Njeswačidło (LR/SN). Tež jědnata šlagrowa nóc w parku Njeswačanskeho barokneho hrodu bě sobotu znowa połny wuspěch. Byrnjež temperatury skerje ke kupanju wabili, přińdźechu wopytowarjo po stach. Witali su jich sportowče w baroknych kostimach. Wuhotowar mjeztym derje znateho a woblubowaneho zarjadowanja bě znowa Njeswačanske sportowe towarstwo Módro-běłych. Dokelž bě předpředań zastupnych lisćikow dosć dobra, móžachu na tónle wječor měrnje zhladować, rjekny předsyda towarstwa Frank Fliegner. Za njeho a wšitkich pomocnikow je šlagrowa nóc mjeztym nimale rutina. Kóždy wotrjad sportoweho towarstwa wě, kotre nadawki a dźěła maja so hdy a hdźe zdokonjeć.

Dokelž so šlagrowa nóc stajnje prěnju sobotu pražnika wotměwa, je to mnohim bywšim Njeswačanam kruty termin, so tónle wječor „doma“ z přećelemi zetkać a zhromadnje swjećić. Tež busowe předewzaća maja Njeswačansku šlagrowu nóc w swojim programje a poskićeja wosebite jězby. Hosći zabawješe lětsa šěsć šlagrowych spěwarkow a spěwarjow, mjez druhim Linda Hesse a Ina Colada.

Krótkopowěsće (06.07.15)

póndźela, 06. julija 2015 spisane wot:

Lětnja šula wotprajena

Lipsk. Serbska lětnja šula lětsa wupadnje. Tole zdźěla prof. dr. Edward Wornar z Instituta za sorabistiku Lipšćanskeje uniwersity. Dotal je so jedna jenička woso­ba přizjewiła. „Tohodla smy nětko wobzamkli, zo lětnju šulu wotprajimy“, wón piše. Připrajenu pomoc z Čěskeje za klě­tušu lětnju šulu chcedźa za přihot noweho kursa wužić.

Hilbert nowy měšćanosta

Drježdźany. Politikar FDP Dirk Hilbert je nowy wyši měšćanosta Drježdźan. Wón přesadźi so we wčerawšim druhim kole wólbow z 54,2 procentomaj přećiwo sakskej ministerce za wědomosć Evje­Mariji Stange (SPD), kotraž dósta 44 proc. ­hłosow. Na wólbach wobdźěli so 42,7 proc. ludźi. Hilbert bě kandidat towarstwa Njewotwisni wobydlerjo.

Wobsah žiwidłow rozdźělny

Praha. Wobsah tyzow žiwidłow ze sams­nym mjenom móže w Němskej a Čěskej rozdźělny być. Tole su čěscy posudźowarjo wuslědźili. Woni zwěsćichu tajki zjaw w cyłkownje 24 padach. Tak je jogurt Ac­tiv­ia w Němskej tučniši. Porno tomu je kwalita mjasa w konserwach w Němskej lěpša hač w Čěskej. Firmy wopodstatnjeja to z rozdźělnymi słodami w krajach.

Policija (06.07.15)

póndźela, 06. julija 2015 spisane wot:

Běła Woda. Wuchowansku słužbu a po­liciju wołachu wčera připołdnju na ­Liebknechtowu w Běłej Wodźe. Tam běchu wobydlerjo žonu namakali, lěkar ­pak móžeše jenož hišće jeje smjerć zwěsćić. Při prěnich přepytowanjach so wukopa, zo bě žona po wšěm zdaću z balkona bydlenja na štwórtym poschodźe pad­nyła. Jedna so wo 56lětnu wusydlenču, kotraž w Běłej Wodźe bydleše. Krimi­nalna policija nětko wobstejnosće, kotrež běchu k smjerći žony wjedli, bliže pře­pytuje. Tež złóstnistwo při tym njewu- zamkuja.

