Pytaja młodych spěwarjow

póndźela, 06. januara 2020 spisane wot:

Budyšin. Za swoju nowu baletnu produkciju „Běchmy, smy, budźemy“ – z chórom, orchestrom a baletom – pyta Serbski ludowy ansambl młodych sobuskutkowacych, spěwarjow wot sydom do 11 lět. Přizjewić móža so zajimcy z mejlku abo telefonisce pod čisłom (03591) 358 101 hač do 15. januara 2020 w SLA. Dóstanu potom přeprošenje na krótke předspěwanje, na kotrymž wuměłska jury spěwarjow/spěwarki wuzwoli. Nazwučować měli za předspěwanje prěnjej štučce spěwa „Bratřiko stań a so zwoblěkaj“.

Zelene kulojte blido

Kamjenc. Jutře, wutoru, wotměje so w 19 hodź. w Kamjenskim hosćencu Ristorante Italiano La Piazza na Cwingerowej přichodne Zelene kulojte blido. Jako hosća su sej na wólnu diskusiju wo lokalnych a mjezynarodnych politiskich temach Roberta Krawca, rěčnika krajneho dźěłoweho zjednoćenstwa Serbske žiwjenje Zwjazka 90/Zelenych w Sakskej, přeprosyli.

Na gmejnsku radu

Policija (06.01.20)

póndźela, 06. januara 2020 spisane wot:

Kólnja so wotpaliła

Přiwćicy. Wčera je so Přiwćicach (Preititz) w Malešanskej gmejnje kólnja wotpaliła. Wohnjowu woboru a policiju běchu palaceho so domu dla wołali, štož so na zbožo jako wopačna informacija wukopa. 30 wobornikow móžeše pak tomu zadźěwać, zo płomjenja na domske přeskočichu. Škoda wučinja něhdźe 2 000 eurow.

„Kastanijowy dwór“ zawrjeny

póndźela, 06. januara 2020 spisane wot:
W běhu lět je wukubłany kuchar Hartmut Paulick z Trjebina fachowc na polu plincypječenja, předewšěm pak jich wobroćenja w tyhelu, tak zo ničo nimo warjenskeho nastroja njeńdźe. Móhli wšak rjec, zo je to samo sperfekcionizował. Najebać to dźerži jeho mandźelska Cordula k wěstoće taler za popadnjenje – jenož, dyrbjało-li tola raz něšto křiwje hić. Paulickecy pak su so rozžohnowali, silwesterska party kónc minjeneho lěta bě za woblubowaneju korčmarjow Trjebinskeho „Kastanijoweho dwora“ posledni swjedźeń. Po nim su hosćenc zawrěli. Foto: Joachim Rjela

Wot dźensnišeho wothłosować

póndźela, 06. januara 2020 spisane wot:

Wojerecy (AK/SN). Město Wojerecy změje­ tež lětsa wobydlerski hospodarski plan. Za njón chce zaměrnje pawšalu 70 000 eurow k spěchowanju wjesneho ruma Swobodneho stata Sakskeje zasadźić. Wot dźensnišeho 6. januara móža wobydlerjo Wojerec a měšćanskich dźělow wo namjetach wothłosować.

Cyłkownje běchu wobydlerjo měšćanskemu zarjadnistwu loni 129 idejow za lětuši wobydlerski etat zapodali. Z nich je zarjadnistwo po pruwowanju přez fachowe wobłuki lisćinu cyłkownje 29 idejow zestajiło. Měšćanska rada je ju na zakładźe poručenja wodźenskeje skupiny „woby­dlerski etat“ na swojim poslednim wuradźowanju minjeneho lěta 17. decembra jednohłósnje schwaliła. Tuž ma nětko kóždy wobydler Wojerec składnosć, hač do 27. januara sobu rozsudźić, hdźe a za čo móhli pjenjezy nałožić. Kóždy­ ma při tym tři hłosy, kotrež móže za namjety wotedać – pak za inwesticije w měsće samym pak za inwesticije w měšćanskich dźělach. Wotedate hłosy za žro města a měšćanske dźěle separatnje wuliča, kaž k tomu z radnicy rěka.

Hwězdni spěwarjo w radnicy

póndźela, 06. januara 2020 spisane wot:
Hwězdni spěwarjo katolskeje fary „Dobreho pastyrja“ su minjeny pjatk Choćebusku radnicu ze znamjenjom „20*C+M+B+20“ žohnowali. Spěwarjow witaštaj wotrjadnikaj Maren Dieckmann a dr. Markus Niggemann. Pod hesłom „Žohnowanje přinjesć, žohnowanje być – Měr w Libanonje a po wšěm swěće“ zanjesechu dźěći cyrkwinske spěwy a prošachu wo pjenježne dary. Při po wšěm swěće najwjetšej pomocnej akciji dźěći na dobro dźěći zasadźeja so hwězdni spěwarjo lětsa za měr w Libanonje. W Němskej wobdźěli so wjace hač 300 000 dźěći na akciji. Jutře budźe skupina tež pola zwjazkoweje kanclerki Angele Merkel (CDU) w Berlinje. Foto: Michael Helbig

Krótkopowěsće (06.01.20)

póndźela, 06. januara 2020 spisane wot:

Hwězdnych spěwarjow přijałoj

Drježdźany. Hwězdni spěwarjo wopytachu dźensa Sakski krajny sejm a statnu kencliju w Drježdźanach. W parlamenće přija jich dopołdnja prezident sejma dr. Matthias Rößler. Ministerski prezident Michael Kretschmer (wobaj CDU) přija na to něhdźe sto holcow a hólcow z biskopstwa Drježdźany-Mišno. Spěwanje na Třoch kralow je najwjetša solidarna akcija dźěći za dźěći po wšěm swěće.

