Policija (08.04.20)

srjeda, 08. apryla 2020 spisane wot:

Spěšnosć měrili

Komorow. Na zwjazkowej dróze B 156 blisko Komorowa pola Klukša, hdźež je 70 km/h dowolenych, je policija předwčerawšim spěšnosć měriła. Do směra na Budyšin přepruwowachu zastojnicy dohromady 250 jězdźi­dłow, třinaće bě přespěšnych. Njesławny rekord docpě Mazda ze 100 km/h.

Dobre knihi pomhaja

srjeda, 08. apryla 2020 spisane wot:

Serbske Nowiny namołwjeja swojich čitarjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće nam na . K tomu podajće prošu hesło „Wostanjemy doma!“ Čakamy na waše dopisy, wobrazy a rysowanki a wuprajamy hižo nětko wutrobny dźak. Uwe Gutšmidt z Bórkowow pisa:

W SKC maja jutrownu studnju

srjeda, 08. apryla 2020 spisane wot:
Poprawom měješe so w Slepjanskim Serbskim kulturnym centrumje kónc měrca dwaj dnjej z ludźimi jenož tak mjerwić. 35 debjerjow jejkow chcyše wopytowarjow tam na 23. jutrownych wikach zwjeselić. Zo njebychu přihoty cyle podarmotne byli, maja w SKC nětko prěnju jutrownu studnju. Tež hdyž dyrbjachu wšitke zarjadowanja wotprajić, su znajmjeńša na te wašnje trochu dojutrowneje atmosfery wutworili. Na Facebooku pokazuje kulturny centrum swoju aktualnu jutrownu wustajeńcu. Foto: Joachim Rjela

Wotpadki njedźělić

srjeda, 08. apryla 2020 spisane wot:

Drježdźany. Priwatne domjacnosće, w kotrychž su z koronawirusom inficěrowane wosoby w karantenje, njeměli swoje wotpadki dźělić. Kaž sakske ministerstwo za wobswět a ratarstwo zdźěli, měli so w tym času tež zapakowanske a biowotpadki w karantenowej domjacnosći do čorneho wotpadkoweho sudobja mjetać, nic pak papjera a škleńca, elektrošrót a baterije. To ma tych ludźi škitać, kotřiž wotpadki wotwožuja, ale tež susodow a domownikow. Dale měli potrjecheni na to dźiwać, zo su jich wotpadki w krutych wotpadkowych titach abo měchach a zo na přikład papjerjane nósniki jednotliwje do wotpadkoweho sudobja njemjetaja.

Poradźuja telefonisce

Budyšin. W času zawrjenych šulow a pěstowarnjow poskića Hornjołužiski zwjazk Carity telefoniske poradźowanje w swójbnych prašenjach. Pod telefonowym čisłom 03591/ 498 220 móža sej zajimcy pomhać dać, trjebaja-li někajku pomoc w kubłanskich naležnosćach, hdyž je w partnerstwje kriza nastała, hdyž su pokiwy za dźěćace zaběry trěbne, abo maja-li pjenježne prašenja.

Wirus zarjadnistwo njeborzdźi

srjeda, 08. apryla 2020 spisane wot:

Tež w tuchwilnym napjatym času gmejnski zarjad dale dźěła

Njeswačidło (JK/SN). Zarjadniske dźěło w gmejnach tež w krizowym času njewotpočuje. Gmejnske nadawki a winowatosće dyrbja dźě dale spjelnjene być, tak tež w Njeswačanskej gmejnje. Kaž tamniši wjesnjanosta Gerd Schuster (CDU) na naprašowanje SN zdźěli, dźěłaja w zarjadni­stwje tučasnje z dwěmaj mustwomaj a tak wotpowědnje strowotniskim žadanjam dźěłakmanosć zaručeja. Mustwje so wšědnje wotměnjatej, a wotewrjeny je gmejnski zarjad nětko wšědnje hač do 16 hodź. Tak je zarjadnistwo nimale přez cyły tydźeń wjesnjanam přistupne, při čimž tam wězo trěbne naprawy hygieny wobkedźbuja.

