Krótkopowěsće (27.11.19)

srjeda, 27. nowembera 2019 spisane wot:

Nowe towarstwo załožili

Mały Wjelkow. 26 wosobow je minjenu sobotu w Małym Wjelkowje nowe towarstwo „Sotrowni Mały Wjelkow“ załožiło. Ochranowska bratrowska jednota jako mějićelka bě to iniciěrowała. Na iniciatiwu dr. Lubiny Malinkoweje je do wustawkow tež serbski aspekt zapisany. Mnohe Serbowki běchu we 18. lětstotku sotrowni sobu natwarili. Předsydka towarstwa je Katrin Böhme z Małeho Wjelkowa.

Wědomostna rada so schadźuje

Choćebuz/Budyšin. Čłonojo wědomostneje přirady Serbskeho instituta so dźensa a jutře schadźuja. Po wopyće Choćebuskeje wotnožki dźensa rano su so popołdnju z Budyskimi sobudźěła­će­rjemi rozmołwjeli. Rozžohnować chcedźa prof. dr. Konrada Köstlina, kiž bě zało­ženje a dalewuwiće instituta sobu přewodźał, kaž tež nětčišeho předsydu rady prof. dr. Winfrieda Müllera.

Tež we Łužicy demonstruja

Tež serbscy młodostni witani

wutora, 26. nowembera 2019 spisane wot:

Budyšin (SN/mwe) Po přewšo wuspěšnych zarjadowanjach minjenych lět přeprošeja Budyske kluby Lions, Lusatia, Leo, Rotary a Club Soropotimist Budyšina třeći króć na dohodowne beneficne koncerty. Prěni adwentny kónc tydźenja wotměja so wot přichodneho pjatka do njedźele hnydom tři koncerty w swjedźenskim ambienće Budyskeho Kamjentneho domu. Pod titlom „Swingin’ Santa“ je ně­hdźe 30 młodych hudźbnikow a spěwarjow z Budyšina a regiona kaž tež z partnerskeho města Budyšina, Jelenjeje Góry, hižo w nazymskich prózdninach něhdźe połdrahodźinski program jako projekt probowało. Nazwučowali su němske a mjezynarodne dohodowne a hodowne štučki. Planowany serbski spěw dyrbjachu chorosće dla krótkodobnje z reper­toira šmórnyć.

Dochody koncertow su za dobry skutk. Zastup drje je darmotny, organizatorojo pak proša wopytowarjow wo pjenježny dar.

Zakłady za dźěło połožić

wutora, 26. nowembera 2019 spisane wot:

Projekt pěstowarnje gmejnsku radu k rozmyslowanju pohnuł

Róžant (JK/SN). Gmejna Ralbicy-Róžant je na wulke wužadanje, nowotwar Ralbičanskeje pěstowarnje, přihotowana. Na minjenym posedźenju gmejnskeje rady předstajeny planowanski projekt budźe gmejnu njesnadnu sumu pjenjez płaćić. Tež, hdyž budźe projekt spěchowany, wšojedne w kotrej wysokosći, dyrbi gmejna swójski podźěl sama zwjesć. A wostanje-li při tuchwilnym trochowanju cyłkownych wudawkow 4,3 milionow eurow a při 75procentowskim spěchowanju, wučinja podźěl gmejny přeco hišće nahladne 1,07 milionow eurow. Wjesnjanosta Hubertus Ryćer (CDU) wšak je optimistiski a ma sumu w planowanju gmejnskeho etata přichodnych lět kruće zakótwjenu. To podšmórny tež komornica zarjadniskeho zwjazka Při Klóšterskej wodźe Franciska Čapikowa, kotraž je radźićelam na samsnym posedźenju staw lětušeho gmejnskeho hospodarskeho plana rozłožiła. Z wida zarjadniskeho zwjazka kaž tež gmejny tón hubjeny njewupada a gmejnska kasa je najebać wudawki běžneho lěta derje pjelnjena, tak zo wjesnjanosće jeho optimizm wotkupiš.