Wuspěšni šulerjo-fyzikarjo

Drježdźany. Wosom šulerjow ze Sakskeje je na předkole lětušeje 51. mjezynarodneje olympiady za fyziku kónc januara w Greifswaldźe wobdźělenych. Tak ma Sakska najwjetšu ličbu wobdźělnikow wšěch zwjazkowych krajach Němskeje. Cyłkownje bě 281 kandidatow nastupiło, 51 šulerjow bě so ze swojimi wuslědkami kwalifikowało. Olympiada wotměje so w juliju w litawskej stolicy Wilniusu.

Statna opera ponowjena

Komuny maja wjac płaćić

pjatk, 03. januara 2020 spisane wot:

Ralbicy (SN/JaW). Runja dalšim změje tež gmejna Ralbicy-Róžant wo tójšto wjac wotedawka zarjadniskemu zwjazkej Při Klóšterskej wodźe přepokazać. Kaž zastu­po­wacy wjesnjanosta delanskeje gmejny Michał Šołta (SWZ Delany) na poslednim wuradźowanju w lěće 2019 zdźěli, ma komuna 316 269 eurow zwjazkej płaćić. To je nimale 25 000 eurow wjace hač lěto do toho. „Sumu njemóžemy wobwliwować. Wšako wobličeja ju po wobydlerjach jednotliweje gmejny. A naša ma po aktulnym stawje z lěta 2018 cyłkownje 18 wobydlerjow wjac, štož ma tež za pozitiwne wuwiće“, Šołta wuswětli. W delanskej gmejnje bydli tuž cyłkownje 1 699 ludźi.

Kaž předsyda zarjadniskeho zwjazka Při Klóšterskej wodźe Měrko Domaška na kromje gmejnskeje rady Serbskim Nowinam rozłoži, wobličeja popłatki gmejnow po statistiskich podawanjach ličbow wobydlerjow. „Za to je wažne, kelko ludźi dokładnje bě 30. junija w gmejnje přizjewjenych. Za klětuše wobličenje wužiwamy potom ličbu z lětušeho junija“, rjekny Domaška. Dalša přičina wyšeho popłatka komunow pak tež je, zo sydło zarjadniskeho zwjazka w Pančicach-Kukowje tuchwilu přetwarjeja a saněruja.

Ptački nětko wobstajnje picować

pjatk, 03. januara 2020 spisane wot:
Tuchwilu je tež nad Hornjej Łužicu tójšto ćahawych ptačkow po puću. A štóž ma zbožo, móže při picowanišćach snano tež raz wosebiteho zastupnika pjerizny wuhladać a wobkedźbować, kaž na přikład tule chětro běłu zelenu wopušku – fachowcy praja k tomu tež „lojcist“. Ptačatko na wobrazu bě ze šwitu něhdźe 40 dalšich zelenych wopuškow na Bronjanskich zahrodach po puću. Tajke njewšědne swětłe stworjenčka nimaja přewulke žiwjenske wočakowanje, dokelž je rubježne ptaki spěšnje popadnu. Zelene wopuški měli nětko tuž wobstajnje picować. Wšako namakaja lědma hišće same picu na našich zahrodach. Foto: Andreas Baumgärtel

Wot wutory zaso wočinjena

pjatk, 03. januara 2020 spisane wot:

Budyšin. Inwentury dla je Budyska Smolerjec kniharnja hišće hač do póndźele, 6. januara, zawrjena. Wšěm fanam knihow a dalšich ćišćanych wudźěłkow a medijow kaž tež wšitkim zajimcam budźe­ kniharnja wot wutory, 7. januara, zaso přistupna.

Zymske zetkanje traktorow

Hora. Mjeztym šesty raz přewjedu na Horje, małym sydlišću blisko Bóšic, njedźelu, 5. januara, zymske zetkanje traktorow. Započatk je w 10 hodź., hdźež prěnje jězdźidła wočakuja. Wot 11.30 hodź. poskića wobjed z gulašoweje kanony, steaki a pražene kołbaski. Přez cyły dźeń budźe tež technika za zahrodu wustajena. Nimo toho přewjedu tombolu.

Wjesnjanosta přeproša

Delni Wujězd. Pod patronatom Hamorskeho wjesnjanosty Achima Junkera (CDU) wotměje so njedźelu, 5. januara, wot 16.30 hodź. w Delnjowujězdźanskim hosćencu „Tři lipy“ nowolětny koncert. Lisćik płaći 35 eurow. Huslerka Katrin Wettin a band chcetej připosłucharjow ze štučkami skupinow Beatles a ACDC kaž tež z „lóšim wětrom“ Mozarta putać.

Do Wrócławja sej wulećeć

Policija (03.01.20)

pjatk, 03. januara 2020 spisane wot:

Wandalojo po puću byli

Łuh. Njeznaći su so Nowe lěto na areal wětrnika we Łuze zadobyli. Tam zwočinjachu wšitke durje, kaž policija informuje. Dale wobškodźichu płót a zapusćichu cyłu ležownosć. Policija dale zdźěla, zo po prěnim přehledźe po wšěm zdaću ničo njepobrachuje. Při­wšěm nasta škoda něhdźe 3 500 eurow. Kriminalna policija pad přepytuje.

Prózdnu hródź zapusćili

Kołwaz. Tež w Kołwazu (Kohlwesa) w Bukečanskej gmejnje su wandalojo zachadźeli. Woni zapusćichu prózdnu hródź, hdźež rozbichu 29 woknow. Škoda wučinja něhdźe 300 eurow. Policija prosy swědkow wo pomoc.

Serbska debata

nowostki LND