Město Wojerecy nadźija so spěchowanja ze stron Zwjazka z programa „přetwar městow“. Wone chce do dźěćaceho dnjoweho přebywanišća „Při Halštrowskim łuku“ inwestować.
Wojerecy (AK/SN). Město Wojerecy chce škit před wohenjom w dźěćacym dnjowym přebywanišću Dźěłaćerskeho dobroćelstwa (AWO) „Při Halštrowskim łuku“ (Am Elsterbogen) sporjadkować a modernizować. Na to su so měšćanscy radźićeljo na swojim posedźenju zańdźenu wutoru dojednali. Jednohłósnje woni wobzamknychu, zo chcedźa zarjadnistwu nadawk dać z wokrjesnym zwjazkom AWO sej naprawy dorěčeć. Te měli so do planowanja etata 2020/2021 zapřijeć.
Saněrować chcedźa připrawje za wohnjoškit a elektriku. W tym zwisku nadźija so město podpěry z programa „přetwar městow“ ze stron Zwjazka a krajow. „W tymle dźěćacym přebywanišću maja žłobik, pěstowarnju a hort. Zaměstnjene su skupiny we wšelakich domach. Dom ma kapacitu 265 městnow“, rěka w předłoze wobzamknjenja. „Hladajo na přihódne połoženje na kromje stareho města, na dobru docpějomnosć a na wulki poskitk ma so zarjadnišćo trajnje zachować. Wućeženje je loni 97,8 procentow wučinjało.“
Dróha z Budyšinka do Plusnikec je Malešanskich gmejnskich radźićelow wospjet zaběrała a drje tež dale zaběra. W februaru běchu wobzamknyli, ćežkowobchad wobmjezować. Nětko bě wokrjes komunalnych politikarjow napominał wobmjezowanje zaso cofnyć.
Malešecy (SN/MiR). Wokrjes bě w lisće na wjesnjanostu zwuraznił, zo rozsud płaćiwemu prawu njewotpowěduje. Tomu pak je so wosebje wobydlerska iniciatiwa „Skała Plusnikecy“ wobarała. Tuž běchu wospjet z plakatami do posedźenja gmejnskeje rady swojich wuzwolenych komunalnych politikarjow napominali, so na stronu wobydlerjow gmejny stupić. Na kóncu zhromadźizny tydźenja běše wjetšina přitomnych wolóžena. Gmejnscy radźićeljo njejsu swój rozsud cofnyli. Sedmjo z nich běchu so za wobzamknjenje z lětušeje zymy wuprajili, jedyn bě za to, próstwje resp. žadanju wokrjesa wotpowědować a rozsud cofnyć, dwaj radźićelej staj so hłosa wzdałoj. Februarski rozsud tuž dale płaći, a Malešanscy gmejnscy radźićeljo na tym wobstawaja, ćežkowobchad na dróze mjez Budyšinkom a Plusnikecami na 7,5 tonow wobmjezować.
Róžant (SN/MWj). W normalnych časach by wčerawša swjatkowna póndźela z jeje wulkotnym nalětnim wjedrom wjele stow ludźi na putnikowanje do Róžanta wabiła. Dokelž pak časy normalne njejsu, wotmě so tež tónle kruty termin w protyce katolskich Serbow w hinašim, mjenujcy tójšto mjeńšim kruhu, kaž to farar Michał Anders na dopołdnišich kemšach w Róžeńčanskej swjatnicy rjekny. Božu mšu je Serbski rozhłós kaž kóžde lěto live wusyłał. Lětsa drje je ju wjele wjace ludźi hač minjene lěta při radiju sćěhowało. Zo pak bě wjele mjenje kemšerjow w Božim domje, hač je w nim městnow, znajmjeńša w radiju słyšeć njebě. Kěrluše a modlitwy wosady klinčachu, kaž by swjatnica nimale połna wobsadźena była. Mnozy su kemše na cyrkwinskej zahrodźe sobu swjećili, hdźež je přez wótřerěčaki přenjesechu.
Doma riziko najwjetše
Budyšin/Zhorjelc. Ličba z koronawirusom natyknjenych je w Budyskim wokrjesu wo tři na 496 přiběrała, swjatki pak njejsu hišće wobkedźbowane. 49 ludźi je schorjenych, pjećoch lěkuja w chorowni. Strowotniski zarjad na to skedźbnja, zo so najwjace ludźi doma natyknje, wosebje na narodninach a při grilowanju. W Zhorjelskim wokrjesu njejsu žane nowe ličby wozjewili, tam wosta při cyłkownje 269 inficěrowanych.
