Krótkopowěsće (27.04.20)

póndźela, 27. apryla 2020 spisane wot:

Dalši třo pacienća zemrěli

Budyšin/Zhorjelc. W Radebergskej hladarni stej dalšej wosobje w zwisku z koronawirusom zemrěłoj. Tak je ličba smjertnych padow w Budyskim wokrjesu na dwanaće rozrostła. Tu je dohromady 347 (+6) natyknjenych. W Nišćanskej hladarni je 90lětna žona w zwisku z pandemiju zemrěła. W Zhorjelskim wokrjesu maja nětko dohromady 20 zemrětych. Ličba infekcijow je tam přez kónc tydźenja na 255 (+3) přiběrała.

Tež Serbowka „Lolu“ dobyła

Berlin. Němska filmowa akademija je sobotu najlěpše produkcije a wukony minjeneho lěta wuznamjeniła. Najwuspěšniši pask je „Systemsprenger“, kotremuž přiznachu mjez druhim myta za najlěpši film, najlěpšu režiju a najlěpši scenarij. „Lolu“ za swój wukon w produkciji zdobychu sej tež Helena Zengel, ­Albrecht Schuch a Serbowka Gabriela Marija Šmajdźina.

16 milionow ekopremije

Kedźbu, škotowarjo!

pjatk, 24. apryla 2020 spisane wot:

Budyšin. Za přichodnu wutoru, 28. apryla, planowany serbski škotowy turněr seniorow dyrbi koronoweje pandemije dla wupadnyć. Přichodny termin je 26. meje w 14 hodź. pola Krawčikec w Chrósćicach, jeli to škitne naprawy potom do­wola. Tradiconalny wulět škotowarjow wotměje so wutoru, 8. septembra. Jězba powjedźe do Drježdźan, hdźež pojědu z parnikom a wobhladaja sej wustajeńcu „Starych mištrow“ kaž tež katedralu a cyrkej Našeje knjenje. Přizjewić móža so zajimcy pola Alojsa Langi w Konjecach (tel. 03 57 92 / 5 01 26) abo pola Měrćina Nowaka w Lubiju (tel. 0 35 85 / 40 24 20).

Čerwjenu kartu pokazać

Budyšin. We wobchodach Budyskeho wokrjesa trjebaja kupcy wot minjeneje póndźele škit před nosom a hubu. Štóž to nječini, tomu móža mějićeljo wob­choda čerwjenu kartu pokazać. Tajku poski­ća krajnoradny zarjad nětko jako download. Je to pokiw tym kupcam, kotřiž­ so tajkemu škitej wobaraja.

Policija (24.04.20)

pjatk, 24. apryla 2020 spisane wot:

Tójšto škody načinili

Wětrow. Po wšěm zdaću w nocy na minjenu wutoru běchu so njeznaći do towarstwoweho domu we Wětrowje zadobyli. Z njeho pokradnychu točensku maši­nu, akušrubowak, kompjuter, krutej tačeli, 50 eurow a wjace hač 30 tyzow z napojemi w cyłkownej hódnoće 1 200 eurow. Wěcna škoda wučinja 200 eurow.

Spěšnosć měrili

Błohašecy. Hdźež na statnej dróze S 106 před Błohašecami S 100 wotboča, su předwčerawšim spěšnosć měrili. Při dowolenych 70 km/h zwěsćichu 43 přeń­dźenjow. Ze 101 km/h najspěšniši bě Opel ze Zhorjelskim čisłom.

Gmejnje wudawki njenastanu

pjatk, 24. apryla 2020 spisane wot:

Dalši krok za nowy towarstwowy dom při Hórnikečanskim jězoru

Łaz (AK/SN). Towarstwowe žiwjenje při Hórnikečanskim jězoru ma so po woli Łazowskeje gmejnskeje rady zaso wožiwić. Sobu najwažniša naprawa za to budźe nowy towarstwowy centrum. Za jeho přizamknjenje z pitnej wodu wotzamknje gmejna zrěčenje z Kamjenskim za­wodom Ewag. Kaž wjesnjanosta Thomas ­Leberecht (CDU) na zašłym posedźenju radźićelow rjekny, słušeja Koblicy a Wulke Ždźary sobu do přisłušneho teritorija Kamjenskeho zastaraćela. Projekt budźe po 85 procentach spěchowany. Zbywace 15 procentow přewozmje Ewag, štož wučinja 26 000 eurow. Tule sumu gmejna najprjedy zapłaći, dóstanje pak ju poz­dźišo wot Ewag wróćenu. „Tak gmejnje žanežkuli wudawki njenastanu“, wjesnjanosta podšmórny.