Policija (26.11.19)

wutora, 26. nowembera 2019 spisane wot:

Pěši po awtodróze

Budyšin. Wulke zbožo měješe njedźelu wječor pěšk, kiž bě pola Porchowa na awtodróze po puću. 42lětny spyta na kromje spěšnočary awta zadźeržeć, zo bychu jeho do směra na Zhorjelc sobu wzali. Při tym šmórny so špihela Renaulta, ale so na zbožo njezrani.

Narkotiki kradnyli

Pančicy-Kukow. Do apoteki swj. Bosćana w Pančicach-Kukowje běchu so njeznaći minjeny kónc tydźenja zadobyli. Tam pokradnychu­ pjenjezy, techniske nastroje a wšelke narkotiki. Hódnota rubizny njeje znata. Wěcna škoda wučinja ně­hdźe 8 000 eurow.

Młodźina w Třělerni rady swjeći

wutora, 26. nowembera 2019 spisane wot:

Młodźinske towarstwo United Clubs for Kulow je zhromadźenstwo dwanaće Kulowskich młodźinskich skupin. Něhdźe­ 200 młodostnych w starobje 14 do 27 lět towarstwu přisłuša.

Kulow (SN/mwe). Jako su čłonojo Kulowskeho třělcowskeho bratrowstwa swj. Bosćana loni 3. nowembra po sydom měsacow trajacym přetwarje z twarskimi firmami, podpěraćelemi, towarstwami a dalšimi ponowjenu Třělernju poswjećili, nadźijachu so zajimaweho žiwjenja w njej. Wšako běchu nimo noweje tejki tež wulkomyslne sanitarne připrawy přitwarili. Něhdyša kinowa žurla dósta nowu barbu. Lěto je zašło a prawdźepo­dobnje so ludźo rady na žurli zetkawaja.

Knihowało je towarstwo United Clubs for Kulow lokalitu z městnom za něhdźe 400 wopytowarjow za přichodnu sobotu, 30. nowembra. Wot 21 do 3 hodź. chcedźa tam na „tingle-party“ mócnje swjećić, hejsować a rejwać.

K poslednjej lětušej kermuši – delanskej – běchu Smjerdźečenjo sobotu wječor we wjesnym kulturnym domje reje přihotowali. Hosćo njedachu so tuž dołho prosyć a su zhromadnje swjećili. Wjesoła nalada knježeše, jako znata kapała Privileg z Rakec k rejam zapiska. W repertoirje wšak mataj hercaj Hartmut Geißler a Gunter Schulze tež serbske štučki. Foto: Feliks Haza

Krótkopowěsće (26.11.19)

wutora, 26. nowembera 2019 spisane wot:

Wubědźowanje zahajene

Drježdźany. Wubědźowanje wo Němsko-Pólske žurnalistiske myto Tadeusza Mazowieckeho 2020 je zahajene. Zapodać hodźa so přinoški w kategorijach ćišć, rozhłós, telewizija, multimedia a žurnalizm w pomjeznym regionje. Lawreatow počesća we wobłuku Němsko-Pólskich medijowych dnjow klětu 4. junija w Frankfurće nad Wódru.

Namjety zapodać

Budyšin. Budyšenjo móža hač do 29. februara 2020 namjety za naprawy na dobro zhromadnosće zapodać. Hač su to wozelenjenje płonin abo swjedźeń w bydlenskej štwórći – wšelakore spěchowanja su móžne. Wot 2017 ma město za to kóžde lěto etat 10 000 eurow k dispoziciji. Namjety zapodać móža woby­dlerjo pod abo w běrowje wyšeho měšćanosty.

Eyckec žněje wulki wuspěch

Policija (25.11.19)

póndźela, 25. nowembera 2019 spisane wot:

Rozestajenje na „plaće“

Budyšin. 28lětny wukrajnik bě po šwarnym konsumje alkohola (2,46 promilow) sobotu nawječor na Budyskich Žitnych wikach 13lětnej holcy narěčał. Muž chcyše, zo so z nim do jeho bydlenja podatej. Po tym zo wonej to raznje wotpokazaštej, ćahaše wopity za jeju drastu. Tole wobkedźbujo so 27lětny wobydler, to­horunja alkoholizowany, do wukrajnika da a jeho chětro namócnje na zemju storhny. Holcy móžeštej so tak wuwinyć. Zawinowarja rozestajenja na „plaće“ dyrbjachu do chorownje dowjezć.

