Krótkopowěsće (25.05.20)

póndźela, 25. meje 2020 spisane wot:

Ličba infekcijow snadnje wjetša

Budyšin/Zhorjelc. Kónc tydźenja bu dalša z koronawirusom natyknjena wosoba zwěsćena, tak zo je w Budyskim wokrjesu tuchwilu 481 dopokazanych padow. Sydom pacientow je so wustrowiło. Ličba postajenych karantenow je so na 247 jasnje pomjeńšiła. W Zhorjelskim wokrjesu njejsu dale žane infekcije zwěsćili. Tam je hišće sydom schorjenych. Dwě wosobje stej w karantenje.

VW dyrbi wotškódnjenje płaćić

Karlsruhe. Awtotwarc Volkswagen je zasadnje winowaty wobsedźerjam dieselowych awtow, kotřiž manipulowaneho wotpłuna dla skorža, wotškódnjenje płaćić. To je Zwjazkowe sudnistwo w Karlsruhe dźensa rozsudźiło. Kupcy, kotřiž chcedźa pjenjezy za swoje awto wróćo měć, dyrbja pak sej kilometry, kotrež su z nim mjeztym po puću byli, přiličić dać.

Geyer: Mnohe wěcy su chore

Kemše dale přez internet

pjatk, 22. meje 2020 spisane wot:

Chrósćicy. Zajutřišim, njedźelu, 24. meje, kaž tež tydźeń na to, njedźelu, 31. meje, wusyłaja we 8.30 hodź. Božu mšu na Youtube z fararjom Gabrišom Nawku z Kulowskeje cyrkwje. Trěbny link na wotpowědny internetny kanal podawa Katolski Posoł pod www.posol.de kaž tež internetna strona Kulowskeje wosady pod www.st-mariae-himmelfahrt-wittichenau.de. W 10 hodź. wusyłaja na samsnym kanalu němske kemše z Kulowa. Tohorunja njedźelu, 24. meje, we 8.30 hodź. wusyłaja tež kemše z Ralbičanskeje cyr­kwje, ale jenož k słuchanju. Link namakaće tohorunja pod www.posol.de.

Poskićeja jědź k wotewzaću

Policija (22.05.20)

pjatk, 22. meje 2020 spisane wot:

Třěcha so paliła

Budyšin. Palace so kózły wjaceswójbneho domu na Schliebenowej w Budyskej měšćanskej štwórći Zapadne předměsto su wčera wječor zasadźenje něhdźe 70 wohnjowych wobornikow wuskutkowali. Dźakowano spěšnej reakciji je so kameradam poradźiło tomu zadźěwać, zo so woheń na cyłu třěchu wupřestrěje.

Wo móžnych wěcnych škodach w by­dlenjach je tuchwilu runje tak mało znate kaž kelko móhło wuporjedźenje skóncowaneje třěchi płaćić. Nastupajo strowotniske škody dyrbješe wuchowanska słužba třoch wobydlerjow, kotřiž takrjec pod třěchu domskeho bydla, medicinsce zastarać, chutnje zranił pak so po wšěm zdaću nichtó z nich njeje. Dalši wobydlerjo njeběchu potrjecheni.

Policija bě tohorunja spěšnje na městnje. Zastojnicy areal zawěsćichu a zaraćichu. Zajeli su „psychisce nadpadnu wosobinu“, kotraž je „wjacore zasadźenske mocy kaž tež přihladowacych ludźi našćuwała a napluwała“, w zdźělence policije rěka. Wokoło wjaceswójbneho domu běchu so tójšto pasantow zešli, zo bychu na njezbožo sutali.

Premjeru w Lětonju wotměli

pjatk, 22. meje 2020 spisane wot:
Wotewrjenje Budyskeho awtokina na Lětońskim lětanišću je zawčerawšim něhdźe 600 přihladowarjow w něhdźe 200 jězdźidłach přiwabiła. Samo z Grodka a Delitzscha běchu hosćo přichwatali. Premjeru je DJjowe duwo Gestört aber Geil z tak mjenowanym drive-in-koncertom wuhotowało. Prěni film chcedźa zarjadowarjo dźensa wječor pokazać. W 21 hodź. prezentuja južnokorejsku produkciju „Parasite“, kotraž bu lětsa z wjacorymi Oscarami wuznamjenjena. Wotwisujo wot rezonancy publikuma je planowane, přichodnje stajnje pjatk a sobotu filmowe předstajenja poskićeć. Tež dalše koncerty su móžne. Foto: Carmen Schumann

Zhromadne dźěło dale wjedźetej

pjatk, 22. meje 2020 spisane wot:

Wojerowske zastaranske zawody (VBH) Miłočanski Křesćansko socialny kubłanski skutk (CSB) tež lětsa zaměrnje podpěruja.

