Ptački w srjedźišću stali

pjatk, 13. oktobera 2023 spisane wot:

Hodźij (kž/SN). Najwšelakoriše ptački su njedawno w Hodźiju wjele zajimcow přiwabili. Tam wotmě so wustajeńca ptačkow, kotrež su hobbyjowi plahowarjo předstajili. Jich angažement słuži k zdźerženju jednotliwych družin. Tule wustajeńcu je Budyske towarstwo plahowarjow ptačkow, kotrehož předsyda je mjeztym hižo 50 lět Heinz Schlanstedt, organizował. Budyšin zhladuje na jara dołhu tradiciju plahowanja. Wšako wobsteji tudyše towarstwo plahowarjow hižo 130 lět, kaž je ze stawizniskich podłožkow wučitać. Z tym drje je wone w Němskej jedne z najstaršich tajkich cyłkow. Mjez wustajerjemi běše tež Jurij Žur z Pančic-Kukowa. „Wot kónca 1980tych lět eksotiske ptački plahuju. ­Zajim za to sym hižo jako dźěćo přez mojeho nana do kolebki połoženy dóstał“.

Šćežki Trija Misterio po wjace hač 13 lětach rozeńdu. Wčera rozžohnowachu so akordeonistka Claudia Steide, gitarist Michael Linke a cellist Helfried Knopsmeier w dźěłarni Budyskeho towarstwa Dźěłań dźeń z łužiskim publikumom. Program wopřijimaše nimo argentinskeho tanga mjezynarodne ludowe spěwy a premjernje prezentowanu adapciju „Sydom lětkow“ z „Kraloweho huslerskeho spěwnika“. Scyła posledni koncert tejele wobsadki slěduje zajutřišim w Zabelitzu. Foto: SN/Bojan Benić

Krótkopowěsće (13.10.23)

pjatk, 13. oktobera 2023 spisane wot:

Dźensa jubilej klóštra

Pančicy-Kukow. Klóšter Marijina hwězda w Pančicach-Kukowje zhladuje dźensa na 775 lět swojeho wobstaća. 13. oktobra 1248 je Bernhard III. Kamjenski klóšter załožił. We wopismje z tymle datumom je mjez druhim rjadowane, kotre wobsydstwo so klóštrej přewostaji, zo bychu knježny hospodarsce zastarane byli. W tym zwisku su mjez druhim Chrósćicy a Nowoslicy mjenowane.

„Prjedy hač woteńdźeš“ w SLA

Budyšin. W knize kaž tež na DVDji pod titulom „Prjedy hač woteńdźeš“ su so basnica Róža Domašcyna, fotograf Maćij Bulank a komponist Měrćin Weclich z pozhubjenjom serbskeje drasty ze wšědneho žiwjenja zaběrali. Nětko předstaji SLA w komornohudźbnym kruchu dźěła tutych wuměłcow, a to 14. kaž tež 31. oktobra serbsce a 15. oktobra němsce.

Filmowy festiwal z nowej rubriku

Stawiznički podłu kolijow

štwórtk, 12. oktobera 2023 spisane wot:

Nowa wosebita wustajeńca wěnuje so 150lětnym stawiznam železnicy

Łaz (AK/SN). Figurina šafnerki wopytowarja přećelnje wita. Wokoło njeje su tafle a dźěle signalowych připrawow wustajene. Ćišćak za jězdźenki dopomina na wšědny dźeń na bywšim Łazowskim dwórnišću. „Chcemy stawizny tak pokazać, zo su zrozumliwe. Staršim wobydlerjam su to dopomnjenki, nowšim skerje nastorki“, praji Reinhardt Schneider z předsydstwa spěchowanskeho towarstwa Domu Zejlerja a Smolerja wo nowej wosebitej wustajeńcy „150 lět železnica we Łazu“. Jutře, pjatk, přehladku we 18 hodź. wotewru.

„Podłu železniskeje čary Wojerecy – Kohlfurt so lětsa stajnje zaso na jeje nastaće před 150 lětami dopomina“, praji Reinhardt Schneider. Mjez druhim přewjedźechu we Wojerecach dwórnišćowy swjedźeń. Nowa wustajeńca we Łazu swójske dopomnjenki přida, wšako běchu so tu kolijow dla stajnje zaso dróhi, puće a mosty změnili. Tež železnisku čaru su wjacore razy přepołožili.

Policija (12.10.23)

štwórtk, 12. oktobera 2023 spisane wot:

Wandalojo zachadźeli

Njeswačidło. Po wšěm zdaću bjez rozuma su wandalojo minjene dny w parku Njeswačanskeho hrodu zachadźeli a kóncowali. Tam powalichu woni pěskowcowu figuru z jedneje ze studnjow. Při tym so figura chětro wobškodźi. To pak nje­znatym njedosahaše, přetož woni tež hišće škleńcu durjow bliskeho hrodu rozbichu. Dohromady nasta tak něhdźe 5 200 eurow škody.

