy za najrjeńšim dowolowym wobrazom swojich čitarjow. Redakciska jury je sej hišće raz wšitke zapósłane­ fota wobhladała a so za motiw z dźěćimi w improwizowanym „poolu“ jako najrjeńši rozsudźiła. Awtorce Grit Wićazowej z Budyšina přewostajimy tuž swójbny zastupny lisćik za wopyt Małowjelkowskeho prazwěrjenca.

Druhe myto spožčimy Juliji Wćelichowej z Koslowa za wobraz wo samopaslenej skakanskej wěži, z kotrejž mějachu młodostni při kupanju w Hórčanskej skale swoje wjeselo. Jej připósćelemy w Ludowym nakładnistwje Domowina wušłu knihu Gerata Wornarja „Ze žohnowanjom na puć“.

nawěšk

SERBSKE NOWINY podpěruja:

Novi Sad – kulturna stolica Europy

nowostki LND