Miłoćicy/Wojerecy (SN/JaW). Hižo wjac hač dźesać lět dołho stej Miłočanski CSB a Wojerowske VBH w dobrym partner­stwje zwjazanej. Zawody podpěruja předewšěm skutkowanje Wojerowskeje Dźěćaceje a młodźinskeje farmy a Wojerowskeje pěstowarnje, kotrejž wšak stej w nošerstwje Miłočanskeho CSB. „Wjeselimy so, zo VBH najebać tuchwilnu zawěsće njejednoru situaciju a wysoke poćeženja nam znowa financnu podpěru za naše dźěło přewostaja“, zdźěla medijowy rěčnik CSB Maik Brězan.

Aktualneho połoženja koronapandemije dla njemóžachu zastupnicy VBH a CSB podlěšenje swojeho partnerskeho zrěčenja kaž zwučene na arealu Dźěćaceje a młodźinskeje farmy podpisać. Tuž činjachu to w rumnosćach VBH.

Zakładnu šulu dale ponowjeja

pjatk, 22. meje 2020 spisane wot:

Łazowska gmejna faworizuje nachwilne rozrisanje z pomocu wuknjenja w kontejnerach.

Łaz (AK/SN) Gmejna Łaz chce swoju zakładnu šulu „Při Hórnikečanskim jězoru“ we Wulkich Zdźarach dale zaměrnje saněrować. To podšmórny wjesnjanosta Thomas Leberecht (CDU) na minjenym posedźenju gmejnskeje rady. „Tuchwilu planowanja za projekt derje postupuja. Faworizujemy rozrisanje z kontejnerami. Wariantu nětko zjawnje wupisamy. Poskitki potom gmejnskim radźićelam předpołožimy. Woni maja potom wo přepo­daću nadawka rozsudźić a wobzamknyć“, rozłoži wjesnjanosta přichodne kročele.

Spontanje a ludźom k wjeselu serbske pěsnje hudźili

Budyšin/Salow/Hórki/Radwor (CS/SN/BŠe/JaW). Tež lětsa su na swjatym dnju Božeho spěća mužojo po puću byli, ale nic jenož. Na mnohich městnach běchu tež skupinki žonow widźeć a dźeń, kotryž wšak je jako nanowy dźeń znaty, wuwiwa so dale a bóle na dźeń za cyłu swójbu. Tuž bě wčera na dróhach a šćežkach znowa tójšto wobchada. Předewšěm mužojo běchu sej swojeho groćaneho konika zesedłali a zgratowali, ale tež swójby wužiwachu słónčny dźeń za wulěty abo zhromadny piknik. Nadpadnyło wčera tohorunja je, zo běchu mnozy ze zapřahami abo na konjach jěchajo po puću. Škitne naprawy koronawirusa dla su nimale wšudźe w dalokej měrje dodźerželi. Policija wšak je tež zaměrnje kontrolowała a bě ze swojimi zasadźenskimi awtami časćišo tež na serbskich wsach po puću.

Zhorjelc (AK/SN). Skórnik načinja we łužiskich lěsach dale wulku škodu. „Połoženje je chutne a jara kritiske. Aktualne mnóstwo škodowaneho drjewa wučinja ze 317 000 kubiknymi metrami pjećinu wšeho škodowaneho drjewa w Sakskej. Smy w najchutnišim połoženju nastupajo škody w lěsach po 1945/46, a to nic jenož w Sakskej, ale po wšej Němskej“, rjekny Sylvia Knote, nawodnica wokrjesneho lěsnistwoweho zarjada tydźenja w Zhorjelcu. Wosebje ćežko potrjecheny je wobstatk chójnow, šmrěkow a larikow. Jara kritiske je połoženje w Kotmarskej kónčinje, na Limasu a w nišich kónčinach Žitawskich horin.

Najrjeńše wjedro na wčerawšim dnju Božeho spěća wabješe tójšto ludźi tež na wulět k Bismarckowej wěži w Bórkowach. Ze 27 metrow wysokeje wěže maja wopytowarjo wulkotny wuhlad na błótowsku krajinu. Poprawom wotměja so tam tež wšelake zarjadowanja, kotrež pak su koronapandemije dla hač do kónca awgusta wotprajene. Foto: Michael Helbig

Ze zahajenjom šulskeho lěta 2020/2021 dyrbja wužiwarjo poskitkow na Budyskej wokrjesnej hudźbnej šuli kaž tež Budyskej wokrjesnej ludowej uniwersiće hłubšo do kapsy přimnyć. Wokrjesny sejm je zańdźenu póndźelu zwyšenje popłatkow wobzamknył.

Budyšin (SN/MiR). Dotalne popłatki zwyša lětsa wo 15 procentow a klětu wospjet wo runje telko. To rěka, zo płaća wužiwarjo poskitkow wot šulskeho lěta 2021/22 hač do 30 procentow wjace hač hišće za šulske lěto 2019/2020. Zwyšenje na dwě lěće rozdźělić bě namjet Swobodnych wolerjow po masiwnej diskusiji w kulturnym a kubłanskim wuběrku Budyskeho wokrjesa. Wšitke frakcije a wjetšina radźićelow su předłoze přihłosowali. Zwyšenje pak njezměja jeničce wužiwarjo njesć. Tež wokrjes chce swoje financielne wobdźělenje zwyšić.

Serbska debata

nowostki LND