Wutwar puća wo tójšto dróši
Zakładna šula Rakecy dóstanje nowe garderobowe kamory
Rakecy (aha/SN). Němsce a serbsce witaše Rakečanski wjesnjanosta Swen Nowotny (CDU) čłonow tamnišeje gmejnskeje rady a dalšich hosći na wčerawše wuradźowanje parlamenta. Jednohłósnje radźićeljo wobzamknychu, zo wudadźa za twar garderobow w tamnišej zakładnej šuli 63 000 eurow. Garderobowe kamory za šulerjow su tuchwilu w dwěmaj rjadowniskimaj rumnosćomaj. Je pak wotwidźomne, zo budźetej rumnosći přiběraceje ličby šulerjow dla za wuwučowanje trěbnej. Tohodla su přetwarjenski plan zdźěłali, wobkedźbujo wohnjoškitne žadanja. Hłowny zachod za šulerjow budźe wot noweho šulskeho lěta přez pincu, hdźež změja woni na woběmaj bokomaj chódby 152 garderobowych kamorow. Za to trěbne wudawki zarunaja z pawšalneho spěchowanja Swobodneho stata Sakskeje.
Wo holanskich jahodach čitał
Knižna premjera wosebiteho razu wotmě so minjeny kónc tydźenja w Delnim Wujězdźe. Wjace hač 130 wopytowarjow chcyše tam njewšědny podawk sobu dožiwić.
Delni Wujězd (JoS/SN). Tajke něšto Delnjowujězdźanska čitanska zyma w 20 lětach swojeho wobstaća hišće dožiwiła njeje. Na połnje wobsadźenej žurli hosćenca „Tři lipy“ nastajene stólcy njedosahachu. Burkhard Unterdörfer, syn legendarneho Delnjowujězdźanskeho hajnika a pisarja Gottfrieda Unterdörfera, předstaji dotal njewozjewjeny manuskript swojeho 1992 zemrěteho nana. Wobsahowje wjedźe „Lěto hajnika“ čitarja do druheje połojcy 1980tych lět a dawa dohlad do tehdyšeho wšědneho dnja ludźi wosrjedź hornjołužiskeje hole a hatow. Dotal stej dwě knize Gottfrieda Unterdörfera po jeho smjerći w nakładnistwje Lusatia wušłej. Najnowšu je Kinsporske nakładnistwo Via Regia wudało.
Hižo 20 lět wuhotuje Dieter Wersch wóz Kulowskeho dźěćaceho ...
Na swoje žadanja skedźbnić
Krótkopowěsće (20.02.20)
Jara wulki zajim za ITB
Berlin. Turistiski zajim na Saksku je tak wulki kaž hišće ženje. Wjace hač 20,7 milionow přenocowanjow hosći bě branša loni zličiła. Sakska prezentuje so wot 4. do 8. měrca na najwjetšich wikach swětoweho turizma, Mjezynarodnej turistiskej bursy (ITB), w Berlinje. Prěni raz chce tež sakska ministerka za kulturu a turizm Barbara Klepsch (CDU) stejnišćo swobodneho stata wopytać.
Za wjace naslědnosće
Drježdźany. Sakska žada sej wot Zwjazka wjace naslědnosće za dołhodobne financowanje kubłanskich programow. „Čas politiki wukładneho wokna dyrbi nimo być. Trjebamy spušćomne financowanje projektow“, rjekny kultusowy minister Christian Piwarz (CDU) powěsćerni dpa. Tak njeje hišće jasne, kak ma so „Zakoń za dobru pěstowarnju“ po kóncu wólbneje periody dale wjesć.
Dóstanje folklorne myto
Dom za staršich a wšitkich
Z bywšeje Worklečanskeje předawarnje ma dnjowa hladarnja nastać
Hač do kónca lěta 2017 je Wałdźic rěznistwo w swojim Worklečanskim předawanišću wobydlerjow z tworami wšědneje potrjeby zastarowało. Bě to zdobom kaž wjesne zetkanišćo, hdźež su wjacore lěta samo wulce kermušowali a dalše swjedźenje wotměwali. Mjeztym twarjenje dwě lěće prózdne steji, jenož napisy na fasadźe wo zašłych lěpšich časach swědča. Ale do bywšeje předawarnje ma bórze zaso žiwjenje zaćahnyć. Hdźež su něhdy kołbasu, butru a muku předawali, nastanje hač do klětušeho dnjowe hladanje za staršich ludźi.