Móžnosće dźěła pola BKA

štwórtk, 12. oktobera 2023 spisane wot:

Budyšin. Informaciske zarjadowanje zwjazkoweho kriminalneho zarjada (BKA) wotměje so štwórtk, 19. oktobra, wot 16.30 do 18 hodź. w powołanskim informaciskim centrumje Budyskeje agentury za dźěło. Karjerowy poradźowar předstaji móžnosće wukubłanja a wuwića za šulskich wotchadnikow, studijnych absolwentow a fachowcow. Zajimcy móža so darmotnje wobdźělić, a to wosobinsce abo online. Při přizjewjenju pod telefonowym čisłom 03591/ 661 410 abo e-mailnje pod měli woni zdźělić, w kotrej formje so wobdźěla.

Hdyž zwěrjenc wotući

Wojerecy. Při wosebitym wodźenju po Wojerowskim zwěrjencu móža zajimcy njedźelu, 15. oktobra, wot 8 hodź. wobkedźbować, kak zwěrjenc wotući. Zwěrjencowa pedagogowka Silke Kühn wobdźělnikam přeradźi, što so w zwěrjencu stawa, prjedy hač prěni wopytowarjo přichadźeja, kotre zwěrjata jako prěnje swoju snědań dóstawaja a štó nowy dźeń wobstajnje zaspi.

Zakónčaca jězba do Berlina

štwórtk, 12. oktobera 2023 spisane wot:

Wotchadna jězba wjedźeše nas šulerjow 10. lětnika Ralbičanskeje wyšeje šule hišće do nazymskich prózdnin do Berlina. Ze swojimaj wučerjomaj Christinu Hajnowej a Mathiasom Klimankom dojědźechmy sej k Aleksandrowemu naměstu a wottam z tramwajku k hostelej. Bórze na to podachmy so pod zemju němskeje stolicy, mjenujcy do tak mjenowaneho Fichtoweho bunkera. Tam tójšto wo druhej swětowej wójnje a wo powójnskim času zhonichmy.

Po dołhej fazy suchoty je dešćik minjenych dnjow přirodu hišće raz trochu wožiwił, tak zo wšelake barby zaso čerstwiše skutkuja hač do toho. Tónle začišć na přikład maš, hdyž ze Smjerdźaceje do směra na Róžant jědźeš. Hišće lěpje je, hdyž pozastanješ a wobraz na sebje skutkować daš. Foto: Hanka Šěnec

Krótkopowěsće (12.10.23)

štwórtk, 12. oktobera 2023 spisane wot:

Wjesnjanostu rozžohnowali

Židźino. Dietmar Koark (CDU), bu srjedu w Židźinom po 33 lětach zastojnstwa jako wjesnjanosta gmejny Halštrowska hola rozžohnowany. Wón běše najdlěje amtěrowacy wjesnjanosta Budyskeho wokrjesa. Wobstajnje je so wón za serbske naležnosće w gmejnje zasadźował. Tak zaruči wón serbsku skupinu w Židźinskej pěstowarni, kotraž je w nošerstwje gmejny. Jeho naslědnica je Antje Gasterstädt (CDU).

Nachribjetnik zhubił?

Drježdźany. Sakska přewostaji komunam cyłoněmske software-rozrisanje za digitalny běrow namakankow. Za to je wona ramikowe zrěčenje ze awstriskim předewzaćom RUBICON podpisała. Wotnětka móža zajimowane komuny produkt „Nova Find“ wužiwać. Do pytanskeho systema su tež Němska železnica a dalše wobchadne zwjazki integrowane.

Prěni raz z premjeru we wukraju

Zahrodkarjam hladaja tuchwilu nazymske dźěła do rukow. Tak maja so hnězdźenske kašćiki rjedźić. W nich dyrbja žiwe parazity kaž ptače pchi, roztoče a klěšće, wotstronić, zo njebychu młodźata klětu nadměru wohrožene byli. Za rjedźenje pak njeměli sylne chemiske čisćenske abo samo desinfekciske srědki wužiwać. Dosaha, hnězdźenski kašćik dokładnje wumjesć.

Štóž ma zahrodowy haćik, měł jón před lisćom, wotemrětymi rostlinami a zmjerzkom škitać, zo by nalěto zaso jasnje a bjez algow k žiwjenju wotućił. Ryby dyrbja z basenkow, kotrež dosć hłuboke njejsu, přez zymu do akwarija přećahnyć. Bónčawy a druhe wódne rostliny, kotrež zmjerzk wohroža, wzmiće z haćika a dajće je w bowje z wodu na chłódnym, ale před zmjerzkom škitanym městnje přezymować. Samsne płaći wězo za hatnu klumpu, njeje-li wona znajmjeńša 80 centimetrow hłuboko we wodźe, móhła škodu poćerpjeć.

Serbska debata

nowostki LND