Prawidłownje wuhotuja w Njebjelčanskej gmejnje wjetše zarjadowanja, kaž su to Mjezynarodny gmejnski swjedźeń, rězbarska dźěłarnička a dalše. Nětko přihotuja młodźinsku dźěłarničku, mjeztym pjatu tajkeho razu.

Njebjelčicy (SN/MWj). „Maće lóšt, z druhimi młodostnymi – našimi mjezynarodnymi hosćimi – swój horicont roz­šěrić? Chceće nowych ludźi zeznać a so kreatiwnje zaběrać, wšojedne hač při ­fotografowanju, molowanju abo při ­rjemjeslniskim dźěle?“ Takle prašeja so organizatorojo 5. mjezynarodneje młodźinskeje dźěłarnički, kotraž wotměje so wot 20. do 25. julija w Njebjelčanskej gmejnje. Nimo hosći z čěskeju městow Hlučína a Frýdlanta kaž tež z pólskeho Namysłowa móža so runje tak serbscy a němscy młodostni wobdźělić. Na ­wšitkich čakaja nimo třoch zajimawych dźěłarničkow a zhromadneho tworjenja spodobne ­wječory při lěhwowym wohenju a wulět do Drježdźan, kaž w přeprošenju rěka.

Festiwal na farskej łuce při cyrkwi

pjatk, 03. julija 2015 spisane wot:

Radwor (SN). Składnostnje wčerawšich 101. posmjertnych narodnin zbóžno­prajeneho Alojsa Andrickeho wotměwa so wot dźensnišeho hač do njedźele w Ra­dworju 2. Alojsowy festiwal, zwjazany z wosadnym swjedźenjom. Dźensa wot 19 hodź. koncertuje na farskej łuce pjeć kapałow z Nižozemskeje, Jendźelskeje, Němskeje a USA. Zastup je darmotny. Jutře dopołdnja přeprošeja na wjacore dźěłarnički, w kotrychž chcedźa ikony molować, so z gregorianskimi spěwami zaběrać, wo katechizmje diskutować a wo Loretskej zhromadnosći zhonić. We 18.30 hodź. započnje so hudźbnje wuhotowane modlenje Nightfever. Na to chcedźa zhromadnje swjećić.

Njedźelu budźe w 9.30 hodź. Boža mša, kotrejž přizamknje so wosadny swjedźeń. Na nim chcedźa wjacori hudźbnicy na jewišću wustupić. Wšitcy zajimcy su wutrobnje witani.

Za dowol sej chwile brać!

pjatk, 03. julija 2015 spisane wot:

Hamburg (dpa/SN). Lětnje prózdniny steja před durjemi a z nimi dołho wočakowany dowol. Dwě třećinje wšěch wobydlerjow Němskeje pak zahajatej jón abruptnje a ze stresom. Častodosć poda­waja so direktnje z běrowa na dowol, bjez toho zo bychu sej znajmjeńša dźeń chwile­ do toho popřeli. To znajmjeńša je wuslědk reprezentatiwneho woprašo­wanja załožby za prašenja přichoda, kotruž­ wčera předstajichu. Po tym dźě­łaja wosebje samostatni a swobodnje skutkowacy hač do­ dnja wotjězda. Předewšěm zastojnicy porno tomu wo wjele měrnišo swój dowol započinaja.

Mnozy dowolnicy swoje prózdninske zbožo na hrački stajeja. „Štóž kófry hakle wječor do wotjězda pakuje a hakle na městnje dowola planuje, móže wo wjele špatnišo wšědny dźeń za sobu wostajić“, měni nawoda załožby prof. Ulrich Reinhardt. To samsne płaći za tych, kotřiž so po­ swojich prózdninach hnydom zaso do dźěła wala. „Tak móže so stać, zo maš hižo po něšto dnjach začuće, zo žno sy zaso zrały za dowol.“

Krótkopowěsće (03.07.15)

pjatk, 03. julija 2015 spisane wot:

Nětko online rešeršować

Budyšin. Archiwowane kubła města Budyšina hodźa so nětko online rešeršować. To zmóžnja nowe perspektiwy, přeslědźić regionalne stawizny. Něhdźe dwě třećinje cyłeho wobstatka stej online přistupnej. W Budyskim statnym archiwje chowa so 2,7 regionalnych kilometrow aktow, 1 500 wopismow a 6 600 kartow z minjenych sydom lětstotkow.