Wosebitosć w cyrkwi widźeć

srjeda, 08. apryla 2020 spisane wot:

Budyšin (SN). Najebać wšitke wuwzaćne rjadowanja je Budyska tachantska cyrkej dale přistupna. Tam steji tuchwilu póstny křiž, kotryž móhł w času, hdyž dyrbja so ludźo zetkawanja z druhimi wzdać, jako městno słužić, swojej izolaciji wućeknyć. Njewšědny křiž steji na centralnym ewangelskim hłownym wołtarju.

Křiž z folije za rostlinarnje a ze šěreho płatu wulki rum cyrkwje optisce pomjeńši, a to runje tam, hdźež stej katolski a ewangelski dźěl Božeho domu z płotom dźělenej. Wid na wołtar w katolskim dźělu cyrkwje je tak wědomje přetorhnjeny. To směmy tež symbolisce widźeć, přetož něchtóžkuli so tele dny wotrěznjeny a izolowany čuje, hdyž njemóže swojich lubych wopytać abo hdyž dowolnicy domoj njemóža.

Cyle nowy napohlad skići nětko w Pančicach-Kukowje płonina mjez šulu a twarjenjom, w kotrymž stej fyzioterapija a logopedija zaměstnjenej. Tam su gmejnscy dźěłaćerjo minjeny čas štomy a kerki wotstronili, něšto kwadratnych metrow wuplestrowali a ławce a blido stajili. Nimo toho připrawichu sudobjo za wotpadki a stejak za kolesa. Nastroje přewostajił je metal předźěłacy zawod z Pěskec. Nětko chcedźa hišće lipu a klon sadźić a městnosć wozelenić. Foto: Feliks Haza

Njewšědny spektakl móžachu ludźo minjenu nóc dožiwić, kaž tale holca na hórce w braniborskim Sieversdorfje: Měsačk je jako połny měsačk dypk docpěł, na kotrymž je zemi najbliši (356 400 kilometrow) a zdawa so nam tuž wosebje wulki. Na přichodnu přirodnu inscenaciju podobneho razu dyrbimy hač do meje 2021 čakać. Foto: dpa/Patrick Pleul

Krótkopowěsće (08.04.20)

srjeda, 08. apryla 2020 spisane wot:

Dalšej wosobje zemrěłoj

Budyšin/Zhorjelc. Z wobydlerjom Wojerowskeje hladarnje je wčera třeći pacient w Budyskim wokrjesu na koronawirus zemrěł. Zdobom mějachu tu 222 natyknjenych, wosom wjace hač dźeń do toho. W Zhorjelskim wokrjesu je nětko pjeć mortwych, po tym zo je dalši, 82lětnym pacient zemrěł. 182 inficěrowanych tam je, sydom wjace hač póndźelu.

Pomocna akcija přestorčena

Budyšin. Čestnohamtsku pomocnu 48hodźinsku akciju je Budyski wokrjes koronapandemije dla přestorčił. Město wot 15. do 17. meje chcedźa akciju pod hesłom ,,… nětko runje!“ wot 9. do 11. oktobra přewjesć. Na to dojednachu so organizatorojo a wokrjesne zarjadnistwo hromadźe z pjenjezydawarjom, Budyskej wo­krjesnej lutowarnju.

Macalic hosćenc prěni zapisany

Policija (07.04.20)

wutora, 07. apryla 2020 spisane wot:

Smjertnej woporaj njezboža

Njebjelčicy. Hrózbny wobraz skićeše so wuchowanskim mocam, wohnjowym wobornikam a policiji wčera připołdnju na statnej dróze S 94 blisko Njebjelčanskeje wotbóčki. Tam bě so krótko po 12.30 hodź. ćežke wobchadne njezbožo stało. Z dotal njeznateje přičiny zrazyštej transporter typa Fiat a wosobowe awto typa Audi frontalnje do so. Dospołnje skóncowany transporter wosta na třěše ležo, Audi suny so do přirowa. Wodźer transportera bě po wšěm zdaću nablaku mortwy. Šofera wosoboweho awta dyrbjachu z ćežkej techniku z jeho jězdźidła wuswobodźić. Tež wón pak pozdźišo w chorobnym awće wudycha. Nimo dweju helikopterow běchu dźesatki wobornikow a wuchowarjow zasadźene. Wobdźěłanja njezboža a rumowanja wobdźěleneju jězdźidłow dla bě statna dróha wjacore hodźiny dospołnje zawrjena. Za přičinami njezboža policija slědźi.

Serbska debata

nowostki LND