Klětuši etat wobzamknyli
Město Kulow dyrbi wjac hač 400 000 eurow ze swojich nalutowankow brać, zo by klětuši etat wurunał.
Kulow (AK/SN). Cyłkownje 410 000 eurow dyrbi město Kulow ze swójskich rezerwow brać, zo by swój klětuši hospodarski plan wurunało. 301 000 eurow nałoža za wjace swójskeho kapitala rjedźernje wopłóčkow. Ze zbytkom pjenjez chcedźa etat wurunać. To podšmórny komornik Thomas Woelke na wčerawšim posedźenju Kulowskeje měšćanskeje rady. Gremij je naćisk hospodarskeho plana 2020 jednohłósnje wobzamknył.
„Smy w planje wobkedźbowali, zo so pjenježna situacija w rjedźerni wopłóčkow přiběrajcy pohubjeńša. Pozadk je dotal njerozrisane rozestajenje mjez Kulowom a Łazowskej gmejnu wopłóčkow dla“, Thomas Woelke rozłoži. „Ručež budźe prawniska situacija zrjadowana, móžemy znowa rozsudźić. Pak wostanu pjenjezy w etaće rjedźernje, pak wróćimy je měšćanskej kasy.“
Chorownja swj. Jana ma wostać
Hornjołužiske kliniki Budyšin su zajimowane zarjadnišćo přewzać
Kamjenc (BG/SN). Spočatk nowembra bě jednaćelstwo maltezow poměrnje njejapcy wozjewiło, zo chce šěsć swojich chorownjow předać. Wot toho potrjechenej stej tež zarjadnišći w Kamjencu a Zhorjelcu.
Komunalni politikarjo wšěch frakcijow Kamjenskeje měšćanskeje rady su jara znjeměrnjeni. Woni žadaja sej jasnu perspektiwu za chorownju swj. Jana w Lessingowym měsće. Wšako je wona zdobom wažna dźěłodawarka w dwurěčnej kónčinje wokoło Kamjenca. Tamniši měšćanscy radźićeljo rady su tule poziciju na swojim wčerawšim posedźenju z jednohłósnje wobzamknjenym wozjewjenjom zwuraznili. Kamjenski wyši měšćanosta Roland Dantz (njestronjan) ma tuž nětko jednać. Runočasnje dźakuje so měšćanska rada personalej chorownje maltezow za wuběrne dźěło.
Krótkopowěsće (12.12.19)
CDU za koaliciju hłosowała
Radebeul. Prěni raz po přewróće poda so sakska CDU do knježerstwoweho zwjazkarstwa třoch stron. Na wosebitym zjězdźe wčera w Radebeulu je 214 delegatow při dwaceći napřećiwjenjach wujednanemu koaliciskemu zrěčenju CDU, Zelenych a SPD přihłosowało. Krajny předsyda a ministerski prezident Michael Kretschmer bě po wozjewjenju wuslědka wolóženy.
Wjace mzdy płaćić
Budyšin. Dźěłarnistwo Cyrobizny-požiwadła-hosćency (NGG) žada za něhdźe 230 sobudźěłaćerjow zežiwjenskeje industrije w Budyskim wokrjesu wjace mzdy. Přichodnu póndźelu chce NGG na tarifowych jednanjach plan wobrěčeć, kotryž płaći mjez druhim za předewzaći Develey Senf & Feinkost a Mast-Jägermeister. Zaměr je hodźinska mzda 12 eurow.
Rotkäppchen najznaćiši sekt
Policija (11.12.19)
Adwentnu pychu spakosćili
Pěskecy/Němske Pazlicy. Tež paduši chcedźa adwentny a hodowny čas najskerje w přitulnej atmosferje swjećić. Za to trěbne je wězo prawe wobswětlenje. Te „wobstarachu“ sej njeznaći kónc tydźenja w Pěskecach, Němskich Pazlicach a Budyšinje. Kaž policija zdźěla, su w tam nimo hodowneje hwězdy tež wobswětlenje hodowneho štomika a figuru rumpodicha z ležownosćow na Kamjenskej w Pěskecach a na Pěskečanskej w Němskich Pazlicach spakosćili. Hódnotu rubizny trochuje policija na 150 eurow. W Budyšinje na Schliebenowym kružnym wobchadźe su njeznaći dźěl hwězdow z tamnišeho hodowneho štoma dele storhali. Kriminalna policija slědźi.