Folklorna lawina zahajena

Choćebuz. Mjeztym 15. folklorna lawina je so dźensa w Delnjej Łužicy zahajiła. Sta wobdźělnikow ćehnješe we wulkej paradźe po Choćebuzu. Přizjewiło bě so 400 hudźbnikow a rejwarjow z 13 krajow, kaž zarjadowarjo zdźěleja. Staciji lětu­šeho festiwala stej nimo Choćebuza tež Baršć a Lubnjow. Folklorna lawina traje hač do njedźele, 5. julija.

Planowanje projekta běži

Zhorjelc. Přihoty za znowawotewrjenje Zhorjelskeje kupnicy derje postupuja. Tuchwilu dźěła skupina projektoweho nawody Jürgena Friedela na planowanju dowolnosćow. Paralelnje k tomu wjedu rozmołwy z móžnymi wotnajerjemi. W domje budźe luksus runje tak zaměstnjeny kaž kupjomne wěcy. Nazymu 2017 chcedźa kupnicu wotewrěć.

Policija (03.07.15)

pjatk, 03. julija 2015 spisane wot:

Nowoslicy. Nic pjenjezy, debjenki abo drohu techniku běchu sej paduši w nocy na srjedu w Nowoslicach jako rubiznu wupytali, ale domjacy skót. Kaž policija informuje, zhubi so z chlěwa na ležownosći při Delanskej 17 kačkow. Wone běchu něhdźe 130 eurow hódne.

Hamor. Runje tak njewšědna rubizna drje su startowanske bloki, kaž nachadźamy je w płuwanskim wobłuku zjawnych kupjelow. Tež w bywšej Hamorskej kupjeli tajke bloki maja, mjeztym wšak su wone tam jenož hišće wobswětlena debjenka. Runje dwaj z tychle blokow su njeznaći minjene dny pokradnyli a tak něhdźe 150 eurow škody načinili.

Minjeny pjatk je syć „trägerverBUNT“ (tvBUNT), pod kotrejež třěchu tež zwjazk Budyšin wostanje pisany skutku­je, 10lětne wobstaće swjećił. Za Cor­dulu Ratajczakowu bě to přičiny dosć so z koordinatorom syće Matthiasom Klemmom wo zańdźenej dźěławosći, dotalnym wuwiću a wo přichodźe skutkowanja rozmołwjeć.

Čehodla bu syć scyła załožena?

Problemy zastaranja z wodu nimale rozrisali

štwórtk, 02. julija 2015 spisane wot:

Slepo (AK/SN). Přirodoškitnu kónčinu Stare Slepjanske haty zachować wostanje energijowemu koncernej Vattenfall dale wažny nadawk. „Tale krajina ma so dale z wodu dobreje kwality zastarać, smy za to­ zamołwići“, podšmórny Christian Graetz z wotrjada geohydrologija a wodowe hospodarstwo koncerna wčera wječor na wobydlerskej zhromadźiznje w Slepom. Freibergska firma GUB bě wot lěta 2006 wokoło Slepoho a Trjebina wažne klimowe a wodowe informacije hromadźiła a je nětko wuslědki lěta 2013/2014 předstajiła. „Lońša nazyma bě w Němskej druha najsušiša wot lěta 1881. Suche wjedro traješe dale hač do lětušeje meje“, rozjasni dr. Christian Konrad z firmy GUB. Suchoty a postupowaceho hórnistwa dla je dnowna woda woko­ło Rownoho wo dwaj metraj spadnyła. „Wot lěta 2013 wobkedźbujemy spad dnowneje wody wjedra dla“, wón rjekny. W Slepjanskim wjesnym haće je staw wody porno lětu 2011 wo 24 centimetrow woteběrał.

nawěšk

nowostki LND