Pomnik za wopory ćěkańcy

štwórtk, 04. junija 2020 spisane wot:

Łaz (AK/SN). We Łazu ma bórze nowy pomnik na wopory wuhnaća ze Šleskeje dopominać, kaž wjesnjanosta Thomas Leberecht (CDU) na njedawnym na posedźenju tamnišeje gmejnskeje rady po­twjerdźi. Mnozy z ćaha ćěkancow 1945 namakachu w Šćeńcy schow a nowu domiznu. Z teje přičiny chcedźa pomnik nastajić. Iniciatiwu za to wuwił je wjesnjanosta Thomas Leberecht zhromadnje z něhdyšim gmejnskim radźićelom Dietmarom Kugelom ze Złyčina.

Kamjeń za pomnik – namakany błudźenk – ma jako plastika tři wosoby zwobraznić, kotrež ćěkaja. Stajić chce gmejna pomnik na ležownosći něhdyšeho kěrchowa Łazowskeje ewangelskeje wosady. Gmejna Łaz je próstwu wo spěchowanske srědki sakskemu ministerstwu za nutřkowne, we wobłuku prašenjow wo wuhnatych a ćěkancach, stajiła. Za to ma hižo pozitiwnu wotmołwu. Pomnik nastajić budźe bjez kóštow za zarjadnistwo. Njewotwisnje wot toho proša iniciatorojo wo podpěru.

Při Brězowskim jězoru budźe bórze zaso móžno we wodźe so wočerstwić abo na přibrjohu so słónčić. Zo by potom kupanske wjeselo dospołne było, přihotujetaj sobudźěłaćerjej zaměroweho zwjazka Brězowski jězor Dirk Siegemund a Michael Bothgen tule wulke suwadło. Srjedź junija chcedźa tam lětušu sezonu zahajić. Foto: Joachim Rjela

Krótkopowěsće (04.06.20)

štwórtk, 04. junija 2020 spisane wot:

Žane nowe infekcije

Budyšin/Zhorjelc. We woběmaj hornjołužiskomaj wokrjesomaj njejsu žane nowe infekcije z koronawirusom zwěsćili. Mjez dotal dohromady 496 natyknjenymi w Budyskim wokrjesu je aktualnje 34 schorjenych, šesćoch lěkuja w klinice. 443 ludźi je so wustrowiło, 19 zemrěło. W Zhorjelskim wokrjesu je z dotal 269 inficěrowanych 245 zaso strowych, jedna wosoba je tuchwilu chora. 23 wosobow je tam w zwisku z pandemiju zemrěło.

Myto tydźenja Janej Breindlej

Budyšin. Wučer čěšćiny Jan Breindl je Serbske myto tydźenja w syći (SPTWS) dobył, kotrež je jury wokoło direktora Załož­by za serbski lud Jana Budarja dźen­s­a sedmy raz spožčiła. We wjacorych lóštnych widejach Čerwjenawki-Karkulki Breindl šulerjam rěč na kreatiwne wašnje spřistupnja. Link k widejam jeo na internetnej stronje SPTWS 2020 podaty.

Digitalne poskitki muzeja

Wotkrywaja nowe sydlišćo

srjeda, 03. junija 2020 spisane wot:

Brězowka (AK/SN). Dróha mjez Slepom a Dźěwinom, tak mjenowany Dźěwinski puć, je hač do kónca julija dospołnje za­wrjena. To zdźěli nawoda zarjada za planowanje, twarstwo a hórnistwo w zarjadniskim zwjazku Slepo Steffen Seidlich na zašłym posedźenju gmejnskeje rady Dźěwin, kotrež wotmě so w Brězowce. Přičina haćenja su dźěła na přichodnej městnosći sydlišća Nowy Miłoraz. Sydlišćo zaměstnja sewjernje Slepoho mjez Lěšćanskim a Dźěwinskim pućom. Tuchwilu wotkrywaja tam móžnosće, kak přichodnje mazanu wodu wotwodźeć. Dale twarja tam trafostaciju za zastaranje z milinu. Zdobom chcedźa dróhu rozšěrić, hdźež wona křiwicy dla dolěwa wjedźe. Tak chcedźa wobchad změrować, wosebje pak spěšnosć awtow pomjeńšić.

Kćenja šćipać njedowolene

srjeda, 03. junija 2020 spisane wot:

Stróža (SN/MWj). Hižo loni je kćějacy mak na modelowym zahonje Dubina w Stróži pola Hućiny mnohich wopytowarjow biosferoweho rezerwata Hornjołužiska hola a haty zahorił. Nětko polo znowa w fijałkojtej pyše kćěje. „Wjeselimy so, zo móžemy hromadźe z agrarnym předewzaćom Holanska farma k mnohotnosći rostlin přinošować. Naši partnerojo-pjekarjo móža tuž zaso całty z domjacym makom poskićeć“, rozłožuje nawoda zarjadnistwa biosferoweho rezerwata Torsten Roch w nowinskej zdźělence.

