Zwukowy festiwal w awgusće

štwórtk, 11. februara 2016 spisane wot:

Napjate hospodarske połoženje nuzuje tež Hamorsku gmejnu k lutowanskim naprawam. Časy, jako móžeše komuna samo wulke kulturne zarjadowanja podpěrać, su nimo.

Hamor (AK/SN). Dwanaty swětłowy a zwu­kowy festiwal transNATURALE při Bjerwałdskim jězoru ma so 5. a 6. awgusta 2016 wotměć. We wobłuku třidnjowskeho festiwala Cherry Beach ma jón priwatny zarjadowar organizować a wuhotować. Hamorska gmejna festiwal podpěrować njebudźe. Tole podšmórny wjes- njanosta Achim Junker (CDU) na zašłym posedźenju gmejnskeje rady. „Napjateho hospodarskeho połoženja dla nima Hamorska gmejna hižo móžnosć, tele zarjadowanje kaž tež druhe na teritoriju gmejny pjenježnje podpěrać“, rozłoži wjesnjanosta w swojej rozprawje k aktualnemu połoženju komuny.

Wjace swěcy za Poršicy

štwórtk, 11. februara 2016 spisane wot:

Runje tak kaž po wšej Kubšiskej gmejnje wostawa tež w Poršicach w nocy ćma, dokelž su wšitke nadróžne lampy hasnjene. Tole chcedźa wobydlerjo nětko změnić – a nic jenož to.

Poršicy (CK/SN). Wobydlerjo Poršiskeho sydlišća do směra na lětanišćo sej přeja, zo by so w nocy kóžda druha na­dróžna latarnja swěćiła. Wěstoty dla ludźo nochcedźa, zo je w nocy na pućach ćma kaž w pjecy, rozłožichu woni na zašłym posedźenju Kubšiskeje gmejnskeje rady. Nimo toho móhła w sydlišću jedna lampa wjace swěćić. Wjesne wobswětlenje běchu po słowach wjesnjanosty Olafa Reicherta (njestronjan) hišće pod jeho předchadnikom, w Poršicach bydlacym, lěta 2008 ponowić dali. Gmejna chce nětko pruwować, hač móhli na přikład při Poršiskej pěstowarni, hdźež zda so ludźom, zo je tam jara ćma, přidatnu lampu instalować. Ale časy změnić, hdy so lampy swěća Reichert za trěbne nima.

Štóž so mysle ženić ma ...

štwórtk, 11. februara 2016 spisane wot:

Kamjenc (SN). Šesty raz wotměja so njedźelu, 21. februara, wot 10 hodź. Kamjenske kwasne wiki w tamnišim hotelu „Město Drježdźany“. Lětsa su je wo hesło „Swjećić a eventy“ rozšěrili, rozłoži sobu- organizatorka Sylvia Stephan z drastoweho wobchoda na Budyskej dróze. Tak chcedźa hišće šěrši publikum narěčeć, wšako je nimo kwasow wjele swjedźenjow, kotrež ma čłowjek we wěstych ­časach přihotować, kaž křćizna, šulski ­zastup, prěnje swjate woprawjenje, firmowanje a dalše. Swoje poskitki a po­słuž­­by prezentuje lětsa znowa něhdźe 40 wustajerjow. Paleta saha wot złotnikarja přez zahrodnistwo, drastowy wobchod a hosćency hač k fotografej, pjekarjej a cateringowemu serwisej. Mjez wustajerjemi budźetej Kamjenska pjekarnja Dominika Zelnaka a Sulšečanski wobchod Sigrid Bejmineje „Kreatiwita“. Wobaj serbskich wopytowarjow rady w jich maćeršćinje­ po kwasnych wikach powjedźetaj.

Cyły dźeń změja 21. februara wosebite poskitki a firmowe prezentacije. Tak přeprošuja w 11.30 hodź. na modowu přehladku, w 12.30 hodź. wustupi rejwanski klub Lessingoweho města a w 14 hodź. podadźa pokiwy k šminkowanju.

Tři zranjene po zražce

štwórtk, 11. februara 2016 spisane wot:
Dwě wosobowej awće stej wčera wječor na zwjazkowej dróze B 98 pola Ramnowa do so zrazyłoj. Tam chcyše 56lětna wodźerka Forda, přijěducy z Ramnowa nalěwo na statnu dróhu S 156 wotbočić, njewobkedźbowa pak při tym napřećo přijěducy VW. Při zražce buchu 49lětna wodźerka VWja, wodźerka Forda kaž tež jeje 78lětna sobujěduca zranjene. Wobě jězdźidle dyrbjachu wotwlec. Wěcnu škodu trochuja na ně­hdźe 20 000 eurow. Wobdźěłanja njezboža a rumowanja dla bě B 98 dwě hodźinje połojčnje zawrjena. Foto: Rocci Klein

Zymski sport we Łužicy je móžny

štwórtk, 11. februara 2016 spisane wot:
Zo je tele dny zymski sport tež we Łužicy móžny dopokazuje Budyska lodowa čara „Elchbahn“ na Nowosólskej. Wona je tuchwilu jeničke městno we wokolinje, hdźež zymu nańdźeš. Tole wěstaj tež Jacob a jeho kuzina Tanja, kotrajž staj so tam dźensa smykałoj. Čara je runje nětkole w zymskich prózdninach wšitkim fanam zymskeho sporta wotewrjena a to wšědnje wot 10 do 12 kaž tež wot 14 do 16 a 17 do 20 hodź. Smykače móža sej zajimcy tež na městnje wupožčić. Foto: Uwe Söder

Krótkopowěsće (11.02.16)

štwórtk, 11. februara 2016 spisane wot:

Rekordne lěto za turizm

Wiesbaden. Rozmach turizma w Němskej dale přiběra. Lońše lěto je hladajo na ličbu přenocowanjow w Němskej nowy, mjeztym šěsty rekord, wunjesło. Zwjazkowy statistiski zarjad je 436,4 miliony přenocowanjow pućowacych z tu- a wukraja zličił. To je tři procenty wjace hač 2014. Ličba wukrajnych hosći zwyši so wo pjeć procentow na 79,7 milionow.

