Wohenje wjace njedowolene
Budyšin (SN). Zjawnej městnje na promenadźe Budyskeho spjateho jězora, hdźež móža sej wopytowarjo wohenčk zamiškrić abo grilować, njehodźa so wotnětka hižo za to wužiwać. Na to skedźbnja wobdźělenska a wobhospodarjenska towaršnosć a reaguje tak na wobstajnu suchotu, z kotrejž je wulki strach lěsnych wohenjow zwjazany. Hinak hač dotal na woběmaj městnomaj tež hižo žane palne drjewo njepřewostajeja.
W tym zwisku skedźbnjeja wuraznje na to, zo stej wotewrjeny woheń a grilowanje zwonka woznamjenjeneju městnow tak a tak zakazanej. To njepłaći jeno za přibrjóžnu promenadu, ale předewšěm tež za teren mjez Strowotnej studnju a stanowanišćom. Tam je strach wohenja hišće wo wjele wjetši, dokelž su w bjezposrědnej bliskosći wulke płoniny lěsa. Stražna słužba při Budyskim spjatym jězoru přichodne dny na dodźerženje předpisow wosebje dźiwa, na přeńdźenja skedźbnja a ewentualne naprawy zahaji, kaž měšćanske zarjadnistwo zdźěla.
Zelena swěca za Nowy Miłoraz
Gmejnska rada Slepoho zrěčenju z LEAG za nowe sydlišćo přihłosowała
Slepo (AK/SN). Nowy Miłoraz ma na sewjernej kromje Slepoho při Dźěwinskim puću hač do kónca lěta 2024 nastać. Tomu je so Slepjanska gmejnska rada na zhromadźiznje wutoru znowa wuznała. Na přidatnje zwołanym posedźenju su radźićeljo zrěčenju za wotkryće bydlenskeje štwórće přihłosowali.
„Nadźijamy so, zo móža spočatk awgusta dźěłać započeć“, podšmórny wjesnjanosta Reinhard Bork (CDU). Do toho dyrbja přepytowanja za archeologiskimi zajimawostkami a tajke za móžnej starej municiju w zemi wotzamknyć. W zrěčenju su jednotliwe wobłuki wotkryća štwórće zapisane, mjez druhim za pitnu wodu, wopłóčki, milinu, internet, płun a nadróžne wobswětlenje. Slepjanska gmejna so zawjazuje, za Nowy Miłoraz nastate komunalne připrawy přewzać a je wobhospodarić. „Najpozdźišo hač do 31. decembra 2024 maja wšitke dźěła hotowe być“, rjekny nawodnica hłowneho zarjada gmejny Marion Mudra.
Štwórć lětstotka samostatna była
Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo zetkawachu a rady pobjesadowachu. W našej lětnjej seriji na něhdyše wjesne wobchody dopominamy.
Dźensa: Koćina (4)
Hižo někotre lěta po Druhej swětowej wójnje mějachu w Koćinje mału konsumowu předawarnju, zaměstnjenu w starym młynje. Tola bórze bě jasne, zo tamniše wuměnjenja za zastaranje wsy z nimale 200 wobydlerjemi njedosahachu. Rozsudźichu so tuž po dorěčenju z wobsedźerjom wjesneje korčmy, předawarnju přepołožić. Předawarka bě tam Trudla Kubowa, kotraž je so wobstajnje wo časowym poměram wotpowědowace zastaranje wobydlerjow ze žiwidłami w dosahacej měrje starała.
Spočatk lětnich prózdnin su na wjacorych městnach nowe ...
Awtor zajimawych přinoškow
Krótkopowěsće (11.07.19)
Wo šansy strukturneje změny šło
Wochozy. Strukturna změna tworješe žro wčerawšeho wopyta zamołwiteho Zwjazka za turizm Thomasa Bareißa we Wochožanskim parku błudźenkow. Wona měła so direktnje na dobro wobydlerjow wuskutkować, sej Bareiß žadaše. Wčera we Wochozach je wón tež ze zastupnikami sakskeje statneje kenclije a hospodarskeho ministerstwa šansy a ćeže strukturneje změny rozjimał.
