Přihotuja Nowy Miłoraz

srjeda, 04. septembera 2019 spisane wot:

Pohrjebnišćo znowa wuhotować budźe wosebite wužadanje

Slepo (AK/SN). Přesydlensku městnosć za Nowy Miłoraz sewjernje Slepoho při Dźěwinskim puću su nětko wotkrywać započeli. To zdźěli nawoda Slepjanskeho twarskeho zarjada Steffen Seidlich na wčerawšim posedźenju tamnišeje gmejnskeje rady. „13. awgusta wotmě so prěnje wuradźowanje wšitkich wobdźělenych partnerow, planowarjow a zastupjerjow twarskeje firmy z Krušwicy“, rjekny Seidlich. Twarskich dźěłow dla je spěšnosć na puću wot Slepoho do Lěska (Lieskau) na 30 km/h wobmjezowana. Přičina je, zo dyrbja twarske mašiny jězdnju časćišo přeprěčić.

Direktnje při Slepjanskim pohrjebnišću, ale na separatnej płoninje nastanje pohrjebnišćo za Nowy Miłoraz. „Předwidźane płoniny chcemy hišće lětsa napjelnić a zrunać. Wuhotować budźemy je hakle klětu, dokelž dotal žanu dowolnosć nimamy“, twarski nawoda rozłoži. W juliju je gmejna Slepo próstwu Zhorjelskemu wokrjesej zapodała.

Kak za sebje lěpje wabić?

srjeda, 04. septembera 2019 spisane wot:

Chrjebja (SK/SN). Partnerska iniciatiwa biosferoweho rezerwata Hornjołužiska hola a haty, kotraž stara so wo lěpše zwičnjenje prózdninskich domow a dowolowych bydlenjow, zetka so njedawno na Ladušec ratarskim statoku w Chrjebi. Iniciatiwa je jedna z 23 tajkich po wšej Němskej a jej přisłuša wjace hač 20 prózdninskich přebywanišćow. Hłownje zaběrachu so wobdźělnicy z prašenjom, kak móža małe předewzaća na polu turizma lěpje zwičnjeć a kak hodźi so za nje lěpje wabić. Ladušec ratarski statok – tam kombinuja aktiwne ratarstwo z hóstnymi stwami a předawanjom domjacych wudźěłkow – bě jedyn z prěnich, kotrež su we wobłuku biosferoweho rezerwata dowolowe přebytki poskićeli.

Serenada w zelenym

W Hejnicach a Frýdlanće byli

srjeda, 04. septembera 2019 spisane wot:

27 wosobow wopřijaca delegacija Kamjenskeje župy „Michał Hórnik“ poda so minjenu njedźelu na kubłansku jězbu do sewjernych Čech. W Hejnicach wobdźělichmy so na dopołdnišej Božej mši, kotruž smy ze serbskim čitanjom a kěrlušomaj wobrubili.

Po kemšach wodźeše nas Jan Heinzl, direktor w klóštrje zaměstnjeneho mjezynarodneho centruma za duchowne kubłanje, po putniskej cyrkwi Marije wopytanja. Přeco zaso skedźbni wón na zwiski a styki Serbow do Hejnic. Wopytali smy tež rownišćo hrabinskeje swójby Gallas pod cyrkwju.

Po słódnym wobjedźe w klóšterskim hosćencu jědźechmy na jenož někotre kilometry zdaleny hród Frýdlant. Wón słuša k najwuznamnišim historiskim zajimawostkam wokoliny. Tež tu zhonichmy wo stawiznach hrabinskeje swójby Gallas. Frýdlantski hród bě hač do lěta 1945 w jeje wobsydstwje. Katharina Jurkowa

W pjeć lětach so wjele stało

srjeda, 04. septembera 2019 spisane wot:

Pančicy-Kukow (SN/MWj). K rozžohnowanju stareje gmejnskeje rady Pančic-Kukowa a ke skonstituowanju nowowu­zwoleneje rady móžeše wjesnjanosta Markus Kreuz (CDU) njedawno nahladnu bilancu gmejnskeho dźěła w zašłej wólbnej dobje sćahnyć. „Před pjeć lětami běchmy hišće w hospodarskej konsolidaciji. Dźensa stejimy jako gmejna na strowymaj nohomaj“, wjesnjanosta konstato­waše.

W tym času zmištrowachu dwaj twarskej wotrězkaj ponowjenja Šule Ćišinskeho, mjenujcy prěni z wohnjoškitom, nowym tepjenjom a nowym šulskim dworom, druhi z ponowjenjom třěchi. Nimo toho zhubi so płony přitwar šule. Dalši měznik w kubłanskim wobłuku bě přetwar bywšeje hudźbneje šule na hort, za kotryž­ je gmejna z mnohich stron wjele chwalby žnjała. Tohorunja inwesticija do kubłanja, ale njepředwidźana, bě wotstronjenje škodow wulkeje wody dla we Wotrowskej pěstowarni.