Za čmjeły, dźiwje pčołki a mjetele je kćějace polo dobre žórło picy. Widźomny rozdźěl porno lońšemu pak je, kaž sobudźěłaćerka Eva Lehmann praji, zo mak tak wysoki narostł njeje. To zwisuje z lětušimi pózdnimi zmjerzkami a ze suchotu. Rostliny tuž hnojiwo prawje přiwzać njemóžachu. Za to pak wopytowar morjo fijał­kojtych kćenjow lěpje přewidźi. Ale kedźbu, kćenja šćipać a sobu wzać njeje dowolene. Hewak nazymu žane makowe całty njesydaja. Nimo toho kćenja w běhu dnja zwjadnu.

Policija (03.06.20)

srjeda, 03. junija 2020 spisane wot:

W lěsu so paliło

Pěskecy. Měrny wukónc swjatkowneje póndźele někotrym wohnjowym wo­bornikam popřaty njebě. Wołachu jich předwčerawšim do lěsa mjez Pěskecami a Němskimi Pazlicami, zo bychu jón ­hašeli. Tam běchu so płomjenja po 800 kwadratnych metrach wupřestrěli.

SKI zaso přistupna

srjeda, 03. junija 2020 spisane wot:
Budyšin. Serbska kulturna informacija w Budyšinje je wot wčerawšeho zaso wotewrjena, a to póndźelu, srjedu a pjatk stajnje wot 10 hodź. do 16.30 hodź., wutoru a štwórtk wot 10 do 18 hodź. W zdźělence SKI dale rěka, zo wustajeńcu „Jutry na póštowych kartach a listowych znamkach“ hač do kónca junija podlěša.

Akcija za dom z pjecu w Krabatowym młynje přemóžacy wuspěch žnjała

Čorny Chołmc (SN/JaW/MiR). Čornochołmčanski Krabatowy młyn so njetuli, byrnjež so tež tam koronakriza wuskutkowała. Kaž jednaćel daloko za łužiskimi mjezami znateho objekta Tobias Čižik na naprašowanje zdźěli, je pjenježna akcija za dom z pjecu (Brotbackhaus) přewšo wuspěšna była.

Darniwosć ludźi korjeni w tym, zo maja ideju, dom z pjecu twarić, za dobru a zo ju z wulkim zajimom přiwozmu a jeje wuwiće sćěhuja. Projekt měri so předewšěm na zmysłapołne a trajne poskitki za dźěło z dźěćimi a mło­dostnymi. „Trěbne pjenjezy smy mjeztym nazběrali. Tak je projekt financnje zawěsćeny“, Čižik rozłoži. „Mějachmy přemóžacu ličbu sponsorow, kotřiž su nas z pjenjezami abo tež z dźěłom na městnje podpěrali. To mam za jónkrótne. Nazběrali smy dohromady 10 000 eurow.“

Dźak spušćomnymaj radźićelomaj

srjeda, 03. junija 2020 spisane wot:

Njebjelčicy (JK/SN). Komunalne a čestnohamtske dźěło njeje za kóždeho. Za to trjebaš lóšt kaž tež wosebity dar a nutřkowny pohon, něšto wuskutkować. Runje to měještaj Křesćan Žur a Daniel Wätzig­, kotrejuž je Njebjelčanski wjes­njanosta Tomaš Čornak (CDU) na minjenym posedźenju gmejnskeje rady z wulkim dźakom rozžohnował. Wobaj staj wjele lět wuspěšne wuwiće gmejny sobu postajałoj.

Křesćan Žur bě wjacore legislaturne periody spušćomny zastupjer wjesnja­nosty a zamó naroki gmejny skutkownje zwoprawdźić. Tajke dźěło bě zwučeny, wšako bě wjele lět sobudźěłaćer za­pósłanca CDU w zwjazkowym sejmje Ulri­cha Klinkerta. Při tym je sej při­swojił wěsty­ wid na politiske kaž tež komu­nalne dźěło a móžeše nazhonjenja w gmejnskim dźěle na dobro gmejny derje­ nałožować. Njeje so tež bojał wjesnjanosće w napjatych situacijach znapřećiwić, swójske měnjenje zwuraznić a je runje tak wopodstatnić. Ke chutnym rozesta­jenjam pak ženje dóšło njeje, wšako bě Žur zdobom diplomat a čłowjek měrneho wašnja.

Napohlad myleny

srjeda, 03. junija 2020 spisane wot:
Wo makowe całty wosobinsce přejara ­njerodźu. W tym nastupanju sym skerje klasiski typ. Hdyž pak widźu wobraz kćějaceho makowišća w Stróži pola Hućiny, njemóžu so dohladać. Kajke rjanosće stwórba w kóždym počasu skići, je prosće wobdźiwajomne. Tež na swójskej za­hrodźe so tele dny nad někotrymi makowymi kćenjemi wjeselimy. Byrnjež z jednoho pjenka byli, wone samo w rozdźělnymaj barbomaj kćěja. Kostrjanc nětko runje tak na mnohich městnach při puću wuhladaš, štož je minjene swjatki zawěsće tón abo tamny pěši abo kolesujo registrował. Rjany napohlad pak myli, zo je po wšěm zdaću dosć ludźi, kotrymž je přiroda smorže. Štóž sej mysli, zo dyrbi swój plastowy kofejowy nopašk abo krónowe wěčka prosće z awta z woknom won ćisnyć, zo by je wotbył, njeje jenož njerozumny, ale w mojimaj wočomaj egoistiski, dokelž sej mysli, zo přiroda jemu samomu słuša. Marian Wjeńka

Serbska debata

nowostki LND