Budyšin (kl/SN). Lětuša kubłanska jězba župy „Jan Arnošt Smoler“ powjedźe 26. septembra do Drježdźan. Župne předsydstwo je na swojim wčerawšim posedźenju w Budyšinje mjez skupinarjemi woblubowane zarjadowanje dopřihotowało. Z 55 přizjewjenjemi je wuprawa lětsa dospołnje wuknihowana. Mjez druhim chcedźa w krajnej stolicy towarstwo Stup dale wopytać a tam wjace wo aktiwitach a prócowanjach Serbow zwonka jich sydlenskeho ruma zhonić.

Nastupajo našu maćeršćinu chce župne předsydstwo za rěčny kurs serbšćiny za dorosćenych, kotryž zarjaduje Rěčny centrum WITAJ wot srjedź septembra w Malešecach, intensiwnje wabić. Wot lěta 1999 do 2011 mějachu tam posledni tajki kurs. Wón je wosebje za staršich, kotřiž sćelu swoje dźěći do tamnišeje Witaj-pěstowarnje. Gmejna přewostaja za to rumnosće w Malešanskej wyšej šuli. Zajimcy móža so hišće přizjewić pod tel. čo. 03591/550400. Serbšćina ma so we wokolinje pěstowarnje dale hajić.