Propst Hrjehor rozžohnowany
Kamjenica/Budyšin. Propst Clemens Hrjehor bu wčera w Kamjenicy oficialnje rozžohnowany. Wón wukonja přichodnje z Budyšina dušepastyrske nadawki, zdźěli Drježdźansko-Mišnjanske biskopstwo. Zdobom je wčera biskop Heinrich Timmerevers na kemšach fararja Benna Schäffela jako propsta a naslědnika Clemensa Hrjehorja w Kamjenicy do zastojnstwa zapokazał.
Dr. Helmut Jenč njeboh
Bart. Dobrowólna wohnjowa wobora Bart by lětsa 170. róčnicu wobstaća swjećiła. Za to planowane swjedźenske zarjadowanje pak dyrbjachu koronapandemije dla wotprajić. Tež tradicionalne mejemjetanje žane njebě. Wšako chcychu jubilej a mejski swjatk zhromadnje woswjećić. Wobornicy wobroćichu so nětko zjawnje na wobydlerjow. Wěmy, kak ćežko mjeztym je w tak małej wsy někajki swjedźeń organizować. Štó pak měł to činić, hdyž nic towarstwa a organizatorojo ze wsy sameje, z Barta? Ze swojim listom na wobydlerjow zwjazuja nadźiju, zo móža bórze zaso zhromadnje swjećić. Zdobom dźakuja so wšitkim, kotřiž su za přihoty jubileja a mejemjetanja mjeztym hižo wjele prócy nałožili. Wobornicy zwjazuja swój dźak z nadźiju, zo po koronje dale dobru zhromadnosć pěstuja.
Kmótřiski projekt za přirodu
Wobydlerjam zarjadniskeho zwjazka Njeswačidło a Bóšicy předleži nětko derje wuhotowana informaciska brošura. Wuhotowała a wudała je 30stronski wulkoformatowy zešiwk w nadawku mjenowaneho zarjadniskeho zwjazka firma Mediaprint info-nakładnistwo w Meringu pola Augsburga. Karta wo hornjołužiskej holi a hatach z dwurěčnymi mjenami a detailowe karty gmejnow su přidate.
Ideja, tajki spis za wobydlerjow zarjadniskeho zwjazka a wo nim wudać je chwalobne. Na titulnej stronje wuhladamy wulkobarbne foto wo Njeswačanskim Starym hrodźe z baroknej zahrodu a třomi pawiljonami před nim, dale tři kulojte mjeńše fota wo hrajkanišću, Koslowskich łučnych hatach a wo swj. křižu na Horje. Swjaty křiž skedźbnja na wosebitosć teritorija, na wsy z katolskimi serbskimi wjesnjanami a tradicijemi kaž tež na ewangelskich wobydlerjow a jich kulturny rum.
Wulku sumu pjenjez a drogi našli
Mały Wjelkow. Zastojnicy Budyskeho policajskeho rewěra a inspekcije kriminalneje policije su minjenu wutoru z pomocu stafle slědźacych psow přepytowanje w Małym Wjelkowje přewjedli. W podhladnym „bydlenskim objekće“ namakachu „něšto mariuany, srědki za woćeńšenje drogow a něhdźe 10 000 eurow“. Třoch muži w starobje 25 do 28 lět a 19lětnu žonu policija zaja, statne rěčnistwo dale přepytuje.
Policistow nadběhował
Niska. Wočiwidnje wopojeny 25lětny muž je so předwčerawšim zajeću spjećował a za policistami kopajo škleńcu słužbneho awta zastojnikow wobškodźił. Wěcnu škodu trochuja na něhdźe 300 eurow. Skućićel spyta z kolesom ćeknyć, štož pak so jemu njeporadźi. Nětko je w přepytowanskej jatbje.
Njebjelčanska gmejnska rada wobšěrny dnjowy porjad rozjimała
Njebjelčicy (JK/SN). Hižo k zahajenju wčerawšeho posedźenja gmejnskeje rady je Njebjelčanski wjesnjanosta Tomaš Čornak (CDU) wuzběhnył, zo budźe to zajimawe posedźenje z wotměnjawym wobsahom. Nimo toho wón radźićelam rjekny, zo gmejnske zarjadnistwo nimale zaso po zwučenych kolijach, po normalnym porjedźe dźěła. Přiwšěm měli wšitcy dale na postajenja dźiwać, kotrež pomhaja rozpřestrěće koronapandemije wobmjezować.