Zjawne wuprajenja kritizowali
Wólby maja tež konsekwency na zestawu gmejnskeje rady
Radwor (SN/BŠe). Wólby noweho wjesnjanosty běchu tema wčerawšeje gmejnskeje rady w Radworju. Hišće hač do 21. apryla amtěrowacy wjesnjanosta Wincenc Baberška (CDU) gratulowaše wuzwolenej naslědnicy Madeleine Rentsch, kritizowaše pak zdobom wozjewjenja měnjenjow w medijach, měrjace so předewšěm na to, zo je němskorěčna kandidatka najwjac hłosow w Radworju dóstała. „Ludźo měli jej najprjedy šansu dać, prjedy hač ju nadběhuja“, Baberška wuzběhny. Wón připowědźi Madeleinje Rentsch rjap skrućić a ju na nowy nadawk derje přihotować. Nimo toho je so tež wobydlerka jara emocionalnje wuprajiła, měnjo zo su sej Serbja ze swojimi wuprajenjemi sami škodźeli. Gmejnski radźićel Jovan Hrjehor, jedyn ze štyrjoch kandidatow wo zastojnstwo wjesnjanosty, je z wólbneho wuslědka konsekwency sćahnył a chce swoje dźěło w gmejnskej radźe złožić. Přichodnje budźe so zaso stoprocentnje na swoje předewzaće koncentrować, štož je sobudźěłaćerjam dołžny. Wšako woni dołho njewědźachu, hač zawod dale wobsteji.
Za debjenje so přizjewić
Njebjelčicy. Štóž chce serbske jutrowne jejka debić nawuknyć, móže to 29. februara a 1. měrca stajnje wot 14 hodź. w Njebjelčanskim gmejnskim centrumje z Marju Šefrichowej. Za barby, pjerka a wósk zapłaća wobdźělnicy sydom eurow (dźěći 3,50 eurow). Wudute jeja měli sej sobu přinjesć. Zajimcy njech přizjewja so pod telefonowym čisłom 0 35 78 / 30 18 04 (wot 18 hodź.).
Zaso na Žitnych wikach
Budyšin. Techniskich njedostatkow dla wotměwachu minjene tydźenje štwórtkowne měšane wiki na Budyskim Hłownym torhošću. Mjeztym je na Žitnych wikach wšitko sporjedźane, tak zo móža wikowarjo wot jutřišeho zaso čerstwe žiwidła, domjacnostne wudźěłki a wšitko dalše na naměsće pod Bohatej wěžu poskićeć. Tak mjenowane zelene wiki wutoru a sobotu su dale na Hłownym torhošću před radnicu.
Policija (19.02.20)
Ćěriwo kradnyli
Zabrod. Něhdźe 350 litrow diesela su njeznaći minjeny kónc tydźenja z twarnišća w Zabrodźe pokradnyli. Kaž dyrbjachu tam póndźelu rano zwěsćić, běchu skućićeljo tankowe wěko wotstajeneju twarskeju mašinow namócnje wočinili a z njeju ćěriwo wotklumpali. Hódnotu diesela trochuja na 500 eurow, nimo toho nasta 100 eurow wěcneje škody.
Wjace wopytowarjow w zwěrjencu
Sobu najwoblubowaniše wólnočasne zarjadnišćo města Wojerec je tamniši coo, kotryž swjećeše loni 60lětne wobstaće. Tež tale róčnica je k dobrej bilancy přinošowała.
Wojerecy (SN/MWj). Dokładnje 140 123 wopytowarjow su loni we Wojerowskim zwěrjencu zličili. To je najlěpši wuslědk wot toho časa, zo su jón a hród lěta 2011 do zwěrjencoweje, kulturneje a kubłanskeje towaršnosće zapřijeli. Porno lětu 2018 je ličba wopytowarjow wo nimale 15 000 ludźi rozrostła, potajkim wo něhdźe dwanaće procentow, zdźěli zamołwita za zjawnostne dźěło Stefanie Jürß. Po jeje słowach njejsu jeno 60. róčnica wobstaća coowa a jeho nowe zwěrjata do zwěrjenca a na hród wabili, ale tež dwě nowowuhotowanej trajnej wustajeńcy w měšćanskim muzeju a najwšelakoriše zarjadowanja. Zwěrjencowa a muzejowa pedagogika móžeše so tohorunja nad wjetšim zajimom za pěstowarske a šulske projekty wjeselić.