„Swětłowy smog“ wobmjezować

Frýdlant. Wobydlerjo Frýdlantskeho wuběžka w sewjernej Čěskej protestuja přećiwo hoberskim škleńčnikam w pólskej Bogatyniji. Tamne škleńčane rostlinarnje dźě w nocy tak mócnje swěća kaž město ze sto tysac wobydlerjemi. Nócne swětło myli wuraznje ludźi a wobwliwuje wobswět. Najebać protesty pak pólska firma Citronex planuje škleńčnikowu přestrjeń hišće dźesać króć powjetšić.

Pola Amazon zaso stawkuja

Policija (11.02.16)

štwórtk, 11. februara 2016 spisane wot:

Znjezbožił a so zminył

Rakecy. Na zwjazkowej dróze B 96 bě za- wčerawšim wodźer Audija po puću, kiž krótko po 20 hodź. blisko Rakec w prawej křiwicy kontrolu nad jězdźidłom zhubi a na lěwy bok jězdnje zajědźe. Při tym prasny wón do milinoweho kašćika a načini tak něhdźe 3 000 eurow škody. Přiwołanym policistam napadny, zo w awće za alkoholom smjerdźeše, šofer pak bě so najprjedy raz zminył. Krótko na to 23lětneho tola dosahnychu a naměrichu pola njeho 0,6 promilow alkohola w kreji. Wón dyrbješe zastojnikow k wotedaću kreje přewodźeć a přichodny čas hižo z awtom jěć njesmě.

Njeskutka bě jemu žel

Radeberg. Sebje samoho pola policije přizjewił je zawčerawšim 31lětny muž w Radebergu. Wón chcyše w kupnicy pakćik mloka kupić, njeměješe pak dosć pjenjez. Tuž předawarce namjetowaše, dźěl zapłaći a zbytk přichodny raz. Na to kupnicu wopušći. 32lětny sobudźěłaćer chcyše jeho wróćo dirigować, kupc pak dyri jemu z pjasću mjezwoči a so zminy. Byrnjež tole pozdźišo wobžarował, změje so muž za to zamołwić.

Nětko pytaja serbsku dnjowu mać

štwórtk, 11. februara 2016 spisane wot:
Dobry wothłós žnějachu organizatorojo njedawneho prěnjeho serbskeho blida w Lipsku. Ličili běchu z něhdźe dźesać wobdźělnikami, přišło bě na kóncu 17 dorosćenych a dźěći. Najstarša wobdźělnica za blidom bě 76 lět, mały Beno hakle dwě lěće. Jako prěnje přińdźechu do hosćenca tři žony, kotrež běchu namołwu k serbskemu blidu w Serbskich Nowinach čitali. Kaž rjeknychu, wone hižo 60 lět w Lipsku bydla a dyrbjachu runje tak dołho na tajke serbske blido čakać. Po móžnosći chcedźa so Lipšćanscy Serbja štyri razy wob lěto zetkać. Přichodny raz budźe to w meji. Najprjedy wšak pytaja serbsku dnjowu mać, kotraž by so wo­dnjo wo dźěći Lipšćanskich Serbow starała a z nimi serbowała. Bibiana Bartec

Nowotwar mosta skónčnje wupisany

srjeda, 10. februara 2016 spisane wot:

Železniski móst nad Budyskej Zeppelinowej chcedźa lětsa w awgusće znowa twarić počeć. Předewzaće Deutsche Bahn (DB) Netz AG je nadawk před něšto dnjemi wupisał. Wo projekće so hižo wjele lět rěči.

Budyšin (UM/SN). Wosebje za zapósłanca Sakskeho krajneho sejma Marka Šimana (CDU) je to zawěsće dobra powěsć. Wot 2006 zasadźa so wón za to, zo so tele „wuško“ na hłownej wobchadnej čarje w Budyskim juhu wotstroni a so stary móst z nowym naruna. Skónčnje je tak daloko: Na šěsć wusko popisanych stronach je DB Netz AG nětko trěbne naprawy a požadanja wupisała.

Sprěnja matej so stary móst a dwuposchodowe twarjenje wuhibkarnje potorhać. Nowotwar ma 18,25 metrow (dotal 9 m) šěroki a 4,50 metrow (dotal 3,50 m) wysoki być. Tak móhli so přichodnje tež wulke nakładne awta bjez problema pod mostom zetkać. Dotal móže tam jenož jedne wjetše jězdźidło srjedźa nimo. Wosebje wot toho časa, zo so zapadna tangenta wužiwa, je to k haćenjam wjedło a wobchad chětro poćežowało. Tež 250 metrow kolijow maja ponowić. Zo bychu ćahi při twarjenju dale jězdźić móhli, je pjeć pomocnych mostow trěbnych.

Tradiciji pjerjodrěća su so póndźelu a wčera na Rownjanskim Njepilic statoku wěnowali. Něhdźe 20 žonow ze spěchowanskeho towarstwa a dalše wjesnjanki su tam pjerja něhdźe 40 husow drěli. Wobydlerjo ze wsy a wokoliny běchu je towarstwu přewostajili. Wužiwać chcedźa pjerjo za dwě poslešći a štyri hłowaki. Foto: Jost Schmidtchen

nawěšk

SERBSKE NOWINY podpěruja:

Novi Sad – kulturna stolica Europy

nowostki LND