Na adwentne spěwanje
Wojerecy. Na zhromadne adwentne spěwanje su zajimcy póndźelu, 16. decembra, na dźěćacu a młodźinsku farmu Křesćansko-socialneho kubłanskeho skutka (CSB) we Wojerecach prošeni. Na prěnim zarjadowanju tajkeho razu scyła na farmje CSB chcedźa tradicionalne, adwentne a hodowne pěsnje spěwać. Podpěrać chcetaj jich hudźbnaj šulerjej Fabian Schulze a Philipp Seidel. Započatk adwentneho spěwanja je we 18 hodź. CSB skedźbnja na to, zo wotměje so spěwanje pod hołym njebjom, wotpowědna ćopła drasta je tuž trěbna.
Pohłubšacy kurs serbšćiny
Budyšin. Rěčny centrum WITAJ poskića wšěm tym, kotřiž maja hižo zakładne znajomosće serbšćiny a chcedźa je pohłubšić, wosebity rěčny kurs. 13. januara jón w Budyskim Serbskim šulskim a zetkawanskim centrumje na Friedricha Listowej zahaja. Kaž RCW dale zdźěla, přewjedu kurs hač do meje prawidłownje póndźelu wot 17.30 do 19 hodź. Dalše informacije namakaće pod www.witaj-sprachzentrum.de. Za kurs přizjewić móžeće so pod telefonowym čisłom 03591/550 400 abo z mejlku pod .
Dalše srědki za nowy šulski dwór
Radwor (SN/MkWj). Pawšalne připokazanki swobodneho stata we wobjimje 70 000 eurow k sylnjenju wjesnych kónčin chcedźa w Radworju za natwar noweje gratownje Chelnjanskeje wohnjoweje wobory, za digitalizaciju gmejnskeho zarjadnistwa a za přidatne wudawki komuny hladajo na přiběrace personalne kóšty w pěstowarnjach wudać. To su gmejnscy radźićeljo na swojim wčerawšim posedźenju wobzamknyli. Na wšě 40 000 eurow inwestuja w Chelnje, digitalizacija płaći 10 000 eurow, a zbywace 20 000 eurow su za personalne wudawki.
Napinace lěto derje zakónčene
Najebać napjatu hospodarsku situaciju dołh pomjeńšić móhli
Njeswačidło (JK/SN). Swoje poslednje lětuše posedźenje wotmě wčera wječor Njeswačanska gmejnska rada. Dnjowy plan njebě tuž hladajo na kónc lěta přewobšěrny. Přiwšěm wuzwolichu radźićeljo ze swojich rjadow čłonow za hłowny a financny kaž tež za techniski wuběrk. Kandidatow běchu hižo na prěnim zetkanju po lětušich komunalnych wólbach nastajili a jich nětko doskónčnje wobkrućili. Na posedźenja wuběrkow su drje stajnje wšitcy gmejnscy radźićeljo prošeni, wobzamknjenjakmani pak su jenož rjadni čłonojo wuběrkow.
Seniorow na adwentničce zawjeselili
Mjeztym zo je Pančičansko-Kukowska gmejnska rada hižo wot časa politiskeho přewróta swojich wuměnkarjow wjacore razy na adwentne zarjadowanja přeprosyła, bě to wčera popołdnju šesty raz, zo to mjeztym kóždolětnje činja.
Pančicy-Kukow (aha/SN). 120 wuměnkarjow Pančičansko-Kukowskeje komuny móžeše wjesnjanosta Markus Kreuz (CDU) wčera na hodownje wupyšenej žurli wohnjoweje wobory witać. Wón wuži składnosć a předstaji senioram derje zestajenu prezentaciju wo podawkach a zdokonjanym minjenych pjeć lět.
Na „wikach rjanych wěcow“ w Budyskim „Zelenym pysku“ a w ...
Zwisowaca hudźbna stawizna(21)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
