Dwójny hospodarski plan Njeswačanskeje gmejny nadal njejasny

Njeswačidło (JK/SN). Zo posedźenje gmejnskeje rady tak dołho traje, sej jeje čłonojo kaž tež wjesnjanosta Gerd Schuster (CDU) wčera wječor w Njeswačidle zawěsće myslili njeběchu. Dnjowy porjad dźě bě poměrnje přehladny, ale diskusije k wšelakim dypkam běchu přiwšěm něšto dlěše a zdźěla tež woprawnjene. Wosebje dołho rěčachu radźićeljo wo tym, kak hodźi so hrožacy minus w naćisku dwójneho hospodarskeho plana na znjesliwu wulkosć pomjeńšić. Wuchadźejo z wuskutkow koronapandemije liči gmejna z mjenje dochodami, a tak hrozy minus w etaće. Komornica Liliane Wetzko radźićelam hišće raz móžne potenciale lutowanja a móžnych wyšich dochodow rozłoži, minus pak da so jeno snadnje pomjeńšić. Tak wjesnjanosta namjetowaše, zo porěči z prawniskim dohladowanskim zarjadom, hač naćisk etata w předležacej formje přiwozmje. Jeli tomu tak budźe, chcedźa jón na posedźenju w juliju za lětsa a klětu wobzamknyć.

Dźěwin (AK/SN). Lětsa chce Dźěwinska gmejna hłownje do pěstowarnjow, wo­hnjoweje wobory, do pohrjebnišćow a do wutwara šěrokopasmoweje syće inwestować. Tele ćežišća předwidźi etat, kotryž su gmejnscy radźićeljo na swojim zašłym posedźenju wobzamknyli.

Kaž komornica Carmen Petrick rozłoži, nochcedźa žane dawki zwyšić. Tuchwilu liča z cyłkownym deficitom wjace hač 300 000 eurow. Tohodla drje hinak ­njepóńdźe, hač zo dyrbja za wohnjowoborne wudawki kredit něhdźe 35 000 eurow wzać. Přiwšěm je gmejna Dźěwin z 202 euromaj na wobydlerja poměrnje snadnje zadołžena. Dokelž pak je hospodarske połoženje komuny dale napjate, komornica wočakuje, zo dyrbja nětko hospodarski konsolidowanski koncept nastajić.

Najwažniše lětuše předewzaća gmejny su, ponowić wohnjowobornu gratownju w Brězowce, kupić hašenske jězdźidło za tamnišich wobornikow, twarić kolesowanski puć z Dźěwina do Slepoho a přetwarić Dźěwinsku nawjes. Za něhdźe 70 000 eurow porjeńša pohrjebnišći w Brězowce a Dźěwinje.

Wojerecy. Pjeć mužacych a žonjacych kolesow kaž tež kolesowy připowěšak su wobydlerjo w meji we Wojerowskim běrowje za namakanki wotedali. Dale přiwzachu tam wosom klučow na wjacorych rynkach, awtowy klučik za wosobowe awto typa Audi, dwaj handyjej kaž tež słónčne nawoči. Potrjecheni, kotřiž su snano něšto zhubili, móža so pod telefonowym čisłom 03571/ 456 347 přizjewić a so wobhonić, hač so wo jich swójstwo jedna.

Tež w młynje maja koncept

Čorny Chołmc. Krabatowy młyn w Čornym Chołmcu je wotstawkowy a hygienowy koncept zapodał, zo móhli tam zaso zarjadowanja za wjetšu zjawnosć přewjesć. Mjez druhim chcedźa filmowe nocy a čaporowe wiki organizować. Tuchwilu poskićeja hižo wodźenja pod hołym njebjom. Hosćenc a předawanišćo zakuskow stej wotewrjenej. W přichodnych měsacach zwoprawdźa projektaj we wobłuku fondsa „Čiń sobu!“. W jednym chcedźa předstajić serbske nałožki w běhu lěta z pomocu rollup-systema.

Město Běła Woda chce wuskutki koronakrizy za lokalne hospodarstwo z wosebitej akciju trochu wolóžić. Wikowarjo a hosćencarjo pak najprjedy raz zdźeržliwje reaguja.

Běła Woda (CK/SN). Dotal 17 wotmołwow wikowarjow a pjeć hosćencarjow je město Běła Woda na swoju akciju dobropisow dóstało. Wyši měšćanosta Torsten Pötzsch (Klartext) so nadźija, zo budźe jich hišće wjace. Akciju běchu spočatk meje zahajili, zo bychu wikowarjow a hosćencarjow města podpěrali, kotřiž dyrbjachu swoje domy nachwilnje zawrěć. Ideja bě, zo kupi město w kóždym wobchodźe abo hosćencu hač do dźesać dobropisow po dźesać eurach. Dobropisy chcedźa towarstwam přewostajić, kotrež tohorunja pod krizu ćerpja.