Paduši w lawbje

Wojerecy. W běhu minjeneho kónca tydźenja běchu so njeznaći we Wojerecach do lawby zadobyli a z njeje telewizor a njebozowu mašinu spakosćili. Hakle póndźelu připołdnju je 67lětny wobsedźer to pytnył a njeskutk přizjewił. Wěcna škoda na lawbje wučinja z 500 eurami wjac hač hódnota rubizny z 350 eurami.

Katalyzator pokradnyli

Budyšin. Chětro njehańbićiwi a přede­wšěm njebojazni paduši běchu tele dny w Budyšinje po puću. Kaž policija zdźěla, su z Mitsubishija, kotryž běše na Drježdźanskej hasy wotstajeny, w nocy na póndźelu cyle woměrje katalyzator wurězali a sobu wzali. Wěcna škoda na awće wučinja něhdźe 300 eurow. Rubizna ma hódnotu 500 eurow. Kriminalna policija so z padom nětko zaběra.

Chrósćicy. Gmejna Chrósćicy přeprosy srjedu, 30. oktobra, na dźeń wotewrjenych duri w tamnišim gmejnskim a kulturnym centrumje. W 15 hodź. zahaja dźeń z po­swjećenjom domu. Po tym předstaja Chróšćanske šulske dźěći kulturny program, a zajimcy móža sej ponowjene rumnosće gmejnskeho a kulturneho centruma wobhladać.

25 lět Horjany

Nowoslicy. Serbska dujerska kapała Ho­rja­ny zhladuje na 25lětne wobstaće. To chcedźa hudźbnicy zhromadnje z lubowarjemi dujerskeje hudźby wo­swjećić. Tuž přeproša njedźelu, 3. nowembra, wot 10.30 hodź. na koncert z wobjedom, kofejom a tykancom do Nowosličanskeje Dinarjec kulturneje bróžnje. Zastupne lisći­ki za 25 eurow móžeće sej telefonisce pod 0151 / 50 74 48 21 abo e-mailnje pod skazać.

Wobydlerjo Wulkich Ždźarow (Groß Särchen) namjetuja, na 650lětne wobstaće swojeje wsy z dźěćacym a Krabato­wym swjedźenjom dostojnje spominać.

Łaz (AK/SN) W lěće 1374 bu wjes Wulke Ždźary prěni raz we wopismje naspomnjena. Na to skedźbni Wulko­ždźarowčan a čłon tamnišeho Krabatoweho towarstwa Jörg Mücke na zašłym posedźenju radźićelow gmejny Łaz, kotrejž Wulke Ždźary jako wjesny dźěl přisłušeja. „Njeby da rjenje było, by-li so gmejnski dźěćacy swjedźeń 2024 we Wulkich Ždźarach wotměł? A njeby tež spomóžne było­, bychu-li samsne lěto Krabatowy swjedźeń w našej wsy přewjedli? Wobaj swjedźenjej składnostnje 650. róčnicy prěnjeho pisomneho naspomnjenja wsy“, wón přitomnym namjetowaše. Gmejna, tak jeho rozmyslowanja, móhła so Krabatowe towarstwo naprašować. Podobnje kaž Kulow w lěće 2016 móhli tež Wulkoždźarowčenjo jako hosćićeljo swjedźeń dostojnje wuhotować a srědki za to dóstać. Lěta 2004 běchu Krabatowy swjedźeń hižo raz we wsy swjećili. „Tehdy wuhotowachmy samo ekumeniske ke­mše“, so Jörg Mücke dopominaše.

Chrjebja-Nowa Wjes (JoS/SN). Tysacy wopytowarjow je minjenu sobotu wu­łójenje rybow z Čorneje truhi (Schwarze Lache) do Chrjebje-Noweje Wsy (Kreba-Neudorf) wabiło. Tradicionalny rybarski swjedźeń bě hosćom znowa nazymske wočerstwjenje. Rjane wjedro z trochu słóncom, tak so ludźom babylěćo lubi.

Zahajili su Chrjebjanski rybarski swjedźeń hońtwjerscy dujerjo „Mužakowska hola“ zhromadnje z jednaćelom Chrjebjanskeho rybarskeho zawoda Dietmarom Mühlu a nawodu Chrjebjanskeho hatarstwa Rüdigerom Richterom. „Rybowe lěto 2019 bě za naš zawod poměrnje spokojacy“, rjekny Richter.