Wjeršk nabožnych dnjow dožiwili
Róžant. Z putnikowanjom do Róžanta dožiwi lětuši nabožny tydźeń serbskich wosadow wčera swój wjeršk. Dopołdnišim kemšam přizamkny so zhromadny wobjed, a putnicy mějachu na łuce za Božim domom wšelaku zaběru. Z nyšporom so dźěćace putnikowanje zakónči. Lětsa je telko dźěći na nabožnych dnjach wobdźělenych kaž hišće ženje. Jeničce w Chrósćicach je jich 170.
Za mišterstwa kwalifikowanej
Kačka čo. 28 na Sprjewicy najspěšniša była
Bórkhamor (JoS/SN). Wjesnych swjedźenjow w gmejnje Halštrowska Hola hižo telko njeje. 600 lět Sprjejcy bě wuwzaće, w Bórku su jón před lětomaj wozrodźili a w Nowym Měsće maja kóžde druhe lěto zeleny lěsny swjedźeń hajnikow. Bórkhamorski wjesny swjedźeń je tuž trochu wusahowacy, dokelž tam infrastruktura derje funguje a wšitcy za jedyn postronk ćahnu. Kaž čłonka předsydstwa wjesneho kluba Olivia Böttcher powěda, su młodźinski klub zestarjenja dla rozpušćili a jón do wjesneho kluba integrowali. Tež hewak so mnozy za wjesny swjedźeń kaž tohorunja za zetkanje motorskich angažuja.
Prěni wjeršk Bórkhamorskeho wjesneho swjedźenja minjeny kónc tydźenja bě hižo pjatk wubědźowanje wohnjowych woborow wo pokal Jantaroweho jězora. Třinaće mustwow z cyłeje Łužicy bě so za to přizjewiło. Kameradojo z Lubowa (Lauba) pola Wopakeje (Oppach) docpěchu z 22,91 sekundami nowy čarowy rekord. Za prěnje městno w cyłkownym hódnoćenju pak to přiwšěm njedosahaše. Pokal wotwjezechu sej na kóncu wobornicy z delnich Sulšec před swojimi kolegami z Lubowa a tymi z Trjebina.
Woblubowany hač do Čěskeje
Lětuša turistiska sezona při Bjerwałdskim jězoru derje zaběžała
Hamor (AK/SN). Turistiska sezona 2019 při Bjerwałdskim jězoru, najwjetšim Sakskeje, je derje zaběžała. Tole podšmórny Hamorski wjesnjanosta Achim Junker (CDU) na póndźelnym posedźenju gmejnskeje rady. „Hladajo na dotal předležace ličby aktualneje sezony směmy so noweho wopytowarskeho rekorda nadźijeć. To pak budźe wězo wot wjedra a wot ličby hóstnych łožow w přichodnych tydźenjach wotwisować“, Junker rjekny. Po nazhonjenjach minjenych lět su hotele, pensije a dowolowe bydlenja na teritoriju gmejny w juliju a awgusće wuknihowane. Přenocowanske kapacity drje přiběraja, hłownje pak w tym wobłuku, kotryž w statistisce njeliča, mjenujcy hdyž jedna so wo mjenje hač dźesać łožow. „Tež w gastronomiskim wobłuku zwěsćamy stagnaciju, štož zwisuje hłownje z pobrachowacym personalom.“
Policija (10.07.19)
Woheń škodu načinił
Ptačecy. Z dotal njeznateje přičiny je so póndźelu na ležownosći w Ptačecach (Tätzschwitz) w gmejnje Halštrowska Hola žiwy płót palił. Wulkeje suchoty dla přeskočichu płomjenja na susodnu garažu, na kontejner a tohorunja na blisku kólnju. Dohromady nasta něhdźe 50 000 eurow škody, rěka w policajskej rozprawje. Kriminalna policija přepytuje nětko podhlada zapalerstwa dla.