Wobchadna zahroda na Choćebuskej Hufelandskej swjećeše wčera 20lětne wobstaće, čemuž wězo tež narodninske dary słušeja. Wot załožby Łužiska brunica dóstachu elektrisce ćěrjene awta a motorske w hódnoće 2 000 eurow. Zahrodu wobhospodarjaca wobchadna straža so nad nowymi elektrojězdźidłami wjeseli, wšako wone park wobohaćeja. Foto: Michael Helbig

Towarstwo staršich za cyłu Łužicu(9)

srjeda, 04. septembera 2019 spisane wot:

Štó a što tči za serbskimi projektami, kotrež su we wobłuku wubědźowanja Sakskeho fondsa „Čiń sobu!“ mytowali? W lětušim lětnim serialu Serbskich Nowin­ wam projekty předstajamy.

Krótkopowěsće (04.09.19)

srjeda, 04. septembera 2019 spisane wot:

Dale mało wody w rěkach

Drježdźany. Hišće přeco ma wjele rěkow w Sakskej přemało wody. Kaž rěčnica Drježdźanskeho ministerstwa za wobswět wčera zdźěli, potrjechi to něhdźe 70 procentow rěkow, tak tež Nysy we Łužicy a Plesny (Pleiße) pola Lipska. Połoženje so mało spadkow dla lědma polěpša. Staw 75 centimetrow wody tež łódźnistwo na Łobju wobmjezuje.

Bliskowobchad darmotnje

Lubnjow. Turistiske města w Błótach, kaž Lubnjow, Lubin a Bórkowy, chcedźa turistow z wosebitym poskitkom do Łužicy wabić. Wšitcy, kotřiž w Błótach přenocuja, měli wosobowy bliskowobchad darmotnje wužiwać směć, informuje Lubnjowske měšćanske zarjadnistwo. Kóšty za to chcedźa ze zwyšenjom kuroweho popłatka wo něhdźe 60 centow zarunać, a to wot lěta 2021.

Dźensa posledni ćopły dźeń

Z Łastojčku, Škraholcom a co.

wutora, 03. septembera 2019 spisane wot:
600lětne wobstaće wsy swjećachu minjenu sobotu w Zuborničce. Při tej składnosći zetka so tam něhdźe 30 lubowarjow mopedow typa Simson. Z najstaršim wobdźělenym mopedom, SR2 z lěta 1961, bě Heiko Mehnert přijěł. Jeho syn Paul zběra wšitke dwukolesate jězdźidła z mjenami ptačkow. Sam bě wón tónraz z Łastojčku zastupjeny. Najstarši wobdźělnik bě 84 lět. Wot 1964 hač do dźensnišeho jězdźi wón z mopedom typa Škraholc. W Zuborničce maja hižo dlěši čas skupinu fanow Simsonow, kotřiž­ so časćišo na tajkich zetkanjach wobdźěleja. Foto: Carmen Schumann

Policija (03.09.19)

wutora, 03. septembera 2019 spisane wot:

Pokradnjenu móšnju namakał

Wojerecy. Hižo minjeny pjatk su njeznaći 39lětnej žonje we Wojerowskej lěkarskej praksy móšeń pokradnyli. W njej bě tójšto wosobinskich dokumentow, ale žane pjenjezy. Předwčerawšim zjewi so na Wojerowskim policajskim rewěrje muž, kiž bě móšeń na Budyskej dróze namakał. Na zbožo běchu w njej hišće wšitke dokumenty. Po wšěm zdaću běchu so paduši nadźijeli, zo pjenjezy w móšni namakaja. Dokelž tomu tak njebě, bě zbytk za nich njezajimawy, a tuž su móšnju prosće preč ćisnyli. Wobkradnjenej žonje móžachu jeje wobsydstwo zaso wróćić.

Benedikt Dyrlich čita

wutora, 03. septembera 2019 spisane wot:
Kamjenc. Ze swojeje knihi „Leben im Zwiespalt 1“ čita Benedikt Dyrlich jutře, srjedu, w 19 hodź. w Kamjenskim Röhrmeisterowym domje na Lessingowym naměsće. Na zarjadowanje přeprošujetej Ludowe nakładnistwo Domowina a Kamjenski Lessingowy muzej. Z wurězkami z dźenikow, listow a přinoškow, kotrež je Dyrlich wot spočatka 1970tych lět zběrał, rysuje wón wróćo zhladujo wotrězki swojeje biografije a poměry w NDR hač k politiskemu přewrótej. Zastup płaći tři eura, potuńšene 1,50 eurow.

Serbska debata

nowostki LND