Dobyćerjo jutrowneje křižowki SN

pjatk, 24. apryla 2020 spisane wot:

Wuhódanje jutrowneje křižowki Serbskich Nowin drje njeje lětušim njewšědnym jutram prawje wotpowědowało. Wšako křižerjo jěchać njemóžachu. Přiwšěm su nam mnozy čitarjo prawu wotmołwu „Křižerjo po puću“ připósłali.

Zo nje­trjebali so dobyćerjo křižerjow cyle wzdać, smy w Ludowym nakład­ni­stwje Domowina wušłu knihu Maćija Bulanka „Jutry doma“ z wjele zajimawymi wobrazami serbskich křižerjow a wubranymi literarnymi tekstami wu­lo­sowali. Nad nowostku wjeselić smědźa so Matti Bětnar z Drježdźan, Edeltraud Kuringowa z Budyšina a Julia Winarjec z Radworja.

Wšitkim dobyćerjam wjele zboža!

Wšitkim kamjeń z wutroby padnył

pjatk, 24. apryla 2020 spisane wot:

Wot spočatka tydźenja smědźa wob­chody hač do 800 kwadratnych metrow zaso wočinjene měć. To wjeseli tež serbsku mějićelku wobchoda čriji w Lessingowym měsće Kamjencu.

Kamjenc (aha/SN). Hižo před 27 lětami je Lucija Cyžowa w Kamjencu na Cyrkwinskej njedaloko torhošća swój wobchod za črije a kožane wudźěłki wote­wrěła. Wobydlerjam Kamjenca, ale wo­sebje tež serbskich wsow bě Cyžec Dom čriji wot toho časa dobra adresa, sej tam trěbne wobuće wobstarać. Požadane znate markowe črije a wobstajne přećelne fachowe posłužowanje wědźa sej kupcy wažić. Wosebje serbskim je wažne, zo jich nimo Lucije Cyžoweje mjeztym tež tam dźěłace předawarki Monika Matcyna, Karin Šěrakowa a Kerstin Čornakowa w maćernej rěči poradźuja a posłužuja.

Znajmjeńša přiroda hišće někak tak funguje, kaž smy to do koronowych časow zwučeni byli. A tak wuhladamy tele dny zaso kćějace rěpikowe pola. Před módrym njebjom bjez smuhow lětadłow skića žołte pola wosebje rjany napohlad, kaž je to fotograf předwčerawšim pola Wotrowa zapopadnył. Foto: Feliks Haza

Radšo zaso w słucharni wuknyć

pjatk, 24. apryla 2020 spisane wot:

Serbske Nowiny namołwjeja swojich čita­rjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće­ nam na . K tomu podajće prošu hesło „Wosta­njemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Student mediciny w Lipsku Pětr Dźisławk je našu namołwu sćěhował a pisa:

Krok po kroku w Němskej šule zaso wote­wru. Wysoke šule maja bórze slě­do­wać, tajki je znajmjeńša tučasny staw. Lipšćanska uniwersita na přikład, na kotrejž tučasnje medicinu studuju, planuje 4. meje zaso seminary a čitanja dźeržeć započeć. Hač tomu woprawdźe tak budźe, na tym hišće dwěluju. Ale byrnjež sej dotal ženje předstajić njemóhł, zo jednoho dnja tak myslu – Čłowječe, bych so ja wjeselił!

W bywšim knježim konjencu Rogeńskeho parka přihotuja tuchwilu wustajeńcu wo po­wójnskich stawiznach „Rogeńc 1945“. Přehladku chcedźa 8. meje wotewrěć. Widźeć budźe tež 250 kg ćežka bomba, kotruž běchu w februaru 1945 na Choćebuz ćisnyli, bomba pak njerozbuchny. Wčera su ju přiwjezli. Foto: Michael Helbig

Krótkopowěsće (24.04.20)

pjatk, 24. apryla 2020 spisane wot:

Tři dalše wosoby zemrěli

Zhorjelc/Budyšin. Třo dalši wobydlerjo Nišćanskeje hladarnje su na koronawirus zemrěli. Tak rozrosće ličba smjertnych woporow pandemije dla w Zhorjelskim wo­krjesu na 17. Dohromady bě wčera tam 252 (+2) inficěrowanych, 73 wosobow je so wustrowiło. W Budyskim wo­krjesu bě wčera 341 (+1) natyknjenych a 206 wustrowjenych. Dotal je tu dźesać wosobow w zwisku z wirusom zemrěło.

Chěže online prezentuja

Zhorjelc. Wobmjezowanjow zjawneho žiwjenja koronapandemije dla je załožba domow ze stołom za 31. meju planowany 16. dźeń wotewrjenych chěžow wotprajiła. W minjenych lětach je pře­rěznje 8 000 ludźi składnosć wužiwało, so tón dźeń po chěžach ze stołom roz­hladować a so na přikład wo poradźenym ponowjenju wobhonić. Domy chcedźa nětko online prezentować.

Mało ludźi w Praskej metro

Serbska debata

nowostki LND