Miłoćicy (aha/SN). Před 40 lětami su młodostni w Miłoćicach posledni raz meju stajili a mjetali. Mnozy to tehdy wobžarowachu. Po politiskim přewróće załožichu 1995 Towarstwo Miłočanska žaba, kotrehož předsyda je wot toho časa Marko Kowar. Pěstować a hajić zdźěla hižo pozabyte tradicije a nałožki, mjez druhim tež rjany mejski, bě towarstwu wažne. Tak su hnydom w lěće po załoženju zaso wosrjedź wsy meju stajili.

Lětsa bě to nětko 24. raz, zo mejemjetanje z rjanym swjedźenjom zwjazachu. Najprjedy pak je minjenu srjedu wulki dźěl 66 čłonow towarstwa swojemu předsydźe k šěsćdźesaćinam gratulował, zwjazujo to z dźakom za jeho wjelelětne dźěło na dobro wsy. Čłonka předsydstwa Hanka Šwejdźina, kotraž je hižo wjacore lěta za cyłkowny wotběh mejemjetanja zamołwita, bě přewšo spokojom. Prěni raz běchu wšitke holcy w narodnej drasće, a z dźěćimi, samo předšulskimi, mějachu tam dohromady 14 porow. Njedźelu do toho bě wona z młodostnymi a dźěćimi­ wjacore rejki nazwučowała, kotrež wšitcy derje předstajichu.

Štyri wosoby so zranili

Bórk. Dokelž bě předwčerawšim popoł­dnju na zwjazkowej dróze B 156 w Bórku wojerska kolona do směra na awtodróhu A 4 po puću, dyrbjachu na napřećiwnej jězdni wjacore awta zastać. 68lětna wodźerka Audija pak to přepozdźe pytny a zrazy­ do awta před njej, kotrež storči do dalšeju jězdźidłow. Při tym so štyri wosoby zranichu. Škoda wučinja 30 000 eurow.

Ratarski pospyt w hornjołužiskim biosferowym rezerwaće

Stróža (SN). Na modelowym polu blisko Stróže w Malešanskej gmejnje kćěje nětko­ na płoninje něhdźe třoch hektarow prěni raz družina nazymskeho maka z mjenom Zeno Morphex. To zdźěla zarjadnistwo biosferoweho rezerwata Hornjołužiska hola a haty. „Mak plahować pak njeje tak bjeze wšeho dowolene. Najprjedy dyrbjachmy wotpowědnu próstwu zwjazkowemu institutej za lěki a medicinske produkty w Bonnje zapodać“, rozprawja sobudźěłaćerka zarjadnistwa biosferoweho rezerwata Eva Lehmann. W Stróži wužiwana družina maka ma pak jeno snadny podźěl morfina a je tuž dowolena. Zakazane su porno tomu wšitke te družiny maka, z kotrychž hodźi so opium dobywać.

Hory (UH/SN). Při najrjeńšim słónčnym wjedrje a z wulkim wjeselom wšitkich wobdźělenych skónči so wčera 13. cyłoněmske zetkanje městow a wsow z mjenom Hory na Horach w gmejnje Halštrowska Hola. Po wšej Němskej je wosom městow a gmejnow kaž tež dalšich 17 wjesnych dźělow z tymle mjenom. Za tajki fenomen dyrbiš so bliže zajimować, myslachu sej iniciatorojo a organizowachu 1995 prěnje tajke zetkanje, kotrež so stajnje na podlěšenym kóncu tydźenja po Božim spěću w dwulětnym rytmusu wotměwa. „Kóžde zetkanje dopokazuje, zo bě tale ideja złoto hódna“, wuzběhny wjesnjanosta Halštrowskeje Hole Dietmar Koark (CDU), kiž sam na Horach bydli, minjeny štwórtk na witanju.