Załožba namołwja wotpowědne próstwy stajić
Budyšin (SN/CoR). Nowy předsyda rady Załožby za serbski lud Jan Budar připowědźa w swojim prěnim postrownym słowje na internetnej stronje załožby hnydom rewolucionarny akt: „Zo móhli so projekty zwonka serbskeho sydlenskeho ruma podpěrować, maja so spěchowanske směrnicy, kotrež to dotal jenož we wobmjezowanej měrje dowoleja, předźěłać.“ Pozadk toho je, zo bydli mjeztym wjele młodych ludźi a swójbow dźěła dla we wjetšich městach Němskeje, kaž w Drježdźanach, Lipsku abo Berlinje. Zo njebychu so wotcuzbnili, móhli tež zwonka Łužicy serbsku rěč hajić a serbsku kulturu pěstować. Tajke składnosće chce załožba wotnětka aktiwnje podpěrać.