Na Měrćina Nowaka-Njechorńskeho 25 lět po smjerći čile spominali

Njechorń (CRM/SN). Tři rowy porno sebi ze samsnymi markantnymi pomnikami na kěrchowje w Hrodźišku wopytowarjej hnydom napadnu. Srjedźa je moler Serbow a wjelestronski kulturnik Měrćin-Nowak-Njechorński pochowany, poboku je row jeho mandźelskeje Marty a na tamnej stronje je jeho mać pochowana. Sobotu rano běchu swěrni jeho česćowarjo jemu na row stajili pisany kwěćel z domjaceje zahrodki – kwětki, kotrež wón wosebje lubowaše.

25 lět po smjerći akademiskeho molerja a nic naposledk pilneho spisowaćela a redaktora, kiž je ze złotymi pismikami do serbskich kulturnych stawiznow zapisany, staji sej předsydstwo župy „Jan Arnošt­ Smoler“ Budyšin nadawk, jeho žiwjenje a skutkowanje zaso bóle do pomjatka zwołać. Tak přeprošowaše zawčerawšim přez cyły dźeń hosći do jeho domu, kotryž je nětko po jeho woli muzej. Běše dźě wón Domowinu za swojeho hłowneho namrěwca zasadźił. Stary historiski dom z ateljejom bu restawrowany a je wot lěta 1999 derje wuhotowany a nimo toho zawěrno awtentiski muzej.