Njedźelny zakaz kontrolowali

Budyšin. Na awtodróze A 4 mjez Zhorjelcom a Drježdźanami je Budyska policija wčera w nocy dodźerženje zakaza njedźelneho jězdźenja nakładnych awtow z cyłkownej wahu wjace hač 7,5 tonow přepruwowała. W kontrolnym centrumje zwěsćichu šěsć přeńdźenjow.

Bus do awta zajěł

Minakał. Na statnej dróze S 106 mjez Łomskom a Minakałom njeje wodźer busa pjatk připołdnju předjězbu Mitsubi­shija wobkedźbował a zajědźe do njeho. Minakałska wohnjowa wobora městno njezboža zawěsći. Zranił so nichtó njeje.

Jeničce při přilubjenju Domowiny wostało

póndźela, 25. nowembera 2019 spisane wot:

Mjeztym hižo dźesać lět zaruča Šunowčanka Erika Maywaldowa dźěćom a młodostnym­ z Konjec a Šunowa kreatiwnu zaběru. Spočatnje bě to stajnje na adwentnym zarjadowanju w towarstwowym domje, hdźež móžachu dźěći z wot njeje wobstaranym materialom paslić dariki a hodownu pychu.

Konjecy (aha/SN). Mjeztym so wona hižo wjacore lěta tež wo to stara, zo runočasnje, hdyž młodźina w Šunowje meju mjeta, mejemjetanje tež w Konjecach dostojnje woswjeća. Z dalšimi přewza zamołwitosć, zo su při tym dźěći w pyšnych narodnych drastach, lětsa bě jich samo 14 porow. Zo maja čłonojo Domowinskeje skupiny na swojej adwentničce rjany program, nazwučuje z pomocu dalšich z dźěćimi dźiwadłowu hru. Lětsa je předwidźane,­ wšě dźěći, kotrež zamóža instrument hrać, do wotměnjaweho hudźbneho programa zapřijeć. Za wšo to a druhe dźěła je wužiwała swoje priwatne rumnosće.

Z kina a dźiwadła zaso domoj

póndźela, 25. nowembera 2019 spisane wot:

Wobchadne předewzaća wot 15. decembra na lěpšu mobilitu nastajene

Budyšin (SN/mwe). Z nowym železniskim jězbnym planom mjez Drježdźanami a Zhorjelcom, mjez Drježdźanami a Žitawu kaž tež do Libereca startuje wuchodosakska syć 15. decembra do lěpšeje mobility. Runočasnje su čary z Drježdźan do Kinsporka a Kamjenca wot toho po­trjechene. Paralelnje k železnicy budu w Budyskim wokrjesu štyri linije PlusBusa po puću. Na naprašowanje Serbskich Nowin Hornjołužisko-Delnjošleski wobchadny zaměrowy zwjazk (ZVON) zdźěli, zo po­trjechi to tež PlusBusowu liniju 102 z Budyšina do Kamjenca. To rěka, zo je bus mjez 4.30 hodź. a 23.15 hodź. kóždu hodźinu po puću. Na kóncu tydźenja pojědu busy tuž 19 króć z Budyšina do Prěčec a Pančic-Kukowa přez Hlinowc do Lessingoweho města a zaso wróćo. „To je šěsć jězbnych porow wjace, hač po starym jězbnym planje. Wjace hač by trěbne było, zo mjenujemy bus ‚PlusBus‘“, Sandra Trebesius z nowinarskeho běrowa ZVON zdźěli. „Nimo toho pojědu kóždu sobotu dwaj jězbnej poraj wjace hač dotal a njedźelu je bus tež štyri razow do kóždeho směra po puću.“

Serbska debata

nowostki LND