Seniorojo SŠT we Wittenbergu a wokolinje pobyli
Hdyž budźe klětu w januaru Serbske šulske towarstwo na 25. róčnicu swojeho załoženja zhladować, budźe wone zdobom wuspěšnu bilancu swojeje dźěławosće předpołožić móc. K tutej bilancy su w tymle času tež seniorojo towarstwa přinošowali, mjez druhim ze swojimi kubłanskimi jězbami. Na lětušu štyridnjowsku jězbu su so seniorojo spočatk meje z busom Poldrackec wozydłownistwa podali. Prěni zaměr běše wopyt Ferropolisa, města ze železa, štož wězo wšitkich wćipnych sčini.
Na slědach Paula Gerhardta
W lětach mjez 1957 a 1991 běše blisko města Gräfenhainichen wulka wotkryta wuhlowa jama, wažna za energijowe hospodarstwo NDR. Po skónčenju dobywanja wuhla zrodźi so myslička, teren wužiwać jako industrijowy muzej. Zdobom ma Ferropolis jedne z najwjetšich open-air-jewišćow srjedźneje Němskeje.
